ROMANOS 4 - Mam of Todos Santos -- Guatemala Unicode

Jun yecꞌbil te ke tuꞌn Abraham

1Cykꞌoꞌnc cycꞌuꞌja tiꞌj Abraham, jxin tneel cyiyꞌjil judío. ¿Ti tten tel jiquen twitz Dios?

2Nuket e xiꞌxin jiquen twitz Dios tuꞌnj baꞌn tbinchbenxin e bint tuꞌnxin, atettzele toclenxin tuꞌn e jaw tnimsan tiibxin. Pero tuj twitz Dios, el Abraham baꞌn yaaꞌn tuꞌnj baꞌn e tbinchaxin.

3Cꞌoquel cycꞌuꞌja tiꞌj ti toc tuꞌn tyol Dios. Tz̈i cyjulu: “Oc ke tcꞌuꞌj Abraham tiꞌ Dios. Juꞌ tzunj e tzaj kꞌoꞌn te Abraham tuꞌn jiquen taꞌ twitz Dios,” tz̈i tyol Dios tuꞌn t-xiꞌ tyeecꞌan jiquen e tema Abraham twitz Dios yaaꞌn tuꞌnj jun baꞌn e bint tuꞌnxin, sino nuk tuꞌnj t-xtalbil Dios.

4N-eltzen kniyꞌ tiꞌj oj nakꞌanan jun xjal, bixsen ntzaj tkꞌoꞌn taaw akꞌuntl pwak te. Yaaꞌn tcotz ntzaj kꞌoꞌn, sino twiꞌ tcꞌuꞌjxin, cuma otk tzꞌakꞌananxin.

5Ja tzunj xjal min tzꞌakꞌanan, bix ka ntzaj kꞌoꞌn pwak te, yaaꞌn twiꞌ tcꞌuꞌj, sino nuk tcotz. Tiꞌj ja techel lu qꞌuelel kniyꞌ tiꞌj ka n-oc ke tcꞌuꞌj jun aj il tiꞌ Dios, ctkꞌaꞌ Dios xtalbil te, yaaꞌn twiꞌ tcꞌuꞌj. Bix ja xtalbil lu, jaj tuꞌn toc jiquen twitz Dios.

6Juꞌx e tkba David ootxa at t-xtalbil Dios tibaj jun xjal yaaꞌn tuꞌnj baꞌn tbinchben e bint tuꞌn, sino tuꞌnj ntzaj kꞌoꞌn te tuꞌn jiquen taꞌ twitz Dios. Tz̈i David cyjulu:

7“Kej xjal o najset cyil, ejeeꞌtzen xjalja at t-xtalbil Dios cyibaj.

8Kej xjal o chi binchan il pero ya mintl chi ul tuj tcꞌuꞌj Kaaw, ejeeꞌtzen xjalja at t-xtalbil Dios cyibaj,” tz̈i David.

9Kape tuj cywitz juun xjal ctkꞌaꞌ Dios ja xtalbil lu nuk te cyej xjal ncpet cychuꞌl te techel t-xjal Dioske, bix min ma takꞌ te cyej yaaꞌn kꞌiꞌn jtechel lu cyuꞌn. Pero yaaꞌn juꞌwa. Tz̈i tyol Dios cyjulu: “Tuꞌnj tocslabl Abraham tiꞌ Dios, e tzaj kꞌoꞌn texin tuꞌn jiquen taꞌxin twitz Dios,” tz̈i tyol Dios te yecꞌbil yaaꞌn tuꞌnj toc techel tiꞌ tchuꞌl.

10Cxeꞌl nkanena cyej xjal judío, ¿jtoo e tkba Dios jiquen taꞌ Abraham twitzxin? ¿Otkpa bint tuꞌn tcpet Abraham tej ttzaj tkbaꞌn Dios jiquen taꞌ Abraham twitz Dios, ma mitknaꞌx? Mitknaꞌx. Juꞌ tzunj qꞌuelel kniyꞌ tiꞌj yaaꞌn tuꞌnj tej tcpet tchuꞌlxin e tkba Dios baꞌnxin twitz Dios.

11Mas yaj e tkba Dios tuꞌn toc tkꞌoꞌnxin jun cꞌupbil tiꞌ tchuꞌlxin tetzen techel jiquentzen taꞌxin tuꞌnj tocslablxin tiꞌ Dios. Cꞌoquel kcꞌuꞌj tiꞌj mitknaꞌx toc techel tiꞌ Abraham tej tkbante Dios jiquen taꞌxin twitz Dios. Juꞌtzen e baj tnincꞌuꞌn Dios tiꞌj, tuꞌntzen toc Abraham te mambaj te cykilca kej xjal yaaꞌn judío at tuꞌn toc ke cycꞌuꞌj tiꞌ Dios mas yaj amale minttiiꞌ techel toc cyiꞌj, tuꞌntzen jax juꞌx cye tuꞌn cyocslabl chi oquel jiquen twitz Dios tisen te Abraham.

12Ja tzunkej xjal judío, kej xjal e cpet cychuꞌl te techel t-xjal Dioske, jax juꞌx o cub tnincꞌuꞌn Dios tiꞌj tuꞌn toc Abraham te cyxeꞌchel, cuma jaxin tneel xjal kꞌilte ja techel lu. Pero jaxin cyxeꞌchel nuk oꞌcx ka n-oc ke cycꞌuꞌj tiꞌ Dios tisen e bint tuꞌn Abraham tej mitknaꞌx toc techel tiꞌjxin.

Tuꞌnj oc ke tcꞌuꞌj Abraham tiꞌ tyol Dios o tcama jun tkab

13Qꞌueleltzen kniyꞌ tiꞌj oc Abraham jiquen twitz Dios nuk tuꞌnj oc ke tcꞌuꞌjxin tiꞌj ti e tkba Dios texin. Juꞌtzen e cyjaꞌ tkbaꞌn Dios jun cykab te Abraham bix cye ke tchmanxin. E tkba Dios tuꞌn tcyaj tkꞌoꞌn texin entera twitz txꞌotxꞌ, yaaꞌn tuꞌnj e nimanxin tiꞌ ley, sino tuꞌnj e tenxin jiquen twitz Dios tuꞌnj tocslablxin tiꞌj Dios.

14Nuket chi camal xjal jcykab tzin tkꞌoꞌn Dios nuk oꞌcx tuꞌnj cyniman ley, mintzeletiiꞌ il tiꞌj tuꞌn toc ke kcꞌuꞌj tiꞌj e tkba Dios, bix nuktzele tajxtl Dios e cyaj tkbaꞌn tyol te Abraham bix cye ke tchman.

15Kej xjal n-oc cyipen tuꞌn cyniman tley Dios tuꞌn cycaman t-xtalbil Dios, mlay cyiikꞌ t-xtalbil Dios, sino ccyiikꞌelcye oꞌcx tkꞌoj Dios, cuma mi nuk jun xjal nniman entera ley. Oꞌcx nuket minttiiꞌ ley baꞌntzele cyten xjal tuꞌn miꞌn tzꞌel cyxooꞌn ley.

16Juꞌtzen qꞌuelela kniyꞌ tiꞌj yaaꞌn tuꞌnj nko niman tiꞌ ley ko kabel tuꞌn Dios, sino nuk tuꞌn kocslabl tiꞌ Dios. Bix cuma nuk tuꞌnj kocslabl, juꞌ tzunj ktzkiꞌn jkkab tzin tkꞌoꞌn Dios yaaꞌn twiꞌ kcꞌuꞌj, sino kcotz. Nuket nko ayon tiꞌj twiꞌ kcꞌuꞌj tuꞌnj oc kniman tley Dios, mlay kcaman, pero ka nko ayon tiꞌj kcotz e cyaj tkbaꞌn Dios tuꞌn tkꞌonte, il tiꞌj tuꞌn kiikꞌente. Bix jkkab lu ctkꞌaꞌ Dios te cykilca kej xjal nchi binchan j-e bint tuꞌn Abraham, tisencꞌa tchman Abraham. Ctkꞌaꞌ Dios yaaꞌn nuk cyej xjal judío e cyiikꞌ tley Moisés, sino jax juꞌx cyekej xjal yaaꞌn judío, cykilca kej xjal n-oc ke cycꞌuꞌj tiꞌ Dios tisen e bint tuꞌn Abraham. Jaxin t-xeꞌchel te cykilcaj n-oc ke tcꞌuꞌj tiꞌ Dios.

17Tz̈i Dios te Abraham cyjulu: “Ma cyaj nkꞌoꞌna te tey tuꞌn toca te t-xeꞌchel te nimcꞌa wik xjal” tz̈i Dios tuj tyol Dios. Amale minttiiꞌ tcwal Abraham otk tzꞌitzꞌj, pero tuj twitz Dios ya otk tzꞌoc Abraham te t-xeꞌchel te nimcꞌa wik xjal. Bix oc ke tcꞌuꞌj Abraham tiꞌj e tkba Dios texin, cuma el tniyꞌxin tiꞌj baꞌn tuꞌn Dios tuꞌn tkꞌonte tipemal te jun xjal tijtl tisencꞌa cyimne, bix baꞌn tuꞌn Dios tuꞌn toc tcyeꞌyen jminaꞌx tbaj bix baꞌn tuꞌnxin tuꞌn tyolen tiꞌj jminaꞌx tbaj tisencꞌa otk baj tilel.

18Juꞌ tzunj ayon Abraham tiꞌj e cyaj tkbaꞌn Dios, amale tujet cywitz xjal mlay bint. El jax tuj twitzxin tuꞌn tocxin te t-xeꞌchel te nimcꞌa wik xjal, cuma otk tkba Dios texin cyjulu: “Nimxsen tajlal tiyꞌjila qꞌuitzꞌjel,” tz̈i Dios.

19El tniyꞌ Abraham tiꞌj minxtiiꞌ titzꞌjel jun tcwalxin, cuma chꞌixcꞌa yaaꞌn jun syent jnabkꞌi ttyemxin, bix el tniyꞌxin tiꞌj jax juꞌx t-xuꞌlxin mlayx tuꞌn talenxuj. Pero tocslablxin tiꞌ Dios min e cub baj.

20Nukx nayonxin tiꞌj tcwalxin otk cyaj tkbaꞌn Dios texin, bix e cywixxin mas tuj tocslablxin, bix e jaw tnimsaꞌnxin tbi Dios.

21Tuya cykil tcꞌuꞌjxin oc ke tcꞌuꞌjxin tiꞌ Dios tuꞌn tbint j-otk cyaj tkbaꞌn Dios texin.

22Tiꞌj tzunj lu e tkba Dios jiquen taꞌxin twitz Dios.

23Entonces n-el kniyꞌ tiꞌj nuk tuꞌnj tocslabl Abraham oc Abraham jiquen twitz Dios. Ja yol lu yaaꞌn nuk tiꞌjxin nyolene,

24sino jax juꞌx nyolen kiꞌj. Jax juꞌx koꞌ, jiquen etoꞌ twitz Dios, cuma jax juꞌx o tzꞌoc ke kcꞌuꞌj tiꞌj Dios e jaw titzꞌjsaꞌn Kaaw Jesús juntl maj tuj cyamecy.

25E tzaj tkꞌoꞌn Dios Kaaw Jesús tuꞌn tbyet tuꞌn kil, bix e jaw titzꞌjsaꞌn Dios jaxin juntl maj tuj cyamecy cuma otk bint tuꞌnxin tuꞌn koc jiquen twitz Dios.