LOS HECHOS 24 - Mam of Todos Santos -- Guatemala Unicode

Tej tyole Pablo tuꞌn tcoꞌpan tiib twitz gobernador Félix

1Jweꞌtltzen kꞌij mas yaj, bix e xiꞌ Ananías, cycawel pala tuj Jerusalén, tuꞌn tponxin tuj tnom te Cesarea, cymojba cyiibxin tuya cabtlxin cawel cyxol judío, bix junxin licenciado Tertulo tbixin. Cykilca tzun kej xina e pon twitz cawel te kꞌolcꞌa til Pablo.

2Tejtzen cyponxin, bix e tzaj kꞌit Pablo twitz cawel gobernador. Cykiltzen otk bint tten, bix akꞌ Tertulo te kꞌolcꞌa til Pablo. Tz̈i tzunxin te gobernador Felix:

—Taat gobernador, chjonte tey keya ejooꞌya judío tzinxsen knaꞌnke ttz̈yal bix jtbanela, bix xsun xobl keya yasbil keya xmucchabl keya ma tzꞌajtz lkꞌeete. Cykil tzunja ma bint tuꞌn t-xjalela.

3Nukxsen jaqꞌuey Felix, jaaꞌxja tiꞌj ktzkiꞌnke ma bintke tten kchunkꞌlala tuꞌna, bix nimke chjonte tzin kkꞌoꞌna tiꞌj.

4Pero nuksama, ncyꞌi tzꞌel wiiꞌn nim ttyema. Nuk waj txiꞌ nkanena te t-xjalela tuꞌn ttzaj tkꞌoꞌna tanema jun rato te ebilecte kajbela.

5Jatzen kajbela ja lu. Ja tzunj xin xjal lu Pablo, junxsen ilbelalke kxola. Nuk cocꞌcꞌa nx-ajte cyxol xjal judío tuj cykil twitz txꞌotxꞌ te itzꞌjsalwe kꞌoj cyuya tyol. N-ocx tkꞌon tiib tuj keya tajbelel kxola. Mintiiꞌte toclen tiꞌj. Bix at jun cloj xjal Nazareno cybi nchi oc kꞌojl tiꞌ cycostumbre xjal judío, bix ja tzunj xin Pablo nintzajxin cyxolj xjala.

6Bix juntl. Taj tzaj tiiꞌn xjal yaaꞌn judío keya tuj xjan tja Kdiosa. Keya te ke, junxsen maj kaꞌ. Juꞌ tzunj e tzyeta kuꞌna tuꞌn tcub tuj castiwa tisen tzin tkbaꞌn cyley judío.

7Pero bix e pon jxin comandante, Lisias, te kꞌolecx tiib cyuya soldado te kꞌilbetz texin.

8Bixsen e tkba keya laꞌ alj at tkꞌoj tiꞌ Pablo, tuꞌntzen ktzaja twitza, tuꞌntzen jaqꞌuey tzꞌoc ebinte. Kanextlpey tewa. Sictzen baꞌn tel tniꞌya tiꞌj ka jaxj nxiꞌ kkbaꞌna tey―tz̈i Tertulo, jxin licenciado, tej xin gobernador Felix.

9Jaan tzunj cabtlxin judío tcub, oc kꞌonte tipemal tyol Tertulo ka cykilj otk tkbaꞌnxin jax.

10Entonces bix oc tchꞌiquen gobernador ja Pablo tuꞌn tcoꞌpante tiibxin, bix e yolen Pablo cyjulu:

—Taat gobernador, we ntzkiꞌnwe nimxsen jnabkꞌi takꞌlena cawel kibaja ejooꞌya judío. Bix ya ttzkiꞌntla ti tten tuꞌn toc tbiꞌna kajbela. Juꞌ tzunj kꞌukbaj cꞌuꞌlxix ma chin akꞌ coꞌpl wiib twitza.

11Nukxix cablajaj kꞌij wexlen tuj ja tnom lu tuꞌn npon tuj Jerusalén te naꞌl Dios. Baꞌntzen tel naj tey tniyꞌ tiꞌj maaꞌtkxix nchin pon.

12Tuj tzunj cab kꞌija, mintiiꞌwa ma cub nbinchen, mitetpe tuj nin tja Dios, bix mitetpe cyuj camon jaaꞌ te xnakꞌtzabl tyol Dios, mitetpe jaaꞌ tumel tuj tnom, min jaaꞌ ẍin jawa cnetwe tzint nchin kꞌojl, matitet tkaꞌyel ncub nbinchen.

13Juꞌ tzunj, mlay bint tcub cykꞌoꞌn jxjal lu tiꞌ wil cye.

14Pero attzen jun yol jaxxix, bix baꞌntzen nkꞌonte wiib tiꞌj. Tiꞌj cloj aj Nazareno, min, yaaꞌn in tincwe cyuya. Pero tej cloj Tbe Jesús tbi, jatztzen in tinca weya. Jatzenwe be jlepch ken tiꞌj. Yal tzun kej xjal lu, tuj cywitz nuk ten, pero jaxxix. Jatzente bej npon tuya Dios, jax Dios cye xjal ootxa, cuma junx maj baꞌn cyten tiꞌj ley cye judío. Cykil ke yecꞌl tbe Dios nejl e cyaj tzꞌiꞌbente at-xe tyem.

15Kej xjal eteꞌc twitza n-oc ke cycꞌuꞌj tiꞌ Dios, bix jax juꞌx weya. Ntzkiꞌnxixwe ti tten, bix jax juꞌx cyewe cytzkiꞌnxixcye ti tten, ka ko jawel itzꞌj cykil koꞌ oj kcyim, junelne ejeeꞌ loj n-oc ebinte tyol Dios, cyuyaxj min tzꞌoc cybiꞌn.

16Juꞌ tzunj nxaꞌ nbisenwe tiꞌj ti tten tuꞌn tten jun baꞌn nchunkꞌlal twitz Dios bix cywitz xjal, tuꞌntzen baꞌn nnaꞌnte cykil ncub bint wuꞌn.

17Bix tejtzen tel nim cab jnabkꞌi tuj juntl wik tnom, cwa npon tuj ntanem te onlcye mebe tuya pwak, bix te kꞌolxte jun cotz te Dios.

18Tuꞌn tzunj juꞌwa, otk chin ocxawe tuj nin tja Dios mintiiꞌwa ttz̈i wiꞌj. Otk baj ntxjoꞌn chꞌinwe wiib tisenx cye judío cycostumbre, bix otktzen chin ocxwe. In tincxsen tej ntzyet. Pero mintiiꞌwa tkaꞌyel ncub bint wuꞌn, bix mintiiꞌwa kꞌoj e jaw wiiꞌn cyxol xjal, cuma nuk cabwe xjal tcub wuya. Pero tuj xsunj juꞌwa, tocpan cab judío te Asia te nicꞌjaw yol wiꞌj.

19Tz̈itzenke ka otk tzꞌocx wiiꞌn xjal griego wuya tuj tja Dios. Pero yaaꞌn juꞌ tewa. Pero min-al kej xjal tzalu jaꞌlewe, amale ejeeꞌtlcye xjal baꞌn cyul tzalu tuꞌn tiwa wil cye, ka at cyaj we.

20Pero min-alke ma chi ul. Entonces yal tzun kej ma chi ula, e cykbantetzen ti jilel wil ma cub nbinchaꞌn bix ti jilel wil ma cykba cywitz nintzaj cyconsejo judío.

21Bix e jaw ns̈iꞌn jun yol tuꞌn tjaw itzꞌj jun cyyol cyxol. Juꞌtzen cyjulu: “Key taat ocsal, tej cyey cykꞌoj wiꞌj, ja tej ka tuj nwitza chi jawetz itzꞌj cykil cyimne juntl maj,” ntz̈i tzuna. Juꞌtzen toc wuꞌna tjaw ns̈iꞌna tej waꞌlcꞌa kena cyxol. Vaya tzunj, juꞌwa baꞌntzen toc cyniqꞌuena wiꞌj, cuma juꞌ toc wuꞌna. Pero te ja lu, mintiiꞌ mas baꞌn toc cyniqꞌuen jxjal lu wiꞌj―tz̈itzen Pablo twitz gobernador.

22Pero tejtzen toc cybiꞌnxin tyol Pablo tcoꞌpbil tiib, taj Felix e cyaj tkꞌoꞌn stis texa juntl kꞌij. Ttzkiꞌnxin ka at nim ocslal, bix ti tten cyocslabl. Entonces tz̈i tzunxin cyjulu:

—Cnyoꞌ ojxe tul comandante Lisias tzalu. Tzul tkbaꞌnxin we mas, bixsen cxeꞌl ncyeꞌyen ti cnbinche―tz̈itzen gobernador.

23Entonces bix e xiꞌ tkbaꞌn Felix tej xin capitán tuꞌn tocx tenx Pablo tuj tzeeꞌ, bix jax tuꞌnx ttzakpet-xin bix tuꞌn cyocx tzakpet ke tuyaxin te kꞌolbel texin, bix tuꞌn toc cyeꞌyet-xin. Yaltzen te Felix bix e xiꞌxin tuj juntl tnom.

24Exsen cab kꞌij. Attzen jun kꞌij bix aj meltzꞌaj jxin gobernador Felix tuj Cesarea. Bix e ponxin tuya t-xuꞌlxin Drusila, aj judíoxuj. Tejtzen tponxin, bix e xiꞌ tkꞌoꞌnxin txocbilte Pablo, tuꞌn cyyolenxin bix tuꞌn t-xiꞌ tkanenxin ti tten oj tocslan jun xjal tiꞌ Jesús.

25Entonces bix akꞌkexin yolel. Bix e yolen Pablo tiꞌj oj tcub tena jiquen twitz Dios, ti tten tuꞌn tcub ttzyun tiiba twitz tkaꞌyel, bix tiꞌj kꞌij tzul oj t-xiꞌ tcyeꞌyen Dios cykil twitz txꞌotxꞌ tuꞌn t-xiꞌ tcyeꞌyenxin ka baꞌn bix ka kaꞌ otk cub tbinchan jun xjal. Tejtzen toc tbiꞌn Felix juꞌwa, bix e tzaj ttz̈i tiꞌjxin, bix e xiꞌ tkbaꞌnxin te Pablo:

—Jaxle baꞌn tuꞌn taj meltzꞌaj tey jaꞌlewe. Ojtzen ttzaj amleꞌn wiꞌj, baꞌntzen ttzaj ntxcoꞌna juntl maj tuꞌn toc nbiꞌn tyola―tz̈i Felix te Pablo.

26Bix e xiꞌ tbisen Felix tiꞌj ka tuꞌn tocx tkꞌoꞌn Pablo pwak tcotzxin tuꞌn ttzakpet-xin. Juꞌ tzunj e cwaꞌ ttzyuꞌnxin Pablo. Min e tzakpixin. Attzen maj e txocxin Pablo te yolel tuyaxin.

27Pero mintiiꞌ e baj, bix ex caꞌba jnabkꞌi juꞌwa. Cwaxsen tocx t-xel Felix jxin Porcio Festo te gobernador, pero juꞌx jxin Festo minx e tzakpixin Pablo, cuma e tajbexin tuꞌn tocxin cyeca cyuya xjal judío. Juꞌ tzunj e cyjaꞌ tkꞌoꞌnxin Pablo tuj tzeeꞌ.