APOCALIPSIS 11 - Mam of Todos Santos -- Guatemala Unicode

Kej caꞌba tyolel Dios

1Bix e tzaj kꞌoꞌn weya jun ptzꞌunt te echquete, bix e tzaj kbet weya:

—Weyꞌtza, bix mlonxa tja Dios tuyax altar, bix ajlanxa jteꞌ xjal nchi naꞌn Dios tuj.

2Pero miꞌn cub tmloꞌna twitz peꞌn tiꞌjxe tja Dios, cuma o txiꞌ kꞌoꞌn cye jun wikxitl xjal yaaꞌn judío. Nuk pjel cywaꞌben jtnom xjan te cyaꞌwnak tuya caꞌba xjaw.

3Bix cxeꞌl nkꞌoꞌna wipemala cyej caꞌba nyolela, bix cxeꞌl cykꞌumen jnyola jun mil tuya caꞌba syent tuya oxcꞌal kꞌij. Bix toc cyxbalen te bisbajil―tz̈i Dios.

4Kej caꞌba tyolel Dios lu, jatzen kej caꞌba tzeeꞌ olivo bix kej caꞌba cantil waꞌlke twitz Taaw twitz txꞌotxꞌ.

5Ka at jun xjal taj tzꞌoc ipan cyiꞌj, qꞌueletz kꞌakꞌ tuj cytzi tuꞌn tcub tzꞌeyꞌ. Alcye kej xjal cyaj tzꞌoc ipan cyiꞌj, il tiꞌj chi cymel tuꞌn kꞌakꞌ n-etz tuj cytzi.

6At cyipemal caꞌba tyolel Dios lu tibaj twitz cyaꞌj tuꞌn miꞌn ttzaj jbal cyuj kꞌij nchi kꞌumen tyol Dios. Bix at cyipemal cyibaj nimaꞌ bix mar tuꞌn cyoc te tz̈iyꞌ, bix tuꞌn cyqꞌuixbisante twitz txꞌotxꞌ, bix tibaj cykilca xitbil, nuk jteꞌxja maj cyaj.

7Ojtzen tjapan baj cyaakꞌenj xin kbalte tyol Dios, jawel tzunjjil jil tuj jul mintiiꞌ tumel t-xeeꞌ. Kaꞌ xsunjil. Bix kꞌojleljil cyiꞌjxin. Bix cwel cyiꞌjxin tuꞌnjil, bix cwel tbyoꞌnjil ejeeꞌxin.

8Yaltzen cyxumlal cyimnewe, txꞌilchcꞌa cywitz xjal tuj jnintzaj tnom yaaꞌn baꞌn. Cynaabl xjal te ja tnom lu tisen cynaabl xjal te Sodoma bix te Egipto nejl, bix e cub cybyoꞌn Kaaw twitz cruz.

9Kej xjal te cykilca wik tiyꞌjil bix te cykilca wik xeꞌchel bix te cykilca wik yol bix te cykilca tnom, oc cycyeꞌyen tiꞌ cyxumlal kej e cyim oxe kꞌij tuya niyꞌjan. Min e cycuya tuꞌn cycuꞌx maket.

10Kej xjal te twitz txꞌotxꞌ chi tzalajel tiꞌj cycyamecyxin, bix chi iyꞌsal jun ninkꞌij tuꞌnj otk chi cyimxin. Cxeꞌl cykꞌoꞌn cotz cye cyuya te iyꞌsal ninkꞌij te cycyamecyxin, cuma kej caꞌba tyolel Dios lu nim otk chi yolen tiꞌj cyil xjal najl twitz txꞌotxꞌ.

11Pero oj tbaj oxe kꞌij tuya niyꞌjan, ctzaal tkꞌoꞌn Dios cyxewxin, bix chi jawel itzꞌjxin, bix nimxsen ctzaal cytz̈ixin cyiꞌj xjal n-oc cycyeꞌyen ejeeꞌxin.

12Bix cxeꞌl cybiꞌn caꞌba tyolel Dios jun cyiw tkꞌajkꞌajel ctzaal tuj cyaꞌj:

—Cyjatza tzalu―tz̈i tbel Dios. Bix chi jawex tuj cyaꞌj tuj jun muj, bix cꞌoquel cycyeꞌyen ke cyaj kꞌoj oj cyjax.

13Bix jaxj hora ctzaal jun nintzaj xcyaklajnab, bix tlajan tkiyꞌ tnom cwel xitj. Wuuk mil xjal chi cymel tuꞌnj xcyaklajnab. Jatzen kej niyꞌtl xjal, chi jawel seyꞌpaj, bix cxeꞌl cykbaꞌn at nim tipemal Dios tuj cyaꞌj.

14Tcab qꞌuixbisabl ma tziyꞌ. Pero at-x toxen qꞌuixbisabl tzul naj tibaj jlu.

Ti pjel oj tkꞌajt xux tuꞌn twuukan ángel

15Tejtzen toc t-xuxen twuukan ángel, e jaw jun cyiwxix tkꞌajkꞌajel cywiꞌ kej eteꞌ tuj cyaꞌj. E xiꞌ cykbaꞌn:

—Ma pon tumel tuꞌn cyoc kej tnom eteꞌ twitz txꞌotx tjakꞌ tcawbil Kman Dios bix tcawbil Jscyꞌoꞌn tuꞌnxin. Bix ccawel te junx maj―tz̈ike.

16Kej winakcyaja tij kꞌuklke tuj cykꞌukbil twitz Dios, e cub mutzkꞌajke twitz Dios, bix e jaw cynimsaꞌn jaxin.

17E xiꞌ cykbaꞌn:

—Cxeꞌl kkꞌoꞌna chjonte tey, Kman Dios. At tipemala tuꞌn tbint cykilca tuꞌna. Ata jaꞌlewe bix ma tena te junx maj. Cxeꞌl kkꞌoꞌna chjonte tey cuma ma tzꞌakꞌa cawel tuya nim tipemala.

18Nejl, e jaw cykꞌoj xjal tiꞌja, pero jaꞌlewe, ma pon tumel tuꞌn tjaw tkꞌoja cyiꞌj. Ma pon tumel tuꞌn ttzaj tkꞌoꞌna cycastiwa kej xjal ma chi cyim, bix tuꞌn ttzaj tkꞌoꞌna cotz cyej t-akꞌanala, bix kej tyolela, bix cykilca ocslal bix cykilca xjal nchi niman tbiy, jawnexleke, chꞌinleke. Bix ma pon tumel tuꞌna tuꞌn cyxiꞌ tuj il kej xjal e cybincha kaꞌ tiꞌj twitz txꞌotxꞌ―tz̈i ke tij.

19Bix e jket ttzi tja Dios tuj cyaꞌj, bix tuj tja Dios e chicꞌajax jcaxa jaaꞌ e cyjaꞌ tkꞌoꞌn Dios tyol cyuya xjal. E tzaj tken kꞌancyok tuyax nim s̈itz̈ꞌ tuyax kꞌancyok nrininin, tuyax jun xcyaklajnab tuya nim skbaken.