2 TIMOTEO 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo

1-2Timoteo ncwal, achena wuꞌn. Ntzꞌiꞌbex xsunja juntl uꞌj lu tey. Tzajxit cyxtalbil Kman Dios bix Kaaw Jesús tibaja, bix tzajxit kꞌaꞌben cycꞌuꞌjxin tiꞌja, bix tente tuj ttz̈yal.

Inayena Pablo, tyolel Jesús. Smaꞌn kena tuꞌn Dios te kbalte cye xjal ma cyaj tkꞌoꞌn Dios tyol alj ma tzꞌoc maje tchunkꞌlal tuya Jesús, Scyꞌoꞌn tuꞌn Dios, at tchunkꞌlal te junx maj.

Il tiꞌj tuꞌn kyolen tiꞌj Cristo cye xjal

3Ojtzen nchin yolen tuya Dios, tzin nchin ajbenwe texin tuya jun sak nnaabl, tisex ke te njaya ootxa e xiꞌ cynaꞌn cyexin Dios, nxiꞌ nkꞌoꞌnwe chjonte te Dios tiꞌja, bix nchin naꞌnwe Dios tiꞌja te kꞌijl bix te koniyan.

4Tzinx n-ul tuj ncꞌuꞌj tetz taꞌl twitza tej kbaj kꞌolben tuꞌn kpax. Wajxse tzꞌoc ncyeꞌyen naja juntl maj, tuꞌn njaw tzalaj.

5Tzinx n-ul tuj ncꞌuꞌj tiꞌj tey tanem kꞌiꞌn tuꞌna tiꞌ Dios. Tneelxix oc ten tanem tyaaꞌy Loida bixsen ttxuy Eunice. Ejeeꞌtzen xuj e ten cyanem tiꞌ Dios nejl, bix tzinen tuj nwitz ka juꞌx tey.

6Juꞌ tzunj we waj txiꞌ wokxenan tey tuꞌn tjaw titzꞌjsaꞌna jtipemala te cawel tuj tja Dios o tiikꞌa te Dios tej tcub nkꞌoꞌn nkꞌab tibaja tuꞌn toc tajwalela.

7Bincham taakꞌena tuya cykil tcꞌuꞌja, cuma o tzaj tkꞌoꞌnte Dios Espíritu Santo ke. Juꞌ tzunj yaaꞌn ilxixte tiꞌj tuꞌn ttzaj ttz̈i kiꞌj, cuma tuꞌn Espíritu Santo at kipemal, bixsen kanem tiꞌ Dios, bix tuꞌn t-xiꞌ kiiꞌn ttxolan.

8Juꞌ tzunj miꞌn tzꞌel chꞌixewey tiꞌ tyol Kaaw Jesús, bix miꞌn tzꞌel chꞌixewey wiꞌj, tiꞌj lu ken intiiꞌnctz tuj tzeeꞌ nuk tiꞌjcꞌa tyol Jesús, sino cuyanx jtey qꞌuixcꞌaj tzul tiꞌj oj t-xiꞌ tpocbaꞌna ka baꞌn cycoꞌpj xjal, tisenj weya lu kena intiiꞌnctz tuj tzeeꞌwa. Dios tey tzul kꞌonte tipemal tuꞌn tiyꞌx qꞌuixcꞌaj tuꞌna oj tcub tzꞌaka.

9Jatzente Diosj o coꞌpente ke, bix o koꞌx ttxcoꞌnxin tuꞌn t-xiꞌ kiiꞌn jun kchunkꞌlal jiquenxix. O ko tcoꞌpete Dios tuꞌn koc te t-xjalxin, yaaꞌn nuk tuꞌn kiikꞌente tcoꞌpbil Dios tuꞌnj baꞌn ncub kbinchen, sino tuꞌn t-xtalbilte Dios kibaj. Juꞌ tcublen tniqꞌuenxin tiꞌj jatxe tuj tneel.

10Nejl min e telniꞌyaxte ti e cub tniqꞌuenxin tiꞌj coꞌpbil ke. Pero tejtzen tul jlet Jesús, Coꞌpl ke, twitz txꞌotxꞌ, bixse e jaw chicꞌajax tnicꞌbenxin tiꞌj tuꞌn kcoꞌpj. Tejtzen tjatz itzꞌj Jesús juntl maj, o cyaj ttzinenxin tiꞌj ke ocslal chi jawel itzꞌj juntl maj, bix te junx maj, tuya acꞌaj cyxumlal mlay cyim.

11Tuꞌn tzunj kbaj te ja yol lu, Dios o tzaj kꞌonte we wajwalela te tyolelxin bix te xnakꞌtzal cye cykil xjal, cyuyax kej xjal yaaꞌn judío.

12Tuꞌnxix xsunja luxse niyꞌ nwitza. Pero kꞌuklwe ncꞌuꞌj, cuma ntzkiꞌnwe aliꞌj kꞌukleca ncꞌuꞌj, bix ntzkiꞌnxixwe ka cwel tcꞌuꞌn wexin wanem o txiꞌ wokxenan texin, texaj kꞌij oj npon tuyaxin.

13Cyeꞌyencxix ka jay nxiꞌ kban te ja yol lu o tzꞌoc tbiꞌna wiꞌj, bix miꞌn cub tchꞌixbeꞌna, bix kbanxse tuya jun tnaabla ka kꞌuklec tcꞌuꞌja tiꞌ Jesús bix kꞌakꞌ tanema tiꞌ Dios bix cyiꞌ xjal, laꞌ jaaꞌ cpomela canan tipemala tuꞌn Jesús.

14Tuyatzen tonbil Espíritu Santo iꞌtz kuya, tcꞌojlaꞌy jcyeca tyol Dios o txiꞌ tkbaꞌnxin tey, tuꞌn min-al cub chꞌixbente.

15Timoteo, ttzkiꞌntl tzuna chꞌixcꞌa yaaꞌn cykil xjal itzkil twitz Dios tuj txꞌotxꞌ te Asia jaaꞌ taꞌy, cyuyacꞌaxtl jxin Figelo bix Hermógenes, ma cyaj cyeꞌyente we.

16Pero at-x juuntl xjal min cyaj cyeꞌyente we, tisenj jun najaj te tja Onesíforo. Cyꞌiwlaꞌnxitke tuꞌn Dios, cuma amale intiiꞌnctzetwe tuj tzeeꞌ, jatzen Onesíforo oc nimsante ncꞌuꞌj, bix min el chꞌixwe wexin wiꞌj.

17Tej ttenxin Roma, min in xiꞌ tcyeꞌyen wexin, sino e jyonxin wiꞌj, tejxe ncnet tuꞌnxin.

18N-el tniꞌya tiꞌj ti tten toc tonenxin ke xjal tuj tnom te Efeso jaaꞌ najley. Nuket tzꞌoc t-xel texin tuꞌn Kaaw Jesús oj tpon tumel tuꞌn kbaj tnincꞌuꞌnxin.