2 CORINTIOS 2 - Mam of Todos Santos -- Guatemala Unicode

1Juꞌ tzunj, key hermano, min in iꞌya cyeyꞌlte cyey, cuma nuket in iꞌya cyxola, otle chi oc wilena, bix e cyajet lokey tuj bis tuꞌn nyola.

2Pero nuket e cyajkey tuj bis tuꞌn nyola, ¿altzen baꞌn ttzaj kꞌukbante ncꞌuꞌja? Mintlen-al.

3Juꞌ tzunj e xaꞌ nsmaꞌna wuꞌja cyey nejl. E wajbeꞌya tuꞌn tcyaj cykꞌoꞌna cykilj kaꞌ nbint cyuꞌna looj mitknaꞌx npona cyxola, tuꞌntzen ntzalaja cyiꞌja, yaaꞌn tuꞌn nbisena cyiꞌja. Tuj nwitza junelne taꞌ cyyola wuyena nuket min chin tzalaja cyiꞌja, jax mlay chi tzalaja wiꞌja.

4Tej t-xiꞌ nsmaꞌna wuꞌja cyuyey, e tzaj chꞌin nbisa bix e xiꞌ wokꞌjeꞌna, cuma il tiꞌj oc wilenkey. Pero min e wajbeꞌya tuꞌn cybisena. Nuk e wajbeꞌya tuꞌn t-xiꞌ nyeecꞌana nim tkꞌakꞌbil ncꞌuꞌja cyiꞌja. Juꞌ tzunj min in pona cyxola tisenj otk cub nnincꞌuꞌna.

Il tiꞌj tuꞌn tcub cynajsaꞌna jtil jun ocslal bix tuꞌn t-xiꞌ cycyiwsaꞌna tcꞌuꞌj

5Ja tzunj ocslal cyxola e tbincha jun kaꞌ, o tzaj chꞌin nbisa tiꞌj. Pero yaaꞌn nuk te weya ja bis lu, sino mas nim te cyey. Pero min txiꞌ nkbaꞌna ka cykilca key e bisenkey tiꞌj, cuma kape yaaꞌn jax.

6Tnimal cybaja e cyajbey tuꞌn tcub tuj castiwa. Pero ma tzul til tuj tcꞌuꞌj tcublen tuj castiwa, bix nim tken tcastiwa e cub.

7Matzen pon tumel tuꞌntzen tbaj tilel jtil ocslal cyuꞌna, tuꞌntzen t-xiꞌ cycyiwsaꞌna tcꞌuꞌj. Katzen tzinx n-oc cykꞌoꞌna tuj castiwa, cweltzen tbisenxin tiꞌj ka min cub cynajsaꞌna tilxin tej tcyaj tkꞌoꞌnxin tilxin, bix jacꞌa tuꞌn tbisxin miꞌn tzꞌajbentlxin tuj taakꞌen Dios.

8Juꞌ tzunj nchin cubsana nwitza cyey tuꞌn tcub cynajsaꞌna tilxin, tuꞌntzen t-xiꞌ cyyeecꞌana tkꞌakꞌbil cycꞌuꞌja texin.

9Nejl e xiꞌ nsmaꞌna wuꞌja cyey, tuꞌn tcub cykꞌoꞌna j-ocslal aj il tuj castiwa. Pero e xiꞌ nkꞌumena juꞌwa nuk tuꞌn tel nniꞌya tiꞌj ka nbint cyuꞌna cykilcaj ti nxiꞌ nkbaꞌna cyey.

10O tzꞌel nniꞌya tiꞌj o cybiy nyola. Pero jaꞌlewe, katzen cwel cynajsaꞌna j-ocslal aj il, jax juꞌx weya. Amale yaaꞌnt wiꞌja oca tbinchaꞌn il, ttzkiꞌn Cristo o cub nnajsaꞌna. O bint wuꞌna juꞌwa te jun yecꞌbil te cyey.

11Ka min knajsa j-ocslal aj il, taaw iltzen ke ccamal kiꞌj. N-el kniyꞌ tiꞌj taj taaw il tuꞌn tcub tyaaꞌn ejooꞌ, tuꞌntzen kcub xitj.

Tej tpon Pablo tuj tnom te Troas

12Tejtzen npona tuj tnom te Troas te kꞌumlte tpocbal Cristo, at nim amleꞌn wiꞌja tuꞌn wajbeꞌna tuj taakꞌen Kaaw.

13Pero mix e binne wakꞌanana baꞌn jatzewe, cuma min otk pon Hermano Tito tuj Troas tuya cypocbala tiiꞌn eteꞌy. Juꞌ tzunj ajkelen ncꞌuꞌja, bix e cyaj nkꞌoꞌna ke ocslal te Troas tuꞌn wula tuj Macedonia te jyolte.

Ncub tiꞌ il kuꞌn nuk tuꞌn Cristo

14Pero amale ajkelet ncꞌuꞌja, bix nxiꞌ nkꞌoꞌna chjonte te Dios. Tuꞌnj nmojbabl wiiba tuya Cristo, at woclena tuya Dios oj tcamanxin tiꞌj cykilca nkꞌoj tiꞌjxin. Bix tisen n-el pax tcꞌoꞌcjel jun tiiꞌ tuj cykꞌiꞌk, juꞌtzen o takꞌ Dios weya tuꞌn t-xiꞌ nkꞌumena tpocbal Cristo jaaꞌ nchin poniya,

15bix baꞌnxsen tuj twitz Dios oj t-xiꞌ nkꞌumena juꞌwa. Tisen jun cꞌocꞌsbil n-el pax tcꞌoꞌcjel tzin cynaꞌn xjal, juꞌtzen japenina oj nxiꞌ nkꞌumena ja yol lu tiꞌj Cristo cyekej chi ocslalte nyola bix chi cletel tuj cyil, bix ja tzunkej qꞌuelel cyiiqꞌuen chi xeꞌl tuj il.

16Kej n-el cyiiqꞌuen nyola, tzin cynaꞌn tisen t-xewel anem, cuma tzin techlaꞌn te cyamecyke. Pero kej nchi ocslan tiꞌ nyola, tisentzen cꞌoꞌcj tuj cywitz.

¿Altzen baꞌn tbint jun nintzaj akꞌuntl tuꞌn juꞌwa? Tuj twitz juun cyey mlay bint wuꞌna. Pero yaaꞌn jax cyuꞌn,

17cuma yaaꞌn juꞌ kena tisen juntl wik xjal nchi akꞌanan tiꞌ tyol Dios nuk tuꞌn pwak cyuꞌn. Jwaakꞌena nbint wuꞌna o tzaj tkꞌoꞌn Dios weya, bix nbint wuꞌna, yaaꞌn nuk tuꞌn pwak wuꞌna, sino jaxxix nchin kꞌumena tyol Dios bix tuya tipemal Cristo, cuma Dios cyeyꞌlte weya laꞌ ka baꞌn nbint taakꞌenxin wuꞌna bix ka min.