SAN MARCOS 6 - Mam of Todos Santos -- Guatemala Unicode

Tej tpon Jesús tuj tnom Nazaret(Mt. 13:53-58; Lc. 4:16-30)

1Bix el Jesús ttziiꞌ tnijabel aꞌ, bix ajxin tuj ttanemxin Nazaret. Bix e xiꞌke t-xnakꞌatzxin tuyaxin.

2Tej tzunj tul canan jmancꞌbil kꞌij tuj smant, jaj kꞌij xjan cyxol xjal, bix ocxxin tuj camon jaaꞌ te xnakꞌtzabl tyol Dios, bix akꞌxin xnakꞌtzal xjal. Tej toc cybiꞌn xjal tyol Jesús, bix e jaw kleeꞌ ke xjal, bix akꞌke kanlecte tiyꞌ cyeeylex:

—¿Jaaꞌtzen ma tzaaꞌ tcnoꞌn jxjal lu jyola? ¿Tikentzen nimxse baꞌn tuꞌn? ¿Bix jaaꞌtzen ma tzaaꞌ tipemal te kꞌanl xjal?

3¿Yaaꞌmpatzen loja carpintero e ten tzalu, tal jxuj María, ttzicy Santiago, tuya José, Judas, bixse Simón? ¿Yaaꞌmpatzen najl ke taneb kxol tzalu?―tz̈i cab xjal te cabtl.

Juꞌ tzunj min ocxix cybiꞌn xjal aj Nazaret tyol Jesús.

4Pero bix aj ttzakꞌbeꞌn Jesús cye xjal:

—Jaaꞌxja tumel n-oc ocslette tyolel Dios. Pero yal jaaꞌ najlaxin, mintiiꞌ tilelxin cye te tjaxin bix cye te ttanemxin―tz̈i Jesús.

5Mintiiꞌxix e bint tuꞌnxin, cuma min oc cybiꞌn aj Nazaret jaxin. Nuk jaaꞌx e cwaꞌ tkꞌoꞌnxin tkꞌabxin tibaj juun xjal tuꞌn cyoc kꞌanet.

6Bix e jaw kleeꞌ chꞌin Jesús, cuma min e cybi xjal jaxin.

Bix e xiꞌ Jesús betel cyuj niꞌ cocꞌ tnom ttxaꞌnxin nin tnom, bix nxnakꞌtzanxexin xjal.

Ex tsmaꞌn Jesús jcablaaj t-xnakꞌatzxin(Mt. 10:5-15; Lc. 9:1-6)

7Attzen jun kꞌij, bix oc tchmoꞌnxin jcablajaj t-xnakꞌatzxin. Bix akꞌxin smalxcye caꞌcab cybet te xnakꞌtzal cyuj jun wikxitl tnom. Bix e xiꞌ tkꞌoꞌn Jesús cyipemal tuꞌn tel cylojoꞌnxin biman cyiꞌ xjal. Bix akꞌ Jesús kbalxte ti chi temela tuj be.

8Bix e xiꞌ tkbaꞌnxin:

—Mintiiꞌxix cxeꞌl cyiiꞌna tuj be, sino nuk juun cybardóna te juun, bix mintiiꞌ pwak bix cyway t-xiꞌ cyiiꞌna, bix miꞌn txiꞌ cyiiꞌna cypay.

9Baꞌn toc cyxaaba. Pero miꞌn txiꞌ cyiiꞌna cychꞌixpubla.

10Bix oj cyocxa tuj jun jaaꞌ, jaxse chi temelaja ojxe cyiꞌya.

11Katzen at jaaꞌ min ẍi cmetey bix min ẍi oc ebiꞌna, cytz̈toncjtzen kuk tiꞌ cyxaaba cywitz tetzen yecꞌbil ka ejeeꞌxtl xjal cyeyꞌl cyiib twitz Dios bix ka mintiiꞌtl cyoclena cye xjal, bix chi ela―tz̈i Jesús cye t-xnakꞌatz.

12Entonces bix ex ke t-xnakꞌatz Jesús te kbalte tuꞌn cymeltzꞌaj xjal tuya Dios.

13Bix el cylojoꞌnxin nim biman cyiꞌ xjal, bix oc cykꞌaꞌnexin nim yabel, n-ocxetzen cysuꞌnxin aseyt, taꞌl jun wik loꞌpj olivo tbi, cyiꞌ xjal te techel ka tuꞌn tul cynaabl xjal.

Tej tcyim Juan Bautista(Mt. 14:1-12; Lc. 9:7-9)

14Bix e tbi jxin Herodes, cawel cyibaj cykil tnom tuj Galilea, ti toc cyyol xjal tiꞌj Jesús, cuma otkxse tzꞌel tpocbalxin. Eꞌlatzen tuj twitz juun xjal ka ja Jesús jxin Juan Bautista. Tz̈i tzun kej xjala cyjulu:

—Ma jatz itzꞌj Juan Bautista juntl maj tuj txꞌotxꞌ. Juꞌ tzunj at nim tipemal―tz̈ikexin.

15At cabtlxin e kbante:

—¿Al tzunj Jesús? Ja loj jxin Elías, tchakꞌel Dios e ten nejl ma cuꞌtz meltzꞌaj tuj cyaꞌj―tz̈i tzunkexin.

Bix cabtl xjal e kbante:

—Jesús jatzen xinja juntl wikxin tyolel Dios e ten nejl―tz̈i tzunkexin.

16Pero tejtzen toc tbiꞌn Herodes nbaj yol juꞌwa, tz̈i tzunxin cyjulu:

—Min. Ja te Juanja. Inayena e nkbante tuꞌn tel txꞌomet twiꞌ Juan. Yaltzen jaꞌlewe, matzen jatz itzꞌjtlxin―tz̈i Herodes.

17-18Tz̈itzen Herodes juꞌwa, cuma yaaꞌntzen ti otk baj nejl. Otktzen tzꞌel tiken Herodes t-xuꞌl Felipe, titzꞌen Herodes, Herodías tbixuj. Pero tejtzen toc tbiꞌn Juan Bautista, bix e xiꞌ tkbaꞌnxin te Herodes:

—Yaaꞌn tumel toc t-xuꞌlena t-xuꞌl titzꞌena―tz̈i Juan te cawel.

Juꞌ tzunj e tzyeta Juan tuꞌn Herodes tuꞌn tocxxin tuj tzeeꞌ, bix ocx ẍpet-xin tuya cadena. Tuꞌn tzunj xuj Herodías ocxe Juan tuj tzeeꞌ, cuma nkꞌojlec tzunxuj tiꞌ Juan.

19E tajbe tzunj xuj Herodías tuꞌn tcub byet Juan, pero min e tcuya Herodes,

20cuma at ttz̈i Juan tiꞌjxin, cuma ttzkiꞌn Herodes ka baꞌn xjalte Juan bix at tajwalelxin tuꞌn Dios te yolel twitz txꞌotxꞌ. Bix oc tcloꞌnxin ja Juan. At maj e yolen Herodes tuya Juan. Pero cab tcꞌuꞌjxin tyolenxin tuya Juan, cuma e tajbexin yolenxin nim tuya Juan, pero tuꞌn tcuyan texin tyol Juan, min.

21Pero attzen jun kꞌij toc tcyeꞌyen Herodías ya tumeltzen tuꞌn tbyet Juan. Yaaꞌntzen ti e baj. Tjapantzen baj Herodes twiꞌ juntl jnabkꞌi tchunkꞌlalxin, bix iyꞌ tiyꞌsaꞌnxin jun ninkꞌij cyuya tawil tcꞌojlalxin, bix ke tcab cawel ttxlajxin, bix ke nintzaj xjal tuj Galilea.

22Tuj tzunja ninkꞌij, bix ocx jtxin tal Herodías bixel. Baꞌnxse eꞌla bixentxin tuj twitz tcab tmantxin, Herodes, bix tuj cywitz niyꞌtl xjal nchi waaꞌn tuya Herodes. Juꞌ tzunj e xaꞌ tkbaꞌnxin cyjulu:

—Kanentz we ti taja. Jacꞌa txiꞌ nkꞌoꞌnwe.

23Seya niyꞌjanj ttxꞌotxꞌ Galilea ma tzaj tkanena we, jacꞌa txiꞌ nkꞌoꞌn tey―tz̈i Herodes te tal Herodías.

24Bix etztxin te kanlte te ttxutxin:

—¿Ti cxeꞌl nkanen?―tz̈i tzuntxin.

Pero ya otktzen tcꞌolba tumel tuj twitz Herodías, bixse aj ttzakꞌbeꞌnxuj te talxuj:

—Kanenx twiꞌ Juan Bautista―tz̈i Herodías.

25Bix ocx ajkeltxin jaaꞌ tocxexin cawel, bix e xiꞌ tkbaꞌntxin:

—Waj tuꞌn ttzaj tkꞌoꞌn naja twiꞌ Juan Bautista we tuj jun lak―tz̈i tzuntxin.

26Bix e jaw bisen cawel, pero cuma ya otk txiꞌ toyenxin tetxin cywitz ttxocanxin, ya mix e cwaꞌ tchꞌixbeꞌnxin tyolxin.

27Juꞌ tzunj e xaꞌ tchkꞌoꞌn cawel junxin aj kꞌoj tuj tzeeꞌ te kꞌilbel twiꞌ Juan.

28Bix e xiꞌ aj kꞌoj, bix el ttxꞌomanxin twiꞌ Juan, bix e pon tiiꞌnxin tuj jun lak. Bix e xiꞌ tkꞌoꞌnxin tetxin, bix e xiꞌ tkꞌoꞌntltxin te ttxutxin te yecꞌbil ka otk cyim Juan.

29Tejtzen toc cybiꞌn kej xjal lepche tiꞌ tyol Juan, bix e ponkexin kꞌilbetz t-xumlal Juan te mukbil.

Tej cywaaꞌn jweꞌ mil xjal tuꞌn Jesús(Mt. 14:13-21; Lc. 9:10-17; Jn. 6:1-14)

30Entonces tejtzen cypon meltzꞌaj jcablajajxin smaꞌn tuꞌn Jesús te xnaktzꞌal jaaꞌj taꞌxin, bix akꞌkexin kbalte te Jesús tikꞌch otk baj cyexin bix tikꞌch otk baj cyxnakꞌtzanxin.

31Bix e xiꞌ tkbaꞌn Jesús cyexin:

—Koꞌke ajlal kjunalx tuj jun lugar tuj ttz̈yal―tz̈i Jesús, cuma txolen cypon xjal bix xiꞌnax cyxiꞌ xjal. Mitetpe e binttl cywaaꞌnxin tuꞌn nimxse xjal.

32Bix ocx Jesús cyuya t-xnakꞌatz tuj jun choc tuꞌn cyiyꞌxxin tuj jun chkꞌajlaj jaaꞌ min-ala xjal.

33Pero nim xjal oc cyeꞌyente cyexin tej cyiyꞌxxin. Tej tzunj toc cycyeꞌyen xjal, bix e xiꞌ baj ke xjal cyuj tnom tuꞌn cypon xjal jaaꞌj cypomlel Jesús. Bix e pon ke xjal nejl twitz Jesús.

34Tej tzunj cypon Jesús, bix oc tcyeꞌyenxin nimxse xjal. Bix oc kꞌaꞌben tcꞌuꞌj Jesús cyiꞌ xjal, cuma tisen jun cloj carnel min-al cycylel. Bix akꞌ Jesús xnakꞌtzal cye xjal tiꞌ tikꞌch jilel.

35Tetzen kale, bix oc lkꞌe ke t-xnakꞌatz Jesús tiꞌj, bix e xiꞌ cykbaꞌnxin:

—Ya kaletltzen, bix tzalu mintiiꞌxse baꞌn tcnet.

36Bajsancꞌatzen twiꞌ t-xnakꞌatza cyuya xjal tuꞌn cyxiꞌ lokꞌol cywa tuj kej cocꞌ tnoma―tz̈ikexin.

37Pero bix aj ttzakꞌbeꞌn Jesús:

—Ejeeꞌ cyey cykꞌonx cywa xjal―tz̈i Jesús.

Bix aj cytzakꞌbeꞌn t-xnakꞌatzxin:

—¿Tipa ttena ko xeꞌl tzuna lokꞌol nim pan? Atetle twiꞌ tcꞌuꞌj jun xjal te jun jnabkꞌi, laꞌtzen ka canan te twiꞌ pan―tz̈ikexin te Jesús.

38Pero bix aj ttzakꞌbeꞌn Jesús:

—Jteꞌ pan kꞌiꞌn cyuꞌna. Cyjyaꞌx―tz̈i Jesús.

Tej tzunj tbaj cyjyoꞌnxin, bix e xiꞌ cykbaꞌnxin te Jesús:

—Ma cnet jweꞌ pan kuꞌna bix caꞌba quis̈―tz̈ikexin.

39Bix e xiꞌ tkbaꞌn Jesús tuꞌn cycub ke xjal tibaj ẍkꞌilen cꞌul tuj chkꞌajlaj.

40Bix e cub ke ke xjal tuj tclojan te syent bix te cyaꞌwnak tuya lajaj.

41Tejtzen tbint cyten xjal, bix e tzaj ttzyuꞌn Jesús jjweꞌ pan bix xsunj caꞌba quis̈. Ncyeꞌyen xsunxin tuj cyaꞌj, t-xiꞌ tkanenxin chjonte te Dios tiꞌ cywaxin. Bix akꞌ Jesús paꞌlcꞌate pan te ke t-xnakꞌatzxin tuꞌn t-xiꞌ cypaꞌnxin cye xjal. Mixe jun e jatz baj pan tuj tcublel, cuma otk txiꞌ tz̈ꞌiy tken pan. Bix juꞌx tchuꞌl quis̈.

42Bix cykiltzen e waaꞌn tejxe tnoj cycꞌuꞌj.

43Cybajtzen waaꞌn xjal, e cyajx cablajaj chiꞌl pan bix quis̈.

44Atle jweꞌ mil xjal xinak e waaꞌn.

Tej tbet Jesús tibaj tnijabel aꞌ(Mt. 14:22-27; Jn. 6:16-21)

45Tbaj tzunj juꞌwa, bix e xiꞌ tkbaꞌn Jesús cye t-xnakꞌatz tuꞌn cycuꞌxxin tuj choc juntl maj nejltzen twitz Jesús tuꞌn cyiyꞌpaxin jlajxitl aꞌ tuj jun tnom Betsaida tbi. Bix iyꞌxkexin, ncyajtltzente Jesús te bajsalca twiꞌ tyol cyuya xjal.

46Tej tzunj tpon baj tyolxin cyuya xjal, bix e jax Jesús twiꞌ jun witz te yolel tuya Dios.

47Tcubtzen klolj, nyolentzente Jesús tuya Dios twiꞌ witz, bix eteꞌtl t-xnakꞌatzxin tmij aꞌ tuj choc.

48Bix oc tcyeꞌyen Jesús ka cyiw tkitj choc tuj aꞌ, cuma juꞌ ntzaj cykꞌiꞌk jaaꞌ xaꞌninakexin. Te chꞌitk cyskixxin, bix e xiꞌ bet Jesús tibaj aꞌ tuꞌn tpon cyiꞌjxin. Cwa tpon canan Jesús cytxlajxin.

49Tej tzunj toc cycyeꞌyenxin, eꞌla tuj cywitzxin ka jun t-xlenel biman nbet tibaj aꞌ, bix e jaw seyꞌpajkexin, bix akꞌkexin s̈-il.

50Yaaꞌn nuk junxin oc cyeꞌyente, sino cykilcakexin oc cyeꞌyente. Pero bix e xiꞌ yolen Jesús cyiꞌjxin:

—¡Cyiwx chi oqueley! Inayen weja. Miꞌn tzaj ttz̈i cyiꞌja―tz̈i Jesús cyexin.

51Bix e cuꞌxxin tuj choc, bix jax n-aj lkꞌetlte cykꞌiꞌk. Biꞌxse e jaw kleeꞌ ke t-xnakꞌatz Jesús.

52Amale otket tzꞌoc cycyeꞌyenxin ti otk tse Jesús kej pan, mitkx n-eꞌla cyniyꞌxin tiꞌj ka cykil baꞌn tuꞌn Jesús. Klolj tuj cywitzxin.

E kꞌanj ke yaab tuꞌn Jesús tuj Genesaret(Mt. 14:34-36)

53Cwa cyponxin tuj ttxꞌotxꞌ Genesaret, jaaꞌ oca cyẍpoꞌnxin cychocxin ttziiꞌ aꞌ.

54Tzinxix nchi cuꞌtzxin tuj choc el naj cyniyꞌ xjal tiꞌj ka ja Jesús.

55Tejtzen toc cycyeꞌyen xjal jaxin, bix ex ke xjal kbalte cykil tuj tnom bix tuj cojbil. Bix akꞌ xeꞌl cyiiꞌn xjal ke yaab twitz wetbil twitz Jesús.

56Tisexse e baj tzalu, juꞌxse e baj tuj juntl wik tnom jaaꞌ oca Jesús. Nuk jakꞌch e cwa cykꞌoꞌn xjal ke yaab tuj be n-ocxetzen cycubsaꞌn xjal cywitz te Jesús tuꞌn tcuyan texin tuꞌn toc cymocoꞌn yaab, amatle nuk tziyꞌ ajx chꞌin cykꞌab tiꞌ t-xbalena. Bix aljxe xjal oc moconte texin, ul cynaabl.