EFESIOS 5 - Mam of Todos Santos -- Guatemala Unicode

Ti tten kchunkꞌlal ejooꞌ ocslal

1E cub tnajsaꞌn Dios cyey cyil, bix ejeeꞌy tcwal Kman Dios. Juꞌ tzunj cycnomale tuꞌn tcub cynajsaꞌna cyil xjal, cuma tcwal Dioskey.

2Juch cycꞌuꞌja tiꞌ cyuyey, tisen te Cristo oc juch tcꞌuꞌjxin kiꞌj. Tuꞌn tkꞌakꞌbil tcꞌuꞌjxin kiꞌj, oc tkꞌon tiibxin kiꞌj bix e cyimxin te kxel tuꞌn kil. Tcyimlenxin te jun oybil twitz Dios, bix baꞌn eꞌla twitz Dios, tisen baꞌn n-eꞌla jun cꞌocꞌsbil cꞌoꞌcj twitz jun xjal.

3Yaltzen tiꞌj achbil te aj pajlel, miꞌntzen cybinchaja cyxola. Bix miꞌntzen tzꞌoc cyachena jte cyuyey at. Kej xjal ocslal mlay cybinchatl kej kaꞌ juꞌwa.

4Bix miꞌn chi yolena tiꞌ jun chꞌixbajil yol bix miꞌn cyyoley tiꞌ yol mintiiꞌ tajbelel, bix miꞌn chi yolena tuya jawnex yol nuk nxiꞌ xeꞌt nuk te cynimbil cyiiba twitz cyuyey tajbelel, sino cyyeeqꞌuey cyyola ejeeꞌy jun wik xjal nkꞌonte chjonte te Dios.

5Cytzkiꞌna kej xjal nchi yaẍen cyuya pajbaj bix kej nchi yolen tzꞌil yol, bix kej nuk tikꞌch cyaj tisenxsen nchi niman twitz sant, ejeeꞌ tzunja mintiiꞌ tuꞌn cykaben tuj lugar jaaꞌ nchi cawena Cristo tuya Kman Dios.

6Attzen juun xjal tzin cykbaꞌn baꞌn tuꞌn tbint cykilj lu cyuꞌn. Pero miꞌn chi cub sbuꞌna cyuꞌn, cuma ke cyej n-el iiqꞌuente Dios chi oqueltzen tuj jun nintzaj castiwa oj ttzaj tkꞌoj Dios.

7Juꞌ tzunj miꞌntzen chi cub majey cyuya kej xjal tzin cykbaꞌn jlu.

8Nejl eteꞌ tzuna tuj klolj, cuma min el cyniꞌya tiꞌj ti tten tuꞌn t-xiꞌ cyiiꞌna jun cynaabla jiquen. Pero yaltzen jaꞌlewe, eteꞌ tzuna tuj spiꞌyen, cuma ya ocslal tzunkey tiꞌ Kaaw bix n-eltzen cyniꞌya tiꞌj ti tajxin. Juꞌ tzunj chi tencꞌaxixa tuj tumel, cuma ya eteꞌy tuj spiꞌyen bix yaaꞌn tuj klolj.

9Ka eteꞌy tuj spiꞌyen, kꞌiꞌntzen jun cynaabla baꞌn, bix jiquenxix chi beteley, bix jaxxix chi yoleley.

10Cꞌoquelxix cycꞌuꞌja tiꞌj tuꞌn tbint cyuꞌna jaj qꞌuelel baꞌn twitz Kaaw.

11Miꞌn chi cub tena cyuya kej eteꞌ tuj klolj oj nchi binchan jun yaaꞌn baꞌn min tzꞌajben, sino cxeꞌlxix cyiiꞌna tuj tumel. Katzen tuj tumel kꞌiꞌn cyuꞌna cywitz, cchicꞌajaxeltzen cynaabl kej lu yaaꞌn baꞌn.

12Kaꞌxsen jnbint cyuꞌn tuj ewjel, hasta jun kchꞌixew n-el kiiꞌn ka nko yolen tiꞌj nbint cyuꞌn.

13Pero oj t-xiꞌ cyiiꞌna jun cynaabla jiquen, bix cꞌoquel maje cynaabla tuya cynaabl kej nbint kaꞌ cyuꞌn tuj ewjel, cchicꞌajaxeltzen cynaabl yaaꞌn jiquen, tisentzen tuj spiꞌyen nchicꞌajaxtzen ti jilel at.

14Tzin tkbaꞌn tyol Dios cyjulu: “Ejeeꞌy min tzꞌel cyniꞌya tiꞌj, cycꞌasem cyiiba, bix chi weyꞌtza bix cypaꞌmel cyiiba cyiꞌkej eteꞌ tuj klolj, bix Cristo cjkolte cynaabla tuꞌn tel cyniꞌya tiꞌj,” tz̈i tyol Dios.

15Entonces, key hermano, cybisenx tiꞌj ti tten tuꞌn cybeta tuj tumel. Miꞌn chi oca tisen min tzꞌel cyniꞌya tiꞌj, sino qꞌuelel cyniꞌya tiꞌj.

16Cybinchama jun baꞌn looj lux tyem ata, cuma nim tkaꞌyel nbaj jaꞌlewe.

17Juꞌ tzunj miꞌn chi oca tisen mintiiꞌ tumel cyuyey tiꞌj nbaj jaꞌlewe, sino cykꞌoꞌnc cycꞌuꞌja tiꞌj tuꞌn tel cyniꞌya tiꞌj ti taj Kaaw tuꞌn tbint cyuꞌna te ja tyem jaꞌlewe.

18Oj n-oc jun xjal te bola tuꞌn vino, ja vino ncawen tibaj, bix nxiꞌ tnaabl tuj il tuꞌn. Juꞌ tzunj miꞌnxit cawen vino cyibaja, sino jaxit Espíritu Santo cawen cyibaja.

19Ka eteꞌy tjakꞌ tcawbil Espíritu Santo, chi bitzela cyxola te Kaaw tiꞌ jun bitz tuya cykil cycꞌuꞌja bix tuya jun tzalajebl ntzaj itzꞌj tuj cyanema tuꞌn Espíritu Santo.

20Bix tiꞌ tbi Kaaw Jesucristo cxeꞌl cykꞌoꞌna chjonte te Kman Dios tiꞌ cykilca.

Ti tten tuꞌn tten kmojbabl kiib tuj kja

21Bix cxeꞌl cyyeecꞌana cynimbila cye xjal tuꞌnj nchi nimena twitz Cristo.

22Key hermano, cxeꞌl nkbaꞌna chꞌin cyey tiꞌj ti tten tuꞌn t-xiꞌ cyyeecꞌana cynimbila cye xjal.

Key xuuj, cxeꞌl cycuyana alcye tkba cychmila, tuꞌntzen t-xiꞌ cyyeecꞌana cynimbila twitz Cristo.

23Tisenx ja Cristo ncawen kibaj ejooꞌ ocslal, jaxsen juꞌx at tcawbil jun xinak tibaj t-xuꞌl.

24Il tiꞌj jacꞌa chi niman ke xuuj twitz cychmil tuj cykilca, tisen ejooꞌ ocslal n-oc kbiꞌn Cristo.

25Yaltzen cyey xinak, cꞌoquel cyakꞌ cyxuꞌla cyey, tisenxj oc cyakꞌ ocslal te Cristo. Jaxin jun yecꞌbil te ke ti tten tuꞌn toc takꞌ jun xjal ke. Oc tkꞌon tiibxin kuya hasta e cyimxin kiꞌj,

26tuꞌntzen tel txjet kil kiꞌj, tisen tzin tkbaꞌn tyol Dios, bix tuꞌntzen koc te t-xjal Dios.

27Juꞌtzen tzin bint kten tuꞌnxin, tuꞌntzen alcye jun kꞌij ko pomel twitzxin mintiiꞌ ktzꞌilel, bix sakxix te junx maj. Ko oquel tisen jun oybil mintiiꞌ tpaltel.

28Juꞌ tzunj, key xinak, tisen cyey cꞌojlaꞌn cyxumlala cyuꞌna, jaxsen juꞌx cycꞌojlay ke cyxuꞌla. Jxinak n-oc takꞌ tiib te, jax juꞌx n-oc takꞌ t-xuꞌlxin texin, cuma t-xuꞌlxin tisenx ja t-xumlalxin.

29Min-al xjal n-el iiqꞌuente t-xumlal, sino nuk oꞌcx n-oc tcꞌaꞌchen bix n-oc tcꞌojlaꞌn. Juꞌxsen ncꞌojlan Cristo kiꞌj, ejooꞌ t-xjalxin,

30cuma tisen t-xumlalxin koꞌ.

31Cycyeꞌyenc ti toc tuꞌn ootxa tyol Dios. Tz̈i cyjulu: “Oj tpon tumel tuꞌn tmaje jun xinak tuya t-xuꞌl, mintiiꞌxix tuꞌn tnajantl tuya tman bix tuya ttxu, sino ya at tuꞌn tnajantl tecꞌax tuya t-xuꞌl, bix cycaꞌbel chi oquel te junx xumlalbaj,” tz̈i tyol Dios.

32Ja yol lu tuj ewjel taꞌ chꞌin bix min chicꞌajax cykilca ti japenina nejl. Pero yaltzen jaꞌlewe jawnexsen japenina te ke. Tuj nwitza nyolen ja yol lu tiꞌj tmojbabl tiib Cristo cyuya ke t-xjal.

33Pero jax juꞌx nyolen ja yol lu tiꞌj ti tten tmojbabl tiib jun xinak tuya t-xuꞌl. Juꞌ tzunj, key hermano, il tiꞌj cyey xinak tuꞌn toc takꞌ cyxuꞌla cyey tisen n-oc takꞌ cyiiba cyey, bix cyey xuuj tuꞌn t-xiꞌ cynimana cychmila.