SAN MARCOS 1 - Mam of Todos Santos -- Guatemala Unicode

Tej tkꞌumen Juan Bautista tyol Dios(Mt. 3:1-12; Lc. 3:1-9, 15-17; Jn. 1:19-28)

1Ja libro lu ma tzakꞌ yolel tiꞌ tbanel tpocbal Jesús, tcwal Dios, jaj junxin xjal e tyole Dios jatxe tuj tneel.

2Jatxe nejl, bix e cyaj ttzꞌiꞌben Isaías, jaj jxin tyolel Dios cyxol xjal te Israel, ti toc tuꞌn Dios te Tcwal. Tz̈itzen Dios cyjulu te Tcwal, tz̈i Isaías: “Cxeꞌl nchkꞌoꞌn jun nyolel nejl twitza te yolel cyuya xjal nejl tuꞌntzen cychꞌixbente xjal cyanem.

3Cjawel yolen jxjala jaaꞌ yaaꞌn nim xjal najl. Tz̈itzen tbel cyjulu: ‘Cybincham cyiiba twitz Taaw twitz txꞌotxꞌ. Cyjkom tbexin tuj cyanema,’ tz̈i tbel jxjal cjawel yolen,” tz̈i Dios te Tcwal, tz̈i Isaías tcyajlen ttzꞌiꞌbenxin.

4Yaaꞌntzen ti e baj. Eltzen cab jnabkꞌi baꞌnxix. Cwatzen tul itzꞌj jxin xjal e tkba Dios. Bix oc tbixin te Juan Bautista. Tej tzunj toc Juan maꞌ xjal, bix e xiꞌ Juan tuj jun lugar jaaꞌ yaaꞌn nim xjal najl. Bix nim xjal e pon tuꞌntzen cybautizarj xjal tuj nimaꞌ te Jordán. Bix e xiꞌ tkbaꞌn Juan cye xjal cyjulu:

—E cybautizarj tzuna tuꞌntzen telniyꞌ ka otk tzꞌajtz tiꞌ cynaabla twitz Dios, tuꞌntzen tcub tnajsaꞌn Dios cyila―tz̈i Juan Bautista cye xjal.

5Bix e pon nim xjal tej tnom Judea bixsen tuj nin tnom te Jerusalén te ebil tyol Juan. Bix e jatz cykbaꞌn cyil, bixse e bautizarjke tuꞌn Juan tuj nimaꞌ te Jordán. Jatzen techel ka otk tzꞌoc cykꞌon cyiib xjal tuya Dios.

6Yaltzen te Juan t-xbalen, binne tuya ttzmal camello, ẍpoꞌntzen tcyꞌitzxin tuya jun gamús. Yaltzen twaxin, bix e cnet tchiꞌxin niꞌ cocꞌkejil tisen jun cuchiꞌ, bix tcꞌaꞌxin taꞌl xiiꞌ.

7Yaltzen tyolxin cye xjal, tz̈i tzunxin cyjulu:

—Tzul juntl xjal lepchxe wiꞌja mas nintzaj nwitza. Nintzaj xsunxin, yal weya mitetpe takꞌel t-xaabxin baꞌn tel npjuꞌna.

8Matzen chi bautizarja wuꞌna nuk tuya aꞌ, pero tzunj xjal tzul cxeꞌltzen tkꞌoꞌn Espíritu Santo cyey―tz̈i Juan Bautista cye xjal.

Tej tbautizarj Jesús(Mt. 3:13-17; Lc. 3:21-22)

9Nkꞌontzen Juan ke xjal tuj aꞌ, tej tetz Jesús tuj Nazaret, jun tnom te Galilea, bix e ponxin tiꞌ Juan ttziiꞌ jnimaꞌ te Jordán, bixsen e tbautizaran Juan Jesús tuj aꞌ.

10Njatzcaxix Jesús tuj aꞌ tej t-xiꞌ tcyeꞌyenxin tej tjket cyaꞌj, bix e tilxin tej tetz Espíritu Santo tuj cyaꞌj tisen junjil cucuꞌ. Bix e cub licyꞌpaj tuj twiꞌ Jesús.

11Bix e tbi Jesús ttzaj tyol Dios tuj cyaꞌj. Tz̈itzen cyjulu:

—Jay Ncwal a wanem tiꞌj. Jay ma nsicyꞌa―tz̈i jyol ttzaj tuj cyaꞌj.

Tej toc niyꞌbet Jesús(Mt. 4:1-11; Lc. 4:1-13)

12Yajcꞌatltzen, bix e xiꞌ kꞌiꞌn Jesús tuꞌn Espíritu Santo tuj jun lugar yuman. Min-al xjal najl tuj.

13E ten Jesús cyaꞌwnak kꞌij tuj ja lugara. E tenxin cyxol talen cꞌul. Bix jatztzen oca ten taaw il niyꞌbelte tiiꞌn tipemal Jesús. Tbajlenxitl tzunj juꞌwa, bixse ul ke tsanjel Dios onlte Jesús.

Bix ocx Juan Bautista tuj tzeeꞌ tuꞌn cawel tuj Judea cuma tajxin e weꞌ t-xnakꞌtzbil Juan Bautista.

Tej ttzyet taakꞌen Jesús(Mt. 4:12-17; Lc. 4:14-15)

14Tocxlenxitltzen Juan tuj tzeeꞌ, bix e xiꞌ Jesús tuj tnom te Galilea te kꞌumlte tumel cye xjal tiꞌ tpocbal jtbanel Dios.

15Tz̈i tzunxin cyjulu:

—Ya matzen pon tumel tuꞌn tul tcawbil Dios cyxola. Matzen pon tumel tuꞌn t-xiꞌ tyeecꞌan Dios cyey ti tseꞌxa ejeeꞌy tuꞌn cycoꞌpja tuj cyila. Ya lutzen ma tzula. Cyimaltzen cyiiba tiꞌ il. Ccyajtzen meltzꞌaj tuya Dios, bix cybimtzen tumel jtbanel tyol Dios―tz̈i Jesús cye xjal.

Tej ttzaj ttxcoꞌn Jesús cyaja xjal quis̈el(Mt. 4:18-22; Lc. 5:1-11)

16At jun maj t-xiꞌ Jesús betel ttziiꞌ jun tnijabel aꞌ, tcub tuj Galilea, bix oc noj Jesús tiꞌj jxin Simón, bix yajcꞌatl oc juntl tbixin Pedro, bix titzꞌenxin Andrés. Tzyul quis̈kexin tuj aꞌ. Tej toc noj Jesús cyiꞌjxin, nxiꞌ cyxooꞌnxin cyxiyꞌpaxin tuj aꞌ te tzyul quis̈.

17Bix e xiꞌ tkbaꞌn Jesús cyexin:

—Chi lpetz wiꞌja. Jaꞌlewe lu key nchi chmon quis̈a. Pero inayenxse chin oquel kꞌonte cyey te txcol xjal tuꞌn cybinte nyola―tz̈i Jesús te Simón tuya Andrés.

18Tejtzen cybinte xinj juꞌwa, bixse tcyaj cykꞌoꞌnxin cyxiyꞌpaxin tuꞌn cyoc lpexin tiꞌ Jesús.

19Bix e xiꞌ cybetexin juntl tkiyꞌ, bix oc nojkexin tiꞌj jxin Santiago tuya titzꞌenxin Juan, junxitl Juan, tcwal jxin Zebedeo tbi. Eteꞌcꞌaxxin tuj jun choc, nchi binchanxin cyxiyꞌpaxin.

20Bix e tzaj ttxcoꞌn Jesús ejeeꞌxin. Bix e cyaj cykꞌoꞌnxin cyxiyꞌpaxin te cymanxin bix cye ke onl cyexin, bix e xiꞌkexin tuya Jesús.

Jun xjal otk tzꞌoc biman tiꞌj(Lc. 4:31-37)

21Bix e ponkexin tuj jun tnom Capernaum tbi. Tecꞌatzen jun kꞌij cynimbil xjal tej tocx Jesús tuj jun camon jaaꞌ, jaaꞌ nchi naꞌna xjal Dios, sinagoga tbi, bix akꞌxin xnakꞌtzal cye xjal.

22Bix e baj jaw kleeꞌ ke xjal tiꞌj t-xnakꞌatz Jesús cuma e xnakꞌtzanxin tisen jun xjal tuya tipemal, yaaꞌn juꞌ yolexin tisen kej xin txꞌolbal ley.

23Nxnakꞌtzantzen Jesús tuj camon jaaꞌ te xnakꞌtzabl tyol Dios, tej tocpan jun xjal otk tzꞌoc licyꞌpaj biman tiꞌj. Bix e jaw s̈-in:

24—¡Jeyꞌ! ¿tuꞌn tikentzen ma tzuley yajlalec keya, Jesús te Nazaret? ¿Mapa tzula te xitlcꞌa keya? Ntzkiꞌnwe al cyey, bix ntzkiꞌnwe ka jay jxjan te Dios―tz̈i biman otk tzꞌoc tiꞌ xjal.

25Bix aj ttzakꞌbeꞌn Jesús te biman:

—¡Cꞌol! ¡Bix kꞌoncj xjal lu!―tz̈i Jesús.

26Biꞌxse e tzaj cyim jxin xjal tuꞌn tipemal biman tej tel ok tiꞌjxin tuꞌn Jesús. Tzinxse ns̈-in biman tej tel.

27Bix cykilca ke xjal e jaw kleeꞌ bix akꞌ ke xjal kanlte tiyꞌ cyxol:

—¿Titzen xjalel jxin lu? Nejl ma ko baj t-xnakꞌtzaꞌnxin tuya nim tipemalxin. Yaltzen jaꞌlewe hasta cyuyax biman ma tzꞌabinte tyolxin―tz̈i ke xjal.

28Lwewaxse el tz̈itj naj tpocbalxin tuj cykil Galilea.

Tej tkꞌanj jxuj tjiiꞌ Pedro tuꞌn Jesús(Mt. 8:14-15; Lc. 4:38-39)

29Tejtzen tetz Jesús cyuya Santiago bix Juan cyuyax Simón bix Andrés tuj camon jaaꞌ te xnakꞌtzabl tyol Dios, bix e xiꞌ bajkexin cyja Simón tuya Andrés.

30Tej tzunj cyponxin tja Simón, tjax jxuj tjiiꞌ Simón twiꞌ wetbil, cuma otk tzaj yebt-xuj tuꞌn nin cyak. Bix e xiꞌ cykbaꞌnxin te Jesús ka yaabxuj.

31Bix e xiꞌ lkꞌe Jesús, bix e jaw tiiꞌnxin tkꞌabxuj. Tzinxix njaw tiiꞌnxin tkꞌabxuj tuꞌn tjaw weꞌxuj, n-el licyꞌpajtl yabel. Bix akꞌxuj cyeyꞌlx cyexin.

Tej tkꞌanj nim yaab tuꞌn Jesús(Mt. 8:16-17; Lc. 4:40-41)

32Tetzen otk cuꞌx kꞌij, tej cyakꞌ pomel nim xjal tja Simón tuya cyyaab bix kej xjal otk tzꞌoc licyꞌpaj biman cyiꞌj, tuꞌntzen toc tkꞌaꞌna Jesús ke yaab, bix tuꞌn tel tlojoꞌn Jesús biman cyiꞌ xjal.

33Nimxse xjal e pon ttziyan tisencꞌa cykilca tnom.

34Bix oc tkꞌaꞌna Jesús kej xjal yaab, bix el tlojoꞌnxin biman cyiꞌj juntl wik xjal. Pero tej tzunj tel tlojoꞌnxin biman cyiꞌ xjal, mintzen e tcuya Jesús tuꞌn cyjaw yolen biman, cuma cytzkiꞌn biman twitz Jesús.

Tej t-xiꞌ Jesús tuj Galilea kbalte tyol Dios(Lc. 4:42-44)

35Tetzen klaxca, n-akꞌ cwelcꞌa jket t-xeeꞌ cyaꞌj, bix e jaw weꞌ Jesús, bix exxin ttxaꞌn tnom te yolel tuya Dios tjunalxin.

36Yaltzen te Simón bix xsunj oxetl tuyaxin, bix exkexin te jyolte Jesús.

37Tej tzunj tcnet Jesús cyuꞌnxin, bix e xiꞌ cykbaꞌnxin te Jesús cyjulu:

—Cykilcaxse xjal njyon tiꞌja. ¿Tikentzen min cheꞌx tcyeꞌyena xjal?―tz̈i tzunkexin.

38Pero bix aj ttzakꞌbeꞌn Jesús cyexin:

—Mlay ko aj meltzꞌajtl cyuya xjal, cuma il tiꞌj ma koꞌx te pocbal tej tbanel Dios cye xjal cyuj jun wikxitl tnom nka tzalu, cuma yaaꞌn nuk tzalu ma chin tzaaꞌ kbalte tyol Dios―tz̈i Jesús cye Simón.

39Juꞌtzen e pjaꞌ cybetsaꞌn Jesús cyuya ke tuya tuj cykilca ke tnom te Galilea. Bix tuj jaca camon jaaꞌ tuj juun tnom ocxakexin kbalte cye xjal jtbanel tyol Dios. Bix n-elxitzen tlojoꞌnxin biman cyiꞌj xjal otk tzꞌoc licyꞌpaj biman cyiꞌj.

Tej tul tnaabl jun xjal nim txꞌaꞌc tiꞌj tuꞌn Jesús(Mt. 8:1-4; Lc. 5:12-16)

40Pero attzen jun kꞌij, bix ul junxin xjal yaab tuꞌn lepra otk tzaj kꞌey tkꞌabxin tisen tuꞌn tzꞌenak. Bix e xiꞌ lkꞌexin tiꞌ Jesús, bix e cub majexin, bix e xiꞌ tkanenxin te Jesús tuꞌn toc kꞌanet-xin. Tz̈i tzunxin cyjulu:

—Taat, ¿tajpey tzꞌel tiiꞌna chꞌin jyabela wiꞌja? At tey tipemal tuꞌn tel tiiꞌna―tz̈i tzunxin te Jesús.

41Bix oc cyꞌixbe tcꞌuꞌj Jesús tiꞌjxin. Bix oc tmocoꞌn Jesús jaxin.

—Wajwe, cyaj tey baꞌn―tz̈itzen Jesús.

42Tujx naj t-xiꞌ tkꞌumen Jesús, tzin ncyajtl jxin xjal baꞌn.

43Bix e xiꞌ tkbaꞌn Jesús texin:

—Cutxena tey.

44Pero miꞌn txiꞌ tkꞌumena ti ma baj tey, sino jiquen t-xiꞌy te yecꞌl tiiba twitzj xin tawil naꞌl Dios, tuꞌn toc tcyeꞌyenxin jay ka ma tzul tnaabla. Bix kꞌinx xsunj tikꞌch cꞌajbel tey tisej e cyaj tkbaꞌn Moisés, tuꞌntzen t-xiꞌ toyen tawil naꞌl Dios tisex tten tley Moisés, tuꞌntzen tcyaja tuj chicꞌaj ka ma tzul tnaabla―tz̈i Jesús texin.

45Pero chꞌin tel-len lkꞌe jxin xjal, bix akꞌxin kbalte ka otk tzul tnaablxin tuꞌn Jesús cye cykil xjal. Juꞌtzen eꞌla nim tpocbal Jesús. Ya min ocxtlxin cyuj tnom tuꞌn nimxse xjal oc cutzꞌj tiꞌjxin. Juꞌtzen e webaxin tuj cojbil jaaꞌ yaaꞌn nim xjal najl. Pero nuk jakꞌch e tzaaꞌ jlet ke xjal cyeyꞌlte texin.