APOCALIPSIS 5 - Mam of Todos Santos -- Guatemala Unicode

J-uꞌj wuuk ẍipbelte

1Bix e wila jun uꞌj te wuuk plaj tcub tuj tmankꞌab Dios, jkꞌukl tuj tkꞌukbil. Tzꞌiꞌben tujxe uꞌj bix tiꞌjxe, bix jpuꞌn tuya wuuk ẍipbelte.

2Bix e wila jun jawnex tsanjel Dios tuj cyaꞌj. E jaw ts̈iꞌn cyiw:

—¿Alcye jun at toclen tuꞌn tel tiiꞌn kej ẍipbelte tiꞌj libro bix tuꞌn tel tjkoꞌn?―tz̈i ángel.

3Pero min-al jun e cnet tuꞌn tjkonte j-uꞌj lu bix tuꞌn tcuꞌx tcyeꞌyen twitz t-xak uꞌj, mi nuk ejeeꞌj eteꞌ tuj cyaꞌj, bix mi nuk ejeeꞌj eteꞌ twitz txꞌotxꞌ, bix mi nuk ejeeꞌj eteꞌ tjakꞌxe twitz txꞌotxꞌ.

4Bix in akꞌa ookꞌel nim, cuma min-al jun e cnet at toclen tuꞌn tel tjkoꞌn uꞌj lu, tuꞌntzen tcyeꞌyen tuj uꞌj.

5Cyxol tzunj winakcyaja tij, e tzaj tkbꞌan jun weya:

—Miꞌn tzꞌookꞌa, cuma at jun xjal at toclen tuꞌn tel tiiꞌn jwuuk ẍipbelte bix tuꞌn tel tjkoꞌn j-uꞌja, ja tzunj xjal León Tiyꞌjil Judá bix T-xeꞌchel Jrey David. Ma xcye tiꞌj taaw il, bix juꞌ tzunj, at toclen tuꞌn tjkonte libro lu―tz̈i tij.

6Bix e wila Jtal Carnel e xiꞌ oyet te kxel lu waꞌl twitz tkꞌukbil Dios. Bix lu tcub cyxol kej cyaja wik bix cyxol kej winakcyaja tij. Tcyeꞌnc tisencꞌa otk cub byet, bix at wuuk tcache bix wuuk tbakꞌ twitz, jatzenj japenina wuuk espíritu te Dios bix smaꞌn tuj cykilca twitz txꞌotxꞌ.

7Bix e pon lkꞌe Tal Carnel tiꞌ tkꞌukbil Dios, bix e tzaj ttzyuꞌn libro tuj tmankꞌab Dios.

8Tejtzen ttzaj ttzyuꞌn libro, e cub maje kej cyaja wik iꞌtz bix kej winakcyaja tij twitzj Tal Carnel. Teeyle juun tij kꞌiꞌn jun arpa cyuꞌn tuyax jun lak te oro. Nojne kej lak tuya incienso, jatzen japeninaj cynaꞌj Dios ocslal twitz Dios.

9Bix e xiꞌ cybitzen jun acꞌaj bitz. E xiꞌ cykbaꞌn cyjulu: “At toclena tuꞌn ttzaj ttzyuꞌna libro bix tuꞌn tel tiiꞌna ke ẍipbelte tiꞌj, cuma e cub byeta, bix tuꞌn ttz̈ꞌquela el tz̈itj tiꞌja tej tcyima, ma txiꞌ tchjoꞌna te Dios jchojbilte tuꞌn cyten xjal tuya Dios, kej xjal te cykilca wik tiyꞌjil xjal bix te cykilca wik yol bix te cykilca wik xeꞌchel bix te cykilca tnom.

10Ma tzꞌoc tkꞌoꞌna cyoclen tuꞌn cycawen bix tuꞌn cyajben te Kman Dios, bix chi cawel tibaj twitz txꞌotxꞌ,” tz̈i bitz, tz̈i ke cyaja wik cyuyax winakcyaja tij.

11Bix oc ncyeꞌyentla, bix e xiꞌ nbiꞌna tkꞌajkꞌajel cywiꞌ nimxsen tsanjel Dios tuj cyaꞌj. Eteꞌ ttxaꞌnele tkꞌukbil Dios tuyax cyaja wik cyuyax winakcyaja tij. Nimxsen tajlal cybaj, millones bix millones cybaj mlay bint cybaj.

12Bix e xiꞌ cykbaꞌn tuya jun cyyol cyiwxix: “At toclen Tal Carnela e cub byet tuꞌn tiikꞌente tipemal, tuꞌn toc te jun kꞌina, tuꞌn tiikꞌente tnaabl, tuꞌn toc te jawnex, tuꞌn tiikꞌente nimbil, tuꞌn tjaw nimset tbi, bix tuꞌn tiikꞌente cyꞌiwlabl,” tz̈i ke ángel.

13Bix e xiꞌ nbiꞌna cyyol cykilca xjal e bint tuꞌn Dios. Cykilca at tuj cyaꞌj bix twitz txꞌotxꞌ bix tjakꞌ txꞌotxꞌ bix tuj mar e xiꞌ cykbaꞌn cyjulu: “Te Dios tuj tkꞌukbil bix te Tal Carnel, xiꞌ kꞌoꞌnxit cyꞌiwlabl, nimbil, bix tuꞌn tjaw nimset cybi, bix tuꞌn cycawen te junx maj,” tz̈i ke cykilca wik xjal e cub tbinchaꞌn Dios.

14Bix kej cyaja wik e xiꞌ cykbaꞌn, “Juꞌxit ttena.” Bix kej winakcyaja tij e cub majeke bix e jaw cynimsaꞌn ja Diosj mintiiꞌ tbajlel.