FILIPENSES 2 - Mam of Todos Santos -- Guatemala Unicode

O cub tmanse tiib Cristo, juꞌ tzunj o jaw nimsaꞌnxin

1Key hermano, katzen wermanakey, il tiꞌj tuꞌn tcyiwset ncꞌuꞌja cyuꞌna, bix ka n-oc wakꞌa cyey, bix ka il tiꞌj tuj cywitza tuꞌn at kmojbabl kiib tuꞌn Espíritu Santo, bix ka cyaja tzaj cykꞌukꞌbaꞌna ncꞌuꞌja,

2chin cybiꞌxix chꞌina tiꞌj ja nyola cxeꞌl nkbaꞌna. Ka ma cybiy, nimxsen chin tzalajel cyiꞌja. Junx qꞌuelela cynaabla, bix junxxit tzꞌoc takꞌ cyuyey cyey, bix junxxit cycꞌojlan cyiiba, bix junxxit cybey, bix mojlxit cyakꞌmala.

3Cykꞌoncja cyxqꞌueybila, bix miꞌn chi jaw cyocsabla cyiiba tuj cyakꞌmala. Mas baꞌn chi yutꞌeqꞌuey. Miꞌn txiꞌ cykbaꞌna ka mas nintzajkey cywitz xjal, sino mas baꞌn jaca juun cyey cwel bisente tiꞌj cykilca xjal mas il tiꞌj cywitza.

4Jaca juun cyey miꞌn chi jyon nuk te cyey jun baꞌn, sino tuyax te juntl cyuyey.

5Ja tzunja e tbincha Cristo Jesús. Amale jat xinj xjal Scyꞌoꞌn tuꞌn Dios te cawel tibaj cykilca, pero iyꞌx qꞌuixcꞌaj tuꞌnxin nuk kiꞌjcꞌa. Bix cwel kbisen tiꞌj alcyej baꞌn te juntl xjal tisen e cub tbisen Cristo Jesús cyiꞌ xjal.

6Amale Dioset-xin, pero min e tzyun xinj toclenxin te cawel tisen Dios.

7Bix e cyaj ttzakpiꞌn xinj toclenxin cawelxin tuj cyaꞌj, tuꞌntzen tocxin te xjal tzalu twitz txꞌotxꞌ. Ulxin twitz txꞌotxꞌ, yaaꞌn te cawelxin, sino te ajbelelxin.

8Bix yaaꞌn nuk ocxin te xjal, sino tuyax ocxin te cyiikꞌbil xjal. Nim el cyiiqꞌuen xjal jaxin, hasta tejxe tcub cybyoꞌn xjal jaxin twitz cruz tisen jun byol xjal. E tcuyaxin jlu tuꞌntzen tnimantexin ti e tajbe Dios.

9Juꞌ tzunj o jaw tiiꞌn Dios jaxin tuꞌn tocxin te mas jawnex bix tibaj cykilca, bix o tzꞌoc tkꞌoꞌn Dios jun tbixin mas jawnex twitz cykilca biybaj, cuma jaxin taaw tibaj cykilca.

10Tzul jun kꞌij oj cykil xjal cwel maje twitz Jesús, kej eteꞌ tuj cyaꞌj, kej eteꞌ twitz txꞌotxꞌ, bix kej eteꞌ tjakꞌxe txꞌotxꞌ.

11Tuj tzunj kꞌij tzul, entera ke xjal qꞌuelel cyniyꞌ tiꞌj ja Jesucristo taaw cykilca. Ojtzen cykilca xjal ckbalte juꞌwa, njawtzen cynimsaꞌn xjal tbi Kman Dios.

Ejooꞌ ocslal juꞌ koꞌ tisen ke cheꞌw nchi txaken tuj klolj

12Juꞌ tzunj, key hermano, tisen Jesús e cub tbisenxin cyiꞌ xjal mas twitzj texin, jax juꞌx cyey il tiꞌj cxeꞌl cyiiꞌna ti tten tuꞌnxin. Amatzenle mintn-al kena cyxola jaꞌlewe, pero cybima nyola. Cykꞌoꞌnctzen cyipena tuꞌn tcub cybinchaꞌna jbaꞌn te cyej cabtl cyuyey mas twitzj cyey, tuꞌntzen cycyaja tuj tumel.

13Jatzen Dios nakꞌanan tuj cyanema, tuꞌntzen cyaja jtaj Dios, bix ntzaj tkꞌoꞌnxin cyipemala tuꞌn cybinchantey alcyej tajxin.

14Miꞌn chi labta bix miꞌn chi kꞌojla,

15tuꞌntzen kej xjal yaaꞌn ocslal baꞌn cyyol cyiꞌja, bix tuꞌntzen sakxixkey twitz Dios, cuma ejeeꞌy t-xjal Dios. Ka nchi binchana kaꞌ tisen kej xjal yaaꞌn ocslal, yaaꞌntzen tumelkey te yecꞌbil cywitzj xjal yaaꞌn ocslal. Ejeeꞌ tzunkey tisen ke cheꞌw nchi txaken tuj klolj.

16Tisen jun luz n-el txaken tuj klolj, juꞌtzen japenina ke cyey ka kꞌiꞌnxix jun tumel cyuꞌna, tuꞌntzen cyocslante xjal tyol Dios. Ka nbint cyuꞌna juꞌwa, chin tzalajel cyiꞌja oj tul meltzꞌaj Cristo cyeyꞌlte waakꞌena o bint wuꞌna cyxola. Pero ka yaaꞌn eteꞌy tuj tumel, at nchꞌixewa cyiꞌja twitz Cristo, cuma minxtiiꞌ otk tzꞌeꞌla waakꞌena.

17Cuma in oneya tej cyocslana tiꞌ Jesús, kape chin cwel byet naja tiꞌj. Katzen ma tzꞌajben ncyamecya tuꞌn ttzket cyocslabla, tuꞌn cykil ncꞌuꞌja tuꞌn ncyima.

18Lu ken nchin tzalaj cyiꞌja, bix juꞌx cyey chi tzalajela wiꞌja.

Timoteo bix Epafrodito

19Key hermano, ka ma takꞌ Kaaw Jesús, pon nchkꞌoꞌn Timoteo cyuyey, tuꞌntzen tul meltzꞌaj tuya cypocbala tiiꞌn eteꞌy, tuꞌntzen tcyiwset ncꞌuꞌja cyiꞌja.

20Cxeꞌl nchkꞌoꞌn Timoteo, cuma n-oc cyakꞌa te tisex inayena. Min-al juntl tzalu ncub tbisen jbaꞌn te cyey tisej keya.

21Cykil ke ocslal tzalu nuk oꞌcx n-oc takꞌ cye tiꞌ cyitzꞌjel. Min nchi jyon tiꞌj alcyej taj Cristo Jesús.

22Pero te Timoteo yaaꞌn juꞌ tisen ejeeꞌ. Cytzkiꞌntla tiiꞌn tzꞌakꞌananxin. Amale atet ti il nbaj, min o cyaj tkꞌoꞌnxin taakꞌenxin. O tzꞌakꞌananxin wuyena tuj taakꞌen Dios te kbalte tpocbal coꞌpbil ke tisen jun cwal najben te tman.

23Mintiiꞌ tumel ti pjel wiꞌj. Pero ojtzen nbinte ti pjel wiꞌja, cxeꞌl nsmaꞌna Timoteo cyuyey. Cutz̈it nbinte naj ti pjel wiꞌj.

24Pero ka ma takꞌ Kaaw, inayentzen chin pon cyuyey.

25Pero amale mat pon Timoteo mas yaj, tuj nwitza il tiꞌj tuꞌn tpon nchkꞌoꞌna Epafrodito cyuyey jaꞌlecꞌa naja. Chjonte cyey ma tzaj cychkꞌoꞌna ja Epafrodito te kꞌolte jun onbil weya cyuꞌna. Baꞌn o tzꞌajbenxin we te yolel cyiꞌja te onlte weya tzalu tuj taakꞌen Kaaw Jesús, bix o tziyꞌx qꞌuixcꞌaj tuꞌnxin wuyena.

26E yebt-xin tzalu, bix jacꞌa o pon tumel cyuyey. Juꞌ tzunj najkelenxin. Bix juꞌx nipax tcꞌuꞌjxin cyiꞌja. Juꞌtzen waja tzꞌaj nchkꞌoꞌn xina cyuyey.

27Jaxte nim e yebt-xin. Jacꞌa chꞌixcꞌa min e baj texin. Pero Dios e tzaj kꞌonte lastim texin, bix e tkꞌana Dios jaxin, bix itzꞌjxin. Nuket e cyimxin, masxetzele bis oc weya. Juꞌ tzunj tej ttzaj tkꞌoꞌn Dios lastim texin, tuyaxa te weya.

28Juꞌ tzunj, tuꞌntzen cytzalaja oj toc cycyeꞌna jaxin bix baꞌntlxin, tuya cykil ncꞌuꞌja pon nchkꞌoꞌnxin cyuyey. Ojtzen nchi tzalaja tiꞌjxin, bix oj t-xiꞌ nbiꞌna, jax juꞌx weya tzalu tuj tzeeꞌ ya miꞌn chin biseltla cyiꞌja oj t-xiꞌ nbiꞌna min chi bisena wiꞌja.

29Ojtzen tponxin cyxola, cykꞌimxin tuya cykil cycꞌuꞌja bix tujxix tumel, bix nuket at chꞌin cynaabla twitzxin, cuma jaxin jun t-akꞌanal Kaaw,

30bix cuma ajbenxin tuj taakꞌen Cristo chꞌix mi eꞌla twiꞌxin tiꞌj. Ejeeꞌy min onenkey wiꞌja cuma nakch eteꞌy, pero te cyxela o tzꞌonen Epafrodito wiꞌja tzalu, bix o tziyꞌx qꞌuixcꞌaj tuꞌnxin tuꞌnj e bint tuꞌnxin tuj taakꞌen Cristo.