1Tuj tzunj tnom te Cesarea, attzen junxin xjal Cornelio tbixin. Yaaꞌn aj judíoxin, sino juꞌ otk tzaj tlocꞌalxin cyxol xjal romano. Jatzen Cornelio cawel tibaj jun cloj te syent soldado te jun cloj Italiano tbi.
2Jatzente Cornelio ebilx texin tyol Dios, bix cykilke te tjaxin, pero mitkx nchi ocslanaxin Jesús. Nimx e kꞌon texin cotz cyej xjal judío mebe. Bix nuk e naꞌxxin Dios.
3Attzen jun kꞌij, te oxe tajlal hora te kale, tej nnaꞌn Cornelio Dios, tisen tiiꞌ tcub kleeꞌ tuj twitzxin. Tej tzunj tcub kleeꞌj juꞌwa tuj twitzxin, e tilxixxin jun tsanjel Dios tuj cyaꞌj, bix e pon jtsanjel Dios jaaꞌj tcwaꞌxin. Tz̈itzen cyjulu:
—Cornelio―tz̈i tsanjel Dios.
4Bix oc ten Cornelio cyeyꞌlte tsanjel Dios tuya nim ttz̈i tiꞌjxin, bix e xiꞌ tkanenxin:
—¿Ti, taat?―tz̈itzen Cornelio.
Bix aj ttzakꞌbeꞌn tsanjel Dios:
—Tuꞌnj nnaꞌn tey Dios, bix xsunj tonbila cyej xjal mebe jatzen ma tbinchaja, nimxsen ma tzꞌoc tcyeꞌyen Dios jay tuya nim xtalbil.
5Yaltzen jaꞌlewe, tejtzen Dios t-xiꞌ tchkꞌoꞌna cab tsoldadey tuj tnom te Jope, te jyolte junxin xjal Simón tbi, bix juntl tbixin Pedro, bix tuꞌntzen ttzaj kꞌit-xin tzalu.
6Ja tzunj xin Pedro, jatztzen taꞌ tposadaxin tuya juntlxin xjal Simón tbi, jxin kesl tzꞌuꞌn najl ttziiꞌ mar. Attzen jun tyol Pedro tzul tkꞌoꞌn te tey―tz̈i tsanjel Dios tuj cyaꞌj te Cornelio.
7Tejtzen tkbante tsanjel Dios juꞌwa, bix aj. Bixsen e tzaj ttxcoꞌn Cornelio jun tsoldado jax ebil tyol Diosxin, jaaꞌ kꞌukleca tcꞌuꞌj Cornelio, bixsen caꞌba tkꞌopajxin xinak.
8Bixsen e xiꞌ tkbaꞌnxin ti jilel e cub kleeꞌ tuj twitzxin tisen tuj twitziyꞌxin. Tex xsunj kꞌij, bix e xiꞌ tchkꞌoꞌn Cornelio ejeeꞌxin tuj tnom te Jope.
9Tetzen juntl kꞌij te chil kꞌij, ya matktzen chi akꞌ pomel canan tsanjel Cornelio tuj tnom te Jope. Chꞌitktzen cypon cananxin, bix e jax Pedro naꞌl Dios tuj tcab cxoꞌlen jaaꞌ, tisenx ttenxin nnaꞌnxin Dios te chil kꞌij.
10Pero ya otktzen tzꞌoc takꞌ weyaj te Pedro. Taj tzunxin e waaꞌnxin. Joocꞌtzen nbint twaxin cubne, bix e cub kleeꞌ tuj twitz Pedro tisen tuj twitziyꞌ.
11E xiꞌ tcyeꞌyenxin ka e jket cyaꞌj tixsenle jilel tij el txakpaj tiꞌ jun manta ẍpoꞌn cycyaal ttxaꞌn.
12Bix e cuꞌtz twitz txꞌotxꞌ. Tujtzen tocxe cykil wik alimaj te cyaja tken, bix nimjil mintiiꞌ tken tisen lbaj bix cykil wik chꞌit. Octzen nimjil te tajlal kaꞌ tuꞌn t-xiꞌ cychyoꞌn judío.
13Bix e tbi Pedro jun yol. Tz̈i cyjulu:
—Pedro, weꞌwey. Byoꞌncꞌa kej jil alimaja. Chyon xsun ke jila―tz̈i Dios.
14Pero bix aj ttzakꞌbeꞌn Pedro:
—Taat, mlayxte, cuma kaꞌxsen t-xiꞌ chyetke, cuma kaꞌxsen tuꞌn tleya. Weya, tuj cykil nchunkꞌlal, bajxsen t-xaꞌ nwaaꞌnwe chꞌin tkaꞌyel tzꞌil tisenj luwe. Nuksam xsuna, taat―tz̈i Pedro.
15Bix e tzaj jyol juntl maj te Pedro:
—Pero baꞌn. Cuma alcyej o cub tbinchaꞌn Dios tuj sak, mixben toc tkbaꞌn tey te tzꞌil―tz̈i tzunj yol.
16Oxe maj tcyꞌi Pedro juꞌwa. Tetzen toxen maj, tzinenxsen e tzaj tkbaꞌn jyol te Pedro ka cxeꞌl tchyoꞌn Pedro cychuꞌljil, bix baꞌnte. Bix aj jaw meltzꞌaj manta cyuya alimaj tuj cyaꞌj.
17Yal te Pedro, nuk otk jaw tzpet-xin tiꞌj tcublen kleeꞌ tuj twitzxin. Nbisen tzunxin tiꞌj ti elpenina. Pero maatkxsen nbisenxin tiꞌj, tej cypon jxin tsanjel Cornelio tjaxin. Otktzen cykanenxin jaaꞌ taꞌ tja Simón, taaw jaaꞌ. Cwa cyponxin ttziꞌyen.
18Tejtzen cyponxin, bix e jaw s̈-inkexin:
—¿Jatzpa najla jxjal Simón tbi tzalu, jaxj xin n-oc te Pedro?―tz̈i tzunkexin.
19Pero tjaxte Pedro tuj tcab cxoꞌlen tposadaxin, nbisenxin tiꞌj twitziyꞌxin, bix e xiꞌ tkbaꞌn Espíritu Santo te Pedro:
—Cyeꞌyenx. At oxe xjal ma tzul te jyol tey.
20Weꞌwey, bix tcuꞌx cyiꞌj te cyeyꞌlcye. Ojtzen t-xiꞌ cytxcoꞌn jay, cutxa cyuya. Miꞌn baj tcꞌuꞌja, cuma inayenx ma chix chkꞌonte tey te cyuya―tz̈itzen Espíritu Santo te Pedro.
21Bixsen e cuꞌtz Pedro cyiꞌ tsanjel Cornelio, bix e xiꞌ tkbaꞌnxin:
—Key taat, inayen wej xjal tzin cyjyoꞌna. ¿Titzen cyaja?―tz̈i Pedro.
22Bix aj cytzakꞌbeꞌnxin:
—Jaj xin kcawela Cornelio ma tzaj chkꞌonte keya. Jxin Cornelio jaxin cawel tibaj syent soldado, bix baꞌn xjal texin. Tzin tbiꞌnxin tyol Dios. Ja xsunxin jun xjal ebin cyuꞌn xjal judío tuj tnom te Cesarea. N-oc takꞌxin cye xjal, bix n-oc ke cycꞌuꞌj xjal tiꞌjxin. O tiikꞌxin jun yol te jun sanjel te Dios tuꞌn ttzaj txocbaja tuꞌn t-xiꞌy tjaxin tuj tnom te Cesarea, bix tuꞌntzen toc tbiꞌnxin alcyej cxeꞌl tkbaꞌna texin―tz̈itzen ke tsanjel Cornelio te Pedro.
23Bix ocx ttxcꞌon Pedro ejeeꞌxin tunwen. Tuya tzunxin ewtanakexin te koniyan. Tetzen juntl kꞌij bix e xiꞌ Pedro cyuyaxin tuj tnom te Cesarea, bix e xiꞌ cabtl ocslal te Jope te cyuyaxin.
24Texetzen juntl kꞌij tpon Pedro tuj Cesarea cyuya ke tuyaxin. Otktzen tzꞌoc tchmoꞌn Cornelio ke te tja bix ke tuya. Nchi ayon tzunxin cyiꞌ Pedro.
25Tejtzen tocx Pedro twitz tpeꞌn Cornelio, bix etzxin clul texin, bix e cub majexin twitz Pedro te tyecꞌbil tcꞌuꞌjxin.
26Pero bix e jaw tiiꞌn Pedro jaxin. Tz̈i Pedro cyjulu:
—Weyꞌtza. Yaaꞌn Dios kenwe. Xjal kenwe tisenxj tey―tz̈i Pedro.
27Tejtzen tbaj kꞌolbenxin Pedro te Cornelio, bix ocxxin tunwen, bix ocpan nojxin tiꞌ nim xjal cychmon cyiib tunwen.
28Bix e xiꞌ tkbaꞌnxin:
—Amale yaaꞌnt judío ke cyey, cytzkiꞌna ka kaꞌ toc cychmon cyiib xjal judío tisen keya cyuya xjal yaaꞌn judío, mitetpe tuꞌn cyocx tunwen tuj cyja. Kaꞌxsen toc tkꞌon tiib jun xjal judío cyuya xjal yaaꞌn judío, mitetpe te kꞌolbelcye. Yaltzen tisenj weya, Diostzente ma tzaj yeecꞌante tuj chicꞌaj mintiiꞌ tuꞌn toc nkꞌoꞌn tbi jun xjal te tzꞌil.
29Bix cuma juꞌ toclen t-xnakꞌtzaꞌn Dios inayen, ma chin tzajwe tuꞌn cykil ncꞌuꞌj, bix lwewaxsen ẍin tzajwe tej ẍi pon tsanjela. Yaltzen jaꞌlewe, ¿titzen cyaja we?―tz̈i Pedro cyej xjal at tja Cornelio.
30Bix aj ttzꞌakꞌbeꞌn Cornelio:
—Jaꞌla tcyaaꞌn kꞌij tisenx ja hora lu, in tin nja tzalu, nchin naꞌn Dios, tej tcub jlet jun xjal nwitz. Tzinxsen ntꞌililin t-xbalen.
31Jatzen xjalj e tzaj kbante we: “Cornelio, matzen tbi Dios ka nnaꞌna Dios, bix ma tzꞌoc tcyeꞌyenxin jtanema cyiꞌ mebe.
32Jatzen Dios ctzaal kbante tey tuꞌn tyolelxin Simón, juntl tbixin Pedro. Entonces chkꞌonxsen tsanjela te txcolte Pedro tuj tnom te Jope, tuꞌn tul tzalu. Jatztzen taꞌ Pedro tja jxin Simón, kesl te tzꞌuꞌn, jxin tcub tja ttziiꞌ mar,” juꞌtzen tten ttzaj tkbaꞌn jtsanjel Dios we.
33Entonces tzinxix nbaj juꞌwa, tzin nxiꞌ nchkꞌoꞌnj oxe xjal te txcol tey. Bix yaltzen tey, matzen tbinchey jun xtalbil wiꞌj tiꞌj ma tzaja. Lu tzuna lu, bix lutzen koꞌ etoꞌ twitz Dios, tuꞌn toc kbiꞌna tyola. Laꞌ ti toc tuꞌn Dios tuꞌn ttzaj tkꞌumena keya―tz̈i Cornelio te Pedro.
34Tejtzen toc tbiꞌn Pedro juꞌwa, bixsen akꞌxin kbal tyol Dios cyexin. Tz̈itzen ke tyolxin cyjulu:
—Key taat, jaꞌlewe ma tzꞌel nniyꞌ tiꞌj te Dios min tzꞌoc tcyeꞌyen texin ti xjalel. Te Dios mintiiꞌ texin toclen tiꞌj ka judío jun xjal bix ka min.
35Ja te xinj toclen tiꞌj, ja jun xjal n-oc ebinte texin, bix ja jun baꞌn tcub tbinchen. Tuj alcyex ja tnom tiꞌj, jun xjal juꞌwa, baꞌnte tuj twitz Dios.
36Yaltzen jaꞌlewe, jtyol Dios e cyaj tkꞌoꞌn jatxe nejl cyuyaj xjal te Israel, ja tej ttz̈yal chi temela xjal tuya Dios, bix ja te ttz̈yal jbaꞌn ttema jun xjal tuꞌnj xin Scyꞌoꞌn tuꞌn Dios, jxin Jesús. Ja te Jesús taaw cykil xjal twitz txꞌotxꞌ, yaaꞌn nuk cye judío.
37Tej xin Jesús lu, cytzkiꞌnxixa tikꞌch o baj, jatxix tej nkba Juan Bautista tyol Dios bix tej nbautizara cye xjal, cykilj e baj tuj ttxꞌotxꞌ Galilea bixtl mas e baj yaj tuj ttxꞌotxꞌ Judea.
38Ja te Jesús, tej tnom te Nazaret, cytzkiꞌntl tzuna ti tten tzaj tkꞌoꞌn Dios nin Espíritu Santo te texin. Bix cytzkiꞌntl tzuna ti tten jakꞌch iꞌya Jesús te kꞌanel bix te onl xjal, bix te coꞌpl xjal tuj tkꞌab biman. E tenxte Dios tuya Jesús.
39Cytzkiꞌn tzuna, bix keya, ejooꞌya t-xel Jesús, oxexsen tzꞌoc kcyeꞌyena tuya tbakꞌ kwitza tikꞌch o bint tuꞌn Jesús, tuj tnom te Jerusalén, bix tuj cytxꞌotxꞌ judío. Bix o kila nimxsen takꞌ iꞌya Jesús tej tbyet twitz cruz.
40Pero tej tcyimxin, e jatz titzꞌjsaꞌn Dios jaxin juntl maj, te toxen kꞌij, tuꞌntzen tjaw jlet-xin juntl maj.
41Min ul jlet-xin tuj chicꞌaj juntl maj cywitz cykil xjal, sino nuk kwitz keya, ejooꞌya t-xel Jesús, bix juuntl xjal. E waaꞌn koꞌya, bix e wcꞌana tuyaxin juntl maj tej tjatzlen itzꞌjtlxin. Ejooꞌ keya tstiwa ka o jatz itzꞌj Jesús juntl maj tej tcyimlenxin. Tetzen juꞌ e scyꞌeta koꞌya tuꞌn Dios nejl.
42Bix e xiꞌ tchkꞌoꞌn Jesús ejooꞌya te kbalte ka nuk jacꞌa Jesús o tzꞌoc tajwalel tuꞌn Dios te binchal stis cyibaj cykil xjal, cyimne cyuyax kej iꞌtz. Klaꞌ alcye jun kꞌij.
43Tiꞌj tzunj xin Jesús lu e yolena ke tyolel Dios. E cyaj cytzꞌiꞌbenxin ka nuk tuꞌnxin baꞌn tbaj twiꞌ til jun xjal, ka ma tzꞌoc ke tcꞌuꞌj xjal tiꞌjxin te junx maj—juꞌtzen tten tyolen Pedro tuya Cornelio, ke tuyaxin, bix ke te tjaxin.
44Maatkxsen nyolen Pedro, tujx naj tul Espíritu Santo cyibaj xjal.
45Toctzen cycyeꞌyen otk txiꞌ kꞌoꞌn Espíritu Santo cye jxjal yaaꞌn judío, e jawxsen kleeꞌ kej tuya Pedro, ocslal judío, cuma min otk tziyꞌ tuj cycꞌuꞌj ka baꞌn toc kꞌoꞌn Espíritu Santo cyej xjal yaaꞌn judío.
46Ti e baj cyej xjal otk tzul Espíritu Santo cyibaj, bixsen akꞌke yolel tuj juntl wik yol mixbix cyuꞌn. Bix juꞌx otk baj cye xjal judío tuꞌnx Espíritu Santo nejl. Ja tzunj tuj cywitz judío jun nim techlal otk takꞌ Dios cye xjal yaaꞌn judío. Bix e xiꞌ cykꞌoꞌn chjonte te Dios, bix e xiꞌ tkbaꞌn Pedro:
47—Kej xjal lu yaaꞌn judíoke, pero ma cybi Jesús tisenj keya, bix ma cyiikꞌ Espíritu Santo tisenxj kewa. Baꞌna atet ti pjel tuꞌn oj cybautizarj―tz̈i Pedro cye tuya.
48Entonces bix e xiꞌ tkbaꞌn Pedro te Cornelio bix cye tuya:
—Ke cyey xjal chi bautizarjela, tuꞌntzen telniyꞌ ka tuya Jesús eteꞌy―tz̈i Pedro.
Bix e cycuya xjal. Yajtltzen bix e cytxocxin Pedro tuꞌn ttenxin cyuyaxin cabtl kꞌij te xnakꞌtzalcye mas tiꞌj tyol Jesús.
Who We AreWhat We EelieveWhat We Do
2025 by iamachristian.org,Inc All rights reserved.
