HEBREOS 1 - Mam of Todos Santos -- Guatemala Unicode

Ma tzaj tkbaꞌn Dios tyol ke tuꞌn Tcwalxin

1Tuj tyem ootxa Dios e kꞌumente cye ke kxeꞌchel nim maj bix chꞌimacꞌa tten. Cyuꞌntzen ke tyolelxin e tkbaꞌxin.

2Yaltzen tuj jtyem te jaꞌlewe, tuꞌn Tcwalxin o cyaj tyolenxin ke te junx maj. Bix tuꞌn Tcwalxin e tbincha Dios cykilca at twitz txꞌotxꞌ bix twitz cyaꞌj. Tetzen te Tcwalxin o cyjaꞌ tkꞌoꞌnxin cykilca tuj tkꞌab, bix o tzꞌocxin te Taaw tibaj cykilca twitz txꞌotxꞌ.

3Tisen tken kꞌij tzin techlaꞌn tiiꞌn tzunj kꞌij, juꞌtzen Tcwal Dios tzin techlaꞌn te ke tiiꞌn jawnex tnaabl bix tipemal bix tbanel Dios. Ja tzunxin kꞌilte te cykilca tuj tumel tuꞌn tipemal tyolxin. Ja tzunxin e cyim tuꞌntzen ttxjonte kil, bix o ponxin tuj tmankꞌab Dios tuj cyaꞌj te cawel tuya Dios.

Mas nim toclen tcwal Dios cywitz ke ángel

4Attzen juun xjal cyxola ncub cybisena tiꞌj ka jaj tley Moisés kꞌoꞌn cye ke kxeꞌchel mas nintzaj twitzj te Jesús jaꞌlewe, cuma ejeeꞌ tsanjel Dios tuj cyaꞌj e tzaj kꞌonte. Pero ja te Tcwal Dios mas jawnex twitzj cyej tsanjel Dios tuj cyaꞌj, bix juꞌ tzunj mas tzꞌakl tyolxin. ¡Jawnexsen jun tbi toclenxin!

5Ktzkiꞌn mas jawnex Tcwal Dios twitzj cye tsanjel Dios tuj cyaꞌj cuma nuk te Tcwal e cyjaꞌ tkꞌumen Dios ja yol lu: “Jaꞌlewe cꞌoquel nkꞌoꞌn tbiy te Ncwal, bix tuya jawnex taakꞌena.” Juꞌ e tkba Dios te Tcwal jatxe nejl, yaaꞌn te jun ángel. Bix juꞌx min e tkꞌumexin tuj tyolxin tiꞌj jun ángel ja yol lu: “Inayena Tmana, bix jay Ncwala,” tz̈i tyol Dios.

6Bix juntl. Oj ttzaj tiiꞌn Dios Tcwal twitz txꞌotxꞌ juntl maj tuꞌn toc te tneel cawel, cxeꞌl tkbaꞌnxin: “Enterake tsanjel Dios tuj cyaꞌj chi cwel maje twitz Tcwal Dios,” tz̈i tyol Dios.

7Bix cyiꞌj tzunj tsanjel Dios tuj cyaꞌj tz̈i Dios: “Tisen jun cykꞌiꞌk cꞌulel bix qꞌuiyel bix tisen jun tken kꞌakꞌ cjawel julen bix cwel baj, juꞌtzen ke ángel nuk chi ulel ajx yecꞌl cyiib,” tz̈i tyol Dios.

8Pero tiꞌtzen Tcwal Dios, tz̈i Dios te Tcwal: “Tujtzen tkꞌukꞌbila, jay Dios, ccawela te junx maj. Jun tcawbila jaxse jun cawbil jiquen.

9Bix te junx maj o tjoya jun baꞌn bix o tzꞌel t-xooꞌna jun kaꞌ. Juꞌ tzunj ma scyꞌeta te cawel wuꞌn. Juꞌ tzunj te tey at mas tzalajebl cywitz ke ángel,” tz̈i Dios te Tcwal, tz̈i tyol Dios.

10Bix at juntl e kbet nejl. Tuj tyol Dios nkꞌumente: “Tz̈i Dios te Tcwal: ‘Jay, Taaw, ja tzuna e binchante cykil twitz txꞌotxꞌ tuj tneel, bix tuya tkꞌaba e binne cykil twitz cyaꞌj.

11Pero ja tzunkej e tbinchay chi naꞌl, twitz txꞌotxꞌ tuya cyaꞌj, pero jay, mintiiꞌ tbajlela. Cuma cykil kej e tbinchay tisen xbalen chi tiil.

12Cwel buchj txꞌotxꞌ tuya cyaꞌj tisen jun xbalen kꞌanak mintiiꞌ cꞌajbeletl, bix il tiꞌj cchꞌixpetel. Pero tey, jaxa te junx maj. Mlay pon baj ttyema, bix mlay chꞌixpeta,’ tz̈i Dios te Tcwal,” tz̈i tyol Dios.

13Dios bajx tkbaꞌ te jun tsanjel tuj cyaꞌj tisen e xiꞌ tkꞌumenxin jun maj te Tcwalxin. Tz̈i cyjulu: “Kequey tuj nmankꞌaba, ojxetzen tcub nkꞌoꞌna tjakꞌ tkena kej xjal chiꞌlel tiꞌja bix cycyꞌi tuꞌn tcawena cyibaj,” tz̈i Dios te Tcwal, tz̈i tyol Dios.

14¡Min! Ke cye ángel nuk espírituke nchi ajben te onlte Dios. Yaaꞌn cawelke tisen Tcwal Dios. Jatzen Dios nxiꞌ kꞌoncye te onel bix cꞌojlal cyej xjal ocslal.