APOCALIPSIS 16 - Mam of Todos Santos -- Guatemala Unicode

Kej wuuk lak tcuꞌx nimxsen tchiyonel cyuj

1Bix e xiꞌ nbiꞌna jun yol cyiw etz kꞌajt tuj tja Dios. E xiꞌ tkbaꞌn cye wuuk ángel:

—Cu txiꞌy bix cykonxa twitz txꞌotxꞌ jtcuꞌx tuj wuuk lak, jatzen tkꞌoj Dios―tz̈i yol.

2Bix e xiꞌ tneel ángel, bix e xiꞌ tkoꞌn twitz txꞌotxꞌ jtcuꞌx tuj lak. Bix e takꞌ jun wik yabel cyakcꞌun cyiꞌ xjal. Nimxsen chiyonel te cyej xjal toc techel jil jil ul jlet cyiꞌj cyxumlal bix kej e naꞌn dios twitz tsantjil.

3Bix e xiꞌ tkoꞌn tcab ángel jtcuꞌx tuj lak tibaj mar. Bix oc mar te tz̈iyꞌ tisen ttz̈qꞌuel jun cyimne, bix e baj cyim cykilca kej najl tuj mar.

4Bix e xiꞌ tkoꞌn toxen ángel jtcuꞌx tuj lak cyibaj nimaꞌ bix cyibaj twiꞌ aꞌ. Bix ocke te tz̈iyꞌ.

5Bix e xiꞌ nbiꞌna tyol jtsanjel Dios tuj cyaꞌj cꞌojlal cykilca aꞌ. E xiꞌ tkbaꞌn:

—Jay Dios xjan, ata jaꞌlewe bix ma tena te junx maj, jiquen jma bint tuꞌna. Jiquen taꞌy tuꞌn t-xiꞌ tkꞌoꞌna tz̈iyꞌ cye xjal tuꞌn t-xiꞌ cycꞌaꞌn,

6cuma ma tzꞌel cytz̈qꞌuel ocslal bix ke tyolela cyuꞌn. Juꞌ tzunj, ma txiꞌ tkꞌoꞌna tz̈iyꞌ tuꞌn t-xiꞌ cycꞌaꞌn te t-xel, cuma cyilx jlu―tz̈i ángel taaw aꞌ.

7Bix e xiꞌ nbiꞌna tyol j-ángel cꞌojlal altar. E xiꞌ tkbaꞌn:

—Jax tuꞌna tej tbint juꞌwa tuꞌna, jay Kman Dios te cykil tipemal. Jiquen taꞌy tuꞌn tcub tkꞌoꞌna cycastiwa xjal tuꞌnj cyoc nimaꞌ bix cywiꞌ aꞌ te tz̈iyꞌ―tz̈i ángel cꞌojlal altar.

8Bix e xiꞌ tkoꞌn tcyaaꞌn ángel jtcuꞌx tuj lak tiꞌj kꞌij, bix e xiꞌ kꞌoꞌn tipemal kꞌij tuꞌn cytzꞌeyꞌ ke xjal tuꞌn tkꞌakꞌel.

9Bix e baj tzꞌeyꞌ ke xjal tuꞌn nim cyak. Pero min e cyaj cykꞌoꞌn xjal cyil tuꞌn tjaw cynimsaꞌn ja Dios. Nuk oꞌcx oc ten yolel kaꞌ tiꞌj Dios, jatzen Dios at tipemal tuꞌn tkꞌonte kej xitbil lu nimxsen cychiyonel.

10Bix e xiꞌ tkoꞌn tjweꞌyan ángel jtcuꞌx tuj lak tibaj tkꞌukbiljil jil ul jlet, jatztzen ncawen. Biꞌx e cyaj ten tuj klolj cykilca lugar jaaꞌ ncawen, bix e cub cytxꞌaꞌn xjal cyaakꞌ tuꞌn takꞌ qꞌuixcꞌaj.

11Bix e jaw yolen kaꞌ tiꞌj Dios tuj cyaꞌj tuꞌn takꞌ cyqꞌuixcꞌaj bix cyakcꞌun cyiꞌj. Min e cyaj cykꞌoꞌn cybinchben kaꞌ.

12Bix e xiꞌ tkꞌoꞌn twukakan ángel jtcuꞌx tuj tlak. E xiꞌ tkoꞌn tibaj jnintzaj nimaꞌ Eufrates tbi. Biꞌx e tzkij nimaꞌ, tuꞌntzen tajben cye cawel te ocne tuꞌn cyiyꞌx tibaj nimaꞌ cyuya soldado.

13Bix e wila oxe biman etz tuj ttzi dragón bix tuj ttzi jil kaꞌ bix tuj ttzi ẍtakꞌ tyolel jil kaꞌ. Cycyeꞌnc biman tisen wooꞌ.

14Biman ke cyoxele, bix nchi yeecꞌan nimxsen cyipemal. Bix nchi pon cyuya cawel tuj cykilca twitz txꞌotxꞌ, tuꞌntzen toc cychmoꞌn ejeeꞌ, tuꞌntzen cykꞌojl cawel cyuya soldado tiꞌj Dios te cykilca tipemal tuj jkꞌij oj tchicꞌajax at mas tipemal Dios.

15Cꞌoquel cycꞌuꞌja tiꞌj ja tyol Jesús lu: “Chin ul meltzꞌaj jun kꞌij mintiiꞌ tumel, jacꞌaj min chi ayon xjal wiꞌja, tisen min chi ayon xjal tiꞌ jun alakꞌ oj tocx tuj cyja te koniyan. At t-xtalbil Dios cyibaj kej xjal nchi ayon wiꞌja bix binne cyten, yaaꞌn tisen jun xjal ẍbikl tten oj tul alakꞌ bix tzul tchꞌixew,” tz̈i Jesús.

16Yaltzen cyej biman, oc cychmoꞌn ke cawel cyuyax cysoldado tuj jun lugar Armagedón tbi tuj yol hebreo.

17Jatzen te twuukan ángel, e xiꞌ tkoꞌn jtcuꞌx tuj lak tuj cykꞌiꞌk. Bix etz jun tkꞌajkꞌajel yol cyiwxix tuj tja Dios tuj cyaꞌj, jatztzen taꞌ tkꞌukbil Dios. E xiꞌ tkbaꞌn:

—Oꞌcx xsunj. Ma pon tumel tuꞌn tbaj cykilca―tz̈i Dios.

18Bix e tzaj tken kꞌancyok tuyax nim s̈itz̈ꞌ bix tuyax ntininin kꞌancyok. Bix e tzaj jun nintzaj xcyaklajnab. Bajx tzaaꞌ jun xcyaklajnab cyiwxsen tisen ja lu jatxe tej tbint xjal twitz txꞌotxꞌ. Jawnexsen jun xcyaklajnab, tuya nimxsen tipemal.

19Biꞌx e cub pax jjawnex tnom. Te oxe eꞌla. Bix e cub xitj cykilca tnom twitz txꞌotxꞌ. Cykilcaj til tnom te Babilonia ul tuj tcꞌuꞌj Dios, bix e tzaj nim tkꞌoj Dios tibaj. Tisen jun vaso nojnexsen tuya vino bix n-el koj, juꞌtzen ttena jtkꞌoj Dios e tzaj cyibaj kaꞌ aj Babilonia.

20Cykilca kej neeꞌ chꞌin txꞌotxꞌ tmij mar e baj cyuyax cykilca witz.

21Bix e tzaj jun jawnex skbaken twitz cyaꞌj tuꞌn tcub cyibaj xjal. Jun syent libra talel juun twitz skbaken. Bix e jaw yolen ke xjal kaꞌ tiꞌj Dios tuꞌnj skbaken, cuma nimxsen jun skbaken.