LOS HECHOS 14 - Mam of Todos Santos -- Guatemala Unicode

Pablo tuya Bernabé tuj tnom Iconio

1E pontza ke Pablo tuya Bernabé tuj tnom te Iconio. Tejtzen cyponxin, bix ocxkexin tuj camon jaaꞌ cye judío. Jatztzen e yolenakexin tuya nim cyipemalxin. Nimxsen xjal ocslante cyyolxin, bix oc cybiꞌn. At xjal judío, bixsen at xjal griego.

2Pero attzen cab xjal judío min e cub cyiꞌj, bix akꞌke yolel kaꞌ cyiꞌ Pablo tuya Bernabé, tuꞌn tcyaj wiꞌt cykaꞌyelxin cywitz xjal griego.

3Juꞌ tzunj e cwaꞌ tuj cywitzxin tuꞌn cytenxin tuj Iconio te nim kꞌij. Tuya nim cyipemalxin bix nim toc ke cycꞌuꞌjxin tiꞌ Dios nchi yolen tzunxin tiꞌ t-xtalbil Dios. Bix e tzaj tkꞌoꞌn Dios nim cyajwalelxin tuꞌn tcub cybinchaꞌnxin tikꞌch techlal, tuꞌntzen t-xiꞌ cyyeecꞌanxin ka jax cyyolxin.

4Pero tujtzen cynicꞌbil judío bixsen ke cyyol t-xel Jesús, bix e cub pax tnom. At cab oc ebinte cyyol judío, bix at cabtl oc ten cyuya Pablo tuya Bernabé.

5Cwaxsen tbint cyyol cycawel griego tuya cycawel judío tuꞌn cyoc yaset-xin bix tuꞌn cycub peekꞌet-xin tuya xak.

6Pero te Pablo tuya Bernabé, e cybixin tpocbal ti jilel nbaj bint, bix e bint cyuꞌnxin tuꞌn cyetzxin tuj Iconio, bix ex okkexin cubne tuj tnom te Listra bix tnom te Derbe, caꞌba tnom te ttxꞌotxꞌ Licaonia.

7Tuj tzunj nim tnoma bix ke tnom tiyꞌ ttxaꞌn bix akꞌkexin kbal tpocbal jbaꞌn.

Oc xeet Pablo tuya xak tuj tnom Listra

8Tuj tzunj tnom te Listra najl junxin xjal cox. Jatxe titzꞌjlenxin bajx jawa bet-xin jun maj. Mintiiꞌ tipenxin cyuj tkenxin.

9Attzen jun kꞌij nabiꞌnc tzunj xin cox cyiꞌ tyol Pablo. Bix akꞌ twitz Pablo tiꞌjxin, bix e tnaꞌ Pablo ka waꞌlec tcꞌuꞌjxin cyiꞌ tyol Pablo, bix otkxsen tzꞌoc ke tcꞌuꞌjxin tiꞌ Jesús ka baꞌn tul tnaablxin tuꞌn Jesús.

10Entonces bix cyiw tuj twiꞌ Pablo t-xiꞌ tkbaꞌn:

—Taat, weꞌwey jiquen cyibaj tkena―tz̈i Pablo.

Ya tujx naj tjaw lipen jxin cox, bix akꞌxin betel.

11Tejtzen toc tcyeꞌyen tnimal xjal ti jilel otk bint tuꞌn Pablo, bix akꞌke xjal s̈-il tuj cyyol tuya nim tzalajebl:

—¡Ke dios ma cub cychꞌixbeꞌn cyiib te xjal, bix lutzen ke lu!―tz̈itzen ke xjal.

Pero te Pablo tuya Bernabé, min e yolenkexin tuj cyyol aj Licaonia. Min el cyniyꞌxin tiꞌj.

12Pero bix akꞌ elelx cywiꞌ xjal tuꞌn cykleeꞌbatz. Tz̈itzen ke xjal ka ja Bernabé dios Júpiter, cycawel dios. Yaltzen te Pablo, jatzen dios Mercurio, cysanjel niyꞌtl dios, cuma jatzen Pablo mas nim e yolen.

13Tuj be n-octz ttxaꞌn tnom te Listra, at jun tja dios jaaꞌ nchi naꞌna xjal dios Júpiter tuya cycostumbre. Tuj tzunj tja Júpiter attzen junxin pala te binchalte cyoybil. Tuj tzunj cyoybilxin nbaj cyabechenxin toro, bixsen ncub tbyoꞌn jxin pala ejeeꞌjil tuꞌn cyxiꞌ oyetjil te Júpiter. Tej tbinte texin ka otk jaw jlet Júpiter tuj Listra, bix e xiꞌ ajkelenxin te kꞌil cabjil wacẍ abechen, bix e tzaj tiiꞌnxin ejeeꞌjil jaaꞌj tcwaꞌ Pablo tuya Bernabé.

14Toc cycyeꞌyen ke toro, bix el cyniyꞌxin tiꞌj ti jilel tcublel bint cyuꞌn xjal. Teltzen cyniyꞌxin tiꞌj, bix el cyrotenxin cyiꞌjxin, tuꞌn t-xiꞌ cyyeecꞌanxin cye xjal ka yaaꞌn baꞌn tuj cywitzxin. Bix ocxkexin cyxol tnimal xjal te s̈-il cyxol xjal. Tz̈itzenke cyjulu:

15—¿Tuꞌn tiken ncwaꞌ cybinchaꞌna juꞌwa? Yaaꞌn tumel, cuma xjal koꞌya tisenxj cyey. Yaaꞌn Dios koꞌka. Yaaꞌn ti ma ko tzaaꞌ keya cyxola jaj tuꞌn tbaj twiꞌj nchi naꞌna cydiosa, cuma mintiiꞌ baꞌn tajbeꞌna. Kajka tuꞌn tcyaj cykꞌoꞌna kej cydiosa cyimnewe, tuꞌn cyajbena te Dios iꞌtz. Ja texin e cub binchante tikꞌch jilel, cyaꞌj, mar, twitz txꞌotxꞌ, bixsen tikꞌch jilel at.

16Cyuj tyem ootxa e naꞌnkecye xjal ke dios tisenx cye cycostumbre, bix e tzakpite Dios ejeeꞌ. Min cytzkiꞌn alxix tej jaxxix Dios.

17Pero at-x tumel techlal ka at-x jun Dios jaxxix. Tisen tzunj, ntzaj tkꞌoꞌnxin jbal, nim twitz awal, nimxsen waabj, ttz̈yal, bix tikꞌch jbaꞌn. Ejeeyla tzunja tstiwa tiꞌj ka jax at Dios―tz̈itzenke Pablo tuya Bernabé.

18Pero mitetpe cyuya jyol juꞌwa, mix e bina tuꞌn tcub cywaban xjal tuꞌn t-xiꞌ oyet kej jil wacẍ cyexin.

19Maatkxsen eteꞌ Pablo tuya Bernabé cyxol jxjal, ya npon jun clojxin judío otk tzajxe tuj tnom te Antioquía Pisidia bixsen Iconio. Ejeeꞌj xin eteꞌcx yajlal cye Pablo tuj tneel. Bix e cub cyiꞌ xjal cyuꞌnxin tuya cyyolxin tuꞌn cyoc meltzꞌaj xjal tiꞌ Pablo tuya Bernabé, bixsen e jaw jun nim kꞌoj, bix e jaw meltzꞌaj ke xjal cyiꞌjxin tuꞌn tcub cykꞌoꞌn xjal ja Pablo tuya xak. Bix iyꞌ tuj cycꞌuꞌj xjal ka otk byet-xin, bix ex kitet-xin tiꞌjxe tnom.

20Pero ke ocslal te Listra oc cysutꞌen cyiib tiꞌjxin. Pero maatkxsen eteꞌc xjal tiꞌjxin, bix e jaw Pablo, bix ocx meltzꞌajxin tuj tnom juntl maj.

Tetzen juntl kꞌij bix iyꞌ Pablo tuya Bernabé tuꞌn cyponxin tuj jun nka tnom Derbe tbi.

21Tejtzen cyponxin tuj tnom te Derbe, bix akꞌkexin kbalte jbaꞌn tpocbal. Nimxsen xjal oc ocslante cyyolxin, bix ocslan ke xjal Jesús. Tejtzen tpon baj twiꞌ cyxnakꞌatzxin tuj tnom te Derbe, bix ajtz meltzꞌajkexin tuj Listra, bix tuj Iconio, bixsen tuj Antioquía, bixsen tuj txꞌotxꞌ te Pisidia.

22Cyuj tzunj lugara nukxsen juꞌ iyꞌkexin nimsalec cycꞌuꞌj ocslal. Bix e xiꞌ cykbaꞌn cyjulu:

—Ilx tiꞌj chi cwel tena tuj tumel twitz Jesús, cuma tzulxte qꞌuixcꞌaj nuk tiꞌjcꞌa Jesús. Miꞌn cyaj cycyeꞌyen xina. Laꞌ alcye jun kꞌij ko temel tuyaxin tuj tcawbil Dios―tz̈itzen ke t-xel Jesús cye ocslal te nimsalcye.

23Cyuj tzunj tnoma e xaꞌ cyjyoꞌn Pablo tuya Bernabé cab xjal te nincꞌul bix cꞌojlal cyxol ocslal. Bix e naꞌnke t-xel Jesús, bix e cub cyyoꞌnxin weyaj, bixsen e cub cykꞌoꞌnxin cykꞌabxin tibaj cywiꞌ kej xjal otk chi etz cyscyꞌoꞌnxin cawel cyxol ocslal, tuꞌntzen at cyajwalelxin, bix tuꞌntzen cyxiꞌ kꞌoꞌnxin tuj tkꞌab Jesús. Tz̈i tzunkexin cyjulu:

—Jaxettzen Jesús cꞌojlalte cyey, cuma ma cyocsla xina―tz̈itzen Pablo tuya Bernabé, bix etzkexin cyuj tnom.

Tej cypon Pablo juntl maj tuj Antioquía

24Bix iyꞌkexin tuj ttxꞌotxꞌ Pisidia, bix e ponkexin tuj ttxꞌotxꞌ Panfilia, jaaꞌ taꞌ jtnom te Perge.

25Tujtzen tnom te Perge e yolenkexin tiꞌ tyol Dios cye xjal. Yajcꞌatltzen bix e xiꞌkexin tuj jun nka tnom te Atalia tuj mlaj txꞌotxꞌ.

26Bixsen tuj Atalia ocxakexin tuj jun barc tuꞌn cyiyꞌxin tuj mar, tuꞌn cyponxin juntl maj tuj Antioquía, jaaꞌxj otk chi exaxin. Antioquíatzen, jatzen jun tnomj jaaꞌj otk chi naꞌna xjal Dios cyiꞌ Pablo cyuya ke cyuyaxin, tuꞌn t-xiꞌ tcꞌojlaꞌn Dios ejeeꞌxin tuj be. Bix ya otk chi pon meltzꞌajxin, cuma otk pon baj cyaakꞌenxin.

27Tejtzen cypon Pablo tuya Bernabé, bix oc cychmoꞌnxin cykil ke ocslal tuj tja Dios, bixsen e baj cykbaꞌnxin tikꞌch e baj cyexin tuj be, ti tten toc tonen Dios ejeeꞌxin, bix ti tten tkꞌontete Dios tuꞌn cyiikꞌen jxjal yaaꞌn judío ja Jesús.

28Bix e ten ke Pablo tuya Bernabé cyuya ocslal nim tyem.