1Key ocslal n-oc cyakꞌa weya, ja tcab uꞌj lu nxiꞌ ntzꞌiꞌbena te cyey tuꞌn tcyaj nkꞌumena te cyey tiꞌj xnakꞌtzbil jaxxix, tuꞌntzen t-xiꞌ cyiiꞌna jun cynaabla tzꞌaklxix.
2Miꞌn tzꞌel cyyol jxin xjan tyolel Dios te ootxa tuj cycꞌuꞌja, bix jyol e tkba jxin Kaaw, Clol ke, bix jkꞌiꞌn cyuꞌnj xin t-xel Jesús cyey.
3Ilxix tiꞌj qꞌuelel cyniꞌya tiꞌj cyuj mancꞌbil kꞌij chi ul juntl wik xjal te xmucchalte cyey cuma nchi ayona oj tul meltzꞌaj Jesús. Cuma nuk tikꞌch cyajbil yaaꞌn baꞌn cbinel cyuꞌn.
4Cykbaꞌ cyjulu: “Tzin tkbaꞌn tyol Dios tzul meltzꞌaj Cristo, pero nuk ten. ¿Ti ma baj tiꞌj yol lu? Jatxe tej cycyim t-xel Jesús, ttenx cykilca tisex tej tbint twitz txꞌotxꞌ,” tz̈i cybel.
5Pero yaaꞌn jax cyyol ka ttenx cykilca jatxe tej tbint twitz txꞌotxꞌ, cuma el cyiiqꞌuen e cub xiten Dios twitz txꞌotxꞌ jun maj. Tej tbinchante Dios twitz cyaꞌj bix twitz txꞌotxꞌ tuya tyol tuj tneel, e xiꞌ tkbaꞌn tuꞌn tcub pax aꞌ, tuꞌn tcyaj jun tkiyꞌ aꞌ te jawne tibajxe cyaꞌj, bix tuꞌn tcyaj juntl tkiyꞌ aꞌ te cubne.
6Tuꞌnj aꞌ e cyaj tibajxe cyaꞌj, e cub xiten Dios cykilca twitz txꞌotxꞌ tej tcyaj twitz txꞌotxꞌ tjakꞌ aꞌ.
7Jax juꞌx cwel xiten Dios twitz cyaꞌj bix twitz txꞌotxꞌ te jaꞌlewe. Tzyuꞌnke tuꞌnx tyol Dios tuꞌn cyocx tuj kꞌakꞌ oj tpon kꞌij tuꞌn cypon ke aj il tuj xkel twitz Dios.
8Key ocslal n-oc cyakꞌa weya, kape tuj cywitza nimxsen tyem nayon Kaaw tiꞌj tuꞌn tul meltzꞌaj. Pero tzꞌel cyniꞌya tiꞌj lu: Tuj twitz Kaaw, jun kꞌij junx taꞌ tisen jun mil jnabkꞌi, bix jun mil jnabkꞌi junx taꞌ tisen jun kꞌij.
9Miꞌn yajtl Cristo tuꞌn tjapan baj tuya jun yol tuꞌn tul meltzꞌaj, tisen tzin cykbaꞌn juun xjal, sino nayon cyiꞌja tuya pasensya. Tcyꞌixin tuꞌn t-xiꞌ jun xjal tuj il. Nuk oꞌcx tajxin tuꞌn cyajtz meltzꞌaj cykilca xjal tuya Dios.
10Jaxxixxsen tzul meltzꞌaj Kaaw, bix tzulxin jun kꞌij mintiiꞌ tumel, tisen jun alakꞌ chꞌinnchꞌe oj ntzaj te koniyan. Bix tuj tzunj kꞌij lu oj tul meltzꞌajxin, pjel twitz cyaꞌj tuya jun tkꞌajkꞌajel tisen oj najkelen tken kꞌakꞌ tuj cꞌul. Cwel patet ke cheꞌw tuyax xjaw tuyax kꞌij, bix pjel tzꞌeyꞌ twitz txꞌotxꞌ tuya cykilca at twitz txꞌotxꞌ.
11Key ocslal, il tiꞌj pjel cykilca juꞌwa. Juꞌ tzunj, mas baꞌn tuꞌn t-xiꞌ cynimana Dios bix tuꞌn tel cypaꞌn cyiiba tiꞌj yaaꞌn baꞌn.
12Cuma cwel tzꞌeyꞌ twitz cyaꞌj tuꞌn kꞌakꞌ bix cwel ulj cykilca cheꞌw bix xjaw bix kꞌij bix twitz txꞌotxꞌ tuꞌn kꞌakꞌ oj tul meltzꞌaj Kaaw, juꞌ tzunj, bincham cytena, bix tuya cykil cycꞌuꞌja chi ayona tiꞌj kꞌij oj tul meltzꞌaj.
13Pjel twitz cyaꞌj bix twitx txꞌotxꞌ te jaꞌlewe, pero ma cyaj tkbaꞌn Dios cbinel jun acꞌaj twitz cyaꞌj bix jun acꞌaj twitz txꞌotxꞌ, jaaꞌ tumel chi temel nuk oꞌcx kej baꞌn. Bix nko ayon tiꞌj lu.
14Key ocslal n-oc cyakꞌa weya, cuma nchi ayona cyiꞌj acꞌaj twitz cyaꞌj bix twitz txꞌotxꞌ, juꞌ tzunj cꞌoquel cycꞌuꞌja tiꞌj tuꞌn cytena tuj ttz̈yal oj tul meltzꞌaj Kaaw, bix tuꞌn sakxix taꞌ cyanema, tuꞌntzen mintiiꞌ chꞌin tzꞌil cyiꞌja bix mintiiꞌ cypaltela.
15Bix qꞌuelel cyniꞌya tiꞌj nayon Kaaw tuꞌn tul meltzꞌaj, tuꞌn t-xiꞌ tkꞌoꞌn amleꞌn cye kej xjal kxol minaꞌx tclet, tuꞌn cycyajtz meltzꞌaj tuya Dios.
Jax juꞌx Pablo n-oc takꞌ ke, o txiꞌ ttzꞌiꞌben cyey tiꞌj ti pjel, bix jyol e cub ttzꞌiꞌben, e kꞌoj te tuꞌn Dios.
16Tuj cykilca uꞌj nxiꞌ tsmaꞌn Pablo, nyolen tiꞌj ti tten oj tul meltzꞌaj Kaaw bix tuꞌn binne cytena oj tul. At juun tyol Pablo cyiw tuꞌn tel kniyꞌ tiꞌj, bix juꞌ tzunj, kej ocslal min tzꞌel cyniyꞌ tiꞌj bix yaaꞌn cyiwke tuj cyocslabl, nuk nbaj cymeltzꞌuꞌn kej yol lu, tisen nuk nbaj cymeltzꞌuꞌn yol tzꞌiꞌben tuj tyol Dios. Ka ma cheꞌx lpe tiꞌj ẍtakꞌ yol juꞌwa, chi xeꞌltzen tuj il.
17Key ocslal n-oc cyakꞌa weya, cuma ya n-el cyniꞌya tiꞌj cyaj xnakꞌtzal ẍtakꞌ tuꞌn cytzpeta tuj cyocslabla, juꞌ tzunj cycꞌojlanxix cyiiba, tuꞌntzen miꞌn baj cycꞌuꞌja tiꞌj jaxxix yol oj nchi ẍtakꞌen, tuꞌn miꞌn cyaj cycyeꞌyena cyocslabla.
18Mas baꞌn tuꞌn cytz̈ꞌiynen cytz̈ꞌiya tuj cyocslabla tuꞌnj tel cyniꞌya tiꞌj xtalbil o kꞌoj te cyey tuꞌn Clol ke, bix tuꞌnj tel cyniꞌya tiꞌ Kaaw Jesucristo. ¡Chi nimanxita tbi jaꞌlewe bix te junx maj! Juꞌxit ttena.
Who We AreWhat We EelieveWhat We Do
2025 by iamachristian.org,Inc All rights reserved.
