APOCALIPSIS 7 - Mam of Todos Santos -- Guatemala Unicode

Kej xjal cꞌoquel jun techel cyiꞌj cyxol aj Israel

1Tbajlenxitltzen jlu, e wila cyaja tsanjel Dios tuj cyaꞌj waꞌlke tuj cyaja plaj ttxaꞌn twitz txꞌotxꞌ. Nchi makon cywitzj cyaja wik cykꞌiꞌk nchi xumen twitz txꞌotxꞌ, tuꞌntzen miꞌn chi xumen twitz txꞌotxꞌ mi nuk twitz mar mi nuk cyiꞌ tzeeꞌ.

2Bix e wila juntl tsanjel Dios tuj cyaꞌj te ocne. E jaw jaaꞌ njatza kꞌij. Tej tjatz ángel, kꞌiꞌn jsello te Dios iꞌtz tuꞌn. Bix e jaw ts̈iꞌn cyiw cyiꞌj cyajatl ángel kꞌoꞌn cyipemal tuꞌn cyqꞌuixbisante twitz txꞌotxꞌ bix mar.

3E xiꞌ tkbaꞌn cye:

—Miꞌn cyqꞌuixbisaya twitz txꞌotxꞌ mi tiꞌ mar mi cyiꞌj tzeeꞌ, cuma tneelxix il tiꞌj cꞌoquel kkꞌoꞌna jtechel tibaj cywitz ke t-akꞌanal Dios, te yecꞌbil ka te Dioske―tz̈i ángel.

4Bix e xiꞌ nbiꞌna cyajlal kej otk tzꞌoc sello cyiꞌj. Ciento cuarenta y cuatro mil otk tzꞌoc sello cyiꞌj cyxol cykilca cyiyꞌjil aj Israel.

5Cyxol ke tiyꞌjil Judá at cablaaj mil oc sello cyiꞌj. Jax cyxol ke tiyꞌjil Rubén at cablaaj mil oc sello cyiꞌj. Jax cyxol ke tiyꞌjil Gad at cablaaj mil oc sello cyiꞌj.

6Jax cyxol ke tiyꞌjil Aser at cablaaj mil oc sello cyiꞌj. Jax cyxol ke tiyꞌjil Neftalí at cablaaj mil oc sello cyiꞌj. Jax cyxol ke tiyꞌjil Manasés at cablaaj mil oc sello cyiꞌj.

7Jax cyxol ke tiyꞌjil Simeón at cablaaj mil oc sello cyiꞌj. Jax cyxol ke tiyꞌjil Leví at cablaaj mil oc sello cyiꞌj. Jax cyxol ke tiyꞌjil Isacar at cablaaj mil oc sello cyiꞌj.

8Jax cyxol ke tiyꞌjil Zabulón at cablaaj mil oc sello cyiꞌj. Jax cyxol ke tiyꞌjil José at cablaaj mil oc sello cyiꞌj. Jax cyxol ke tiyꞌjil Benjamín at cablaaj mil oc sello cyiꞌj.

Nimxsen cyajlal xjal toc cyxbalen sak

9Tbajlenxitltzen jlu, oc ncyeꞌyena, bix e wila nimxsen cyajlal xjal. Min-al jun xjal jacꞌa bint tajlante. Otk chi tzaj cyuj cykilca tnom bix cykilca cyiyꞌjil xjal bix te cykilca wik xeꞌchel bix te cykilca wik yol. Waꞌlke twitz jawnex tkꞌukbil Dios bix twitz Jtal Carnel. Toc cyxbalen sak, bix tzyuꞌn tkꞌab xaꞌj cyuꞌn.

10Bix cyiwxix e jaw cys̈iꞌn:

—Ma ko clet tuꞌn Kman Dios kꞌukl tuj tkꞌukbil bix tuꞌnj Tal Carnel―tz̈ikexin.

11Cykilcatzen ke tsanjel Dios tuj cyaꞌj waꞌlke tiꞌjele tkꞌukbil Dios bix cyiꞌjele ke tij bix cyiꞌjele ke cyaja wik iꞌtz. E cub mutzkꞌajke twitz tkꞌukbil Dios tuꞌn tjaw cynimsaꞌn jaxin.

12E xiꞌ cykbaꞌn:

—At toclen Dios tuꞌn tiikꞌente cyꞌiwlabl bix tuꞌn tjaw nimset tbixin. At tnaabl, bix tipemal, bix tipen, bix kꞌoꞌnxit chjonte te tuyax nimbilte. Juꞌxit tten te junx maj―tz̈i ke ángel.

13At jun cyxol kej tij e tzaj tkanen weya:

—¿Alcye kej lu toc cyxbalen sak, bix jaaꞌ ma chi tzaaꞌ?―tz̈i jun tij weya.

14Bix aj ntzakꞌbeꞌna te:

—Taat, ja tey etzkilte—ntz̈iya.

Bix e tzaj tkbaꞌn weya:

—Kej xjal lu, ejeeꞌ tzunja ma chi ex tuj nintzaj yajbil. Ma txjet cyxbalen tuꞌnj ttz̈qꞌuel Tal Carnel, tuꞌntzen toc cyxbalen sakxix.

15Juꞌ tzunj, lu ke eteꞌ twitz tkꞌukbil Dios, bix nchi ajben texin te kꞌij bix te koniyen tuj lugar jaaꞌ taꞌxin, bix at cynajbil tuyaxin, bix cꞌojlaꞌnke tuꞌnxin.

16Mintiiꞌtl weyaj bix takꞌ aꞌ cyiꞌj, bix mintiiꞌtl qꞌuixcꞌaj cyiꞌj tuꞌn tken kꞌij bix mintiiꞌtl takꞌ cyak cyiꞌj,

17cuma Jtal Carnel tcub twitz tkꞌukbil Dios, ja te cꞌojlal cye, cxeꞌl tiiꞌn ejeeꞌ jaaꞌ nchi jatza itzꞌj twiꞌ aꞌ te chunkꞌlal. Bix ja te Dios qꞌuelel suꞌnte cykil taꞌl cywitz―tz̈i tij.