1 JUAN 4 - Mam of Todos Santos -- Guatemala Unicode

Kej xnakꞌtzal at Espíritu Santo cyuya bix kej nchi xnakꞌtzan ẍtakꞌ yol

1Key ocslal n-oc cyakꞌa weya, miꞌn txiꞌ cyocslaꞌna tyol jaca xnakꞌtzal tzin tkbaꞌn tyolel Dioste. Oj nyolen jun xnakꞌtzal, cykꞌoꞌnc cyipena tiꞌj tuꞌn tel cyniꞌya tiꞌj ka nyolen tuꞌn Espíritu Santo bix ka min, cuma at nim xnakꞌtzal ẍtakꞌ nchi bet cyxol xjal.

2Tzꞌelxitzen cyniꞌya tiꞌj tyol jun xnakꞌtzal tiꞌj Jesucristo ka nyolen tuꞌn Espíritu Santo. Ka nxiꞌ tkꞌumen ul Tcwal Dios twitz txꞌotxꞌ bix oc te jun xjal, Jesucristo, tetzen Dios xnakꞌtzal lu.

3Pero ka min nxiꞌ tkꞌumen jun xnakꞌtzal yaaꞌn Tcwal Dios te Jesús, yaaꞌntzen te Dios, sino junx taꞌ tyol tuya tyol nintzaj ẍtakꞌ xjal nkꞌojl tiꞌ Cristo. O cybiy ka tzul, bix kej nchi oc lpe tiꞌj ya eteꞌtl twitz txꞌotxꞌ.

4Key wuya nim n-oc cyakꞌa weya, te Dioskey, bix min ma cheꞌx lpey cyiꞌj xnakꞌtzal ẍtakꞌ, cuma at mas tipemal Espíritu Santo at cyuyey twitzj taaw il nchi oc lpe xnakꞌtzal ẍtakꞌ tiꞌj.

5Kej xnakꞌtzal ẍtakꞌ, aj ilke, bix juꞌ tzunj, nchi yolen tuꞌn tel cyyol baꞌn tuj cywitz ke aj il, bix nxiꞌ cybiꞌn aj il cyyol.

6Perotzen keya, te Dios koꞌya, ejooꞌya xnakꞌtzal jaxxix. Kej xjal cytzkiꞌn Dios, n-octzen cybiꞌn kyola. Pero kej xjal yaaꞌn te Dios, min tzꞌoc cybiꞌn kyola. Ka ma tzꞌoc tbiꞌn jun xjal kyola, ma tzꞌel kniyꞌ tiꞌj lepchexsen tiꞌj yol jaxxix. Pero ka tcyꞌi txiꞌ tbiꞌn kiꞌja, ktzkiꞌn ka taj tzꞌoc lpe tiꞌj yol ẍtakꞌ.

At tkꞌakꞌbil tcꞌuꞌj Dios kiꞌj

7Key ocslal n-oc cyakꞌa weya, tzꞌocxit cyakꞌ kuya ke, tuꞌntzen tchicꞌajax tnaabl Dios kꞌiꞌn kuꞌn, cuma ka ma tzꞌoc takꞌ kiib ke, tzin tyeecꞌan jlu tcwal Dios koꞌ. Alcyej xjal n-oc cyakꞌ tcwal Dios te, ntyeecꞌantzen tcwal Dioste bix ttzkiꞌntzen ja Dios.

8Alcyej xjal min n-oc cyakꞌ ocslal te, ntyeecꞌantzen min ttzkiꞌn ja Dios. Yaaꞌn tnaabl tisen tnaabl Dios, cuma n-oc cyakꞌ tcwal Dios te.

9E tzaj tyeecꞌan Dios tkꞌakꞌbil tcꞌuꞌj kiꞌj tej ttzaj tsmaꞌn junx Tcwal kxol twitz txꞌotxꞌ, tuꞌntzen kten kchunkꞌlal te junx maj tuꞌnj e bint tuꞌn Tcwalxin.

10Yaaꞌn tzꞌaklxix tkꞌakꞌbil kcꞌuꞌj tiꞌ Dios. Pero ya te Dios tkꞌakꞌbil tcꞌuꞌj kiꞌj, tzꞌaklxix. E tzaj tsmaꞌnxin Tcwalxin kxol, tuꞌntzen tcyim te chojbil kil, tuꞌntzen tel tiiꞌn tkꞌoj Dios kiꞌj.

11Key ocslal n-oc cyakꞌa weya, cuma e tzaj tyeecꞌan Dios tkꞌakꞌbil tcꞌuꞌj kiꞌj tuꞌnj ttzaj tsmaꞌn Tcwal tuꞌn tcyim te kxel, juꞌ tzunj ilxsen tiꞌj cꞌoquel kakꞌ kiib kxol.

12Amale mint o kil twitz Dios, pero n-el kniyꞌ tiꞌj najl Dios tuj kanem ka n-oc kakꞌ kxol. Ka ma bint kuꞌn juꞌwa, nbinttzen tajbil Dios kuꞌn.

13Bix jax n-el kniyꞌ tiꞌj at kmojbabl kiib tuya Dios bix at Dios kuya tuꞌnj ma tzaj tkꞌoꞌn Dios Espíritu Santo te ke.

14Bix jax baꞌn kuꞌn at Dios kuya, cuma o kila Tcwal Dios bix nxiꞌ kkꞌumena e tzaj tsmaꞌn Dios Tcwal tuꞌn toc te Clolte cye xjal.

15Alcyej xjal nxiꞌ tkbaꞌn tuya cykil tcꞌuꞌj ja te Jesús Tcwal Dios, attzen Dios tuya, bix at tmojbabl tiib tuya Dios.

16Ejooꞌya t-xel Cristo, n-el kniꞌya tiꞌj ti tten tkꞌakꞌbil tcꞌuꞌj Dios kiꞌj, bix juꞌ tzunj o tzꞌoc ke kcꞌuꞌja tiꞌj.

Tnaabl Dios, jaj tuꞌn toc cyakꞌ xjal te. Juꞌ tzunj, alcyej ocslal n-oc cyakꞌ xjal te, attzen tmojbabl tiib tuya Dios, bix attzen Dios tuya.

17Ka at kmojbabl kiib tuyaxin juꞌwa, n-octzen cyakꞌ xjal ke tisen taj Dios, bix mintiiꞌ ttz̈i kiꞌj oj kocx twitz Dios tuj xkel, cuma nxiꞌ kiiꞌn kchunkꞌlal twitz txꞌotxꞌ tisen te Cristo.

18Mintiiꞌ ttz̈i kiꞌj ka ma tzꞌoc cyakꞌ xjal ke. Ka tzꞌaklxix tkꞌakꞌbil kcꞌuꞌj juꞌwa, mlaytzen tten ttz̈i kiꞌj, cuma min ko ayon castiwa kiꞌj tuꞌn Dios. Ka min n-oc cyakꞌ xjal te jun xjal tisen taj Dios, attzen ttz̈i castiwa tiꞌjxin.

19N-oc takꞌ Dios ke cuma tneel oc kakꞌ te Dios.

20Ka ma txiꞌ tkbaꞌn jun xjal, “N-oc takꞌ Dios weya,” ka tz̈i juꞌwa pero n-el tiiqꞌuen juntl ocslal, ẍtakꞌ xjal lu, cuma ka min tzꞌoc takꞌ jun ocslal te baꞌn tuꞌn toc tcyeꞌyen, mlay bint tuꞌn toc takꞌ Dios te, cuma bajx tzꞌoc tcyeꞌyen.

21Bix yaaꞌn nuk oꞌcx jlu, bix jax juꞌx ma cyaj tkꞌoꞌn Dios ja ley lu ke: Alcyej xjal n-oc takꞌ Dios te, ilxsen tiꞌj tuꞌn toc cyakꞌ ocslal te.