LOS HECHOS 6 - Mam of Todos Santos -- Guatemala Unicode

Tej tjaw scyꞌet wuuk akꞌanal tuj taakꞌen Dios

1Yaltzen tajlal ocslal, tz̈ꞌiynax ttz̈ꞌiy. Pero maatkxsen txolen ttz̈ꞌiy, attzen jun yol e jaw. Attzen ocslal judío cye chi yolen tuj cyyol xjal griego, bix atl judío baꞌn yolen tuj hebreo. Cyxol jcaꞌba cloj xjal at nim viuda. Ejeeꞌ tzunj xuuj viuda bix e baj paax cywa jaca kꞌij. Pero ejeeꞌ tzunj viuda aj griego octzen cykanbil xjal ka yaaꞌn juꞌx tken cywa n-etz tisenx kej xuuj aj hebreo. Juꞌ tzunj e jaw jun kꞌoj.

2Entonces bixsen oc chmet cykil ocslal tuꞌnj cablajaj xin t-xel Jesús, bix e xiꞌ cykbaꞌnxin:

—Cyajtzen cyey ejooꞌ keya ko xeꞌl nincꞌunte cyey cykꞌoj. Pero yaaꞌn baꞌn tuꞌn tcyaj kkꞌoꞌna kxnakꞌatza nuk tuꞌn ejooꞌya ko xeꞌl paꞌn te cyway.

3Juꞌ tzunj, key ocslal, cyjyonxa wuuk xinak cyxola te nincꞌulte cyey. Ja tzunj wuuk xjala cꞌoquelxix ke cycꞌuꞌj xjal cyiꞌj bix cꞌoquelxix cybiꞌn xjal ejeeꞌ, bix cbinelxix cyuꞌn, bix ejeeꞌj ebilte Espíritu Santo. Ojtzen tcnet wuuk xjal tisenj nxiꞌ kkbaꞌna cyey, ejooꞌtzen keya ko oquel waꞌbencye tiꞌj ja akꞌuntla te paꞌlte cyway.

4Yaltzen keya, cxeꞌlx kiiꞌnke kaakꞌen te naꞌl Dios bix te kbalte tyol Dios―tz̈itzen ke t-xel Jesús cye ocslal.

5Cykilxsen ke ocslal oc ebinte juꞌwa. Bix etz scyꞌet ja wuuk xjal lu: Esteban, junxin xjal axsen tanemxin tiꞌ Dios, bix nuk ebilxxin tiꞌ Espíritu Santo, juꞌx jxin Felipe, jxin Prócoro, jxin Niconor, jxin Timón, jxin Parmenas, bixsen Nicolás, jun xjal te Antioquía nejl ocslalxin tiꞌ cyreligión judío, pero ya otk tzꞌocslanxin Jesús.

6Cykil tzun kej xin lu e pon cywitz t-xel Jesús bix e baj naꞌt Dios cyibajxin, bixsen oc cyajwalelxin tuꞌnj tcublen cykꞌab t-xel Jesús cyibajxin.

7Juꞌtzen tten tbinlen ke ocslal te Dios, bix xiꞌne e xiꞌ tz̈ꞌiy. Tyol Dios e xiꞌ tz̈ꞌiy cyxol xjal, bix jawnexsen e jaw tken tajlal ocslal tuj Jerusalén, bix nimxsen pala cye judío e cub cychꞌixbeꞌn cynaabl tuꞌn oc ke cycꞌuꞌjxin tiꞌ Jesús.

Tej ttzyet Esteban

8Ja tzunj xin Esteban nimxsen tipemal Dios at tuyaxin, bix nim xtalbil tibajxin, bix jax nimxsen techlal tipemal Dios e bint tuꞌnxin cyxol xjal.

9Pero attzen cabxin oc ten cyakwusalecte Esteban, bix e kꞌojlke tuya Esteban. Ejeeꞌ tzunj xin oc kꞌojl tiꞌ Esteban, te jun camon jaaꞌ te xnakꞌtzabl tyol Dioskexin jaaꞌj e chmeta kej xjal otk chi tzakpet tuj akꞌuntl tjakꞌ tcawbil Roma. Jatzen otk chi tzaaꞌxin tuj tnom te Cirene, Alejandría, bix Cilicia, bixsen tuj ttxꞌotxꞌ Asia, tuꞌn cyponxin tuj Jerusalén.

10Ejeeꞌ tzunj xin lu e kꞌojlkexin tuya Esteban, pero mix e xcyebake tiꞌjxin, cuma texin e yolenxin tuya tonbil Espíritu Santo.

11Entonces tuꞌntzen tchiꞌlel cycꞌuꞌjxin, bixsen oc cychjoꞌnxin tuj ewjel cabtl xjal tuꞌntzen tbaj bint ẍtakꞌbil tiꞌ Esteban tisen ka otk tzꞌoc cybiꞌnxin tyol Esteban kaꞌ tiꞌ Moisés bixsen tiꞌ Dios.

12Juꞌtzen tten tbaj cyxtzꞌimenxin cywitz xjal bixsen ke tij xjal bixsen ke txꞌolbal ley. Bixsen e cytzuyxin ja Esteban, bix e xiꞌ kꞌiꞌnxin cywitz ke nintzaj cyconsejo judío.

13Bixsen e pon kej xin ẍtakꞌ tstiwa, bix e cykbaxin ka min cyaj tyolen kaꞌ yol Esteban tibaj tja Dios bixsen tiꞌ tyol Moisés.

14Bixsen oc tyol Esteban te cysakchbilxin. Tz̈i tzunkexin cyjulu:

—O tzꞌoc kbiꞌna tyol xjal lu ka jxin Jesús te Nazaret cwel t-xitenxin nin tja Dios bix ctchꞌixbeꞌxin jcostumbre o cyaj tkꞌoꞌn Moisés―tz̈itzen ke ẍtakꞌ cye cawel.

15Yaltzen ke cawel, bixsen ke cykil kej xjal kꞌukl, occa cycyeꞌyen xjal ja Esteban. Pero tej toc cycyeꞌyenxin twitzxin, nkoptzꞌajxsen twitzxin tisenxsen twitz jun tsanjel Dios tuj cyaꞌj.