HEBREOS 4 - Mam of Todos Santos -- Guatemala Unicode

1Tisen nejl, juꞌx jaꞌlewe, lux tyol Dios tcyajsen kuyawe tuꞌn kocx tuj ajlabl tuyaxin. Juꞌ tzunj cꞌoquelxix kcꞌuꞌj tiꞌj tuꞌntzen mi nuket jun kxol cyaj tuꞌn miꞌn tzꞌocx tuj ja ajlabla.

2Ke, o tzꞌoc kbiꞌn tyol Dios te coꞌpl ke, tisen ke kxeꞌchel ootxa oc cybiꞌn tyol Dios. Pero min ajben cye, cuma nuk oc cybiꞌn bix min e cyocsla. Nuket e cyocsla, ajbentzenle cye.

3Pero ejooꞌtzen o kocsla jyol te coꞌpbil, ejooꞌ tzunja ko oquex tuj jun ajlabl tuya Dios, cuma jax at jun ajlabl ke laꞌ alcye jun kꞌij. Ja tzunj ajlabl nbyan tuj tyol Dios tej ttz̈i Dios cyjulu: “E tzaj nkꞌoja cyiꞌj xjal min e cybi nyol, bix e xiꞌ nkbaꞌn cye jaxxix tuꞌn miꞌn chi oc tuj ajlabl wuyena,” tz̈i Dios. Ja tzunj yol lu nyeecꞌante ya at jun ajlabl te Dios nejl biꞌx e baj bint jatxe te tbaj bint twitz txꞌotxꞌ.

4Tiꞌj tej tajlan Dios, tzin tkbaꞌn tuj tyol Dios cyjulu: “E ke tcꞌuꞌj Dios bix ajlanxin te twuukan kꞌij tbinlen cykilca taakꞌenxin,” tz̈i tyol Dios.

5Bix cyiꞌj xjal min cyocsla tuꞌn cypon tuj ajlabl tuya Dios, tzin tkbaꞌn tuj tyol Dios cyjulu: “Miꞌn chi octz ajlal wuyena kej xjal n-el cyiiqꞌuen,” tz̈i Dios tuj tyol.

6Entonces e bint tuꞌn Dios tuꞌn cypon xjal tuj ajlabl tuyaxin. Pero tuj tneel kej oc ebinte tej ttxconte Dios cyiꞌj tuꞌn cypon, min e ponke tuꞌn tel-len cyxooꞌn tyolxin. Juꞌ tzunj at-x tuꞌn cypon xjal tuj ajlabl lu, bix at tumel kuya lux Dios ntxcon kiꞌj tuꞌn kpon tuyaxin.

7N-el kniyꞌ tiꞌj lux baꞌn kocx tuj ajlabl tuya Dios, cuma tz̈i tyol Dios tuꞌn kpon jaꞌlewe. Jyol jaꞌlewe e tkba Dios tuꞌn David, e tkꞌumexin nim jnabkꞌi mas yaj twitzj tneel maj e tzaj tkꞌoꞌnxin jun kꞌij tuꞌn cypon xjal tuyaxin. E tkba David tuꞌn Dios ja yol lu ya ma kbaꞌj: “Jaꞌlewe, ka cybiꞌy jtzin tkbaꞌn Dios, miꞌn tzꞌel cyiiqꞌuena tyolxin,” tz̈i David.

8Juꞌ tzunj miꞌn cub cybisena ka jaj txꞌotxꞌ te Canaán ajlabl e tkba Dios tuꞌn cypon tuj. Canaán nuk jun techel ti tten tuꞌn kpon tuj juntl ajlabl. Nukettzen ja Canaán mancꞌbil najbil te ajlabl, minttzenle e tkba Dios mas yaj tiꞌj jun kꞌij tuꞌn cypon xjal tuj ajlabl tuyaxin.

9Tiꞌj tzunj yol lu qꞌuelele kniyꞌ tiꞌj yaaꞌn Canaán jaj ajlabl e tkba Dios, sino at juntl ajlabl mas jawnex tuꞌn kocx tuj.

10Alcyej ocslal oj tcyim cꞌoquex tuj ajlabl bix cweꞌbel taakꞌen, tisenj te Dios ajlan tej tbaj bint taakꞌen.

11Juꞌ tzunj ilxix tiꞌj tuꞌn toc kcꞌuꞌj tiꞌj tuꞌn kpon tuj ajlabl tuya Dios, bix miꞌn txiꞌ kiiꞌn cynaabl kej xjal el cyxooꞌn tyol Dios bix min ocke tuya Dios.

12Pero miꞌntzen cub cybisena ka baꞌnj nbint cyuꞌna nuk tuya cytziy pero yaaꞌn juꞌ tuj cyanema, bix miꞌn cub cybisena baꞌn tuꞌn tcub cyewena ti niyꞌ tuj cycꞌuꞌja tuj twitz Dios. Mlay tzꞌoc cyyaꞌna Dios. Te tyol Dios iꞌtzxixte bix at tipemal. Tisen jun machet caꞌba ttziiꞌ bix binne ttziiꞌ baꞌn tocx tuj kxumlal, juꞌtzen elpenina jtyol Dios baꞌn tocx tuj kanem. Cꞌoquex te cyeꞌyel cykil niyꞌ tuj kcꞌuꞌj, ka baꞌn bix ka kaꞌ. Jniyꞌ tuj kcꞌuꞌj ẍbiꞌk tuj twitz Dios.

13Min-al jun baꞌn tcub ewen twitz Dios. Cykilca chicꞌaj tuj twitz Dios. Bix twitz Dios kkꞌaꞌ jun kumel ti xbaj kbinche bix ti xbaj kbisen.

Ja Jesús nintzaj kpala

14At juntl tumel. O pon Jesús, Tcwal Dios, tuj cyaꞌj twitz Dios. Bix ja Jesús jatzen nintzaj kpalaj. Ojtzen kpon twitz Dios te kanel, attzen Tcwal Dios te kuya te onl ke. Jatzen kpala jnintzaj te junx maj. Jatzen yolel kiꞌj twitz Dios. Juꞌ tzunj, miꞌn cyaj kcolen ja Jesús, bix miꞌn cyaj kcolen kocslabl.

15Jatzen yolel kiꞌj twitz Dios, bix at jun tkꞌakꞌbil tcꞌuꞌjxin kiꞌj, cuma n-el tniyꞌxin tiꞌj ti tten j-oj nko oc tuj niyꞌbebl tuꞌn il, cuma tej tten texin twitz txꞌotxꞌ tuya t-xumlal, iyꞌ texin twitz cykil niyꞌbebl tuꞌn il, pero min e cub tzꞌakxin tuj il.

16Juꞌ tzunj, tuꞌnxix cykil kcꞌuꞌj ko lkꞌex twitz Dios jaaꞌ ncawena, tuꞌntzen kiikꞌente t-xtalbil Dios, bix tuꞌntzen ktzaj tonenxin oj kniyꞌbet tuꞌn il.