1 PEDRO 3 - Mam of Todos Santos -- Guatemala Unicode

Ti tten tuꞌn tnajan xinak tuya t-xuꞌl

1Jax juꞌx cyey xuuj, il tiꞌj chi yeecꞌala cynimbila. Cynimanx cychmila. Ka yaaꞌn ocslal ke cychmila, bix ka cycyꞌi cyyolena tiꞌ tyol Dios, pero ka ma cub cycuyana cyyol, kape at jun kꞌij chi ocslal tiꞌ Dios tuꞌnj cynimbila.

2Kape chi ocslal oj toc cycyeꞌyen cynimbila bix jun cychunkꞌlala sakxix.

3Miꞌn cybinchay nuk tuꞌn baꞌn cycyeꞌnquey. Cxebjil cywiꞌy, bix cycwencha oro, bix cyxbalena wiꞌyel, pero miꞌn tzꞌoc cykꞌoꞌna te cynimbil cyiiba.

4Mas il tiꞌj tuꞌn tocxix cycwenta tiꞌj cyanema, ka baꞌn bix ka yaaꞌn baꞌn. Tenxit cyanema maans bix txubtx. Pjel cyxbalena, pero cyanema tbanelxix, miꞌn baj, bix mas il tiꞌj jlu tuj twitz Dios.

5Jatxe ootxa, kej xuuj cyxol ttanem Dios mas oc cykꞌoꞌnxuj cycwent tiꞌj ti tten cyanemxuj twitzj tiiꞌn cycyeꞌncxuj. Oc kexuj cycꞌuꞌjxuj tiꞌ Dios, bix e xiꞌ cynimanxuj cychmilxuj. Juꞌ tzunj, chi oquel lpey tiꞌj cyyecꞌbilxuj.

6Jun yecꞌbil te cyey e cyaj tkꞌoꞌn Sara, t-xuꞌl Abraham te ootxa. Oc tbiꞌnxuj tyol tchmilxuj, bix oc tkꞌoꞌnxuj tbixin te “Taat.” Chi oquela tisen Sara ka ma chi binchay jbaꞌn bix mintiiꞌtzen ttz̈i cychmila cyiꞌja.

7Yaltzen cyey chmilbaj, chi ten tzuna tuj tumel. Chi najana tuya cyxuꞌla tuya cynaabla baꞌn. Qꞌuelel cyniꞌya tiꞌj yaaꞌn nimxix cyipenxuj cywitza. Cykꞌonxa nimbil cyexuj, tuꞌntzen miꞌn ten jun xitbil oj nchi naꞌna Dios, cuma cycaꞌbela ma cyiikꞌa cychunkꞌlala te junx maj.

Kej niyꞌx qꞌuixcꞌaj cyuꞌn tuꞌnj nchi binchan baꞌn

8Yaltzen te cykilca key, chi bet-xita cykilcakey junx. At-xit cyanema cyxola, bix cꞌoquel cyakꞌ ocslal cyey, cuma tisen cyitzꞌen cyiiba tuꞌnj cyocslabla. Qꞌuelel cyniꞌya tiꞌj ka at il taꞌ juntl, bix chi oca maans.

9Miꞌn xeꞌlen cyuꞌna oj toc bint jun kaꞌ cyiꞌja bix oj cyoc yasen xjal cyiꞌja, sino cykanenx te Dios tuꞌn tkꞌonte jun baꞌn te cye. E tzaj ttxcoꞌn Dios ejeeꞌy tuꞌn ttzaj tkꞌoꞌn jun baꞌn te cyey. Juꞌ tzunj, cykꞌoꞌnxa jun baꞌn te cykilca.

10Tzin tkbaꞌn tyol Dios cyjulu: “Alcye taj tuꞌn tten nim kꞌij twitz txꞌotxꞌ, bix tuꞌn tnoj tchunkꞌlal tuya baꞌn, il tiꞌj tuꞌn tcub ttzyuꞌn ttzi, tuꞌn miꞌn yolen yaaꞌn baꞌn, bix tuꞌn miꞌn cub tsbuꞌn juntl.

11Bix il tiꞌj tuꞌn tcyaj tcyeꞌyen jkaꞌ bix tuꞌn tbinchante baꞌn bix tuꞌn toc tipen tiꞌj tuꞌn tten tuj ttz̈yal cyuya xjal.

12Cykꞌoꞌnc cyipena tiꞌj tuꞌn tbint jlu cyuꞌna, cuma tzin tcꞌojlaꞌn Dios kej xjal baꞌn nbint cyuꞌn, bix tzin tbiꞌn Dios oj nchi naꞌn tiꞌjxin. Pero kej xjal kaꞌ nbint cyuꞌn, kaꞌke tuj twitz Dios,” tz̈i tyol Dios.

13Cxeꞌl nkanena cyey, ka ma tzꞌoc cykꞌon cyiiba tuꞌn cybinchantiya nuk jaj baꞌn, ¿nchi kꞌojlelpale xjal cyiꞌja? Min.

14Pero ka ma kꞌojl jun xjal cyiꞌja tuꞌn tlaj tzin cybinchaꞌna baꞌn, jun xtalbil jlu tuꞌn niyꞌx qꞌuixcꞌaj cyuꞌna tuj taakꞌen Dios. Juꞌ tzunj, miꞌn tzaj ttz̈i cyiꞌja, bix miꞌn baj cycꞌuꞌja.

15Miꞌn chi xoba cywitz xjal, sino nuket chi nimanxa Cristo tuj cyanema, cuma Kaaw. Bix binne cytena tuꞌn t-xiꞌ cytxꞌolbaꞌna cye xjal ka ma tzaj cykanen cyey tiken ma tzꞌoc ke cycꞌuꞌja tiꞌ Cristo. Pero chebe cykbanxa cye, bix tuya cynimbila cywitz.

16Cybinchama nuk jaj baꞌn, tuꞌn junx taꞌ cybinchbena tuyaj tzin tkbaꞌn cyanema. Ojtzen tchicꞌajax mintiiꞌ cypaltiya, ctzaaltzen cychꞌixew kej xjal nchi yasen cyiꞌja tuꞌn cybinchbena baꞌn bix cyocslabla tiꞌ Cristo.

17Ka taj Dios, mas baꞌn tuꞌn tiyꞌx qꞌuixcꞌaj cyuꞌna tuꞌn tlaj jbaꞌn nbint cyuꞌna, twitzj tuꞌn tcub castiwa cyibaja tuꞌn tlaj jyaaꞌn baꞌn nbint cyuꞌna.

18Cycyeꞌyenxa jun yecꞌbil e cyaj tkꞌoꞌn Cristo. Mintiiꞌ til, pero e cyim tuꞌn klaj yaaꞌn tzꞌaklxix koꞌ, tuꞌn tchjet kil te junx maj, tuꞌntzen kpon tiiꞌn tuya Dios. E cub byet t-xumlal, pero e jatz titzꞌjsaꞌn Espíritu Santo jaxin tuj cyamecy.

19Bix tuj ja tyem lu, e cuꞌx Cristo tuꞌn t-xiꞌ tkꞌumen cyej xjal otk chi cyim bix jpuꞌnke tjakꞌ txꞌotxꞌ.

20Jatxe ootxa min e cybi kej xjal lu Dios. Tisen tzunj, tej tjaw tbinchaꞌn Noé jun barc, nim ayon Dios cyiꞌj xjal tuꞌn cyajtz meltzꞌaj tuya Dios, bix tuya nim cypasensya, pero cycyꞌi. Nuk wajxak xjal e clet tuj barc tuj aꞌ.

21Bix tisen e clet ke Noé tuꞌn barc, ma chi cleta tuꞌnj cymojbabl cyiiba tuya Jesucristo, cuma e jatz itzꞌjxin juntl maj tuj cyamecy. Min e cletkey tuꞌnj costumbre tuꞌn tjaw aꞌ cywiꞌy, sino cuma e xiꞌ cykanena te Dios tuꞌn ttzaj tkꞌoꞌn cyey jun acꞌaj bix sakxix cynaabla.

22Yal te Jesucristo, ma pon tuj cyaꞌj, bix at tuj tmankꞌab Dios. Bix at cykilca ángel bix biman bix cawel tjakꞌ tcawbil.