1Bueno, cuma n-el kniyꞌ tiꞌj Tcwal Dios mas nintzaj, il tiꞌj cꞌoquel kocslaꞌn tyolxin. Juꞌ tzunj cꞌoquelxix kcꞌuꞌj tiꞌj jaxxix yol te coꞌpbil o kbi, tuꞌntzen miꞌn ko el tzpet tiꞌj.
2Ja tzunj tley Moisés kꞌoꞌn cye ke kxeꞌchel cyuꞌn tsanjel Dios tuj cyaꞌj, ilxix tiꞌj tuꞌn tbint cyuꞌn. Ja tzunkej min e cynima, bix e cubke tuj castiwa jaxxix toclen.
3Katzen o chi cub ke kxeꞌchel tuj castiwa tuꞌn min e cybi tley Moisés, jaxse juꞌx ke jaꞌlewe, mlay ko el libre tiꞌj kcastiwa tzul yaj ka ma tzꞌel kxooꞌn jun coꞌpbil ke mas jawnex twitzj ley nejl. Ja Kman Jesús tneel xjal e kꞌumente jyol te coꞌpbil, bix mas yajxitl ke t-xel Jesús e cyyeecꞌa ke ka jax, bix kocslaꞌ.
4Jax Kman Dios e yeecꞌante jax tuꞌn nim tipemalxin bix tuꞌn tbaj bint-xin bix tuya nim techlal, bix tuꞌn tipemal Espíritu Santo o tzaj tkꞌoꞌn ke, te teeylex juun laꞌ alcye tkꞌaꞌxin.
Oc Cristo te jun xjal, bix n-el tniyꞌ tiꞌj ti tten tuꞌn tniyꞌ qꞌuixcꞌaj tuꞌn5Tzultzen jun kꞌij oj tul jun acꞌaj cawbil twitz txꞌotxꞌ. Tuj tzunj cawbil yaaꞌn ke ángel chi cawel twitz txꞌotxꞌ, sino ja te Tcwal Dios.
6Kꞌoꞌnc cycꞌuꞌja tiꞌj ti toc tuj tyol Dios. Tz̈i jun xjal te Dios cyjulu: “Nuk xjal koꞌya, pero tey nintzaj Diosa. Pero amale Diosate, ntzaj tkꞌoꞌna nimxix il tiꞌj kiꞌja. ¿Tuꞌn tikentzen nnaꞌnajey kiꞌja, bix tuꞌn tikentzen nlabtey kiꞌja, ejooꞌya xjal?
7Jay e kbante yaaꞌn nim tcawbil ke xjal cywitz ke ángel jun rato jaꞌlewe. Pero at jun kꞌij tkꞌaꞌy jun tajwalel xjal tuꞌn tcawen, bix tibaj cykilj e tbinchay.
8Cykil cyjel tjakꞌ tcawbil tuꞌna. ¡Axsen tbanel jun tumel tuꞌna!” tz̈i jun xjal te Dios, tz̈i tyol Dios.
Juꞌtzen n-eꞌla kniyꞌ tiꞌj laꞌ alcye jun kꞌij Dios ctzaal kꞌonte cykil, cyuyax ke ángel, tuj tkꞌab jun xjal. ¿Pero opa kil jlu? Minaꞌx.
9Pero te Jesús o kil jun xjal o tzꞌoc ttzyuꞌn tuꞌn tbint alcyej nbyan tuj tyol Dios oc pjel. Tej tcubxin twitz txꞌotxꞌ, ocxin menos chꞌin cywitz ke ángel. Ocxin te xjal tuꞌn tcub tenxin kuya, tuꞌntzen tcyimxin te t-xel cykilca xjal, tuꞌntzen cyiikꞌente xjal t-xtalbil Dios. Pero ya o jaw tnimsaꞌn Dios ja Jesús mas tbanel bix mas nintzaj, cuma o tziyꞌx qꞌuixcꞌaj tuj cyamecy tuꞌnxin.
10Entonces, tej tcyim Jesús, ja tzunja e baj tnincꞌuꞌn Dios. Cykil e bint tuꞌn Dios, bix cykilca te te Dios. Bix taj Dios cykilca ke tcwal tuꞌn cypon jaaꞌ taꞌxin. Juꞌtzen jun tumel e tkba Dios tuꞌn ttzket-xix tuꞌn Jesús tuj qꞌuixcꞌaj, cuma ja Jesús tuꞌn tcub nejl cywitz xjal jaaꞌ taꞌ Dios, bix te kꞌilx cye xjal tuya Dios.
11Ke, o ko jaw tiiꞌnxin tuj tzꞌil tuꞌntzen sakxix koꞌ twitz Dios, ejooꞌtzen tcwal Dios. Bix Tcwal Dios ja Jesús, o txjonte ke tuꞌn kajben te Dios. Juꞌx te Jesús bix ejooꞌ, junx Kman tuyaxin. Juꞌ tzunj te Tcwal Dios min chꞌixewxin tuꞌn tkbante hermano koꞌ tuyaxin.
12Tuj tyol Dios tzin tkbaꞌn Tcwal Dios ka ejooꞌ termano. Cꞌoquel cycꞌuꞌja tiꞌj tz̈i Tcwal Dios te Dios cyjulu: “Chin yolela tiꞌja cyuya ke wermaniya tuꞌn tel cyniyꞌ tiꞌja al cyey. Bix chin nimela twitza cyxol ke wermaniya tuj tjay,” tz̈i Tcwal Dios te Dios, tz̈i tyol Dios.
13Bix juntl tumel. Tz̈i Tcwal Dios cyjulu: “Juꞌx weya n-oc ke ncꞌuꞌja tiꞌ Dios,” tz̈i tyol Dios. Juꞌtzen tumel junx Tcwal Dios cyuya xjal. Bix tuj tyol Dios tz̈i Tcwal Dios cyjulu: “Lu kena ntiina cyuya ke tcwal Dios e tzaj tkꞌoꞌn Dios we.”
14Ke tcwal jun xjal jax ttz̈qꞌuel bix tchuꞌl cyuya cabtl titzꞌen. Jaxse juꞌx te Jesús oc te xjal tuꞌntzen telxin junx cyuya xjal, bix tuꞌn tbint tuꞌn tcyimxin tisen ke xjal nchi cyim, bix tuꞌntzen tjaw itzꞌjxin tuj cyamecy, tuꞌn tel tiiꞌnxin tipemal taaw cyamecy. Juꞌtzen e tcamaxin tibaj taaw il.
15Juꞌtzen e tbinchaxin tuꞌntzen cytzokpaj xjal tiꞌj ttz̈i cyamecy cyiꞌj, cuma tuꞌntzen ttz̈i cyamecy cyiꞌj eteꞌcx tjakꞌ tcawbil taaw il.
16At juntl tumel tiken il tiꞌj oc Tcwal Dios te xjal. Nuket juꞌ tajxin tuꞌn tonenxin cye ángel, juꞌtle il tiꞌj tuꞌn tocxin te ángel. Pero juꞌ e labte texin te onlte cye xjal. Juꞌ tzunj oquexin te xjal, bix te tiyꞌjil ootxa kchman Abraham.
17Ilxix tiꞌj tuꞌn ocxin junx kuya, ejooꞌ termanoxin, tuꞌntzen tbint tuꞌn tponxin twitz Dios te yolel kiꞌj. O ponxin twitz Dios tuꞌntzen tocxin te nintzaj kpala jiquenxix bix n-oc kꞌakꞌen tcꞌuꞌjxin kiꞌj, bix tuꞌntzen tchjet chojbil kil tuꞌnxin.
18Otzen tziyꞌx qꞌuixcꞌaj tuꞌnxin, bix ocxin tuj niyꞌbebl tuꞌn taaw il, pero min e tkeyxin. Juꞌ tzunj jaxin onlte ke oj koc tuj niyꞌbebl.
Who We AreWhat We EelieveWhat We Do
2025 by iamachristian.org,Inc All rights reserved.