APOCALIPSIS 14 - Mam of Todos Santos -- Guatemala Unicode

144,000 xjal waꞌlcꞌake twiꞌj witz Sión

1Bix juntl maj oc ncyeꞌyena, bix jeyꞌ, waꞌltej Tal Carnel twiꞌj witz Sión, bix at jun syent cyaꞌwnak tuya cyaja mil xjal tuya. Tzꞌiꞌbenc tbi Jtal Carnel tibaj cywitz bix tuyax tbi Tman.

2Bix e xiꞌ nbiꞌna tkꞌajkꞌajel cywiꞌ nim tuj cyaꞌj. Tkꞌajkꞌajel cywiꞌ tisen jun nimaꞌ oj n-etz wajtzꞌaj twitz xak bix tisen kꞌancyok oj ntininin cyiw bix tisen oj chi chimban xjal tiꞌ arpa.

3E xiꞌ cybitzen jun acꞌaj bitz twitz tkꞌukbil Dios bix cywitz kej cyaja wik iꞌtz bix kej jawnex tij. Yaltzen cye xjal twitz txꞌotxꞌ, min-al e bint tuꞌn tuꞌn tbitzen tiꞌj bitz. Nuk oꞌcx kej syent cyaꞌwnak tuya cyaja mil xjal otk chi clet.

4Ejeeꞌtzen xjal jlu min o chi chucj cyuya xuuj. Sakxix cynaabl. Ejeeꞌtzen kej lu nchi oc lpe tiꞌj Tal Carnel nuk jaaꞌxja nxaꞌ. Ma chi clet cyxol xjal tuꞌn cyajben te jun oybil te Dios bix tej Tal Carnel.

5Min tzaj ẍtakꞌ yol tuj cytzi, bix mintiiꞌ cyil.

Jcyyol oxe ángel

6Bix e wila juntl tsanjel Dios tuj cyaꞌj npurpaj tmij cyaꞌj. E xiꞌ tkꞌumen jbaꞌn tpocbal colbil te junx maj cyej xjal najl twitz txꞌotxꞌ. E tkꞌume cye xjal te cykilca wik tiyꞌjil xjal bix te cykilca wik xeꞌchel bix te cykilca wik yol bix te cykilca tnom.

7Bix e tzaj tkbaꞌn tuya jun tyol cyiw:

—Cynimanx Dios bix cynimajaw jaxin, cuma ma pon tumel tuꞌn tcub tkꞌoꞌnxin cycastiwa xjal. Cꞌoquel cybiꞌna ja Dios e cub tbinchaꞌnxin twitz cyaꞌj bix twitz txꞌotxꞌ bix mar bix cywiꞌ aꞌ―tz̈i ángel.

8Bix e tzaj juntl tsanjel Dios tuj cyaꞌj tiꞌj tneel ángel. E xiꞌ tkbaꞌn:

—Chꞌixcꞌa tcub baj jnintzaj tnom te Babilonia. Tuya cykil tcꞌuꞌj ma tzꞌoc lpe Babilonia tiꞌj yaaꞌn baꞌn, bix ma chi oc lpe cykilca tnom tiꞌj yaaꞌn baꞌn tuꞌn, tisen n-oc tzꞌeyꞌxix oj nchiꞌlen tcꞌuꞌj jun bolo tiꞌ kꞌeꞌn―tz̈i tcab ángel.

9Bix e tzaj toxen tsanjel Dios tuj cyaꞌj cyiꞌj. E xiꞌ tkbaꞌn tuya jun tyol cyiw:

—Alcye kej xjal ma jaw cynimsaꞌn jajil jila tzul jlet bix cywitz tsantjil, bix alcye kej xjal ma cyiikꞌ jtecheljil tibaj cywitz bix ka tiꞌj cykꞌab,

10cweltzen jawnex tkꞌoj Dios cyibaj. Cxeꞌlxsen cycꞌaꞌn xjal tkꞌoj Dios, tisen nxiꞌ tcꞌaꞌn jun bolo kꞌeꞌn, cuma nojnexsen vaso tuya tkꞌoj Dios. Cycastiwa cwel cyibaj, jatzen tuꞌn cytzꞌeyꞌ tuꞌn kꞌakꞌ bix tuꞌn azufre cywitz ke ángel xjan bix twitzj Tal Carnel.

11Bix tsibel kꞌakꞌ nqꞌuixbisan ejeeꞌ njatz te junx maj. Mintiiꞌ cyajlabl kej xjal lu e jaw cynimsaꞌn jajil jil ul jlet bix jtsantjil bix e cyiikꞌ jtechel tbi. Nimxsen qꞌuixcꞌaj cyiꞌj te kꞌij bix te koniyan―tz̈i toxen ángel.

12Juꞌ tzunj, il tiꞌj tuꞌn cyniman ocslal tley Dios bix tuꞌn cyten cyiw tuj cyocslabl tiꞌj Jesús.

13Bix e xiꞌ nbiꞌna tkꞌajkꞌajel jun tyol tuj cyaꞌj. E tzaj tkbaꞌn weya:

—Tzꞌiꞌbeqꞌuey jlu: “At t-xtalbil Dios tibaj kej xjal junx eteꞌ tuya Cyaaw tuꞌnj cycyim tuj ja tyem lu, cuma ya mintiiꞌ qꞌuixcꞌaj chi iꞌyela, bix cxeꞌl tkꞌoꞌn Dios cyxel jqꞌuixcꞌaj iyꞌx cyuꞌn tuꞌn tlaj cybinchben baꞌn,” cwel ttzꞌiꞌbena―tz̈i Espíritu Santo weya.

Jawnex tawal Dios twitz txꞌotxꞌ

14Tej toc ncyeꞌyena juntl maj, e wila jun muj sak, bix kꞌuklcꞌa tibaj jmuj ja xjalja Smaꞌn tuꞌn Dios tuꞌn tten cyuya xjal. Tjax jun tcorona te oro tuj twiꞌ, bix tzyuꞌn jun semel tuꞌn bix binne ttziiꞌ.

15Bix etz juntl tsanjel Dios tuj cyaꞌj tuj tja Dios tuj cyaꞌj, bix e xiꞌ tkbaꞌn tuya jun tyol cyiw tej xjal kꞌukl tibaj muj:

—Binchamxsen tiiba tuya tsemela tuꞌn tjaw chmet twitz awal, cuma ma pon tumel tuꞌn tchmet twitz awal. Ma tzkij twitz awal twitz txꞌotxꞌ―tz̈i ángel.

16Bix jxjal kꞌukl tibaj muj e tzaj tnukpiꞌn tkꞌab tuyax semel, bix e cub tchmoꞌn awal twitz txꞌotxꞌ.

17Yajxitltzen bix etz juntl tsanjel Dios tuj cyaꞌj tuj tja Dios at tuj cyaꞌj. Jax juꞌxte, tzyuꞌn jun semel tuꞌn binne ttziiꞌ.

18Bix etz j-ángel at taakꞌen tuꞌn tcꞌojlan jkꞌakꞌ twiꞌj altar tuj cyaꞌj. Etz twitz altar, bix e xiꞌ tkbaꞌn tuya jun tyol cyiw tej ángel tzyuꞌn semel tuꞌn binne ttziiꞌ:

—Binchanxsen tiiba tuya tsemela binne ttziiꞌ, tuꞌn tel joset ke tzkꞌaj uva twitz txꞌotxꞌ, cuma ma chi tzkij―tz̈i ángel.

19Bix e baj tchmoꞌn ángel twitz awal twitz txꞌotxꞌ tuya tsemel, tuꞌn tel keset tzkꞌaj uva twitz txꞌotxꞌ, bix e cub tkꞌoꞌn ke uva tuj jun ttemlel, tuꞌntzen tel yetzꞌet taꞌl, jatzen elpeninaj jawnex tkꞌoj Dios.

20Bix e baj waꞌbet uva tiꞌjxe tnom, bix etztzen tz̈iyꞌ tuj ttemlel uva jaaꞌ e cwaꞌ chmet. E jaw tz̈ꞌiy tz̈iyꞌ, bix e japan tpiman maa tuj ttzi tz̈ej, bix jun mutxꞌ ajlab jaaꞌ e pon baj tz̈iyꞌ.