1Juꞌ tzunj, key hermano, cꞌoquel cykꞌoꞌna tilel tuꞌn at tkꞌakꞌbil cycꞌuꞌja cyxola. Pero jax juꞌx baꞌn tuꞌn tbint cyuꞌna tuꞌn Espíritu Santo jun cyaakꞌena tuj taakꞌen Dios. Bix tibaj cykilca, cyjyonxa tuꞌn t-xiꞌ cykꞌumena tyol Dios.
2Ojtzen tyolen jun ocslal tuj jun wikxitl yol min-al n-el tniyꞌ tiꞌj, nuk oꞌcx nyolen te Dios, yaaꞌn cyuya xjal. Amale nyolet tuꞌn tipemal Espíritu Santo, min-al qꞌuelel cyniyꞌ tiꞌj tyolxin, cuma yaaꞌn telniyꞌ.
3Pero oj t-xiꞌ tkꞌumen jun ocslal tyol Dios tuꞌn tipemal Espíritu Santo, qꞌueleltzen tniyꞌ cabtl ocslal tiꞌj, bix cbinel tuꞌn tuꞌntzen cytz̈ꞌiy ocslal tuj tyol Dios, bix tuꞌn cyxiꞌ onet tuj cyocslabl tiꞌ Dios, bix tuꞌn n-oc nimset cycꞌuꞌj.
4Jun ocslal nyolen tuj jun wikxitl yol min-al n-el tniyꞌ tiꞌj, nuk te te najbeꞌna. Pero jun ocslal nkꞌumen tyol Dios, tetzen cykilca ocslal najbeꞌna.
5Katzen cyaja cykilca key chi cyyolela tuj jun wikxitl yol min-al n-el tniyꞌ tiꞌj, baꞌn. Pero jawe waj mas ka cykilcakey nchi kꞌumena tyol Dios. Ja tej tkbaj tyol Dios mas il tiꞌj twitzj yol minteyꞌ telniyꞌ. Pero katzen at jun te txꞌolbalte ti elpenina jun wikxitl yol min-al n-el tniyꞌ tiꞌj, baꞌntzen, cuma cꞌajbeltzen cye ocslal tuꞌn cytz̈ꞌiy tuj tyol Dios.
6Ka oj npona cyxola bix chin yolela tuj jun wikxitl yol min-al n-el tniyꞌ tiꞌj, ¿ti cꞌajbele nyola cyey? ¡Mintiiꞌ! Pero ka ma txiꞌ nkꞌumena cyey alcye o tkba Dios weya, bix alcye n-el nniꞌya tiꞌj tyol Dios, bix ka tzinen n-oc wuꞌna alcye toc tuꞌn tyol Dios, bix ka nxiꞌ nkbaꞌna cyey alcye o nxnakꞌtzaya tuj tyol Dios, cꞌajbeltzen nyola cyey.
7Cxeꞌl nkꞌoꞌna juntl tumel cyey. Kej nchi oc kꞌonte jun quitar bix ka jun xux, ka min bint chinbelte cyuꞌn, nuk nlililin. Mintiiꞌ tumel ti toc tuꞌn. Ja tej ka ttxolante chinbelte, attzen tumel ti toc tuꞌn.
8Juꞌxsen oj cyxiꞌ soldado tuj kꞌoj. Jxjal cxeꞌl kꞌonte tumel cye soldado tuya trompeta laꞌ alcye otk tkba cycawel, ka min s-oc tkꞌoꞌn tuj tzinen, mlay tzꞌel cyniyꞌ soldado tiꞌj ti cbinel cyuꞌn.
9Juꞌx oj nchi yolena. Ka min chi yolena tuj tzinen, ¿ti tten tuꞌn tel cyniyꞌ xjal tiꞌj? Nuk tuj cykꞌiꞌk nchi yolena.
10Cxeꞌl nkꞌumena juntl tumel. At nim wik yol twitz txꞌotxꞌ, bix tecꞌalex juun tuya tyol bix n-el tniyꞌ tiꞌj.
11Pero ka at jun xjal ma tzaj yolen wiꞌja bix min tzꞌel nniꞌya tiꞌj tyol, te nakch xjal kena te texin, bix te nakch xjalxin te weya.
12Juꞌ tzunj ka cyaja chi akꞌanana tuꞌn Espíritu Santo, il tiꞌj cyaja cyipemala tuꞌn cyonena cyiꞌj ocslal tuꞌn tel cyniyꞌ tiꞌj.
13Juꞌ tzunj, key hermano, katzen at jun ocslal nyolen tuj jun wikxitl yol min-al n-el tniyꞌ tiꞌj, e t-xiꞌ tkanen te Dios tuꞌntzen jax qꞌuelel tniyꞌ tiꞌj titzen tyola, tuꞌntzen t-xiꞌ ttxꞌolbaꞌn tyol cye cabtl.
14Oj knaꞌn Dios tuj jun wikxitl yol min-al n-el tniyꞌ tiꞌj, ja te kanem nyolen te Dios, yaaꞌn knaabl. Juꞌ tzunj min tzꞌel kniyꞌ tiꞌj titzen tkbaꞌn kanem.
15Key hermano, ¿alcye baꞌn tuꞌn tbint? Baꞌn tuꞌn knaꞌn Dios tuj kanem tuj jun wikxitl yol min tzꞌel kniyꞌ tiꞌj, bix baꞌn tuꞌn knaꞌn Dios tuya kyol n-el kniyꞌ tiꞌj. Bix ko bitzel yaaꞌn nuk tuya jun wikxitl yol min-al n-el tniyꞌ tiꞌj, sino juꞌxa ko bitzel bix qꞌuelelxix kniyꞌ tiꞌj kbitz.
16Ka njaw knimsaꞌn Dios tuj jun wikxitl yol min tzꞌel cyniyꞌ niyꞌtl ocslal tiꞌj, yaj tzunkej xjal min tzꞌel cyniyꞌ tiꞌj knabl Dios, mlay cykba “Amen” te yecꞌbilte baꞌn tuj cywitz oj t-xiꞌ kkꞌoꞌn chjonte te Dios, cuma min tzꞌel cyniyꞌ tiꞌj knabl Dios.
17Amaloj baꞌnxsen knaꞌj Dios tuj jun wikxitl yol, pero ejeeꞌ tzunj ocslal min tzꞌel cyniyꞌ tiꞌj, mlay tzꞌajben cye.
18Yaltzen weya, chjonte te Dios baꞌn wuꞌna tuꞌn nyolena tuj jun wikxitl yol min-al n-el tniyꞌ tiꞌj. Bix mas nchin yolena tuj jun wikxitl yol twitz cykilcaj ke cyey.
19Pero cyxol ocslal mas waja nuk jweꞌ yol cxeꞌl nkbaꞌna pero telniyꞌ, twitzj oj t-xiꞌ nkꞌumena laaj mil yol tuj jun wikxitl yol min-al n-el tniyꞌ tiꞌj.
20Key hermano, oj t-xiꞌ kbisen tiꞌj tuꞌn tbint jun akꞌuntl kuꞌn, miꞌntzen ko oc tisen jun neeꞌ tuya knaabl, sino tisen jun xjal ma xjaltl nxiꞌ tbisen tiꞌj. Pero tuꞌn t-xiꞌ kbinchaꞌn jun kaꞌ, baꞌntzen tuꞌn koc tisen jun neeꞌ mlay bint tuꞌn.
21Cxeꞌlxix cybisena tiꞌj ti toc tuꞌn ootxa tyol Dios tiꞌj jun wikxitl yol at tuꞌn tul cyxol xjal te Israel nejl. Tz̈i Kaaw cyjulu: “Ja nyola cycyꞌi xjal te Israel. Juꞌ tzunj cꞌoquel nchkꞌoꞌn juntl tnom tuya jun wikxitl yol te cawlcye. Pero amale cwelet nkꞌoꞌna cycastiwa juꞌwa, pero cycyꞌi t-xiꞌ cybiꞌn nyola,” tz̈i Kaaw tuj tyol Dios.
22N-oc kcyeꞌyen tuj tyol Dios tej tpon juntl wik xjal tuya juntl wik yol cyxolj xjal min e cybi tyol Dios, minxtiiꞌ oca tuꞌn cyiikꞌente tcawbil Dios. Yaltzen cyey tuj cywitz, jax juꞌx oj kyolen tuj jun wikxitl yol min-al n-el tniyꞌ tiꞌj, qꞌueleltzen baꞌn tuj twitzj xjal yaaꞌn ocslal, tz̈ikey. Bix tuj cywitza oj kkꞌumen tyol Dios tuj tzinen, cꞌajbel te jun xjal ocslal pero yaaꞌn te jun xjal yaaꞌn ocslal.
23Pero yaaꞌn juꞌwa. Ka cykilca key ocslal nchi chmeta tuj jun lugar, bix cykilca key nchi akꞌa yolel tuj jun wikxitl yol yaaꞌn telniyꞌ, ¿ti pjel oj tocx jun xjal yaaꞌn ocslal cyxola? Qꞌuelela tuj twitz njaw tuj cywiꞌy.
24Pero katzen nchi kꞌumena tyol Dios tzinenxix, ojtzen tocx jun xjal yaaꞌn ocslal cyxola, cꞌoqueltzen tbiꞌn, bix jketel tnaabl, bix qꞌuelel tniyꞌ tiꞌj at til.
25Cykil tzunj ewen tuꞌn tanem cꞌuleltzen tuj tcꞌuꞌj, bix cyjeltzen tkꞌoꞌn til, bix cwel maje naꞌl Dios, bix qꞌuelel tniyꞌ tiꞌj Diostzen at cyuyey.
26Entonces, key hermano, jnxiꞌ nkbaꞌna cyey jaj oj cychmeta tuj jun culto, cab cyey bitzel, bix cabtl cyey kꞌumlte tyol Dios, bix cabtl cyey kbalte ti o tyeecꞌa Dios cye, bix cabtl cyey yolel tuj jun wikxitl yol min-al n-el tniyꞌ tiꞌj, bix cabtl cyey kbal ti japeninaj jun wikxitl yol. Pero cybinchama cykilca tuꞌn ttzket cynaabl ocslal tuj tyol Dios.
27Ka ma yolen juun tuj jun wikxitl yol min-al n-el tniyꞌ tiꞌj, caꞌbax baꞌn tyolen juꞌwa, bix ka ma yolen oxe, pero oꞌcx xsunj. Bix juntl, oj cyyolen xjal tuj jun wikxitl yol, miꞌn chi yolen junx, sino nuk juuncꞌa c-yolel. Bix iltzen tiꞌj at juntl te kbalte ti japenina cyyol.
28Pero katzen min-al jun baꞌn ttxꞌolbante ti elpenina cyyol tuj culto, miꞌn chi yolen tuj wikxitl yol min-al n-el tniyꞌ tiꞌj. Mejor e cyyole cyjunalx bix tuya Dios.
29Ja tzunkej kꞌuml tyol Dios, oꞌcx caꞌba oxe baꞌn tyolen tuj jun culto. Jatzen cabtl nuk chi ebil ti toc cyuꞌn kej nchi kꞌon tyol Dios, laꞌ ka tumel bix ka min.
30Bix oj nkꞌon jun ocslal tyol Dios, bix nebinj juntl ocslal kꞌuklecx, bix at chꞌintl tumel tuya ti tten tyol Dios, iltzen tiꞌj tkꞌaꞌj ocslal nkꞌon tyol Dios ttyem tej juntl ocslal tuꞌn tyolen jun rato.
31Mas baꞌn juuncꞌa c-yolel tiꞌ tyol Dios tuj tumel twitzj oj tjaw nilj entera ocslal te kꞌolte tyol Dios. Juꞌtzen qꞌuelel cyniyꞌ ocslal tiꞌj tyol Dios bix chi cycywixeltzen tuj cyocslabl.
32Jnxiꞌ nkꞌumena jaj oj at nim cybaja cyaja chi kꞌona tyol Dios tuj jun culto, ilxsen tiꞌj ttxolan cyseꞌ cyiiba joocꞌtzen ncana cyiꞌja tuꞌn cyyolena,
33cuma te Dios taj tuꞌn cykilca ten tuj ttz̈yal, yaaꞌn tuꞌn cykil ten tuj tzpetpajlenel. Juꞌ tten cyxol ocslal tuj cykilca tja Dios.
34Bix at juntl nbaj cyxola. Ke xuuj oj min tzꞌel cyniyꞌ tiꞌ cyyol kꞌuml tyol Dios, bixsen nchi ocx te kanlte te ke cychmil ti tten, bix kaꞌca jun tbiꞌnc tuj culto. Ke xuuj mixbe cyyolen juꞌwa tuj culto. Il tiꞌj tuꞌn cybinte jley ti tten tuꞌn cycub ten tuj tumel tuj culto.
35Ka cyaj xuuj tuꞌn tel cyniyꞌ tiꞌj ti toc cyuꞌn kꞌuml tyol Dios, baꞌn tuꞌn t-xiꞌ cykanen te cychmil cyja, cuma yaaꞌn baꞌn tuꞌn cyocx ten labtel tuj culto.
36Yaltzen key, ¿tzimpa niyꞌ tuj cycꞌuꞌja tiꞌj ejeeꞌpa tzuna e jaw itzꞌjsante tyol Dios? ¿Bix tzimpa niyꞌ tuj cycꞌuꞌja tiꞌj nuk ejeeꞌy n-el cyniyꞌ tiꞌ tyol Dios? Ka juꞌ niyꞌ tuj cycꞌuꞌja, juꞌtzen loj njaw cyniman cyiiba.
37Ka jaxxix cyuꞌna n-el cyniꞌya tiꞌj alcyej jaxxix, bix ka jaxxix cyuꞌna at cyipemala tuꞌn t-xiꞌ cykꞌumena jaxxix, qꞌuelel cyniꞌya tiꞌj jnxiꞌ ntzꞌiꞌbena cyey jaj tcawbil Dios.
38Ka at jun kꞌuml tyol Dios cyxola min tzꞌel tniyꞌ tiꞌj jaxxix jnxiꞌ ntzꞌiꞌbena cyey, miꞌn tzꞌoc tajlal te kbalte tyol Dios.
39Key hermano, cykꞌoꞌnc cyipena tiꞌj cykꞌumena tyol Dios tuj tzinen, pero miꞌn txiꞌ cykbaꞌna cye kej ocslal nchi yolen tuj jun wikxitl yol min-al n-el tniyꞌ tiꞌj tuꞌn miꞌn chi yolen.
40Ja mas il tiꞌj jaj tuꞌn cytena tuj tumel tuj jun culto, yaaꞌn tuj tzpetpajlenel.
Who We AreWhat We EelieveWhat We Do
2025 by iamachristian.org,Inc All rights reserved.
