ROMANOS 16 - Mam of Todos Santos -- Guatemala Unicode

Jun kꞌolbebl tuꞌn Pablo cyuya ke tuya cye ocslal aj Roma

1Jxuuj Febe tbi cxeꞌl tiiꞌnxuj jwuꞌja lu te cyey. Jun baꞌn xuuj t-akꞌanal Dios cyxol ocslal tuj tnom te Cencrea.

2Cxeꞌl ncubsaꞌna nwitza cyey tuꞌn t-xiꞌ cycꞌojlaꞌn jxuuja, tisex nbint cyxol ocslal, cuma ocslalxuj tiꞌ Kaaw. Cyonenx-xuj tuya ti cyitzꞌjelaxuj, cuma nim xjal o tonenxuj, bix o tzꞌonenxuj wiꞌja.

3Cykꞌonxa jun nkꞌolbebla te hermana Priscila bix te hermano Aquila. O chi akꞌanan junx wuyena tuj taakꞌen Cristo Jesús.

4Chꞌixcꞌama e cwaꞌke tuꞌntzen ncleta cyuꞌn. Juꞌ tzunj nim nxiꞌ nkꞌoꞌna chjonte te cye, bix yaaꞌn nuk njunala, sino cykilca kej ocslal yaaꞌn judío.

5Bix cykꞌonxa jun nkꞌolbebla te cyej ocslal nchi chmet tuj tja Priscila bix Aquila tuꞌn tjaw cynimsaꞌn tbi Dios. Bix cykꞌonxa jun nkꞌolbebla te Epeneto, jun wuyena. Jaxin tneel ocslal tiꞌ Cristo tuj departamento te Asia.

6Bix cykꞌonxa jun nkꞌolbebla te María. Nim o tzꞌakꞌananxuj cyxola.

7Bix cykꞌonxa jun nkꞌolbebla te Andrónico bix te Junias. Te ntanema kej xjal lu, bix o chi tenxin tuj tzeeꞌ wuyena. Bix t-xel Cristoke bix nim o bint cyuꞌnxin, bix ejeeꞌxin nejl ocslal nwitza.

8Cykꞌonxa jun nkꞌolbebla te hermano Amplias, jun wuyena.

9Bix cykꞌonxa jun nkꞌolbebla te Urbano. Kuya kiib tuya tuj taakꞌen Cristo. Bix cykꞌonxa jun nkꞌolbebla te Estaquis, juntl wuyena.

10Bix cykꞌonxa jun nkꞌolbebla te Apeles. Iyꞌx qꞌuixcꞌaj tuꞌnxin nuk tiꞌj Cristo, pero min e cyaj tcyeꞌyenxin tocslablxin. Bix cykꞌonxa jun nkꞌolbebla te cyej ocslal at tuj tja Aristóbulo.

11Bix cykꞌonxa jun nkꞌolbebla te Herodión, juntl xjal te ntanema. Bix cykꞌonxa jun nkꞌolbebla te cyej ocslal at tuj tja Narciso.

12Bix cykꞌonxa jun nkꞌolbebla te Trifena bix te Trifosa. Akꞌanalkexuj tuj taakꞌen Kaaw. Bix cykꞌonxa jun nkꞌolbebla te Persida, jun wuyena. Nim o tzꞌakꞌananxuj tuj taakꞌen Kaaw.

13Bix cykꞌonxa jun nkꞌolbebla te Rufo. Jun ocslal tbanelxix tnaabl. Bix cykꞌonxa jun nkꞌolbebla te ttxu Rufo. Jaxuj o cꞌojlan te weya tisencꞌa talxuj inayena.

14Bix cykꞌonxa jun nkꞌolbebla te Asincrito, te Flegonte, te Hermas, te Petrobas, te Hermes, bix cykilca kej ocslal nchi chmet cyuyaxin tuꞌn tjaw cynimsaꞌn tbi Dios.

15Bix cykꞌonxa jun nkꞌolbebla te Filólogo, bix te t-xuꞌlxin Julia tbixuj, bix te Nereo, bix te xuuj titzꞌen Nereo, bix te Olimpas, bix te cyej ocslal nchi chmet cyuyaxin.

16Bix juꞌx cyxola, cykꞌolben cyiiba tuya cykil cycꞌuꞌja.

Bix jax juꞌx cykilca kej ocslal tiꞌ Cristo tzalu, jax nxiꞌ cykꞌoꞌn jun kꞌolbebl te cyey.

17Key hermano, il tiꞌj tuꞌn cycꞌojlan cyiiba cywitz kej xjal cyxola ncub paꞌnte cyey, cywitz kej nchi xnakꞌtzan jun xnakꞌtzbil yaaꞌn junx taꞌ tuyaj cyey o tzꞌoc cyxnakꞌtzaꞌna tiꞌj tyol Dios, tuꞌntzen cytzpeta. Cypamel cyiiba cyiꞌj,

18cuma kej xjal lu yaaꞌn t-akꞌanal Kaaw Cristo, sino nuk nchi xnakꞌtzan alcyej baꞌn cye tuj cywitz. Tuya yol jawnex pero ẍtakꞌ, ncub cysbuꞌn kej ocslal mintiiꞌ tumel cyuya ka jaxxix chi yolen bix ka min.

19Ntzkiꞌna min o cheꞌx lpey tiꞌj jyaaꞌn jaxxix, cuma nkꞌumj tuj cykil twitz txꞌotxꞌ nchi niman cyey tyol Dios. Juꞌ tzunj nchin tzalaja cyiꞌja, pero waja tuꞌn cycꞌojlante cyiiba cywitz kej xjal cyaj tuꞌn tbint kaꞌ cyuꞌna. Waja tuꞌn tel cyniꞌya tiꞌj alcyej baꞌn, pero ncyꞌiya tuꞌn tel cyniꞌya tiꞌj ti tten tuꞌn tbint jkaꞌ.

20Amatzele tzint chi akꞌanan kej lepchec tiꞌ taaw il tuꞌn tbaj cypaꞌn ke ocslal, pero jax juꞌx nakꞌanan Dios tuꞌn cytena tuj ttz̈yal. Oj tpon tumel, Dios cwel waꞌbente tuj ajkelbil taaw il, bix cwel kꞌoꞌn tjakꞌ cykena.

Jatzen cyey, tzajxit t-xtalbil Kaaw Jesucristo cyibaja.

21Timoteo nkꞌon jun kꞌolbebl cyey. Akꞌanalxin wuyena tuj taakꞌen Dios. Bix Lucio tuya Jasón bix Sosípater nchi kꞌon jun kꞌolbebl cyey. Te ntanemake.

22Inayena, Tercio, jun tzꞌiꞌbel te Pablo, jax ma txiꞌ nkꞌoꞌna jun kꞌolbebl te cyey, cuma ocslal kena.

23Nxiꞌ tkꞌoꞌn Gayo jun kꞌolbebl cyey. Tjaxin ntiiniya, bix tuj tjaxin nchi chmete ke ocslal tzalu te nimsalte tbi Dios. Jax juꞌx Erasto nxiꞌ tkꞌoꞌn jun kꞌolbebl cyey. Jaxin cꞌuꞌl pwak tuj ja tnom lu. Bix nkꞌon jxin Cuarto jun kꞌolbebl cyey. Jaxin jun ocslal tzalu.

24Bix weya, nchin kanena te Dios tuꞌn ttzaj t-xtalbil Kaaw Jesucristo cyibaj cykilcakey.

Tej tjaw tnimsaꞌn Pablo tbi Dios

25Mancꞌbiltzen, chi xeꞌl nkꞌoꞌna tuj tkꞌab Dios. Nuk jaxin at tipemalxin tuꞌn cycywixa tuꞌntzen cytena jiquen tuj tyol Dios, jaj baꞌn tpocbal tiꞌj Jesucristo o txiꞌ nkꞌumena cyey. Jaj tpocbal tiꞌ Cristo eꞌwen taꞌ jatxe ootxa, pero jaꞌlewe yaaꞌn eꞌwentl taꞌ.

26Jaꞌlewe lu nkbaja. Jxnakꞌtzbil tiꞌ Cristo o cyaj tzꞌiꞌbet cyuꞌn kej kbalte tyol Dios. Jaj xin Dios mintiiꞌ tbajlel e kbante tuꞌn tbint jlu, tuꞌntzen tkꞌumj tuj cykilca twitz txꞌotxꞌ jxnakꞌtzbil tiꞌ Cristo, tuꞌntzen cyniman ke xjal jtajbil Dios, jaj tuꞌn cyocslan ti Cristo.

27Oꞌcx jun Dios at. Iynen tilbil tibaj cykilca te junx maj. Jawxit nimset tbixin tuꞌn Jesucristo te junx maj. Juꞌxit ttena.