EFESIOS 2 - Mam of Todos Santos -- Guatemala Unicode

Ma ko clet tuꞌn t-xtalbil Dios kibaj

1Key hermano, nejl cyimne eteꞌy. Amale iꞌtzet cyxumlala, cyimne eteꞌy, cuma e tenkey tuj cyila.

2Nejl kaꞌ e cybinchay, tisen nbint cyuꞌn kej xjal lepch nuk tiꞌ tnaabl te twitz txꞌotxꞌ. Bix e cynimey taaw il, jaj taaw il ncawen cyibaj biman eteꞌ kibajxe min chicꞌaj, jaxj taaw il nakꞌanan tuj cyanem kej xjal min txiꞌ cyniman tyol Dios.

3Juꞌ e tema cykil koꞌ nejl. E tena koꞌ cyxolj xjal yaaꞌn ocslal. Nuk e xiꞌ lpe koꞌ tiꞌj nuk tikꞌch taj kxumlal bix tiꞌj nuk tikꞌch kaꞌ e cub kbisen. Juꞌ tzunj e tzaaꞌ nim tkꞌoj Dios kibaj, tisen jaꞌlewe ntzaj tkꞌoj Dios cyibaj kej xjal min cyocsla Dios.

4Nim n-oc tkꞌoꞌntlxin lastim ke, cuma nim n-oc kakꞌ texin.

5Nejl cyimne koꞌ tuꞌn kil. Pero tuꞌnj kmojbabl kiib tuya Cristo, o tzaj tkꞌoꞌn Dios ke jaxj chunkꞌlal e tzaj tkꞌoꞌnxin te Cristo tej tjatz titzꞌjsaꞌnxin tuj cyamecy. Tuꞌn tzunj t-xtalbil Dios kibaj, ma ko cleta.

6At mas tipemal Cristo Jesús tuꞌn tcawen tibaj cykilca, bix tuꞌn kmojbabl kiib tuyaxin, nko cawen junx tuyaxin, tuꞌn kcaman tiꞌj taaw il.

7Ejeeꞌ tzunj lu kkꞌinemal o tzaj tkꞌoꞌnxin te ke, ejooꞌ at kmojbabl kiib tuya Cristo Jesús. Bix tuꞌn tzunj kkꞌinemal tuꞌn Dios te ke, ejooꞌ t-xjalxin, cxeꞌl tyeecꞌan Dios te cykil xjal cyuj kej tyem chi ul, nimxsen jun t-xtalbilxin te ke, ejooꞌ ocslal, tuꞌntzen tchicꞌajax tkꞌakꞌbil tcꞌuꞌjxin kiꞌj.

8Tuꞌn t-xtalbil Dios kibaj, bix cuma o tzꞌoc ke kcꞌuꞌj tiꞌ Tcwalxin, o ko clet tuj il. Yaaꞌn kuꞌnx ma ko cleta, sino ja coꞌpbil ke jun kcotz tuꞌn Dios.

9Yaaꞌn tuꞌn ti jilel baꞌn nbint kuꞌn ko cletel, sino tuꞌnj coꞌpbil ke o takꞌ Dios, tuꞌntzen min-al jun ke baꞌn tuꞌn tjaw tniman tiib tiꞌj twitz Dios.

10O ko clet nuk tuꞌnj t-xtalbil Dios o tzaj tkꞌoꞌn ke. Tuꞌnj kmojbabl kiib tuya Cristo Jesús o ko oc te t-xjal Dios, tuꞌntzen tbint jun baꞌn kuꞌn. Tiꞌj tzunja e tbinchaꞌ Dios ejooꞌ jatxe tuj tneel.

At ttxubt xjal kxol jaj tcyimlen Cristo twitz cruz

11Juꞌ tzunj, key hermano, cynaꞌmcꞌa yaaꞌn ejeeꞌy t-xjal Dios nejl, cuma yaaꞌn aj Israelkey. Ncub cybisen aj Israel jaꞌlewe nuk ejeeꞌ t-xjal Dios, cuma at jun techel n-oc cykꞌoꞌn tiꞌ cyxumlal. Ejeeꞌ tzin cykbaꞌn juntl wik xjal yaaꞌn te Dioskey, cuma mintiiꞌ techel n-oc tiꞌ cyxumlala. Pero n-oc cykꞌoꞌn techel cyiꞌj nuk tuꞌn cyex cykꞌab.

12Nejl tiꞌjxe xjal te Israel eteꞌy. Mintiiꞌ cymojbabl cyiiba tuya Cristo, bix mintiiꞌ tumel cyuyey tiꞌj cykilcaj otk tkba Dios tuꞌn tkꞌonte. E tenkey twitz txꞌotxꞌ min-al jaxxix Dios cyuyey, bix min ayonkey tiꞌj jun coꞌpbil cyey.

13Pero jaꞌlewe at cymojbabl cyiiba tuya Cristo Jesús. Amale nakchet eteꞌy tiꞌ Dios nejl, pero jaꞌlewe, tuꞌnj tcyimlen Cristo, at cyoclena tuya Dios.

14Nejl at jun kꞌoj cyxol xjal judío bix kej xjal yaaꞌn judío. Ja kꞌoj lu tisen jun tapya tcuꞌx cyxol cycaꞌbel wikan. Pero jaꞌlewe ejeeꞌy yaaꞌn judío bix ejooꞌ judío mintiiꞌ kꞌoj tcuꞌx kxol. Cykilca koꞌ at kmojbabl kiib tuya Cristo, bix juꞌ tzunj junx wik xjal koꞌ.

15Jtapya tcuꞌx cyxol cycaꞌbel wikan xjal nejl, jatzen leyj e cyaj tkꞌoꞌn Dios te cye judío nejl nimcꞌa iken tuꞌn. Pero tej tcyim Cristo twitz cruz, biꞌx el tiiꞌn tipemal jcyley judío te paꞌlte cye xjal, tuꞌntzen cyoc cykil xjal te junx t-xjal Dios. Juꞌtzen e cwaꞌ tkꞌoꞌn Cristo ttxubtxjal t-xol cycaꞌbel wikan.

16Tuꞌntzen tcyimlen Cristo twitz cruz, ejooꞌ judío bix ejeeꞌy yaaꞌn judío o ko oc te junx cloj xjal. Cykiltzen koꞌ baꞌn kten tuj ttz̈yal tuya Kman Dios. Tuꞌn tcyimlen Cristo e cymaꞌ kꞌoj cyxol judío bix kej yaaꞌn judío.

17Tej tul Cristo twitz txꞌotxꞌ, bixsen e tkbaxin tpocbalj ttxubtxjal cye cykilca xjal. E tkꞌumexin cyey, ejeeꞌy yaaꞌn judío min otk cyiikꞌa ley te Dios, bix e tkꞌumexin te cye judío otk cyiikꞌ ley te Dios bix oc cybiꞌn jaca kꞌij.

18Judíole koꞌ, bix yaaꞌnle judío koꞌ, tuꞌn Cristo baꞌn tuꞌn kocx cykilca koꞌ twitz Dios. Bix tuꞌn junx Espíritu Santo at koclen tuꞌn kocx twitz Dios.

19Entonces, key hermano yaaꞌn judío, nejl yaaꞌn ejeeꞌy t-xjal Dios. Pero yaaꞌntl tiꞌjxe eteꞌy te t-xjal Dios, sino t-xjal Dios key kuyena. Ya junx elninakey tuya Dios.

20Ejooꞌ t-xjal Dios tisen jun jaaꞌ. Ke cyxnakꞌtzbil ke tyolel Dios bix ke t-xel Jesús o cyaj cykꞌoꞌn ke, ejeeꞌ tzunja tisen tkꞌukꞌlel jaaꞌ. Bix Cristo Jesús tisentzen xcbil te tipemal,

21tuꞌntzen cyiw jaaꞌ, tuꞌntzen miꞌn tzꞌel xitj niyꞌ ttxꞌotxꞌel. Tisentzen jun jaaꞌ tlichon tiib tuya xcbil bix juꞌtzen nbinne jun jaaꞌ, juꞌxsen kewa ejooꞌ ocslal tuya Cristo. Tuꞌnj kmojbabl kiib tuya Cristo, junx elnina t-xjal Dios koꞌ, tuꞌntzen kajben te Dios te sakxix t-xjal.

22Bix cyuyaxa, tuꞌnj cymojbabl cyiiba tuya Cristo, bix t-xjaltltzen Dios ejeeꞌy, bix attzen Espíritu Santo cyuyey.