COLOSENSES 4 - Mam of Todos Santos -- Guatemala Unicode

1Key taaw akꞌuntl, cykꞌonx jun twiꞌ cycꞌuꞌj cy-akꞌanala jiquen, tuꞌntzen baꞌn tuj twitz Dios, bix ka baꞌn akꞌanalke, jun twiꞌ cycꞌuꞌj baꞌn, cuma cyuyaxa eteꞌy tjakꞌ tcawbil cypatróna tuj cyaꞌj, jaj Dios nxiꞌ cyeyente cyey ka ma chi binchana cye cy-akꞌanala tuj tumel.

2Key ocslal tuj Colosas, miꞌn cyaj cykꞌoꞌna tuꞌn cynaꞌna Dios. Bix chi ximala oj cynaꞌna Dios, bix tuya chjonte texin.

3Bix chi naꞌna Dios wiꞌja, tuꞌn ttzaj tkꞌoꞌnxin amleꞌn weya tuꞌn t-xiꞌ nkꞌumena jxnakꞌtzbil tiꞌ Cristo, jaj yol eꞌwen taꞌ nejl pero chicꞌaj tuꞌn Dios jaꞌlewe. Ntiina tuj tzeeꞌ cuma e nkꞌumena nejl.

4Juꞌ tzunj, chi naꞌna Dios wiꞌja, tuꞌn tchicꞌajax ja xnakꞌtzbil lu wuꞌna, cuma ja weja waakꞌen.

5Cxeꞌl cyiiꞌna cychunkꞌlala tuya cynaabla cywitzj xjal min ma chi ocslan tiꞌ Cristo. Cyjyonx amleꞌn tuꞌn cybinchana jun baꞌn te cyexin.

6Tisen tzin tkꞌoꞌn atzꞌen ttz̈yal tiꞌ waabj, tenxit cyyola tuj ttz̈yal, tuꞌntzen cynakꞌeta tiꞌj tuꞌn taj cytzakꞌbeꞌna te juun xjal tuj tumel.

Jun kꞌolbebl tuꞌn Pablo cyuya ke tuya cye ocslal aj Colosas

7Yaltzen weya tzalu, cxeꞌl ttxꞌolbaꞌn jxin Tíquico ti ntena cyey. Nim n-oc takꞌxin weya, bix n-oc ke ncꞌuꞌja tiꞌjxin tuj akꞌuntl. Junx nko akꞌanana tuj taakꞌen Kaaw.

8Nxiꞌ nchkꞌoꞌna jaxin cyuyey tuꞌn tel tniyꞌxin tiꞌj ti cytena, bix tuꞌn tcywix cycꞌuꞌja tuꞌnxin.

9Jax juꞌx nxiꞌ nsmaꞌna jxin Onésimo tuyaxin. Aj cytanema ja Onésimo, bix at nim tkꞌakꞌbil ncꞌuꞌja tiꞌjxin. Nim ma tzꞌajbenxin weya. Cxeꞌl cykꞌumenxin cycaꞌbelxin cyey cykilcaj nbaj tzalu.

10At Aristarco tuj tzeeꞌ wuyena, bix nxiꞌ tkꞌoꞌnxin jun kꞌolbebl te cyey. Jax juꞌx nxiꞌ tkꞌoꞌn Marcos jun kꞌolbebl te cyey. Tcwal titzꞌen tman Bernabéxin. N-ul tuj cycꞌuꞌja j-e xiꞌ nkbaꞌna cyey tuꞌn tbint cyuꞌna ka ma ponxin cyuyey. Cykꞌimxin tuya cykil cycꞌuꞌja.

11Jax juꞌx junxin Jesús, juntl tbixin Justo, nxiꞌ tkꞌoꞌn jun kꞌolbebl te cyey. Cyxol kej ocslal n-onen wiꞌja jaꞌlewe tuj waakꞌena tzalu tiꞌj tuꞌn ttz̈ꞌiy tcawbil Dios, oꞌcx kej oxe xjal lu aj judíoke. Nim ma nimset ncꞌuꞌja cyuꞌnxin.

12Nxiꞌ tkꞌoꞌn jxin Epafras jun kꞌolbebl te cyey. Aj cytanema jaxin, bix jun t-akꞌanal Cristoxin. Nim nnaꞌnxin Dios cyiꞌja, tuꞌn cykꞌon cyiiba tiꞌj tajbil Dios, bix tuꞌn cyweꞌxixa tuj cyocslabla.

13Jax wuꞌna, nim nchin labta cyiꞌja, bix cyiꞌj kej ocslal cyuj tnom te Laodicea bix te Hierápolis.

14Jax juꞌx nxiꞌ tkꞌolbeꞌn jxin Lucas ejeeꞌy, jaj xin kꞌanel n-oc takꞌ weya. Bix nxiꞌ tkꞌoꞌn jxin Demas jun kꞌolbebl te cyey.

15Cykꞌonxa jun nkꞌolbebla te cyej ocslal najlke tuj Laodicea. Bix cykꞌonxa jun nkꞌolbebla te Ninfas bix te cyej ocslal nchi chmet tuj tjaxuj.

16Najsama, oj tbaj cys̈iꞌna ja uꞌj lu cyxola, cysmanxa cye ocslal tuj Laodicea, tuꞌntzen tjaw cys̈iꞌnxin cyxolxin. Jax waja tuꞌn tjaw cys̈iꞌna j-uꞌj nxiꞌ nsmaꞌna cye ocslal tuj Laodicea.

17Cykbanxa ja nyola lu tej xin Arquipo: “Kꞌoꞌnc tcꞌuꞌja tiꞌj tuꞌn tpon baj jtaakꞌena ma kꞌoj tey tuj taakꞌen Kaaw,” tz̈i cybela texin.

18Inayena, Pablo, nxiꞌ nkꞌoꞌna jun nkꞌolbebla te cyey, pero yaaꞌn jun ntzꞌiꞌbila ncub tzꞌiꞌbente, sino inayena tuꞌnx nkꞌaba. Chi naꞌna Dios wiꞌja, cuma tuj tzeeꞌ ntiiniya. Tenxit t-xtalbil Dios cyuyey.

Oꞌcx nyolja.