1 CORINTIOS 13 - Mam of Todos Santos -- Guatemala Unicode

Mlay ko ajben te Dios ka min n-oc takꞌ juntl kuya ke

1Kane baꞌn ko yolen cyuya xjal, bix kane baꞌn tuꞌn kjaw yolen tuj jun wikxitl yol mintiiꞌ tumel, hasta baꞌntetnele kyola cyuya ke ángel tuj cyaꞌj, pero ka mintiiꞌ tkꞌakꞌbil kcꞌuꞌj cyiꞌ xjal, mintzen nko ajben twitz Dios. Ka min tzꞌoc cyakꞌ kuya ke, nuk kyol nkꞌajt, tisen jun xcbil nuk ntzininin mintiiꞌ najbeꞌna.

2Bix ka at nim kajbel tuꞌn t-xiꞌ kkꞌumen tyol Dios, bix kane ma tzꞌel kniyꞌ tiꞌj cykilca, hasta cykilcaj e cyaj tkꞌoꞌn Dios ti pjel yaj, pero ka min tzꞌoc cyakꞌ kuya ke, mintiiꞌ tajbelel. Bix ka nim kocslabl tiꞌ Dios at, hasta jacꞌanele tsiyꞌ yucch witz kuꞌn tuꞌn kocslabl, pero ka mintiiꞌ tkꞌakꞌbil kcꞌuꞌj cyiꞌ kuya, mintiiꞌ kajbel.

3Bix ka ma txiꞌ kkꞌoꞌn cykilca at kuya cye mebe xjal, pero nuk te nimbil kiib, bix mintiiꞌ tkꞌakꞌbil kcꞌuꞌj cyuya mebe, mintiiꞌ tajbelel jnbint kuꞌn twitz Dios. Bix ka ma cub tzeyꞌ kxumlal nuk tuꞌn nko kꞌumen tyol Dios, pero ka mintiiꞌ tkꞌakꞌbil kcꞌuꞌj cyuya xjal, mintiiꞌ tajbel kcyamecy.

4Katzen at tkꞌakꞌbil kcꞌuꞌj, attzen kpasensya, bix jun xtalbil cxeꞌl kkꞌoꞌn cye cabtl, bix miꞌn nuk chiꞌlec kcꞌuꞌj ka at jun tiiꞌ at tuya juntl, bix yaaꞌn cjawel kniman kiib, bix miꞌn ko iyꞌ tibaj mas knaabl tibaj cabtl.

5Tuꞌn toc cyakꞌ xjal ke, iltzen tiꞌj ko yeecꞌan baꞌn knaabl cye xjal, yaaꞌn nuk cꞌoquex kcuꞌtzen kiib, bix yaaꞌn nuk te ke jun baꞌn cxeꞌl kbisen, bix min ko jaw kꞌoj naj, bix ka at jun kaꞌ n-oc tbinchaꞌn juntl kiꞌj, miꞌn tzaj knaꞌntl.

6Oj at tkꞌakꞌbil kcꞌuꞌj, miꞌn ko tzalaj ka ma txiꞌ jun xjal tuj il tuꞌn til, sino oꞌcx ko tzalajel tiꞌj ka ma txiꞌ tiiꞌn jun xjal tchunkꞌlal jiquen.

7Ka n-oc cyakꞌ xjal ke, cweltzen knajsaꞌn cyil, bix nuk cxeꞌl kbisen baꞌn tiꞌ jun xjal, bix kaj nuket cykilca baꞌn te jun xjal, bix qꞌuiyax kuꞌn cykilca kaꞌ n-oc xeꞌt kiꞌj.

8Tkꞌakꞌbil kcꞌuꞌj mintiiꞌ tbajlel, cuma cꞌoquel kꞌakꞌen kcꞌuꞌj tuj cyaꞌj te junx maj. Pero yaltzen tkꞌumj tyol Dios, bix jyol tuj jun wikxitl yol min-al n-el tniyꞌ tiꞌj, bix tkꞌumj jcykilca baꞌn kuꞌn, cykilca pjel twiꞌ laꞌ alcye jun kꞌij oj kpon tuya Dios, cuma mintiiꞌ chi ajbeletl. Nuk oꞌcx cyjel tkꞌakꞌbil kcꞌuꞌj kuya kxol.

9Jn-el kniyꞌ tiꞌj jaꞌlewe, yaaꞌn enterax. At mastl. Bix cykilcaj nbyan tiꞌ Dios jaꞌlewe yaaꞌn juꞌ tisej oj toccꞌa kcyeꞌyen.

10Juꞌ tzunj ojtzen kpon tuya Dios, bixsen pjel tilel tpocbal Dios, cuma ya mintiiꞌtl il tiꞌj. Mintiiꞌtltzen nuk tpocbal, cuma tcubtltzen Dios ya kuya.

11Cxeꞌl nkbaꞌna jun tumel. Tej neeꞌ kena, in yolena tisen jun neeꞌ, bix at jun nnaabla tisen jun neeꞌ. Yaltzen jaꞌlewe ma xjaltltzen kena, bix ya yaaꞌntltzen juꞌtl nnaabla tisen neeꞌ. Juꞌtzen kten jaꞌlewe. Tisen neeꞌ etoꞌ jaꞌlewe, hasta ojxe toc kcyeꞌyen jmera jaxxix. Pero oj toc kcyeꞌyen jmera jaxxix alcye jun kꞌij, ya tisentzen jun xjal ya ma xjaltl, bix qꞌueleltzen kniyꞌ tiꞌj.

12At juntl tumel. Oj kaj kil kwitz, mlay kil. Nuk tuj jun respej klaꞌtzen chꞌin. Juꞌtzen tten n-el chꞌin kniyꞌ tiꞌ Dios jaꞌlewe. Nuk tisen n-oc kcyeꞌyen chꞌin kwitz tuj respej jaꞌlewe, pero at jun kꞌij cꞌoqueltzen kcyeꞌyen twitz Dios tisen te Dios n-oc tcyeꞌyen kwitz jaꞌlewe.

13Entonces, key hermano, tuꞌn tpon baj twiꞌ nyola tiꞌj tkꞌakꞌbil kcꞌuꞌj, cxeꞌl nkbaꞌna cyey at kꞌukl kcꞌuꞌj tiꞌ Dios, bix at nko ayon tiꞌjxin, bix at tkꞌakꞌbil kcꞌuꞌj kxol. Bix cyxol tzunj oxe tumel lu ja te mas il tiꞌj, jaj tkꞌakꞌbil kcꞌuꞌj kxol.