LOS HECHOS 21 - Mam of Todos Santos -- Guatemala Unicode

Tej t-xiꞌ Pablo tuꞌn tpon tuj Jerusalén

1Jatztzen taꞌ barc, axsen tcyiwel tcub kpaꞌn kiiba cyuya tij otk chi ul tuj Mileto, bix ocx koꞌya tuj barc. Bix e xiꞌ koꞌya txucl tuj txꞌotxꞌ te Cos. Tetzen juntl kꞌij kpona tuj txꞌotxꞌ te Rodas. Kiyꞌtla bix e pon koꞌya tuj tnom te Patara.

2Tujtzen Patara e kchꞌixbe kiiba tuj juntl barc. Ja tzunj barc e xiꞌ kꞌinte keya juꞌ xiꞌnin tuj txꞌotxꞌ te Fenicia, parte te Siria.

3Tujtzen be tuj mar e kila txꞌotxꞌ te Chipre, pero min e weꞌ koꞌya, sino juꞌ ex koꞌya tuj kmankꞌaba te Chipre. Kꞌinx kbeya tejxe kpona tuj txꞌotxꞌ te Siria. Pero tuꞌntzen tcyaj tkꞌoꞌn barc iktz tuj tnom te Tiro, ttziiꞌ mar, bix ocx koꞌya jatzewe.

4Tujtzen Tiro bix e xiꞌ kjyoꞌna ke ocslal, bix e ten koꞌya cyuya wuuk kꞌij. Tejtzen cybinte ocslal ka xiꞌnin Pablo Jerusalén, bix e cykbaxin te Pablo:

—Taat, nuksama. Miꞌn txiꞌy tuj Jerusalén. At-xsen tkaꞌyel te tey. O tzaj tkbaꞌn Espíritu Santo keya tuꞌn miꞌn txiꞌy―tz̈i tzunkexin te Pablo.

5Pero te Pablo min e tcuyaxin, bix etzx koꞌya tej wuuk kꞌij. Tejtzen ketza, cykilca ke ocslal tuya ke cyxuꞌl bix ke cycwal bix e tzajke wabl keya ttxaꞌnxe tnom ttziiꞌ mar. Tejtzen kpona ttziiꞌ mar, bix e cub maje koꞌya, bix e naꞌn koꞌya Dios. Kbajtzen naꞌna Dios, bix e kꞌolben koꞌya.

6Bix ocx koꞌya juntl maj tuj barc, bix ajtz meltzꞌaj ke ocslal te Tiro cyja.

7Bix ex koꞌya tuj barc tejxa kpona tuj tnom te Tolemaida, bix etz koꞌya tuj barc. Bix e xiꞌ koꞌya jyol cye ocslal. E kꞌolben koꞌya cye, bix e ten koꞌya jun kꞌij cyuya.

8Tetzen juntl kꞌij bix etz koꞌya tuj Tolemaida, bix e xiꞌ koꞌya tuꞌn kkena cubne tuj tnom te Cesarea, jaaꞌj najla Felipe, junxin cyxol jwuukxin onel tuj tja Dios otk cub pan tej waabj cyxol viuda te Jerusalén. Ya jatl tzunxin kbalte tpocbal Jesús cye xjal, bix e cyaj koꞌya tuya Felipe.

9Cyaja tmeelxin sortel at. Bix nchi kbantxin tyol Dios otk cyiikꞌtxin te Dios, cuma ejeeꞌtxin tyolel Dios.

10E ten koꞌya cab kꞌij tuya Felipe. Attzen jun kꞌij e tzajxin junxin tyolel Dios tuj Judea, bix e ponxin tuj Cesarea. Ttzkiꞌnxin ti jilel tuꞌn tbaj. Agabo tbi jxin tyolel Dios.

11Ja tzunj xin Agabo e pon te kꞌolbel keya. Tejtzen tponxin, bix el tiiꞌnxin tqꞌuelbil Pablo. Tuyatzen tqꞌuelbil Pablo oca tẍpoꞌnxin ke tkꞌabxin bix ke tkenxin. Tz̈i tzunxin cyjulu:

—Ma tzaj tkbaꞌn Espíritu Santo ka cwel ẍpet jtaaw jqꞌuelbil lu, tisenj ma cub wichlaꞌna, cyuꞌn judío, bix cxeꞌl kꞌoꞌna cye xjal te Roma―tz̈i Agabo.

12Tejtzen toc kbiꞌna kej yol juꞌwa, bix oc kcubsaꞌna kwitza cyuya ocslal te Cesarea te Pablo tuꞌn miꞌn txiꞌxin Jerusalén.

13Pero bix aj ttzakꞌbeꞌn Pablo:

—¿Tikentzen nchi ookꞌey bix juꞌ cyyole tuꞌn tcub cynajsaꞌna ncꞌuꞌj tiiꞌn xiꞌnin kena? Lu kenwe binne nten tuꞌn ncub ẍpet, bix yaaꞌn oꞌcxj, sino tuyaxa tuꞌn ncyim nuk tiꞌjcꞌa Kman Jesús―tz̈i Pablo keya.

14Mix e cwaꞌ tiꞌjxin kuꞌna tuꞌn miꞌn txiꞌxin Jerusalén. Cwa tpon baj twiꞌ o kyolena tuyaxin, bix e xiꞌ kkbaꞌna texin:

—¡Nukxna ja t-xtalbil Dios tuyey!

15Tbajlenxitltzente kꞌolbena tuj Cesarea, bix oc kchmoꞌna tikꞌch keya, bix e tzyet kbeya Jerusalén.

16Bix e xiꞌ junxin ocslal te Cesarea kuyena tuj kbeya. Tejtzen kpona Jerusalén, bix e xiꞌ cyiiꞌnxin ejooꞌya tja junxin Mnasón tbi, tuꞌn kcyaja tjaxin. Jxin Mnasón te txꞌotxꞌ te Chipre, bix nimxsen tyem toclenxin ocslal.

Tej tjaw ttzyet Pablo tuj templo

17Bixsen ke ocslal te Jerusalén e cyiikꞌ koꞌya tuya nim ttz̈yal tej kpona.

18Tetzen juntl kꞌij bix e xiꞌ Pablo kuyena te kꞌolbel Jacobo, titzꞌen Jesús bix jaxin tneel tajwil cye ocslal. Bix tuya Jacobo otk pon cychmoon cyiib ke tajwil ocslal.

19Kbajxitltzen kꞌolbena, bix akꞌ Pablo kꞌumlte tikꞌch otk bint tuꞌn Pablo tuꞌn tipemal Dios cyxolj xjal yaaꞌn judío.

20Tejtzen toc cybiꞌn tawil tja Dios judío kej tpocbal, bix akꞌkexin kꞌol chjonte te Dios. Pero yajcꞌatltzen bix e xiꞌ cykbaꞌnxin te Pablo:

—Taat, baꞌnxsente cyxolj xjal yaaꞌn judío at nim ma chi ocslan. Pero attzen jaaꞌ toca chꞌin. Matzen tzꞌoc tcyeꞌyena cyxol xjal judío nimxsen mil xjal ma tzꞌocslan. Pero kej ocslal judío ncubx cycyiwsan cyiib ka ilx tiꞌj tuꞌn cyxiꞌ lpe tiꞌ tley Moisés.

21Pero kej judío o chi oc ebinte cyxolj xjal judío najl nakch cyxol juntl wik xjal, jatzen tey umlaꞌn kbal tej tuꞌn miꞌn chi oc lpe tiꞌ tley Moisés, mitetpe cycostumbre judío, mitetpe il tiꞌj tuꞌn toc cyechel judío tiꞌ twiꞌ cytzꞌalbil neeꞌ cwalxke.

22Entonces ¿titzen kseꞌ? Jax cybiꞌxcye ka ma tzul tey tzalu, bix cꞌoquel cychmoon cyiib tiꞌj cye cyaj.

23At jun baꞌn ttema tuꞌn cycub chewex. Bincham jcxeꞌl kkbaꞌna tey. Keya kxol at cyaja xjal o cyaj cykꞌoꞌn cyyol twitz Dios cwelx cycꞌuꞌncye jun cycostumbre judío, bix miꞌn cub cymatzoꞌn ttzmal cywiꞌ ojxe tbint ja yol lu cyuꞌn.

24Ya nukxix nbinactl ja lu cyuꞌn. Cutxetzen tey, bix kꞌiꞌnxsenke, tuꞌntzen tbint cyuꞌna cykil cycostumbre judío cyuꞌna jcye cbinel cyuꞌn. Bix juntl, jax tey cꞌoquel chjonte cyej jil alimaj te oybil cxeꞌl cyoyej jcyaja xjala tuꞌntzen tpon baj twiꞌ cyyol twitz Dios. Bix oj tpon baj oybil, bixsen cwel mtzet twiꞌy cyuyaj cyaja xjala. Tiꞌj tzunj juꞌwa cykilca ke xjal judío cꞌoquel cyeꞌyente ka min cub tchꞌixbeꞌn tey tley Moisés. Cꞌoquel cycyeꞌyen ka jaan tey ncuyan tej cycostumbre judío.

25Yaltzen ke ocslal yaaꞌn judío, matzen cub ktzꞌiꞌbena jun uꞌj cye tzin tkbaꞌn ti chi temela kuꞌn. Miꞌn tzꞌoc cykꞌoꞌn cye cycꞌuꞌj tiꞌj cyley judío. Nuktzen jaj tuꞌn miꞌn txiꞌ cychyoꞌn jchiꞌpj otk txiꞌ cyoyen cye sant, mitetpe tz̈iyꞌ, mitetpe cychuꞌl alimaj min otk tzꞌel tz̈iyꞌ cye, bix min-al jun baꞌn twutan tuya juntl xuuj, nuk ja te t-xuꞌj―tz̈itzen ke tij tuj tja Dios te Pablo.

26Kej yol lu baꞌn eꞌlake tuj twitz Pablo. Tetzen juntl kꞌij bix e xiꞌ tiiꞌnxin kej cyaja xjal, bix e xiꞌxin tuj nin tja Dios te ichlalca costumbre cyuya, bix tuꞌntzen tpon baj twiꞌ jwuuk kꞌij costumbre te mitknaꞌx cyxiꞌ oyet jil alimaj te Dios te jaca juun xjal.

27Juꞌtzen tten tpon baj twiꞌ jwuuk kꞌij nimbil tuj nin tja Dios. Tejtzen chꞌitk cypon baj wuuk kꞌij, bix ocpan cabxin judío tuj tja Dios. Otk chi ponxin Jerusalén. Otk chi tzajxexin tuj txꞌotxꞌ te Asia. Tejtzen toc cycyeꞌyenxin Pablo bix akꞌkexin cyakwusal xjal, bix e cytzuyxin Pablo.

28Bix akꞌkexin s̈-ilcye xjal:

—Key xjal te Israel, ¡ko cyoneca tzalu! Ma tzyet jxjal niyꞌ tuj jaca tnom kbalte ka mintiiꞌ il tiꞌj tuꞌn toc ebiꞌnj tzin t-xnakꞌtzan ktanem, bix tley Moisés, bix tley nin tja Dios. Bix ka tzul tiiꞌn cab xjal griego tuj nin tja Dios, jaaꞌ nuk ejeeꞌcꞌacye xjal judío baꞌn cyoctz. Juꞌtzen ma tzꞌoc cytzꞌilsaꞌn ja lugar sant―tz̈i tzun kej xin judío otk chi tzajxe.

29Juꞌtzen cyyol xina cyibaj xjal griego, cuma otk tzꞌoc cycyeꞌyenxin Trófimo te Efeso, jun tuya Pablo, tuj tja Dios, bix tuj cywitzxin ja Pablo kꞌil texin. Pero yaaꞌn juꞌwa.

30Tejtzen cybiꞌn kej yol, bix e tzaj kꞌojl cykil tnom, bix e tzaj cychmoon cyiib xjal, bix e tzyet Pablo, bix etz kitet-xin tiꞌjxe tja Dios, bix e jpetke ttziiꞌ tja Dios.

31Biꞌxitle e byet-xin nuket min e pon tumel kꞌoj tuyaj xin cawel cyibaj soldado te Roma.

32Ja tzunj xin cawel cye soldado bix e tzaj ttxcoꞌnxin ke tsoldadoxin, bix ke tcapitánxin, bix junxsen cyxiꞌ ajkelenxin jaaꞌ npjaꞌ il. Tejtzen toc cycyeꞌyen xjal jxin cawel cyuya soldado otk chi ponxin, ya min oc cywolpsaꞌnxin Pablo.

33Entonces bix e xiꞌ lkꞌe cawel tiꞌ Pablo, bix e tzaj ttzyuꞌnxin Pablo, bix e xiꞌ tkbaꞌnxin cye tsoldadoxin tuꞌn tcub ẍpet Pablo tuya caꞌba cadena, bix e bint cyuꞌnxin juꞌwa. Bix akꞌxin kanlte te Pablo alcye Pablo, bix ti otk cub tbinchenxin, bix ti jilel tilxin.

34Pero tzinxsen n-el cywiꞌ xjal, ya minx iyꞌxtl tyol Pablo tuj twiꞌxin, bix mitetpe el tniyꞌxin ti cyyol xjal, cuma tecꞌax tzin tyolen jun wik yol, bix cabtl juntl wik cyyol. Mix eꞌla tniyꞌxin tiꞌj. Entonces cwa t-xiꞌ tchkꞌoꞌnxin tuꞌn t-xiꞌ kꞌiꞌn Pablo tuj jaaꞌ jaaꞌ najla ke soldado.

35Tejtzen cyponxin tuj jaaꞌ, bix akꞌ jawexkexin cyuj yotx te jaaꞌ, bix e jaw cyiiꞌn soldado ja Pablo tiꞌ cykulxin tuꞌn tclet-xin cywitz xjal, cuma cyaj xjal tuꞌn tcub Pablo.

36Otkxsen chi oc lpe xjal, bix tzinxsen nchi s̈-in:

—¡Cybyoꞌncꞌa! ¡cybyoꞌncꞌa!―tz̈itzen cys̈itz̈ꞌbil xjal.

Tej tyole Pablo tuꞌn tcoꞌpan tiib

37Tejtzen chꞌitk tocx Pablo cyuꞌnxin tunwen, bix e xiꞌ tkbaꞌnxin te cawel cye soldado:

—Taat, waj jun xtalbil. Waj txiꞌ nyolen cab nyol tuyey―tz̈i Pablo.

Bix aj ttzakꞌbeꞌn cawel:

—A, baꞌn tey yolen tuj griego―tz̈i comandante, cuma otk txiꞌ tkanen Pablo tuj griego.

—Baꞌnte―tz̈i Pablo.

38Bix e xiꞌ tkbaꞌn comandante cye soldado te Pablo:

—Ka baꞌn yolena tuj griego, yaaꞌn aj Egipto tey tisenj we tuj nwitz. At jun xjal te Egipto ma bint-xe cab tyem e jaw tiiꞌn jun kꞌoj tzalu. Yajtltzen bix e xiꞌ tiiꞌn cyaja mil byol xjal jaaꞌ min-al xjal najl―tz̈i comandante.

39Bix aj tkbaꞌn Pablo:

—Min, taat, yaaꞌn inayen weja. Aj judío kenwe, bix tej tnom Tarso kenwe, jaj jun tnom mas il tiꞌj tuj txꞌotxꞌ Cilicia. Pero wajtzen txiꞌ nkanen jun xtalbil tey. Nuksama, chin tzakpiꞌy te kbalx cab nyol cyej xjal lu―tz̈i Pablo.

40Bix e takꞌ cawel tuꞌn tyolen Pablo, bix e cub weꞌxin cyuj yotx te jaaꞌ, bix e xiꞌ tkꞌoꞌnxin techlal tuya tkꞌabxin tuꞌn cyweꞌ xjal cyyolen. Tejtzen cyweꞌ xjal, bix akꞌxin yolel tuj yol hebreo, cyyol xjal judío bix tyol Pablo.