1 CORINTIOS 5 - Mam of Todos Santos -- Guatemala Unicode

Tej tyole apóstol Pablo tiꞌj jun ocslal nbint il tuꞌn

1O tzꞌel tz̈itj tyol jilj at jun nim chꞌixbajil cyxola. At jun ocslal n-oc ipan tiꞌ tcab ttxu. Ja il lu mintlpe bintja cyxol kej xjal yaaꞌn ocslal. ¡Nimxsen jun chꞌixbajil te cyey!

2¡Bix amale atet jun nimxsen il cyxola, pero tzinx n-oc cykꞌon cyiiba te jawnex bix mas baꞌn cyuꞌna! Yaj tzunj xinak tocx binchal il cyxola, masetle baꞌn ka tuj bis eteꞌy tiꞌj twitzj nuk nchi jaw tz̈ꞌiya. Bix masetle baꞌn tuꞌn tetz cyxooꞌna ja aj il cyxola twitzj eteꞌcꞌa clolte. Pero mintiiꞌ o cybinchay tiꞌj aj il.

3Nuket intin cyxola, inayentla o cub kꞌonte tuj castiwa. Tuj nnaabla ntiina cyxola te cyeyꞌlte,

4bix entera ke cyey cychmoꞌnc cyiiba tiꞌj xinak aj il. Bix tuj nnaabla ntiina jatzewe cyxola tuya jun woclena tuꞌn Kaaw Jesucristo bix tuya nim wipemala tuꞌn,

5tuꞌn t-xiꞌ nkbaꞌn tuꞌn tex cyxooꞌna jxjala cyxola, tuꞌntzen taj tuj tcawbil taaw il jun rato, tuꞌntzen tel tniyꞌxin tiꞌj tuꞌn il nimxsen kaꞌ tzin tkꞌoꞌn te texin. Oj tiyꞌx qꞌuixcꞌaj tuꞌnxin juꞌwa, kapetzen tuꞌn tmeltzꞌajxin, tuꞌntzen tocxxin te tajlal cyuyaj xjal chi coꞌpjel oj tul Kaaw Jesucristo juntl maj.

6Nuket ntiina cyxola, j-ocslal aj il tisetle yaaꞌn ocslal tuj nwitza, pero cyey, baꞌn tuj cywitza tiꞌj tocx cyxola, bix jawnex cykꞌon cyiiba cuma nuk niyꞌxec til cyuꞌna. ¿Mimpatzen tzꞌel cyniꞌya tiꞌj ka ma tzꞌocx ten jun ocslal binchal il cyxola, cꞌoquel lpe cabtl tiꞌj? Ka at il cyxola, cxeꞌl tz̈ꞌiy tisen jun cluj kꞌotj te ttxꞌotxꞌel pan njaw punntzꞌaj tuꞌn n-ocx levadura te tkꞌanel.

7Juꞌ tzunj cyimetz cyxola cykilj tkaꞌyel tocx cyxola. Nejl ke xjal te Israel e clet cychunkꞌlal tuꞌn carnel e xiꞌ cyoyen te Dios. Bix tej tiyꞌ jninkꞌij te coꞌpbil cyexin, e waaꞌnkexin pan mintiiꞌ levadura tocx te tkꞌanel. Jlevadura ajben te techel il tej tocx tuj cypanxin. Yal te ke jaꞌlewe, jatzen Cristo e cyim te coꞌpbil ke. Juꞌ tzunj cxeꞌl kiiꞌn kchunkꞌlal mintiiꞌ kil, cuma ejooꞌtzen tisenj pan etz levadura tuj.

8Juꞌ tzunj, tuꞌntzen kajben te Dios, cyjeltzen kkꞌoꞌn kkaꞌyel e bint kuꞌn nejl, tisentzen cye aj Israel etz cyiiꞌnxin levadura tuj cyjaxin tuꞌntzen tiyꞌ cyiyꞌsaꞌnxin Pascua. Tej Pascua tisen kchunkꞌlal jaꞌlewe, bix yaaꞌn tumel tuꞌn knimante tuya mastl kil. Mas baꞌn tuꞌn knimante tuya jun knaabl sakxix bix jaxxix.

9Key hermano, o txiꞌ ntzꞌiꞌbena juntl uꞌj te cyey tuꞌn miꞌn tzꞌoc cymojban cyiiba cyuya kej ocslal aj pajlel.

10Pero mintiiꞌ e xiꞌ nkbaꞌna tuꞌn tel cypaꞌn cyiiba cyiꞌj kej xjal yaaꞌn ocslal, amale aj pajletke, bix kej nuk tikꞌch cyaj, bix kej nchi alkꞌan, bix kej nchi naꞌn Dios twitz cysant, cuma eteꞌqꞌuey twitz txꞌotxꞌ cyuya, cuma kej te twitz txꞌotxꞌ cykilca eteꞌcꞌa cyuyey. Katzen cyaja tuꞌn miꞌn chi yolena cyuya, entonces iletnele tiꞌj tuꞌn cyiꞌya twitz txꞌotxꞌ. Mlay txiꞌ nkbaꞌna tuꞌn tel tpaꞌn cyiiba cyiꞌj xjal yaaꞌn ocslal.

11Nuk oꞌcx waja txiꞌ nkbaꞌna ka at jun ocslal, bix nbinchan nim til, miꞌn cub cyjunen cyiiba tuya. Ka at jun ocslal at tpaj, bix ka nuk tikꞌch taj, bix ka nnaꞌn Dios twitz tsant, bix ka nyasen tiꞌ juntl xjal, bix ka ncꞌan kꞌeꞌn, bix ka n-alkꞌan, miꞌntzen tzꞌoc cymojban cyiiba tuya, mi nuket tuꞌn cywaaꞌna junx tuya, te yecꞌbil yaaꞌn baꞌn tnaabl tuj cywitza.

12Juꞌtzen jacꞌa tzꞌeꞌla cyniyꞌ ocslal aj il tiꞌ cyil, tuꞌntzen tul cychꞌixew, tuꞌntzen tcyaj cykꞌoꞌn cyil. Jatzen cyej yaaꞌn ocslal, mintiiꞌ ke koclen te cyeyꞌleccye.

13Ja te Dios tzul cyeyꞌlcye.

Juꞌ tzunj, key hermano, cyimetz cyxola jxinak n-oc meltzꞌaj tiꞌ tcab ttxu.