LOS HECHOS 19 - Mam of Todos Santos -- Guatemala Unicode

Tej tpon Pablo tuj tnom Efeso

1Joocꞌtzen at-xte Apolos tuj Corinto, yal te Pablo nbet-xin cyuj txꞌotxꞌ cywiꞌ witz. Cwa tponxin tuj tnom te Efeso. Jatztzen e cneta nim ocslal tuꞌnxin. Pero cye ocslal oꞌcx cye baꞌn cyuꞌnj tisenj otk tkba Juan Bautista. Bix e xiꞌ tkanen Pablo:

—Key taat, tej cyoc cyey tmoj Jesús, ¿e cyiikꞌpey Espíritu Santo?―tz̈i Pablo.

2Bix ajtz cytzakꞌbeꞌnxin:

—Min. Mitetpe o tzꞌoc kbiꞌna ka o tzaj kꞌoꞌn Espíritu Santo te cycotz jxjal nchi ocslan Jesús―tz̈i tzunkexin.

3Bix aj tkanen Pablo:

—Jeyꞌ, ¿titzen jilel cyey jawsaj aꞌ o cyiikꞌ? ¿Titzen jilel e baj tej cybautizarja?―tz̈i Pablo t-xiꞌ tkanen.

Bix aj cytzakꞌbeꞌnxin:

—Tzin kiikꞌen keya te Juan Bautista tbautismo cye xjal. Nxiꞌ kocslaꞌna bix nxiꞌ kyolena jtexin oc t-xnakꞌtzaꞌn―tz̈i tzunkexin.

4Bix e xiꞌ tkbaꞌn Pablo:

—N-el cyey cyniyꞌ tiꞌj e bautizaran Juan Bautista jxjal e tajbe tjatz tkbaꞌn til bix otk tzul til tuj tcꞌuꞌj. Bix baꞌnte. Pero te Juan Bautista, e tkba texin cye xjal tuꞌn toc cyocslaꞌn xjal jxin Scyꞌoꞌn tuꞌn Dios, jxin tul-lel mas yaj. Bix ya ktzkiꞌntltzen ka ja Jesús. ¡Ja tzunxin ma tzul!―tz̈i Pablo cye xjal.

5Tejtzen toc cybiꞌnxin ttxolen, cykil ke xjal e bautizarj, tuꞌntzen cykbante ka otk chi oc tuya Cyaaw Jesús.

6Tejtzen tpon baj tej cybautizarj xjal, bix e cub tkꞌoꞌn Pablo tkꞌab tibaj cywiꞌ xjal. Tejtzen tbint tuꞌn Pablo juꞌwa, bix ul Espíritu Santo te cyuya junx maj, bix akꞌke xjal yolel tuj yol bajx binne cyuꞌn, tuꞌn tcyaj tyol Dios tuj chicꞌaj.

7Cablajaj cybet xjal ocslante Jesús.

8E tentzen Pablo tuj Efeso oxe xjaw. Bix cocꞌcꞌax ocxxin cyuj camon jaaꞌ, bix tuyaxsen nim tajwalelxin e yolenxin tuꞌn tcub cyiꞌ xjal tiꞌj tcawbil Dios.

9Pero cyxol tzunj xjal oc ebinte tyol Pablo, attzen cabxin e cub tcyiwsan tiib. Cycyꞌixin oc cybiꞌnxin. Cywitztzen nimal xjal bix e yolen kej xin xool cynaabl kaꞌ tiꞌ tyol Pablo. Entonces bix el tpaꞌn tiib Pablo tiꞌ camon jaaꞌ, jaaꞌj eteꞌcxa jxin kaꞌ xjal, bix e xiꞌ Pablo cyuya jcabtlxin ocslal tuj tja jun xjal Tiranno tbi. Jatztzen e yolena Pablo tiꞌ tyol Dios cykil kꞌij cyuya xjal.

10Nyolenxsen Pablo tuj Efeso te caꞌba jnabkꞌi. Juꞌtzen oca cybiꞌn cykilj xjal najl tuj ttxꞌotxꞌ Asia jyol tiꞌ Jesús, judíole, bix yaaꞌnle judío.

11Bix e tzaj tkꞌoꞌn Dios tipemal Pablo tuꞌn t-xiꞌ tyeecꞌanxin ka jaxxix tyolxin, bix nim tikꞌch e bint tuꞌnxin.

12Axsen tbaneyil ke tbinchben Pablo, bix oc cykꞌoꞌn xjal cysuutꞌ bix twitz cyken tiꞌ Pablo, bix oc cykꞌoꞌntl cyiꞌj xjal yaab. Bix tej toc cykꞌoꞌn xjal juꞌwa, ul cynaabl yaab tuꞌn, bix etz biman tuj cychuꞌl xjal tuꞌn.

13Cyuj tzunj tyem lu attzen cabxin judío e bet tuj jaca tnom. Nchi kban tzunxin ka at cyipemalxin tuꞌn tel biman cyiꞌ xjal cyuꞌnxin. Tujtzen tnom te Efeso bix akꞌkexin ajbel tbi Jesús tuꞌn tetz biman tuj cychuꞌl xjal. Jatzen nxiꞌ cykbaꞌn xinj cye bimanj ja tzunja lu:

—¡Biman, cxeꞌl nkꞌumen tey, ctel tiꞌj xjala! Cxeꞌl nkꞌumen tuꞌn tipemal tbi Jesús, ja Jesús nyolen Pablo tiꞌj―tz̈i tzunkexin judío cye biman.

14Cyxol tzunj xjal e bint cyuꞌn juꞌwa, attzen wuukxin tcwal Esceva, jun nim cyyolel xjal twitz Dios cyxol judío. Ja tzunj wuuk xina el lojoꞌncye biman cyiꞌ xjal.

15Attzen jun maj e cyajbexin tbint cyuꞌnxin juꞌwa. Pero bix aj ttzakꞌbeꞌn kaꞌ xewbaj:

—Ntzkiꞌnwe twitz Jesús, bix Pablo ntzkiꞌnwe alcyexin. Perotzen cyey, ¿altzen cyekey?―tz̈itzen jun biman cyej xin tcwal Esceva.

16Tej tkbante biman juꞌwa, yal tzunj xin xjal jaaꞌ iklte biman bix e xiꞌ tzokpajxin te pjulec cyexin, bix e xcyexin tiꞌ cywuukal tcwal Esceva. Nimxsen e bajkexin, tejxa tel rotj cyiꞌjxin cyuꞌn biman, bix e cyaj ẍbiktzꞌajkexin, bix otkxsen chi is̈jxin.

17Cykilxsen xjal ebinte, ke griego bixsen ke judío, ti otk baj. Tejtzen toc cybiꞌn xjal juꞌwa, cykilxsen xjal oc ebinte tbi Jesús, bix nimxsen baꞌn yol e cyyolen xjal tiꞌ Jesús.

18Bix jax nim ocslal otk tzꞌaj tuya chmambaj e cykba cyil.

19Bix nim nxnakꞌtzante magia, bix oc cychmoꞌn cyuꞌj bix akꞌ cwel cypaten cywitz cykil xjal. Atle jun cincuenta mil plata twiꞌ cyuꞌj e baj tzꞌeyꞌ.

20Juꞌtzen tten t-xiꞌ tz̈ꞌiy cybet ocslal, bix nim oc ebinte tyol Dios.

Tej cyjaw labtl ke xjal tuj tnom Efeso

21Attzen jun kꞌij e xiꞌ tbisen Pablo tuꞌn nxiꞌ kꞌolbel tuj Macedonia juntl maj, bixsen tuj Acaya, bix yaj tuꞌn t-xiꞌ tuj Jerusalén, bix yaj tuꞌn t-xiꞌ tuj tnom te Roma.

22Bix e xiꞌ tchkꞌoꞌn Pablo caꞌba onl texin tuj Macedonia nejl. Pero te Pablo, e cyaj texin tuj txꞌotxꞌ te Asia.

23Bix joocꞌtzen at-xte Pablo tuj tnom te Efeso tujx txꞌotxꞌ te Asia, bix e jaw jun tij kꞌoj tuꞌn t-xnakꞌatz Jesús.

24Juꞌtzen tten tjawlen jkꞌoja cyjulu. Attzen junxin binchal plata Demetrio tbixin. Ja tzunj xin Demetrio nchi binttzen sant tuꞌnxin tuya jun wik xcbil plata te ttxꞌotxꞌel binchbilte jxuuj sant Diana tbi. Bix nim t-akꞌanalxin at. Nimxsen e qꞌueyenxin.

25Pero attzen jun kꞌij bix oc tchmoꞌn Demetrio cykil ke akꞌanal bix cabtl xjal juꞌx taakꞌen tisenx te Demetrio, bix e xiꞌ tkbaꞌnxin:

—Key taat, cytzkiꞌntl tzuna tiꞌj ke kaakꞌen nbinta, jatztzen iꞌtza koꞌya.

26Pero ya matzen tzul Pablo te yajlal ke, bix o tzꞌoc cybiꞌna bix o cyila ti tten ncub cyiꞌ xjal tuꞌnxin tuꞌn tcyaj cykꞌoꞌn xjal ke kdios. Tzin tkbaꞌnxin ka mintiiꞌ baꞌn tajbena jcyechlal dios nbint tuꞌn kꞌabbaj. Bix yaaꞌn nuk tujcꞌa Efeso, sino tuj cykil ttxꞌotxꞌ Asia n-oca kꞌojlxin tiꞌ cyechel dios.

27Kaꞌ xsunja lu. Chꞌinnchꞌe oj tbaj twiꞌ kaakꞌen, bix yaaꞌn oꞌcxj, sino cwa oj tcyaj cykꞌoꞌn xjal jxuj diosa Diana, bix ya min chi ocxtl xjal tuj tja dios binne te texuj tuꞌn tnaꞌjxuj. Jxuj diosa Diana nnaꞌj cyuꞌn cykil xjal te Asia, bix yaaꞌn nuk oꞌcxcꞌaj, sino tuꞌn cykil twitz txꞌotxꞌ. ¡Axsen jun ilbelal! Matzele cyaj cyeyet-xuj―tz̈itzen Demetrio cye niyꞌtl t-xjal Diana.

28Tejtzen toc cybiꞌn xjal juꞌwa, cykil ke xjal e tzaj kꞌojl, bix akꞌ elel cywiꞌ xjal:

—Iꞌtzxte Diana cyej xjal te Efeso―tz̈i ke xjal cyjaw s̈-in.

29Junxsen rato el tz̈itj naj tuj cykil tnom. Caꞌba tuya Pablo, ja Gayo bix Aristarco te Macedonia, e tzyetkexin cyuꞌnj xjal nchi kꞌojl. Bix junxsen rato e xiꞌ kitet Gayo tuya Aristarco tuj camon jaaꞌ tuj plaza.

30Tejtzen tbinte Pablo ka otk cheꞌx kꞌiꞌn tuyaxin tuj camon jaaꞌ, e tajbetzen Pablo tuꞌn t-xiꞌ rasonel, pero min e cycuya ocslal tuꞌn t-xiꞌxin tuꞌn ttz̈i.

31Bix tuyaxe cabxin cawel te Asia, cytzkiꞌnxin twitz Pablo, e kbante tuꞌn miꞌn tzꞌocx tkꞌon tiib Pablo tuj.

32Tujxsen camon jaaꞌ nim tzpetpajlenel e baj. At cab xjal e kbante jun wikxitl yol, bix at cabtl nuk tikꞌch e cyyole, bix nimtl xjal min el tniyꞌ tiꞌj ti cyaj tuj camon jaaꞌ.

33Cyxoltzen xjal tocxe cabxin judío. Attzen jun cyexin Alejandro tbi. Bixsen ocx cylomoꞌn jmastl xjal judío jaxin cywitz cykil xjal tuꞌn tocxxin te rasonel tuꞌn taj tkꞌoꞌnxin culpa tibaj Pablo tuꞌntzen tel il cyibaj judío. Bix e xiꞌ tyeecꞌan Alejandro tkꞌab te techel tuꞌn cyweꞌ xjal cyyolen, tuꞌntzen tyolen texin.

34Pero toc cycyeꞌyen ka ja Alejandro e tajbe tuꞌn tyolen. Bix itzkiꞌnxin ka judíoxin, cykil xjal akꞌ jawel s̈-in juntl maj:

—¡Iꞌtzte Diana cye xjal Efeso! ¡Jaxuj dios cyibaj ke entera xjal te Efeso!―tz̈i cys̈itz̈ꞌbil xjal.

Caꞌba hora e s̈-inkexin mintiiꞌ waꞌlen cyuꞌnxin.

35Cwaxsen tetz secretario te myolcye xjal. Tejtzen cyweꞌ xjal cys̈-in, bix akꞌxin yolel. Tz̈i tzunxin cyjulu:

—Key taat te Efeso, cykil twitz txꞌotxꞌ itzkilte ka jaj tnom te Efeso at te cꞌojlal tej tja dios Diana. Keya junx maj cꞌojlaꞌn kuꞌna jxak techlal Diana e tzaj tzꞌak tuj cyaꞌj.

36Min-alte jun baꞌn tel xooꞌnte. Cꞌolke cyey. Mintiiꞌ cub cybinchena ka mintiiꞌ otk txiꞌ cybisena tiꞌj.

37Yaaꞌn baꞌn tiꞌj ma tzaj cyiiꞌna Gayo tuya Aristarco, cuma mintiiꞌ cyexin ma cyalkꞌa tiꞌ tja dios Diana, bix mitetpe kaꞌ cyyol tiꞌ kdiosa Diana.

38Cxeꞌl nkꞌumen te Demetrio bix cye xjal akꞌanal, ka at jun cykꞌoj tuya jun xjal, chi xeꞌl kꞌumlte tuj stis twitz cawel. ¡Tzalu, min! cuma oꞌcx tuj stis baꞌn tclonte jun xjal tiib.

39Bix ka cyaja chi yolena tuj tumel, baꞌn ayoncyey ojxe toc cychmon cyiib kej xjal sinica te yolel tujxix tumel.

40Pero oj cycub tena labtel, mintiiꞌ tumel cyuyey. Nuk tisen kaꞌ xjal ke cyey. ¿Tuꞌn tiken? ¡Kaꞌ tzunj juꞌwa! cuma kaꞌxsen qꞌuelela te ke ka ma tbi jxin cawel te Roma ti ma kbinche jaꞌlewe. Cꞌoquel weꞌ cywitz kiꞌj ka kaꞌ koꞌ, bix ko cwel tuj cyiw castiwa. ¿Tuꞌn tikentzen? Jcyey ma cybinchewe yaaꞌn tumel. Mintiiꞌ ttxolen, bix mlay bint kclon kiib―juꞌtzen tten tyolen secretario cyxol xjal.

41Tejtzen tbaj tkbaꞌnxin juꞌwa, bix e tkbaxin tuꞌn tel cypaꞌn cyiib xjal, bix e baj twiꞌ kꞌoj.