GÁLATAS 6 - Mam of Todos Santos -- Guatemala Unicode

1Key ocslal, ka at tumel cyuyey at jun cyxola ma cub tzꞌak tuj jun til, cywaꞌbajawtzen juntl maj, bix tuya mansbajil cycꞌuꞌja oj cyyolena tuya, key nchi nima Espíritu Santo. Pero cycꞌojlanx cyiiba, tuꞌntzen miꞌn chi cub tzꞌaka tuj til.

2Cyonenx cyiiba oj toc pena cyiꞌja. Oj nchi onena tiꞌj cyiketz mastl juꞌwa, njapan baj tajbil Cristo cyuꞌna.

3Yaaꞌn tumel tuꞌn tjaw kniman kiib, cuma ka mintiiꞌ kpaltel tuj kwitz, nko tzpet, cuma at kpaltel.

4Yaaꞌn tumel tuꞌn ktzalaj tiꞌj ka mas ma bint kuꞌn cywitz juntl. Mas baꞌn tuꞌn kmlonte kex knaabl, bix ka baꞌn ma bint kuꞌn, tuꞌn ktzalaj tiꞌj.

5Ma kꞌoj te jaca juun xjal taakꞌen tuꞌn tbint tuꞌn. Juꞌ tzunj, il tiꞌj tuꞌn toc kcꞌuꞌj tiꞌj kex kaakꞌen.

6Ejeeꞌy o cyiikꞌa jxnakꞌtzbil tiꞌ tyol Dios, baꞌn tuꞌn t-xiꞌ cykꞌoꞌna chꞌin waabj cye kej cyxnakꞌtzala bix tiꞌj alcyej baꞌn at cyuyey.

7Miꞌn chi el tzpeta tiꞌj te Dios baꞌn tuꞌn. Mlay cub cyyajlaꞌna jaxin. Jnbint cyuꞌna tisen jun awal twitzxin. Alcyej ncuꞌx cyawaꞌna, jax cjawel cychmoꞌna.

8Katzen ma cuꞌx cyawaꞌna tajbil cynaabla kaꞌ, cjaweltzen cychmoꞌna cycyamecya te junx maj. Pero ka ma cuꞌx cyawaꞌna tajbil Espíritu Santo, cjaweltzen cychmoꞌna cychunkꞌlala te junx maj kꞌoꞌn tuꞌn Espíritu Santo.

9Juꞌ tzunj, miꞌn ko sict tuꞌn kbinchante jbaꞌn, cuma oj tpon tumel, cjawel kchmoꞌn jun baꞌn tuꞌn Dios, ka min ma cyaj kkꞌoꞌn tuꞌn tbint baꞌn kuꞌn.

10Jatzen tyem jaꞌlewe tuꞌn tcuꞌx kawaꞌn. Juꞌ tzunj, kkꞌaꞌc kipen tiꞌj tuꞌn kbinchante jbaꞌn te cykilca xjal, bix tneelxix cyekej ocslal tiꞌ Cristo.

Njaw tnimsaꞌn Pablo tiꞌj o bint twitz cruz tuꞌn Kaaw Jesucristo

11Cycyeꞌyenx ke nmak letra nxiꞌ ntzꞌiꞌbena jaꞌlewe tuꞌnx nkꞌaba, tuꞌntzen tbaj twiꞌ nyola. Cꞌoquel cycꞌuꞌja tiꞌj mancꞌbil nyola cyey.

12Kej xjal cyxola tzin cykbaꞌn il tiꞌj tuꞌn tel keset ttzꞌumel cytzꞌalbila, nchi yolenxin juꞌwa nuk tuꞌn cyelxin baꞌn tuj cywitz xjal, bix yaaꞌn tuj twitz Dios. Cycyꞌixin tuꞌn ttzaj cykꞌoj kej jawnex judío cyiꞌjxin tuꞌnj tzin cykꞌumenxin ka nchi clet ke xjal nuk tuꞌnj tcyimlen Cristo twitz cruz.

13Jax wuꞌna nuk cyajxin tuꞌn miꞌn chi oc iꞌlenxin cyuꞌn jawnex judío, cuma amale tzint cykbaꞌnxin il tiꞌj tuꞌn tel keset ttzꞌumel cytzꞌalbila tuꞌn cycuyatey tley Moisés, pero ejeeꞌxxin min chi nimanxin cykil tley Moisés. Cyajxin tuꞌn cycpeta nuk oꞌcx tuꞌn t-xiꞌ cykbaꞌnxin cyej jawnex judío aj Galacia ma cub cyiꞌj cyuꞌnxin.

14Yal weya, min jaw nnimsan wiiba tuꞌnj nbint wuꞌna. Nuk oꞌcx cxeꞌl nkꞌumena tiꞌj o bint twitz cruz tuꞌn Kaaw Jesucristo. Tuꞌnj tcyimlenxin twitz cruz, ma naj nmojbabl wiiba tuya cynaabl xjal te twitx txꞌotxꞌ. Mintiiꞌtl wajbila tuꞌn wela baꞌn tuj cywitz xjal te twitz txꞌotxꞌ, bix jax mintiiꞌtl wajbela tuj cywitzxin.

15Mintiiꞌ il tiꞌj ka ma tzꞌoc jun techel tiꞌ kxumlal bix ka min. J-il tiꞌj, jaj ka ma ko oc acꞌaj xjal.

16Cykilca kej xjal ma chi oc acꞌaj tuj cyanem, chi temeltzen tuj ttz̈yal tuya Dios, bix ctzaal kꞌaꞌben tcꞌuꞌj Dios cyiꞌjxin, bix jaxxix t-xjal Dioskexin.

17Tetzen jaꞌlewe miꞌntltzen tzꞌoc cybiꞌna cyyol ẍtakꞌ xnakꞌtzal, cuma nimxsen ma tzꞌoc pjet nxumlala tuj taakꞌen Jesús, te yecꞌbil inayenja kbalte jaxxix yol.

Jun kꞌolbebl tuꞌn Pablo cye ocslal aj Galacia

18Cyiikꞌxita t-xtalbil Cawel kxol, Jesucristo, tuj cyanema, key hermano.

Oꞌcx nyolja.