EFESIOS 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo

1Key hermano tuj tnom te Efeso.

Inayena Pablo. Scyꞌoꞌn kena tuꞌn Dios tuꞌn wajbena tiꞌj waakꞌena te t-xel Cristo Jesús. Ncub ntzꞌiꞌbena ja uꞌj lu te cyey, ejeeꞌy n-ocxix ke cycꞌuꞌj tiꞌj Cristo Jesús.

2Tzajxit t-xtalbil Kman Dios tuya Kaaw Jesucristo cyibaja, bix cyuꞌnxit-xin chi temey tuj ttz̈yal.

Ntzaj tkꞌoꞌn Dios cykil t-xtalbilxin kibaj nuk tuꞌnj o tzꞌel ttz̈qꞌuel Jesús twitz cruz

3Ko nimanxit Dios, tman Kaaw Jesucristo. Tuꞌnj kmojbabl kiib tuya Cristo o tzaj tkꞌoꞌn Dios ke cykil xtalbil at tuj cyaꞌj, bix ja Espíritu Santo ntzaj kꞌinte jxtalbil te ke.

4Jatxe ootxa otk cub tnincꞌuꞌn Dios tuꞌn kcoꞌpj tuꞌn kel junx tuya Cristo. Tej mitknaꞌx tbint twitz txꞌotxꞌ, otk baj tnincꞌuꞌn Dios tuꞌn ttzaj tkꞌoꞌn xinj xtalbil lu te ke. E tbincha Dios lu kiꞌj nuk tuꞌn Cristo. E cub tnincꞌuꞌnxin tuꞌn kel junx tuya Cristo tuꞌntzen kten sakxix bix tuꞌn mintiiꞌ kil twitzxin.

5Tuꞌnj tkꞌakꞌbil tcꞌuꞌjxin kiꞌj, jatxe tuj tneel e baj tnincꞌuꞌnxin tuꞌn koc te tcwalxin tuꞌn Jesucristo. Juꞌ e cub tnincꞌuꞌnxin tuꞌn ttzaj tkꞌoꞌnxin ke,

6tuꞌntzen tjaw knimsaꞌn tbixin cykil t-xtalbilxin kibaj. A tanemxin tiꞌj Tcwalxin, bix tuꞌnj kmojbabl kiib tuya Tcwalxin, jax juꞌx o tiikꞌxin ejooꞌ te tcwalxin.

7Tisen pres koꞌ tjakꞌ kil nejl, pero ya at kmojbabl kiib tuya Cristo. Juꞌ tzunj ya o ko clet tuj kil. E chjet kil tuꞌn Tcwalxin tej tel ttz̈qꞌuel bix e cyim te kxel. Yal jaꞌlewe o najset kil. ¡Nimxsen jun t-xtalbil Dios ntzaj tkꞌoꞌnxin ke!

8¡Nimxsen jun baꞌn o tzaj tkꞌoꞌnxin ke! ¡Nimxsen tnaabl Dios te nicꞌulte cykilcaj lu!

9J-e baj tnincꞌuꞌn Dios jatxe ootxa, jaj tuꞌn tel cykilca junx tjakꞌ tcawbil Cristo. Bix o tzaj tkꞌoꞌn Dios ke tuꞌn tel kniyꞌ tiꞌj jaj e cub tnincꞌuꞌnxin jatxe tuj tneel pero eꞌwen taꞌ kwitz nejl.

10Oj tjapan baj cykilca tkꞌijlal, o niqꞌuet tuꞌn Dios cykilcaj at tuj cyaꞌj bix twitz txꞌotxꞌ cyjel tjakꞌ tcawbil Cristo.

11Key hermano, tuꞌn kmojbabl kiib tuya Kaaw Jesús o ko oc te t-xjal Dios. Jatxe tuj tneel o tnicꞌu Dios tuꞌn kocx te t-xjalxin, bix nbint tuꞌnxin cykilcaj o baj tnincꞌuꞌnxin kiꞌj.

12Ejooꞌtzen judío tneel tnom ayon tiꞌj tulel Cristo. E bint tuꞌn Dios tuꞌn koca te t-xjalxin tuꞌntzen tjaw knimsaꞌn tbixin.

13Yaltzen cyey ocslal yaaꞌn judío, jax t-xjal Dioskey. Tej toc cybiꞌna jyol jaxxix tiꞌj coꞌpbil ke, oc ke cycꞌuꞌja tiꞌ Jesús. Juꞌ tzunj e tzaj tkꞌoꞌn Dios Espíritu Santo tuj cyanema, tisen otk tkba Dios, tetzen techel t-xjaltzen Dios ejeeꞌy.

14Najben Espíritu Santo ke tuꞌntzen tzinen taꞌ alcye jun kꞌij cxeꞌl tiiꞌn Dios ejooꞌ tuꞌn kten tuyaxin te junx maj. Jatzen kkabj. O cub tnincꞌuꞌn Dios juꞌwa tuꞌntzen tjaw knimsaꞌn tbixin.

Tej tnaꞌn Pablo Dios tuꞌn ttzaj tkꞌoꞌn Dios cynaabl ocslal

15Cuma t-xjal Dios ejeeꞌy, juꞌ tzunj min nchin weꞌya nnaꞌna Dios cyiꞌja. O nbiꞌya nim n-oc ke cycꞌuꞌja tiꞌ Kaaw Jesús bix nim tkꞌakꞌbil cycꞌuꞌja at cyiꞌ cabtl ocslal.

16Ojtzen nnaꞌna Dios cyiꞌja,

17nxiꞌxix ncubsaꞌna nwitza te jawnex Kman Dios, tman Kaaw Jesucristo, tuꞌn ttzaj tkꞌoꞌnxin cynaabla. Bix nxiꞌ nkaniya texin tuꞌn t-xiꞌ tyeecꞌaxin cyey ti ttenxin, tuꞌntzen tel mas cyniꞌya tiꞌj Dios.

18Bix nxiꞌ ncubsaꞌna nwitza texin tuꞌn tjkontexin cynaabla tuꞌntzen tel cyniꞌya tiꞌj cykilcaj tzin cyyoꞌna o tkba Dios tuꞌn tkꞌonte bix o tzaj ttxcoꞌnxin ejeeꞌy te niyꞌbelte. Ejooꞌ ocslal ckiikꞌel jun jawnex kxab te Dios.

19Bix nxiꞌ nkaniya texin tuꞌn tel cyniꞌya tiꞌj jawnexsen junx maj tipemalxin kibaj, bix minteyꞌxse tumel tiiꞌn. Jtipemalxin najben texin tuꞌn ttzaj tonenxin ejooꞌ,

20juꞌxse tipemalxin ajben texin tej tjatz titzꞌjsaꞌnxin Cristo tuj cyamecy, bix juꞌxse tipemalxin e tzaj tkꞌoꞌnxin te Cristo tuꞌn tcub ke tuj tmankꞌabxin tuj cyaꞌj te cawel.

21O tzaj tkꞌoꞌn Dios te Cristo tuꞌn tcawen cyibaj cykil cawel. O tzaj tkꞌoꞌnxin te Cristo tuꞌn tcawen yaaꞌn nuk tuj ja tyem lu, sino juꞌx tuj jtyem tzul.

22O cyaj tkꞌoꞌn Dios cykilca at te Cristo tuꞌn tten tjakꞌ tcawbil. Bix tex Cristo o tzaj tkꞌoꞌnxin tuꞌn tcawen tibaj cykilca ocslal.

23Ejooꞌ ocslal tisen t-xumlal Cristo, jkwiꞌ nkꞌonte kchunkꞌlal te junx maj. Mintiiꞌ jun lugar mintn-alxin tuj, sino at-xin.