SAN MATEO 24 - Mam of Todos Santos -- Guatemala Unicode

Tej tkbante Jesús tuꞌn tcub xitj tja Dios(Mr. 13:1-2; Lc. 21:5-6)

1Tej tbaj yolen Jesús, etzxin tuj tja Dios, bix e xiꞌxin. Bix e xiꞌ cychꞌiquen t-xnakꞌatzxin tja Dios texin, tiiꞌn tcyeꞌnc.

2Bix e xiꞌ tkbaꞌnxin cyexin:

—Cycyeꞌyenx cykilcaj lu, cuma jaxxix cxeꞌl nkbaꞌna cyey, mi nuket jun xak bix cyjel tibaj juntl. Cykilca pjel xitj―tz̈ixin.

Kej yecꞌbil cyiꞌj mancꞌbil kꞌij(Mr. 13:3-23; Lc. 21:7-24; 17:22-24)

3Yajcꞌatltzen, bix e cub kexin twiꞌj witz Olivos tbi. Cyjunalxin cyuya t-xnakꞌatzxin. Bix e pon lkꞌe ke t-xnakꞌatzxin tiꞌjxin, bix e xiꞌ cykanenxin:

—Taat, kbantz keya, ¿jtojtzen pjel cykilca kej lu ma tkbay? ¿Bix titzen jilel techel tzul oj chꞌitk tul meltzꞌaja bix oj chꞌitk tpon mancꞌbil kꞌij?―tz̈ikexin.

4Bix aj ttzakꞌbeꞌnxin:

—Cycꞌojlam cyiiba cywitz kej xjal chi ul tzpetsal cyey.

5Cyuj jkꞌij chi ul, tzul nim xjal te kbalte ka ejeeꞌ Scyꞌoꞌn tuꞌn Dios te clol xjal, bix cwel cysbuꞌn nim xjal.

6Cxeꞌl cybiꞌna nbajtl kꞌoj tuj ttanema bix jakꞌch tumel. Pero miꞌn chi jaw seyꞌpaja, cuma il tiꞌj at kꞌoj te mitknaꞌx wula. Pero kej kꞌoj lu yaaꞌnja te yecꞌbil chꞌixcꞌa tpon mancꞌbil kꞌij.

7Cyuj jkꞌij chi ul, chi jawel nmak tnom te kꞌojlel cyuya juntl nmak tnom, bix juꞌ pjel tuj cykilca twitz txꞌotxꞌ. Bix tzul nim weyaj tuj nim lugar twitz txꞌotxꞌ. Bix nuk jakꞌch qꞌuiyela xcyaklajnab.

8Pero kej tchiyonel lu nuk chꞌin teja cywitzj qꞌuixcꞌaj nim tzul mas yaj oj tul mancꞌbil kꞌij.

9Cyuj kꞌij chi ul, chi xeꞌl kꞌoꞌna tuj cykꞌab cawel, bix chi yasjela cyuꞌn, bix chi cwel byoꞌna cyuꞌn. Bix chi elel iiqꞌuena tuj cykilca tnom tuꞌnj lepcheckey wiꞌja.

10Tuꞌn tlaj qꞌuixcꞌaj lu, nim xjal cyjel cykꞌoꞌn cyocslabl wiꞌja, bix cxeꞌl cyqꞌueyen ke ocslal tuj cykꞌab aj kꞌoj wiꞌja, bix qꞌuelel cyiiqꞌuen cyiib.

11Chi ul nim xjal tzin cykbaꞌn ka tyolel Dioske, pero nuk tenx cyuꞌn, bix nim xjal chi tzpetel cyuꞌn.

12Tz̈ꞌiynen tjaw tz̈ꞌiy il twitz txꞌotxꞌ, bix juꞌ tzunj, nim xjal miꞌn tzꞌoctl cyakꞌ ke cyuya cye.

13Pero alcyej xjal min xcyaj cyeꞌyente weya hasta ojxe tcyim, ccleteltzen tuꞌn Dios.

14Jbaꞌn tpocbal tcawbil Dios cxeꞌl pocbet tuj cykilca twitz txꞌotxꞌ, tuꞌntzen cybinte cykilca wik xjal tyol Dios. Bix oj tbint lu, tzultzen mancꞌbil kꞌij.

15Cykilcatzen jlu il tiꞌj pjel cyuj kꞌij chi ul. Pero mas yaj tzul mancꞌbil kꞌij. Juꞌ tzunj, ilxsen tiꞌj qꞌuelel cyniyꞌ kej xjal n-oc cybiꞌn cyyola tiꞌj ti pjel oj chꞌitk tul mancꞌbil kꞌij. Jatxe ootxa, e tkba jtyolel Dios Daniel tzul jun kꞌij oj tocx jun xjal kaꞌxsen te junx maj tuj nin tja Dios tuꞌn ttzꞌilex bix tuꞌn ttzpet bix cxitjel tja Dios tuꞌn. Oj toc cycyeꞌyena otk tzꞌocx ja xjal lu tuj xjan cwart tja Dios, tzꞌocxix cycꞌuꞌja tiꞌj.

16Tuꞌn tclet cychunkꞌlal, chi elel ok kej xjal eteꞌ tuj Judea tuj cꞌul cyxol witz.

17Alcyekej xjal eteꞌwex tuj tcab cxoꞌla cyja, miꞌn chi ocxtl kꞌilbetz te tikꞌch cye tuj cyja, sino txucl chi elex ok tuj cꞌul tuꞌn cyajkelbil.

18Bix alj nakꞌanan tuj tcojbil, miꞌn tzꞌajtz meltzꞌaj tja, mitetpe te kꞌilbex ke tiꞌj.

19Pero lastim kej xuuj preñada, bix ma nchꞌuꞌn cyal, oj tul ja ila, cuma mlay bint tuꞌn cyel ok.

20Cykanenx te Dios nuket miꞌn baj juꞌwa tuj tyem te tchewel, bix ka tuj jun kꞌij te ajlabl, cuma cyiw tuꞌn cyel ok xjal.

21Bajxse pjaꞌ jun maj juꞌwa jatxe tcublen itzꞌj twitz txꞌotxꞌ tuꞌn Dios, bix miꞌn baj juntl maj juꞌwa oj tbaj ja lu.

22Nuket miꞌn cub tbajsaꞌn Dios twiꞌ kej kꞌij te qꞌuixcꞌaj lu, milen-al jun xjal jacꞌa cyaj itzꞌj. Pero cwel tbajsaꞌnxin twiꞌ tuꞌn tkꞌakꞌbil tcꞌuꞌjxin cyiꞌj texin ttanem scyꞌoꞌn tuꞌnxin.

23Katzen at jun xjal ma tzꞌoc kbante cyey: “Cycyeꞌyenctzen, lu tzunj xin Scyꞌoꞌn tuꞌn Dios lu,” ka tz̈i cyseja, miꞌn tzꞌoc cybiꞌna,

24cuma tzultzen nim xjal ẍtakꞌ kbalte ka ejeeꞌ Scyꞌoꞌn tuꞌn Dios te cawel, bix tzul xjal ẍtakꞌel ka ejeeꞌ tyolel Dios. Ejeeꞌ tzunj xjal lu chi cwel binchante jawnex techel bix nuk tikꞌch cbinel cyuꞌn tuya cyipemal, tuꞌntzen cysbun ke xjal, bix chꞌinnchꞌe oj tcub sbuꞌn jun te Dios t-xjal.

25Cykil tzunja lu ma txiꞌ nkbaꞌna cyey nejl.

26Juꞌ tzunj, ka ma cykba xjal: “Lu Cristo at tuj lugar min-al xjal tuj,” ka cytz̈ike juꞌwa, miꞌn cheꞌxa. Bix ka ma cykba xjal: “Lu Cristo tocx tuj cwart lu, cyjyoꞌnx,” ka cytz̈ike juꞌwa, miꞌn txiꞌ cyocslaꞌna cyyol.

27Min chin ula tuj ewjel. Oj wula, cchicꞌajaxel cywitz cykilca xjal, tisenj oj tcub koptzꞌaj jun tken kꞌancyok te ocne bix niyꞌtl koptzꞌaj twitz cyaꞌj tuꞌn tex te elne.

28Jaaꞌ tcwaꞌ t-xumlal cyimne, jatztzen chi chmetel ke cꞌutz. Mintiiꞌ il tiꞌj tuꞌn toc cykanenjil jaaꞌ tcwaꞌ.

Ti tten oj chꞌitk tul meltzꞌaj Jesucristo juntl maj(Mr. 13:24-37; Lc. 17:26-30, 34-36; 21:25-33)

29Ojtzen tbaj kej kꞌij te cyiwxsen qꞌuixcꞌaj lu, cꞌoquel klolj twitz kꞌij, bix ya miꞌntl txakentl xjaw. Chi cꞌuꞌl tzꞌak cheꞌw twitz cyaꞌj, bix nuk cluꞌl cykilca twitz cyaꞌj tisen jun xlokꞌlaj cyaꞌj.

30Oj tbaj lu, cchicꞌajaxel jun yecꞌbil twitz cyaꞌj te techel at tuꞌn tul jxjal Smaꞌn tuꞌn Dios tuꞌn ntena cyuya xjal. Bix chi jawel okꞌ xjal tuj cykilca tnom twitz txꞌotxꞌ, cuma cylaꞌ xjal inayena oj ncuꞌtza tuj muj tuya nim wipemala bix nchin txakakan xsuna.

31Tuj tzunj kꞌij lu oj wula, ctzaaltzen nsmaꞌna nsanjela tuj cyaꞌj tuꞌnj tkꞌajt tkꞌajkꞌajel jun jawnex xux, bix chi chmol ke n-ángela ke nxjala tuyaxe cykil jaaꞌ pomnina baj twitz txꞌotxꞌ.

32Cycnomtzen. Ko nkꞌaꞌcꞌatzen jun techel ti tten oj wula. Juꞌ tten tisenj oj ntzaj xulan jun wiꞌ higuera. Oj ntzaj alajin tkꞌab higuera bixsen n-akꞌ eletz muxkꞌaj t-xul, ya telniyꞌtzen tuj cywitza ka chꞌitk toc coresma.

33Jaxse juꞌx oj wula. Tisen tzunj t-xul higuera n-etz te chꞌitk coresma, qꞌuelelcꞌatzen cyniꞌya tiꞌj oj tbaj cykilca ma txiꞌ nkbaꞌna cyey twitz txꞌotxꞌ, jatzen techel ka chꞌitk wetza tuj cyaꞌj.

34Jaxxix cxeꞌl nkbaꞌna cyey, kej xjal cylaꞌ cykilca kej yecꞌbil ma txiꞌ nkbaꞌna cyey, min otk chi cyim oj tul tcawbil Dios.

35Il tiꞌj juꞌ pjela. Te cyaꞌj bix te twitz txꞌotxꞌ cwel xitj, pero ke weya nyol, mlay baj twiꞌ.

36Yaltzen tej tuꞌn alcye kꞌij bix niyꞌ hora oj wula, min-al ebilte. Mitetpe ejeeꞌ tsanjel Dios tuj cyaꞌj itzkilte, bix mitetpe inayena. Nukxix ja te Nmana itzkilte niyꞌ hora pjel jlu.

37Yal cyej xjal at twitz txꞌotxꞌ oj chꞌitk wul meltzꞌaja, min n-oc cycꞌuꞌj tiꞌj alcyej at tuꞌn tbaj, tisenx kej xjal e ten tuj ttyem Noé min oc cycꞌuꞌj tiꞌj alcyej at tuꞌn ttzaj cyibaj.

38Tuj kꞌij te mitknaꞌx tcub cycastiwa aꞌ cyibaj xjal, tej tjaw tz̈ꞌiy aꞌ, nuk ex cykꞌij nchi waaꞌn, nchi cꞌan, bix nchi maje, nuk cytenx. Pero nuk tisen tiiꞌ tej tpon jkꞌij tej cyocx Noé tuj barc.

39Min e cyocsla aj il ka at tuꞌn tcub jun castiwa cyibaj hasta tejxe ttzaj jun nintzaj jbal cyibaj, bix e baj cykilca xjal. Jax juꞌx nuk qꞌuelex cykꞌij xjal oj wul meltzꞌaja twitz txꞌotxꞌ juntl maj. Bix cwel castiwa cyibaj.

40Tuj tzunj kꞌij oj wul meltzꞌaja, at caꞌba xinak tuj cojbil. Jun cjawel kꞌiꞌn, pero juntl cyjel ten tuꞌn tcub tcastiwa.

41At caꞌba xuuj chi tz̈eeꞌl junx tiꞌj jun cyaaꞌ. Jun cjawel kꞌiꞌn, pero juntl cyjel ten.

42Juꞌ tzunj, cuma min cytzkiꞌna jtoj chin ula, inayena Cyaawa, cycꞌojlam cyiiba tuꞌntzen binne cytena.

43Cybima ja yol lu. Nuket e biꞌn tuꞌn taaw jun jaaꞌ niyꞌ hora te koniyan tzul alakꞌ, jacꞌale cub ten cꞌojlal, tuꞌntzen mlay txiꞌ tkꞌoꞌn amleꞌn te alakꞌ tuꞌn tocx tuj tja.

44Jax juꞌx cyey, cykil hora cyitzꞌlem cyiiba, cuma chin ul meltzꞌaja tuj jun kꞌij min nayona tiꞌj, inayena, Jsmaꞌn tuꞌn Dios tuꞌn ntena cyuya xjal.

45Juꞌ tzunj, baꞌnxit chi eꞌla tuj cyaakꞌena, tisen jun t-akꞌanal patrón at tnaabl bix cuyan tuꞌn tuj taakꞌen kꞌoꞌn tuꞌn tpatrón tuꞌn t-xiꞌ tkꞌoꞌn cywa kej te tja patrón oj tpon hora.

46At nim xtalbil tibaj jun akꞌanal ka cuyan tuꞌn tuj taakꞌen oj tul meltzꞌaj tpatrón.

47Jaxxix cxeꞌl nkbaꞌna cyey, cxeꞌl tkꞌoꞌn patrón tej akꞌanal tuꞌn toc te nincꞌulte cykilca at te patrón.

48Pero ka ma txiꞌ tkbaꞌn akꞌanal kaꞌ: “Yaj tzulwe npatróna,” ka tz̈i,

49bix ma tzꞌoc ten pjul cye mastl akꞌanal bix ma tzꞌoc ten waaꞌl bix cꞌal cyuya ke cꞌal kꞌeꞌn,

50tzultzen meltzꞌaj tpatrón tuj jun kꞌij min nayon tiꞌj bix tuj jun hora min ttzkiꞌn.

51Bix cwel kꞌoꞌn nim castiwa te akꞌanal, bix cxeꞌl t-xooꞌn tpatrón cyxol ke xmeletzꞌ xjal, jatztzen chi jawela okꞌja, bix jaaꞌ cjawela kitxꞌitxꞌin t-xeeꞌ twitz cye―tz̈i Jesús cye t-xnakꞌatz.