2 CORINTIOS 8 - Mam of Todos Santos -- Guatemala Unicode

Tuꞌn t-xiꞌ kkꞌoꞌn jun onbil tuya cykil kcꞌuꞌj

1Key hermano, jaꞌlewe waja txiꞌ nkbaꞌna cyey ti nbaj cyxol ocslal tuj cykilca tnom tuj Macedonia. Tuꞌn t-xtalbil Dios cyibaj, o cycaman pwak te onbil cye mebe ocslal tuj Jerusalén.

2Amale nimet e niyꞌbet ke ocslal te Macedonia tuj qꞌuixcꞌaj, bix amale penat nchi itzꞌja tuꞌn tcyajlal, pero tuꞌn cytzalajebl e xiꞌ cykꞌoꞌn jun onbil tuya cykil cycꞌuꞌj.

3Inayena tstiwa e xiꞌ cykꞌoꞌn onbil tuya cykil cycꞌuꞌj, bix e xiꞌ cykꞌoꞌn laꞌ niyꞌ chꞌin e cnet cyuꞌn, bix e xiꞌ chꞌintl tibaj.

4Nim e cubsanke cywitz weya tuꞌn t-xiꞌ nkꞌoꞌna xtalbil cye tuꞌn cyonen cyiꞌ ocslal judío.

5E xiꞌ cyonen kej ocslal tisenj e wajbeꞌya, bix e bintl mas jawnextl cyuꞌn. Yaaꞌn nuk e tzaj cykꞌoꞌn cypwak, sino e xiꞌ cykꞌon cyiib te Kaaw bix mas yaj te weya, tisen taj Kaaw.

6Ojat tbint cyuꞌna juꞌwa. Juꞌ tzunj o chin cubsan nwitza te Tito tuꞌn tpon cyxola juntl maj, tuꞌntzen tbaj bint taakꞌen otk tzyet cyxola nejl, jaj tej cyakꞌa chmolte pwak te cye ocslal mebe tuj Jerusalén.

7Chꞌimacꞌa o bint cyuꞌna baꞌn. Nim n-oc ke cycꞌuꞌja tiꞌ Dios. Bix baꞌn t-xiꞌ cykꞌumena tyol Dios. Bix n-el cyniꞌya tiꞌj tyol Dios. Bix nchi akꞌanana tuya cykil cycꞌuꞌja tuꞌn cyela baꞌn tuj nwitza. Bix at cyanema wiꞌja. Yal jaꞌlewe, tisen cykilca o bint cyuꞌna tuj tumel, jax juꞌx cykꞌoꞌnc cyipena tiꞌj tuꞌn t-xiꞌ cyonena kej judío mebe.

8Min chi oc nlojoꞌna tiꞌj tuꞌn cychmona pwak. Nuk nxiꞌ nkbaꞌna cyey ke ocslal tzalu tuj Macedonia nim nchi yeecꞌan lastim cye mebe, tuꞌntzen toc ncyeꞌyena ka juꞌx cyey ka at lastim cye mebe cyuꞌna tuya cykil cycꞌuꞌja.

9Il tiꞌj cxeꞌl cykꞌoꞌna cyoybila, cuma cytzkiꞌna xtalbil o cyaj tkꞌoꞌn Kaaw Jesucristo cyey. Amale kꞌinet xsunxin tuj cyaꞌj, pero ocxin te mebe xjal twitz txꞌotxꞌ nuk tuꞌn tyeecꞌaxin tkꞌakꞌbil tcꞌuꞌjxin cyey, tuꞌntzen tajben tmebeyilxin tuꞌn cyiikꞌentey t-xtalbil Dios.

10Cxeꞌl nkꞌoꞌna jun consejo te cyey, cuma ja cꞌabel te onbil te cyey. Ma bint jun jnabkꞌi e cub cybisena tuꞌn cychmona jun cyoybila cye mebe judío. Ejeeꞌy tneel ocslal tuꞌn tcub cybisena juꞌwa. Bix yaaꞌn nuk e cub cybisena, bix akꞌkey binchalte.

11Pero ma pon tumel tuꞌn tjaw baj cychmona jcyoybila. Tuj tneel e cyajbey tuꞌn tcub cychooꞌna tuya cykil cycꞌuꞌja, pero ma pon tumel tuꞌn tcub baj cyuꞌna j-o tzꞌoc cytxꞌaakena. Teeylex juun cyey ckꞌolte laꞌ niyꞌ chꞌin baꞌn tcnet cyuꞌna.

12Ka tuya cykil cycꞌuꞌja nchi kꞌona laꞌ niyꞌ chꞌin baꞌn t-xiꞌ cykꞌoꞌna, ntzalaj Dios cyiꞌja. Ka at juun cyey mlay cnet nim cyuꞌn, pero cykꞌaꞌx chꞌin, ntzalajtzen Dios cyiꞌj.

13Tzin nkbaꞌna baꞌn tuꞌn t-xiꞌ cykꞌoꞌna cyoybila laꞌ niyꞌ chꞌin ncnet cyuꞌna, cuma yaaꞌn baꞌn tuꞌn mintiiꞌtl cyey cyjel oj t-xiꞌ cykꞌoꞌna onbil cye mebe. Nuktzen tzin nkbaꞌna il tiꞌj ko onel cye mebe.

14Pero ntzkiꞌnwe jaꞌlewe yaaꞌn mebekey. Juꞌ tzunj baꞌn cyonena cyiꞌj xjal pena nchi itzꞌja. Kape laꞌ alcye jun kꞌij chi oquela te mebe xjal, bix ja tzunkej xjal mebe jaꞌlewe chi oquel te kꞌine, bix ejeeꞌtltzen chi onel cyey tuꞌn cyitzꞌja. Juꞌtzen at kitzꞌjel te cykilca koꞌ.

15Tz̈i tyol Dios cyjulu: “Jxjal e jaw tchmoꞌn nim waabj e cutz tkꞌoꞌn Dios, mintiiꞌ ttxꞌaken e cyaj. Ja tzunj xjal e jaw tiiꞌn nuk chꞌin, at twa jaca kꞌij tuꞌn titzꞌj,” tz̈i tyol Dios cyiꞌj xjal tuj tzkij txꞌotxꞌ tej tcuꞌtz tuj cyaꞌj jun wik cywa “maná” tbi.

16Chjontetzen te Dios jaxin o cux kꞌonte tuj tanem Tito tuꞌn at tkꞌakꞌbil tcꞌuꞌjxin cyiꞌja, tisexj weya.

17E tbixin nyola tej t-xiꞌ nkanena texin tuꞌn tponxin cyxola, pero cpomelxin yaaꞌn nuk tuꞌnj e xiꞌ nkꞌumena, sino cuma tajx texxin ponxin.

18Attzen juntl ocslal cxeꞌl nsmaꞌna junx tuya Tito tuꞌn cypon cyuyey. Cykilca ocslal cyuj cykilca tja Dios tzalu cytzkiꞌn baꞌn tnaablxin, cuma tuya cykil tcꞌuꞌjxin o tzꞌoc tkꞌon tiibxin tuj taakꞌen Dios.

19Bix yaaꞌn nuk oꞌcx n-oc ke cycꞌuꞌj ocslal cyuj cykilca tja Dios tiꞌj tnaablxin, sino jax juꞌx o jyet-xin cyuꞌn ocslal tuꞌn t-xiꞌxin wuyena oj nxiꞌya Jerusalén te kꞌolte onbil cye mebe. Tuꞌnj onbil lu cynimet tbi Dios, bix chicꞌajaxet waja tuꞌn t-xiꞌ wonena ke mebe ocslal tuj Jerusalén.

20Cxeꞌl tzunj ocslal lu wuyena, tuꞌntzen min-al cjawel wiꞌja ka min e xiꞌ nkꞌoꞌna j-onbil cye mebe tuj tumel.

21Tuya cykil ncꞌuꞌja waja tuꞌn wakꞌanana tuj tumel, tuꞌntzen wela baꞌn twitz Kaaw, pero yaaꞌn nuk twitz Kaaw, sino tuyax cywitz xjal.

22Bix at-x juntl ocslal cxeꞌl nsmaꞌna cyey junx cyuya Tito. Bix chꞌimpaxe maj txiꞌ nkꞌoꞌna taakꞌen, bix e bint tuꞌn tuya cykil tnaabl. Nim taj tzaj tonen ejeeꞌy tiꞌ tchmoj cyoybila, cuma nim n-oc ke tcꞌuꞌjxin cyiꞌja.

23Yaltzen te Tito, jaxin jun akꞌanal wuyena bix jaxin npon te nxela cyxola. Ja tzunj caꞌbatl ocslal, ejeeꞌja nchi pon te cyxel cyxol ocslal tzalu, bix baꞌnkexin tuj twitz Cristo.

24Juꞌ tzunj cyyeecꞌax cyej oxe ocslal bix cyej cykil ocslal tzalu, at tkꞌakꞌbil cycꞌuꞌja cyiꞌj ocslal mebe, bix cyyeecꞌax nyola jaxxix tiꞌj oj tzin nkbaꞌna tuꞌn tcub baj cyoybila cyuꞌna.