ROMANOS 2 - Mam of Todos Santos -- Guatemala Unicode

Tzul tkꞌoꞌn Dios tcastiwa teeylex juun laꞌ alcye xbint tuꞌn

1Ja tzunkej xjal cyxola nchi mlon tiꞌ cybinchbil kej xjal kaꞌ nbint cyuꞌn, cyuyax mlay cycol cyiib twitz Dios. Ka tzin cykbaꞌna aj il kej xjal lu tuꞌnj kaꞌ nbint cyuꞌn, cyuyaxa aj ilkey, cuma nbint cyuꞌna tisenx nbint cyuꞌn.

2Tzin cykbaꞌna cyjulu: “Ejooꞌ ktzkiꞌn tkꞌaꞌ Dios cycastiwa te cykilca kej xjal nbint il cyuꞌn juꞌwa, laꞌ alcye il nbint cyuꞌn,” tz̈ikey.

3Ka nchi yolena cyiꞌ aj il tuꞌnj il nbint cyuꞌn, bix juꞌx key nbint il cyuꞌna, ¿tiiꞌn cwaꞌ cybisena chi elela libre tiꞌ cycastiwey tzul tuꞌn Dios?

4O tzaj tkꞌoꞌn Dios nim xtalbil te cyey. Chꞌima maj o weꞌ tkꞌojxin cyiꞌja bix o tziyꞌx tuꞌnxin cyiꞌja. Pero miꞌn tkba cycꞌuꞌja ka miꞌn tzaj cycastiwey tuꞌn Dios tuꞌnj cyila. O tzaj tkꞌoꞌnxin kej xtalbil lu tuꞌntzen tcyaj cykꞌoꞌna cyila.

5Pero kej cyxola n-el cyxooꞌn t-xtalbil Dios, bix min cyaj cykꞌoꞌn cyil, nbaj tchmoꞌn Dios cycastiwa. Ccyiikꞌel cycastiwa oj tpon tumel tuꞌn toc jaca juun xjal tuj xkelbil tuꞌn Dios, bix cꞌoquel tcyeꞌyenxin tiꞌxix tumel.

6Ctzaal tkꞌoꞌnxin teeylex juun laꞌ alcye xbint tuꞌn.

7Ctzaal tkꞌoꞌnxin chunkꞌlal te junx maj cyej xjal nbint jtajbil Dios cyuꞌn bix n-oc cyipen tuꞌn cypon tuya Dios bix tuꞌn cycaman cycotz bix cychunkꞌlal mintiiꞌ tbajlel.

8Pero ja tzunkej xjal min cyniman ti taj Dios bix nuk nchi jyon cyex cyajbil bix nuk jaj kaꞌ nbint cyuꞌn, cyibajtzen cꞌuꞌla tkꞌoj Dios bix cycastiwa.

9Jaca juun xjal aj il nim qꞌuixcꞌaj bix nim bisbajil qꞌuiyax tuꞌn tuj tcastiwa. Judíole, bix yaaꞌnle judío, pero cykil aj il ccyiikꞌel cycastiwa.

10Ja tzunkej xjal baꞌn nbint cyuꞌn, chi pomel jaaꞌ taꞌ Dios bix chi camal cycotz bix chi temel tuj ttz̈yal. Judíole, bix yaaꞌnle judío, pero cykilca kej nchi binchan baꞌn, cycaman cycotz.

11Oj toc tcyeꞌyen Dios ke xjal, min-al jun mas jawnex twitz juntl.

12Cykilca kej xjal cyaj tuꞌn tbint il cyuꞌn, judíole, yaaꞌnle judío, pero ccyiikꞌel cycastiwa tuꞌn Dios. Kej xjal yaaꞌn judío min e cybi ti toc tuꞌn tley Moisés. Juꞌ tzunj miꞌn tzꞌoc tcyeꞌyen Dios ejeeꞌ laꞌ ka e cynima tley Moisés bix ka min. Pero ctzaal tkꞌoꞌn Dios cycastiwa, cuma e binchanke il. Yal tzunkej xjal judío, e cyiikꞌ tley Moisés. Juꞌ tzunj jtley Moisés cꞌajbel te Dios oj tmlon tiꞌ cybinchben, tuꞌntzen tkꞌontexin cycastiwa kej min e cyniman tley Moisés.

13Yaaꞌn kej judío nuk n-oc cybiꞌn tley Moisés chi temel jiquen twitz Dios, sino nuk ejeeꞌj nbint cyuꞌn alcyej tzin tkbaꞌn.

14Ja tzunkej xjal yaaꞌn judío, amale mint cytzkiꞌn tley Moisés, pero tuj cyanem n-el cyniyꞌ tiꞌj alcyej baꞌn bix tiꞌj alcyej yaaꞌn baꞌn. Ka jaj baꞌn nbint cyuꞌn, tzin cyyeecꞌan at tley Dios tuj cyanem.

15Amale mint cytzkiꞌn tley Moisés, pero ka kꞌiꞌn tley Dios cyuꞌn, nyeecꞌantzen tisenx at tley Moisés tuj cyanem, cuma kej caꞌba ley lu junx eteꞌ. Ka tzin tkbaꞌn cynaabl ka kaꞌ nbint cyuꞌn bix ka baꞌn, juꞌtzen ntyeecꞌan at tley Moisés tuj cyanem.

16Tuj tzunj kꞌij oj toc tcyeꞌyen Dios cykilca xjal, tujtzen tcwent Jesucristo cꞌaale tkꞌoꞌn Dios tuꞌn toc tcyeꞌyen jcꞌuꞌn tuj cyanem xjal. Kej e cyniman, cchicꞌajaxel jiquenke twitz Dios. Juꞌ toc tuꞌn tyol Dios, bix juꞌx weya.

Tuj cywitz judío n-el cyniyꞌ tiꞌj ti taj Dios

17Ejeeꞌtzen key judío, at juun cyey tzin cykbaꞌna nintzaj t-xjal Dioskey. Tzin cykbaꞌna mintiiꞌ cycastiwey tkꞌaꞌ Dios, cuma ejeeꞌy e tjoy Dios tuꞌn cyiikꞌente cyey tley Moisés. Cuma ejeeꞌy e tjoy Dios te t-xjal, juꞌ tzunj njaw cyniman cyiiba.

18Tuj cywitza n-el cyniꞌya tiꞌj ti taj Dios tuꞌn tbint cyuꞌna. Tuj cywitza kꞌiꞌn cyuꞌna tuj tumel, cuma jaj tley Moisés xnakꞌtzalte cyey ti tten tuꞌn cyela baꞌn.

19Tuj cywitza n-el cyniꞌya tiꞌj cykilca, bix juꞌ tzunj te cyey cyaakꞌena te xnakꞌtzalte cyej xjal yaaꞌn judío. Tisen mos̈ eteꞌ cywitza. Tuj cywitza tuj klolj eteꞌ, bix ejeeꞌ tzuna te kꞌolte spiꞌyen te cye.

20Tuj cywitza ja cyaakꞌenja te kbalte tyol Dios te cyej xjal min tzꞌel cyniyꞌ tiꞌj. Tuj cywitza tisen cwalke, bix ejeeꞌ tzuna cymaystra, cuma cyuya tzuna taꞌ jmera tyol Dios, cuma at tley Moisés cyuyey.

21Tuj cywitza jawnex maystrakey cye cabtl, pero min o cynimey jn-oc cyxnakꞌtzaꞌna. Tzin cykbaꞌna miꞌn tzꞌalkꞌan jun xjal, pero ejeeꞌxa nchi alkꞌana.

22Tzin cykbaꞌna miꞌn tzꞌoc ipan jun xjal tiꞌ t-xuꞌl juntl, pero ejeeꞌxa nchi oc ipana tiꞌ t-xuꞌl cyuyey. Tzin cykbaꞌna kaꞌ tuꞌn toc cyniman xjal ke sant. Nuk ja Dios, tz̈ikey, pero ejeeꞌxa min cynimey Dios.

23Cuma e tzaj tkꞌoꞌn Dios tley Moisés cyey, juꞌ tzunj njaw cyniman cyiiba, pero min tzꞌoc cynimena. Juꞌ tzunj nchi yolen kej xjal yaaꞌn judío kaꞌ tiꞌ Dios.

24Cycyeꞌyenx ti toc tuꞌn tyol Dios tiꞌj lu. “Kej xjal yaaꞌn judío, nuk xmucchabl te Dios tzin cykbaꞌn tuꞌnj kaꞌ nbint cyuꞌna, ejeeꞌy judío,” tz̈i tyol Dios.

25Ke cyey judío n-oc ke cycꞌuꞌja tiꞌ cꞌupbil ttzꞌumel twiꞌ cytzꞌalbila te techel t-xjal Dios tzunkey. Baꞌn tej cyechela lu, pero oꞌcx ka tzin cynimana cykilca tley Moisés. Pero amale atet cyechela toc, pero ka min cynimey tley Moisés, tisencꞌax mintiiꞌ cyechela.

26Pero ka at jun xjal yaaꞌn judío tzin tniman tley Dios cꞌuꞌn tuꞌn tanem, amale minttiiꞌ techel toc tiꞌj, pero tuj twitz Dios, t-xjal Dioste.

27Ka jun xjal yaaꞌn judío nniman tley Dios, amale minttiiꞌ techel toc tiꞌj, pero telniyꞌ t-xjal Dioste. Pero jun xjal aj judío, ka min tzin tniman tley Moisés, amale ot cpet tchuꞌl bix amale atet tley Moisés tuya, pero telniyꞌ yaaꞌn t-xjal Dioste.

28Yaaꞌn t-xjal Dios jun xjal tuꞌnj aj judío bix tuꞌn oc cpet t-xumlal.

29Kej mero t-xjal Dios ejeeꞌj tzin cyniman Dios tuya cykil cycꞌuꞌj, yaaꞌn nuk ejeeꞌj o tzꞌel keset chꞌin cychuꞌl. Jun xjal, tuꞌn toc te t-xjal Dios, il tiꞌj tuꞌn tnimante Dios tuj tanem, yaaꞌn nuk tuꞌn toc tcyeꞌyen tley Dios twitz uꞌj. Tuj cywitz judío, kej nchi el baꞌn ejeeꞌj toc cyechel tiꞌ cychuꞌl te yecꞌbil t-xjaltzen Dioske. Pero tuj twitz Dios, kej nchi el baꞌn, ejeeꞌj tzin cyniman Dios tuj cyanem.