TITO 3 - Mam of Todos Santos -- Guatemala Unicode

Nuk ocx tuꞌn t-xtalbil Dios jiquen koꞌ twitzxin

1Cxeꞌltzen nkbaꞌna tey ti tten tuꞌn cyten ocslal cyxol kej xjal yaaꞌn ocslal. Kbanx cyexin tuꞌn toc cybiꞌnxin tley gobierno bix tuꞌn cynimanxin tyol cykil cawel ncawen cyibajxin tuj tnom. Xnakꞌtzanx cyexin tuꞌn tbint cyuꞌnxin alcyej akꞌuntl baꞌn tuꞌn tbint cyuꞌnxin, bix tuya cykil cycꞌuꞌjxin.

2Bix xnakꞌtzanx cyexin tuꞌn miꞌn chi xooꞌnxin kaꞌ yol tiꞌ juntl, bix tuꞌn miꞌn chi kꞌojxin cyuya xjal. Nuk oꞌcx tuꞌn cyyeecꞌanxin cynaablxin baꞌn cywitz xjal, bix tuꞌn cyyolenxin maans cyuya xjal.

3Tumelte tuꞌn cyyeecꞌanxin cynaablxin baꞌn cywitz xjal yaaꞌn ocslal, cuma nejl, jax juꞌx ejooꞌ min el kniyꞌ tiꞌj. Min oc kbiꞌn Dios. Bix e xiꞌ lpey koꞌ nuk tiꞌj ẍtakꞌ xnakꞌtzbil. E ten koꞌ tjakꞌ tcawbil kxumlal, bix nuk kaꞌ e tajbe kxumlal. Ex kkꞌij nuk nko binchan jyaaꞌn baꞌn, bix nuk e chiꞌl kcꞌuꞌj. Oc ten koꞌ cyakwusalte ke xjal, bix el kiiqꞌuen kiib kxolx.

4Pero amale nimet kaꞌ e bint kuꞌn, pero e tzaj tyeecꞌan Dios, Clol ke, tkꞌakꞌbil tcꞌuꞌj kiꞌj. Oc kakꞌ texin,

5bix e coꞌpaxin ke tuj kil. Pero yaaꞌn tuꞌnj jun kchunkꞌlal jiquen ma ko clet, sino nuk oꞌcx cuma e tzaj kꞌontexin lastim ke. Ma ko clet nuk tuꞌnj ttxjontexin kanem, bix tej ttxjet nuk tuꞌnj, e kiikꞌ jun acꞌaj kchunkꞌlal bix jun acꞌaj knaabl tuꞌn Espíritu Santo.

6Tuya cykil tcꞌuꞌjxin bix tuꞌn Jesucristo, Clol ke, e cuꞌtz tkꞌoꞌnxin Espíritu Santo ke.

7Tuꞌn tzunj t-xtalbilxin, jiquen koꞌ twitzxin, bix attzen koclen tuꞌn kpon tuyaxin te junx maj. Tiꞌj tzunj kkab nko ayon tiꞌj.

8Jaxxix taꞌ jma txiꞌ nkbaꞌna, bix baꞌn tuꞌn toc ke kcꞌuꞌj tiꞌj. Kꞌumenx tuya tipemala, tuꞌntzen t-xiꞌ cykꞌon cyiibxin tiꞌj tuꞌn cybinchanxin baꞌn te juntl.

Baꞌnxsen kej xnakꞌtzbil lu, bix at cꞌajbela cye xjal.

9Pero cawenx kej ocslal tuꞌn miꞌn chi kꞌojl cyiꞌj xnakꞌtzbil min chi ajben. Miꞌn chi kꞌojlxin tiꞌj alcyej cyxeꞌchel judío mas jawnex, bix tiꞌj alcyej tley Moisés tuꞌn cynimantexin. Paꞌmel tiiba cyiꞌj xnakꞌtzbil lu, cuma nuk kꞌoj ntjyoꞌn, bix mintiiꞌ tajbel.

10Ka at jun xjal ma takꞌ jun xnakꞌtzbil yaaꞌn jaxxix, kbanx texin tuꞌn miꞌntl xnakꞌtzanxin takꞌ. Ka ma txiꞌ tkbaꞌna tcab maj tuꞌn miꞌntl cub tkꞌoꞌnxin kꞌoj cyxol ocslal, bix tcyꞌixin tuꞌn t-xiꞌ tbiꞌnxin tyola, ljomax cyxola.

11Il tiꞌj tuꞌn tel t-xooꞌna, cuma ttzkiꞌna ma txiꞌ tnaablxin tuj il. Binchal ilxin, bix jaxxin njyonxin tcastiwaxin.

Tej t-xiꞌ tkbaꞌn Pablo te Timoteo alcye tuꞌn tbint tuꞌn

12Cxeꞌl nsmaꞌna jxin Artemas tuyey bix ka jaj xin Tíquico. Oj tpon jun cyxolxin tuyey, kꞌoꞌnc tipena tiꞌj tuꞌn tpon naja tuj tnom Nicópolis, cuma tuj tzunj tnom lu chin temela tuj tyem te cheꞌw tzul.

13Ja tzunj xin Zenas, jxin txꞌolbal ley, tuyax jxin Apolos, oj cyetzxin tuj ttanema, kꞌonx chꞌin onbil cyexin, tuꞌntzen mintiiꞌ pena tuj cybexin.

14Yeecꞌanx cye ocslal ti tten tuꞌn cyonen cyiꞌj xjal at pena eteꞌ, tuꞌntzen cyajben ocslal tuj taakꞌen Dios.

Mancꞌbil yol cye ocslal

15Cykilca kej ocslal at wuyena nxiꞌ cykꞌoꞌn jun cykꞌolbebl cyey. Kꞌonxa kkꞌolbebla cyej xjal n-oc kakꞌa cye bix junx cyocslabl kuyena.

Tzajxit t-xtalbil Dios cyibaja. Oꞌcx nyolja.