1Entonces ja tzunj xin pala nintzaj cycawel cyibaj mas pala cyxol xjal judío e xiꞌ kanente te Esteban:
—¿Jaxpa ka ma tzꞌoc meltzꞌaja tiꞌ tley Moisés? Jatzen cykanbil xjal jtiꞌja, ¿jaxpa?―tz̈i tajwil naꞌl Dios.
2Bix aj ttzakꞌbeꞌn Esteban:
—Cybintza, taat, key te ntanem, cybintz chꞌina jun rato. Wajtzen txiꞌ ntxꞌolbaꞌn chꞌin tiꞌj nbint tuꞌn Dios tiꞌ kloqꞌuel bix cyiꞌ kxeꞌchel ootxa, bix tiꞌj ox chi cub tzpet kloqꞌuel tuj taj Dios bint.
Tneelxsen cxeꞌl nkbaꞌn tiꞌj jxin kxeꞌchel Abraham. Tej iꞌtzx Abraham tuj ttxꞌotxꞌ Mesopotamia, ja tzunj xin nintzaj Kdios el jlet twitz Abraham tisen cyey cytzkiꞌntla.
3Bix e xiꞌ tkbaꞌn Dios te Abraham: “Abraham, kꞌonj ttxꞌotxꞌa bixsen alkch te tjay, bix ctexsen tzalu, bix lpetztzen wiꞌj tuj txꞌotxꞌ cxeꞌl nyeecꞌan tey,” tz̈i Dios te Abraham.
4Bix etz Abraham tuj ttxꞌotxꞌ Mesopotamia, juntl tbi Caldea. Pero tejtzen tponxin tuj Harán, bix e cyajxin cab kꞌij jatzewe. Cwa tcyim tmanxin tuj tnom Harán. Mas yajtl, bixsen iyꞌtiiꞌ Dios jaxin tuj ttxꞌotxꞌ Canaán, jaaꞌ tcwaꞌ Israel jaꞌlewe, jaaꞌj najla koꞌwe.
5Yaltzen jaꞌlewe, ketltzen, pero tej kꞌij tej tul Abraham, pero mi nuketpe jun bara oc tetzen Abraham. Mitkx n-oca tkꞌoꞌn Dios texin. Pero otk txiꞌ tkbaꞌn Dios texin tuꞌn tcub tcmoꞌnxin, bix laꞌ altzen cye kꞌij tetzen ke tchmanxin tuꞌn cyeke tisen cycotz. Bix e tkba te Dios ja lu jatxe tej min-alte Abraham tcwal.
6Bix jax e xiꞌ tkꞌoꞌn Dios juntl tumel te Abraham: “Kej tey t-xeꞌchel chi najalcye tuj juntl txꞌotxꞌ. Cyaja syent jnabkꞌi chi najal tey tloqꞌuel jatzewe. Chi akꞌanalcye, pero mintiiꞌ chojbilcye. Chi akꞌanal nuk cotz. Tetzen t-xel twiꞌ cycꞌuꞌj, jatzen cyiikꞌel jnimxsen kaꞌ cꞌoquel cybinchen xjal cyiꞌj.
7Pero cwax oj cyetz jatzewe, bix chi altz meltzꞌaj tuj ja txꞌotxꞌ lu juntl maj, tuꞌn cyajben we. Yal tzun kej xjal cꞌoquel binchen tej kaꞌ cyiꞌj tcwala, inayenxsenwe chin cwel kꞌonte il cyibaj,” juꞌtzen toc tuꞌn Dios te Abraham tej tpon Abraham tuj txꞌotxꞌ otk tzꞌoc oyet texin.
8Bix tuꞌntzen tcyaj kej yola tuj chicꞌaj, bixsen e cub bint jun tyol Dios tuya Abraham. Jatzen cyyolxin e cub bint, jatzen Abraham cyuya ke t-xeꞌchel, ke xjal te Israel, cyocleltzen te t-xjal Dios. Yaltzen te Abraham, cyuya ke tcwal, t-xiꞌleltzen tyeecꞌanxin techlal tyolxin, teltzen keset ttzꞌumel twiꞌ cytzꞌalbil jxjal xinak. Juꞌ tzunj tej titzꞌj tcwal Abraham, Isaac, bix el tkesenxin ttzꞌumel twiꞌ ttzꞌalbil Isaac te wajxak kꞌij titzꞌjlen. Jaxsen juꞌx te Isaac tuya tcwal Jacob, bix juꞌx e tse Jacob tuyaj cablaaj tcwalxin. Ejeeꞌ tzunj cablajajxin tcwal Jacob e cub itzꞌjsante jcablajaj cloj xjal te Israel, tisen cyey cytzkiꞌntla.
9Jatzen jun xin cyxol jcablajajxin itzꞌjsalcatej, jxin José. Otkx tzaj texin te coꞌpl t-xjalxin tuj weyaj. Pero yaaꞌntzen telniyꞌxin ka juꞌ xina, sino el xooꞌnxin. Yaltzen ke ttzicyxin tzinxsen nkꞌakꞌen cyanemxin tuya tchiꞌlel cycꞌuꞌj, bix e xiꞌ qꞌueyet-xin cye xjal te Egipto tuꞌn takꞌananxin nuk cotz. E bint cyuꞌnxin juꞌwa cuma jaxin achen tuꞌn cymanxin cywitzxin. Juꞌtzele tewa. Pero atte Dios tuya José.
10Pero cwax tcoꞌpjxin tuj il, bix e takꞌ Dios nim tuꞌn tiyꞌ tilbilxin tiꞌj, bix e takꞌ Dios texin tuꞌn tten t-xtalbil cawel te Egipto tiꞌjxin, bix ocxin te tcab cawel tibaj cykil ttxꞌotxꞌ Egipto tuꞌn nin cawel. Bix oc tkꞌoꞌn cawel tajwalelxin tuꞌn tcawenxin tibaj tja cawel.
11Entonces bixsen e tzaj weyaj tibaj cykil ttxꞌotxꞌ Egipto. Jaxsen tyemj tul weyaj tibaj Canaán, jaaꞌj najla ttzicy José, ke kchman ootxa. Cyiwxsen cychunkꞌlalxin tuꞌn weyaj. Min e cnet cywaxin.
12Pero tejtzen tbintte Jacob tumel ka at triwa tuj Egipto, bixsen e xiꞌ tchkꞌoꞌnxin ke tcwalxin te lokꞌolte. Juꞌtzen tten cyxiꞌlen ke ootxa xjal te tneel maj cykenxin te lokꞌol waabj tuj Egipto. Jatztzen e pona cnet José cyuꞌnxin. Pero min el cyniyꞌxin tiꞌ José.
13Eltzen cabtl xjaw, bix e baj cywaxin tuj Canaán. Iltzen tiꞌj tuꞌn cyxiꞌxin Egipto juntl maj. Entonces bix e xiꞌkexin te tcab maj. Te tzunj juntl maja, bixsen e tyeecꞌa tiib José cye ttzicy. Bix te xsunja maj lu tej tel tniyꞌ cawel tiꞌ José te jaaꞌxin, bixsen el tniyꞌxin tiꞌj jaaꞌ elnina itzꞌj José.
14Bix ajtz meltzꞌaj ke ttzicy José Egipto tuꞌn cyponxin tuj Canaán. Kꞌiꞌntzen jun txoquen José cyuꞌnxin tuꞌn cyxiꞌxin cykilke te cyjaxin najal tuj Egipto. Tejtzen cyul meltzꞌajxin te toxen maj, bixsen e xiꞌkexin cykilcakexin, atle ama nuk oxcꞌal tuya olajaj xjal.
15Juꞌtzen tten tpomlen Jacob najal Egipto, bix jatztzen e cymaꞌ xina. Bix tujtzen Egipto e cymaꞌ José, bixsen ke ttzicyxin, ejeeꞌtzen kxeꞌchel te ootxa.
16Tejtzen cybaj cyimxin, bix aj kꞌit cyxumlalxin mas yaj tuj ktanem. Tzalutzen mokuꞌnakexin tuj cyjayelxin otk tlokꞌ Abraham. Otk tzꞌel tlokꞌoꞌnxin te junxin xjal Hamor tbixin, tej tnom te Siquem, tisen cyey cytzkiꞌntla.
17Ke ootxa xjal e najankexin nim tyem tuj Egipto. Bix e tz̈itpajkexin, bix tij e tz̈ꞌiy xsunkexin. Pero cwax tpon tyem tuꞌn tbintj otk toye Dios te Abraham, tuꞌnx cyaj meltzꞌaj ke kchman ootxa tujx ke ktxꞌotxꞌ.
18Pero tuj xsunj tyem lu attzen junxin cawel tibaj Egipto, junxin cawel min ul José tuj tcꞌuꞌjxin, bix min oc tbiꞌnxin tyol José.
19Ja tzunj xin cawel lu nimxsen e baj tyajlaꞌnxin bix nimxsen tcyajlal iꞌya ke kchman tuꞌnxin. Bix oc tlomoꞌnxin ke xjal tuꞌn tcyaj cycyeꞌyen ke cycwal xinak, tuꞌntzen cycyim ke neeꞌ acꞌaj xinak txolen cyitzꞌj.
20Tuj tzunj tyem lu tej titzꞌj Moisés. Jun neeꞌ cwal naꞌn twitz Dios, bix neeꞌ cyeca xsunxin, bix el ewet-xin tunwen cyuꞌn tmanxin te oxe xjaw.
21Pero cwa tpon jkꞌij tuꞌn ya mixben tcub ewetl neeꞌ cwal, bix e pon jkꞌij tuꞌn tcyaj cyeyet. Pero jatltzen tmeel cawel tibaj Egipto iyꞌ kꞌinte, bix oc tz̈ꞌis̈entxin neeꞌ tisen jun taltxin.
22Juꞌtzen tten t-xnakꞌtzetlen Moisés tuya tikꞌch baꞌn tuꞌn Egipto. Bix tejtzen tocxin ma xjal, axsen jun yolenxin, bix nimxsen e bint tuꞌnxin.
23Attzen jun kꞌij ya nukxix n-elactlxin twiꞌ cyaꞌwnak jnabkꞌi, bix ul tuj tcꞌuꞌj Moisés tuꞌn t-xiꞌxin kꞌolbelcye te ttanemxin, ke te Israel, jatzex najlake Egipto.
24Pero tejtzen tponxin tuj lugar, bix oc tcyeꞌyenxin nimxsen il niꞌya cabtl te ttanemxin tuꞌn junxin te Egipto. Toctzen tcyeꞌyenxin, bix e tzaj kꞌojlxin, bix e cub tbyoꞌnxin jxin aj Egipto.
25Jatzen tuj twitz Moisés tel-leltzen cyniyꞌ te ttanemxin tiꞌj ka tuꞌnxin tel-leltzen tcoꞌpan Dios ke te ttanemxin tuj cykꞌab aj Egipto. Pero min el baꞌn tuj cywitz aj Israel.
26Tetzen juntl kꞌij bix e xiꞌ Moisés kꞌolbelcye xjal te Israel juntl maj. Pero te tzunja juntl maj lu, bix oc tcyeꞌyenxin caꞌba te ttanemxin nchi kꞌojl cyil cyiibx cyiib. Taj tzunxin e cub tpaꞌnxin ejeeꞌ, bix e xiꞌ tkbaꞌnxin cye cyjulu: “Key taat, mixben cykꞌojl cyey cyjulu, cuma te cytanem cyiiba. ¡Miꞌn chi kꞌojla mas!” tz̈i Moisés t-xiꞌ tkbaꞌn cyexin.
27Pero tzunj juntlxin toc pjulec tej juntlxin, bix ex tlomoꞌnxin ja Moisés, bix oc tkbaꞌnxin te Moisés: “¿Al tey ma tzꞌoc kꞌonte te cawel keya kibaja?
28¿Tajpey chin cub tbyoꞌna tisenj e tsey jxjal aj Egipto ewe?” tz̈ixin te Moisés.
29Toctzen tbiꞌn Moisés juꞌwa, bix el tniyꞌxin tiꞌj ka otk tzꞌel niyꞌ tiꞌjxin ka jaxin otk cub byon tej xin aj Egipto. Bix el okxin. Bix e ponxin tuj ttxꞌotxꞌ Madián. Jaxsen e temaxin jtisen jun te nakch xjal. Bix e majexin tuya jun xuuj te Madián, bix itzꞌj caꞌba tcwalxin.
30Exsen cyaꞌwnak jnabkꞌi. Attzen jun kꞌij ncylen Moisés tuj chkꞌajlaj nka taꞌj witz Sinaí, tej t-xiꞌ tcyeꞌyenxin jun wiꞌ chꞌiꞌx njulen tuya kꞌakꞌ. Bix e jaw jlet jun tisencꞌa jun tsanjel Dios tuj tken kꞌakꞌ.
31Tejtzen toc tcyeꞌyen Moisés, e jawxsen kleeꞌxin, bix e xiꞌ lkꞌexin te cyeyꞌlecte nka tuꞌn tocxix tcyeꞌyenxin tixix tten. Pero tujtzen tken kꞌakꞌ etza tyol Dios. Tz̈i tyol cyjulu:
32“Inayenwe Jcydios ke cychmana, Tdios Abraham, Tdios Isaac, bixsen Tdios Jacob,” tz̈itzen tyol Dios. Tejtzen toc tbiꞌn Moisés tuj twiꞌ Dios, bix e jaw luꞌlenxin tuꞌn ttz̈i. Ya min ocxix tcyeꞌyentlxin tken kꞌakꞌ.
33Pero te Dios, bix akꞌx texin yolel: “Kꞌimal ke t-xaaba tuꞌn ttzaj tyeecꞌana mas tanema we tuj ja lugar lu, cuma ja txꞌotxꞌ jaaꞌ tcwaꞌy xjan txꞌotxꞌ teja.
34Cxeꞌl nkbaꞌn tey ma tzꞌoc ncyeꞌyen tiꞌ tkaꞌyel eteꞌ nxjal te Israel tuj cykꞌab xjal te Egipto. O nbi tzinxsen nchi kanen xtalbil, bix matzen chin tzaj te coꞌplcye. Pero tuya tonbila chi coꞌpjela. Quixtetzen. Matzen txiꞌ nsmaꞌna Egipto,” tz̈i Dios te Moisés―tz̈i Esteban cye cawel tuj consejo.
35Bix akꞌx Esteban kbalte:
—Key taat, ja xsunj xin Moisés lu el cyxooꞌn xjal te Israel tuya cyyol cyjulu: “¿Altzen ma tzꞌoc kꞌonte tey te cawel keya kibaj?” tz̈i tzunkexin. Bix jaj xsunj Moisés lu e cyaj tkꞌoꞌn Dios tajwalel te cawel bix te coꞌpel cye xjal te Israel tuj tkꞌab cawel te Egipto. Ja te Dios e yolen tuꞌn tyol tsanjel tuj tken kꞌakꞌ tuj chꞌiꞌx.
36Jatzen Moisésj etz kꞌinte cye kchman ootxa tuj ttxꞌotxꞌ Egipto. Cytzkiꞌntltzen cyey ja Moisésj e binchan tej techlal bix nim seyꞌpajlenel tuj Egipto, bixsen ttziiꞌ Cyak Mar. Bix jaxsen xinj oc cꞌojlancye aj Israel te cyaꞌwnak jnabkꞌi tuj tzkij txꞌotxꞌ.
37Bix jaxsen Moisésj e xiꞌ kbante cye xjal te Israel: “Laꞌ alcye jun kꞌij qꞌueletz tscyꞌoꞌn Dios jun nintzaj xjal yecꞌl be cyxol aj Israel te kbalte tyol Dios cye xjal, tisenj ma chin etz tscyꞌoꞌn weya Dios,” tz̈i Moisés.
38Jaxsen Moisésj el xooꞌn cyuꞌn xjal, jajxsen xinj ajben te yolel cyxol xjal tuya Dios tej cychmet xjal t-xeeꞌ jwitz te Sinaí. Nuktzen tuꞌncꞌa Moisés e binne cyyolen kchman tuya Dios, bix nuk tuꞌncꞌa Moisés e tzaaꞌ tkꞌoꞌn Dios ke tley cye xjal. Kej yol lu ejeeꞌtzen yol jte cychunkꞌlal xjal tuya Dios.
39Nuket bix oc cybiꞌn ke ootxa xjal ke ja yola, bixitle e tzaj tkꞌoꞌn Dios cychunkꞌlal te junx maj, pero bix el cyxooꞌn. Min e cybi, bix el cyxooꞌn Moisés. Yaltzen tuj cyanem e cyajbex tuꞌn cyaj meltzꞌaj tujx cychunkꞌlal te ootxa tuj Egipto.
40Pero min oc cybiꞌn ja Moisés, sino oc cykanbil twitz Aarón, ttzicy Moisés: “Taat, min ktzkiꞌna ti ma baj te Moisés, jxin etz kꞌinte keya tuj Egipto. Jatzen tey, keya kuya kbinchaꞌcꞌatzen cab kdios tuꞌntzen t-xiꞌ kꞌinte ke,” tz̈itzen ke ootxa xjal te Aarón.
41Entonces bixsen e cub cybinchaꞌn xjal junjil wacẍ nukxsen oro ttxꞌotxꞌeljil, bixsen oc ten ke xjal patlcꞌa alimaj te cyoybil twitz. Bix axsen ttz̈yal taꞌ cycꞌuꞌj xjal tiꞌj otk bint cyuꞌn xjal tuya cykꞌab.
42Entonces bix el tpaꞌn tiib Dios cyiꞌ xjal, bix e cyaj tcyeꞌyen Dios ejeeꞌ xjal laꞌ ti jilel e cyajbe tcub bint cyuꞌn. Bixsen e naꞌnke xjal ke cheꞌw tuj cyaꞌj. Ootxa tyol Dios nyolen tuj libro te Amós tiꞌj e baj. Tz̈i Dios cyjulu tuj uꞌj te Amós: “¡Xjal te Israel! ¿Tepatzen we jkej jil alimaj e tzaj cyoyena we tej cytena tuj tzkij txꞌotxꞌ cyaꞌwnak jnabkꞌi? ¡Min! Juꞌ tten cyuꞌna, pero tuj cyanema, min.
43Te t-xelj tuꞌn cyoc tena naꞌl we, bix oc tenkey naꞌl tdios kꞌij Moloc tbi, bix e naꞌnkey dios twitz jun dios cheꞌw, dios te Renfán. Ejeeꞌtzen cyey cydios ajben cyey. E naꞌnkey dios twitz kej diosa nuk tuꞌn cykꞌaba. Juꞌ tzunj ma chi ex wiiꞌna tuj cytxꞌotxꞌa. Matzen cheꞌx nchkꞌoꞌna tuj jun txꞌotxꞌ nakch, mas nakch tiꞌ txꞌotxꞌ te Babilonia,” tz̈i Dios cyej xjal te Israel, kej min oc cybiꞌn Dios, tz̈i tyolel Dios Amós at-xe jnabkꞌi―tz̈itzen Esteban cye judío tuj Jerusalén.
44Bix akꞌx Esteban yolel:
—Yaltzen jaꞌlewe cꞌaaltzen ntzakꞌbeꞌn cabtl yol tiꞌj yol wiꞌja tiꞌj nin tja Dios. Cytzkiꞌntltzen cyey ke kchman ootxa e ten jun tja Dios puro xbalen, jaaꞌ e tema Dios, jaaꞌxja cheꞌxaxin tiꞌj tuj tzkij txꞌotxꞌ bix tziyꞌ cyiiꞌnxin Dios cyuyaxin. Ja xbalen tcublel Dios e bint cyuꞌnxin tisenxj otk tkba Dios te Moisés, bix tisencꞌaxj otk tzꞌoc tcyeꞌyen Moisés twiꞌ jwitz te Sinaí.
45Ja xbalen tja Dios, bix e xiꞌ cyiiꞌn ootxa xjal tuj ttxꞌotxꞌ Canaán. Tuya cycawelxin Josué bixsen e cub cychmoꞌnxin tuj Canaán. Tuyatzen tonbil Dios e xcyebakexin cyibaj xjal kaꞌ te Canaán. Cykilxsen tyem, jatxe tuj ttyem Moisés tejxe tpon baj ttyem cawel David, ke ootxa xjal e tenx cyexin tjayel Dios cyxol. Mintiiꞌ cyexin nin tja Dios cyuya.
46Pero nimxsen t-xtalbil David tuya Dios, bix e xiꞌ tkanenxin xtalbil te Dios tuꞌntzen tjaw tbinchaꞌnxin jun jaaꞌ te tja Dios jaaꞌ tuꞌn kocxa naꞌnke Dios ejooꞌ t-xeꞌchel Jacob.
47Bix e xiꞌ tcuyan Dios tyol David, pero yaaꞌn ja David, sino ja tcwalxin Salomón.
48Perotzen cyey tuj cywitz, ¿jatztzen najla Dios tuj jun jaaꞌ tbinchben xjal? ¡Min! Tej xin jawnexsen, tej xin binchal twitz txꞌotxꞌ, jxin Dios, yaaꞌn tuj jun jaaꞌ najla texin. Cybintzney tyol ktzan Isaías, tyolel Kman Dios. Tz̈itzen Dios tuꞌn tyolelxin Isaías cyjulu:
49“Maan tuj cyaꞌj nchin tzaaꞌ cawen twitz txꞌotxꞌ. Bix ka ja cyaꞌj te we nuk jun nkꞌaꞌj, yal te twitz txꞌotxꞌ nuk tuꞌn tcub weꞌwe nken tibaj. Yaltzen cyey ejeeꞌy xjal, ¿titzen tten tuꞌn tjaw cybinchaꞌna jun jaaꞌ te nnajbila bix ma tuꞌn wajlana tuj?
50¿Yaaꞌmpatzen inayena in cub binchan tej cykilj at twitz txꞌotxꞌa?” tz̈i Dios cye ootxa xjal at-xe tyem, tz̈i Isaías tcyaj tkbaꞌn―tz̈i Esteban.
51Bix oc ttzꞌaktzaꞌn Esteban tuya mancꞌbil tyol te colbil tiibxin:
—Entonces, key taat, alj toc chilsalec tcꞌuꞌj Dios ejeeꞌ cyey. Tisencꞌax kej cyey cychman ootxa e cub cykipan cyiib twitz Espíritu Santo tej tcub cykipan cyiib twitz Moisés, juꞌxsen ke cyey cyiw xsun key tuya cyanema, tisencꞌax kej min cytzkiꞌn twitz Dios. ¡Juꞌx ke cyey tisen ke kchman ootxa xjal!
52¿Pero alcyej tyolel Dios min oc cyyasen ke ootxa xjal? ¡Mi nuket jun cye! ¡Cykilcake minx e cybi! Bix xsun kej e kbante ka alcye jun kꞌij tul-lel kuya junxin Scyꞌoꞌn tuꞌn Dios, junxin nuk jaj baꞌn tcublel tbinchenxin, ja tzun kej kbalte e cub byetke. Bix yaltzen jaꞌlewe, otzen tzul jxin e kbaj, pero o txiꞌ cyqꞌueyen xina, bix o cub cybyoꞌn xina.
53Ejeeꞌy xjal o tzꞌoc kꞌoꞌn tley Dios cyey tuꞌn tsanjel Dios, pero minx oc cybiꞌna, ejeeꞌ xsuna o cub byoꞌnte jxin xjal Scyꞌoꞌn tuꞌn Dios―tz̈itzen Esteban tcyaj tkꞌoꞌn tuj chicꞌaj cywitz nintzaj consejo.
54Tejtzen toc cybiꞌn pala cyibaj judío kej tyol Esteban, e tzajxsen tij kꞌojlkexin. E jawxsen kitxꞌitxꞌin t-xeeꞌ twitz cyexin tiꞌ Esteban yecꞌbil cykꞌojxin.
55Pero te Esteban maans texin tnaabl. Tujxsen tnoj tanemxin tuꞌn tipemal Espíritu Santo. Bix e xiꞌ tcyeꞌyenxin tuj cyaꞌj. E til tzunxin tilbil Dios tzinxsen ntxililin, bixsen Jesús waꞌlcꞌaxin tuj tmankꞌab Dios.
56Toctzen tcyeꞌyen Esteban, tz̈i tzunxin cyjulu:
—Qꞌuelelcꞌa cyniꞌya tiꞌj, lu cyaꞌj jakl tuj nwitza, lu Jesús, jxjal Smaꞌn tuꞌn Dios tuꞌn tten cyuya xjal, waꞌlcꞌa tuj tmankꞌab Dios―tz̈i Esteban.
57Pero cycyꞌi nintzaj cawel e cybi ke tyol Esteban ka at Jesús tuya Dios, bix oc cymaksiꞌnxin cyẍquinxin, bix akꞌkexin s̈-il, bix e xiꞌkexin tibaj Esteban.
58Bix ex kitet-xin ttxaꞌn tnom te Jerusalén, bix nbajtzen cyxooꞌnxin tuya xak. Tuꞌntzen at mas cyipen jxin xool xak, bix el cyiꞌjxin, tuꞌnx tbaj Esteban. Bixsen e cyaj cykꞌoꞌnxin cyiꞌjxin twitz junxin xjal Saulo tbixin.
59Maatkxsen nbaj xooꞌnxin cyuꞌn kej xjal cymoj consejo, bix e xiꞌ tkbaꞌn Esteban te Jesús tuj cyaꞌj:
—Nuksama, Taat Jesús, kꞌinxsen wanem tuj cyaꞌj―tz̈i Esteban.
60Bix e cub mejtzꞌajxin, ns̈-inxin txiꞌ tkbaꞌnxin te Dios:
—Nuksama, miꞌn tzꞌoc tkꞌoꞌna cybinchben jxjala te tajlal―tz̈i Esteban. T-xiꞌlen bajxitltzen tkbante Esteban, bix e cyimxin tuj ttz̈yal.
Who We AreWhat We EelieveWhat We Do
2025 by iamachristian.org,Inc All rights reserved.
