SAN MARCOS 7 - Mam of Todos Santos -- Guatemala Unicode

Alcyej ctzꞌilelxix xjal tuꞌn twitz Dios(Mt. 15:1-20)

1Attzen jun kꞌij, bix e pon kej xjal nimalxsen tuj ley, ejeeꞌj xjal tej cloj fariseo, tuya cabxin txꞌolbal ley. Otk chi tzajxexin maan Jerusalén. Bix e ponkexin tiꞌ Jesús.

2Toctzen cycyeꞌyenxin nchi waaꞌn t-xnakꞌatz Jesús min otk txjet cykꞌabxin tisexix tten cyuꞌn fariseo, bix el kaꞌyba tuj cywitzxin, cuma eꞌlatzen tuj cywitz fariseo otk chi chucj t-xnakꞌatz Jesús twitz Dios,

3cuma kej xjal judío lepchxke cye xjal tiꞌj jun ley te nejl ka tuꞌn mixbe cywaaꞌn xjal ka mitkx n-eꞌla txjet cykꞌab tisexix tten.

4Jaxse juꞌxe, oj nchi ul meltzꞌaj lokꞌol tuj plasen, jax n-el cytxjoꞌn cykꞌab tisex tten. Bix yaaꞌn oꞌcxcꞌaj, sino atl nim cyley xjal, tisen txjoj cylak, ke xaran, ke wicyꞌil, ke los, bix ke wetbil tisex tten cyuꞌn xjal judío nimal tuj cyley fariseo.

5Juꞌ tzunj, tej toc cycyeꞌyen ke fariseo bix ke txꞌolbal ley min otk txjet cykꞌab t-xnakꞌatz Jesús tisen cyexin cyten, ya otktzen chi chucjxin tuj cywitz fariseo. Bix e xiꞌ cykbaꞌn te Jesús:

—¿Tikentzen min chi waaꞌn tey t-xnakꞌatz tisen kej xjal ootxa? Nchi waaꞌn tey t-xnakꞌatz bix chucjninke twitz Dios―tz̈i tzunkexin te Jesús.

6Pero bix aj ttzakꞌbeꞌn Jesús:

—Jaxne toc tyol Isaías, tyolel Dios, tej tcyaj ttzꞌiꞌbenxin jtyol Dios cyiꞌj xmeletzꞌ cytzi tisej cyey. Tz̈itzen Dios cyjulu, tz̈i Isaías: “Kej xjal lu tzin chi naꞌn Dios nim tuya cytzi, perotzen cyanem nakch taꞌ wiꞌj.

7Mintiiꞌ baꞌn tajbeꞌna ncub cychmon cyiib te naꞌl weya. Bix xnakꞌtzben cye yaaꞌn wuꞌna, sino nuk cyuꞌnx,” tz̈i Dios, tz̈i Isaías tcyajlen ttzꞌiꞌben.

8Cuma cyey, nuk n-el cyiiqꞌuena jtzin tkbaꞌn Dios tuꞌn cyxiꞌ lpey tiꞌj cyley xjal nejl.

9Cytzkiꞌnxix cyey ti tten oj n-aj cylakꞌbaꞌna tyol Dios tuꞌn toc cycꞌojlaꞌna jcyey cyleya.

10Tisen tzunj: Ma tzꞌaj cylakꞌbaꞌna jtyol Moisés tej tkbantexin: “Ebimcꞌa tmana bix ttxuy,” bix “Al tzunj ma tzꞌel xooꞌnte tman bix ttxu, biꞌxse cbyetel naj cyuꞌn xjal,” tz̈i Moisés cye xjal nejl.

11Pero yaltzen cyey, baꞌntzen t-xiꞌ tkbaꞌn jun xjal te tman bix te ttxu: “Mlay tzꞌoc wonen wey, cuma alcyej chꞌintl ma cyaj cxeꞌl oyette te Dios.”

12Juꞌ tzunj al tzunj taj tzꞌoc onente cye tman tuya pwak, mlaytltzen, cuma mintzen tcuyantl cyleya.

13Juꞌtzen tten ncub cybajsaꞌna tyol Dios tuya cyleya. Bix nimxtl nbaj cyey tisex jluwe―tz̈i Jesús cye txꞌolbal ley bix cyej xjal nimal tuj cyley.

14Yajcꞌatltzen bix e ttxoc Jesús ke xjal, bix e xiꞌ tkbaꞌnxin:

—Chin cybiꞌtzen, bix cybimquey.

15-16Mintiiꞌte jun ti jilel cꞌoquex tuj ttzi jun xjal cchucjalet tuꞌn, sino ja tej ctzaal tiꞌ tanem xjal, jatzente cchucjal twitz Dios―tz̈i Jesús cye xjal.

17Tcyajtzen tcyeꞌyen Jesús ke xjal, bix ocxxin tuj jun jaaꞌ. Bix e xiꞌ cykanen t-xnakꞌatzxin ti elpenina jtyolxin cye xjal.

18Bix e xiꞌ tkbaꞌn Jesús:

—Jax juꞌx cyey, ¿mimpatzen ma tzꞌel cyniꞌya tiꞌj? ¿Mimpatzen ma tzꞌel cyniꞌya tiꞌj ka ti jilel ma tzꞌocx tuj ttzi jun xjal, miꞌn chucjte twitz Dios?

19Miꞌn chucjte xjal, cuma miꞌn txiꞌ tuj tanem, sino juꞌ cxeꞌlte tuj tcꞌuꞌj, tuꞌn tiyꞌ tcꞌuꞌn. Mintiiꞌ jun waabj baꞌn tchucj jun xjal tuꞌn.

20Ja tej ctzaal tiꞌ tanem xjal, jatzen te ja ctzꞌilex xjal tuꞌn twitz Dios.

21Cuma tujxe tanem xjal ntzaaꞌ itzꞌj tkaꞌyel, tisej kej xjal nuk xinak ma nuk xuuj n-oc takꞌ cye, alkꞌal, biyꞌyen,

22pajlel, kꞌabj tikꞌch te xjal, cyak wisaj xjal, yajlaj xjal, lochꞌ cꞌuꞌjbaj, xchiꞌlen cꞌuꞌjbaj, kaꞌ yol tiꞌ xjal, n-oc tkꞌon tiib jun xjal te jawnex, bix mintiiꞌ tcꞌuꞌj tiꞌ juntl xjal.

23Cykil tzunj tkaꞌyel lu ntzaj tuj cyanem xjal. Cyuꞌn tzunj lu ntzꞌilaxe xjal twitz Dios―tz̈i Jesús cye t-xnakꞌatz.

Jun xuuj aj Fenicia e xiꞌ tocslaꞌn tyol Jesús(Mt. 15:21-28)

24Bix e xiꞌ Jesús tuj jun wikxitl tnom, Tiro tbi. Bix ocxxin tuj jun jaaꞌ. E tajbexin tuꞌn min-al xjal tzꞌoc cyeꞌyente texin, pero mix e bina tewexin.

25Lwewatzen naj e tbi junxuj xuuj, ttxu juntxin cwal otk tzꞌoc biman tiꞌj, ka otk pon jlet Jesús. Bix e xiꞌxuj, bix e cub majexuj twitz tken Jesús.

26Pero yaaꞌn judíaxuj, sino tej tnom Fenicia tej nin tnom Siria, ttxlaj Galilea te jawne. Bix akꞌxuj cubsal twitzxuj twitz Jesús tuꞌn tel tlojoꞌnxin biman tiꞌ talxuj.

27Pero bix aj ttzakꞌbeꞌn Jesús texuj:

—Tneel chi oquel ncyeꞌyen weja weya nxjal aj judío. Yaaꞌn tumel oj tel kꞌiꞌn cywa neeꞌ tuꞌn t-xiꞌ kꞌoꞌn cye txyan. Nejl chi waaꞌl ke neeꞌ―tz̈i Jesús texuj te niyꞌbel tnaablxuj.

28Pero bix aj ttzakꞌbeꞌn jxuj xuuj:

—Jax toc tuꞌna, Taat. Pero tzintlpe cyyoꞌn cyej jil txyan jniyꞌ qꞌuelel tzꞌak ttxꞌakan cywa neeꞌ. Jaxse juꞌx weya cnyoꞌwa laꞌ niyꞌ chin tzaal tonena―tz̈i tzunxuj.

29Bix aj ttzakꞌbeꞌn Jesús:

—Ma bint ttzakꞌbentey nyol. Baꞌntzen taja tjay. Ya ma tzꞌel biman tiꞌ tala―tz̈i Jesús texuj.

30Tejtzen tponxuj tjaxuj, tjax talxuj twiꞌ wetbil, pero ya otk tzꞌel biman tiꞌ talxuj.

Ul tnaabl jun xjal yaab tẍquin bix men tuꞌn Jesús

31Bix etz meltzꞌaj Jesús tuj tnom te Tiro, iyꞌxin tuj tnom te Sidón, bix iyꞌxin cyuj tnom te Lajaj Tnom, cwa tponxin ttziiꞌ tnijabel aꞌ te Galilea.

32Tej tzunj tponxin, bix e pon cyiiꞌn xjal jun yaab min tziyꞌx tuj twiꞌ bix makma. Bix e xiꞌ cykanen xjal tuꞌn tcub tkꞌoꞌn Jesús tkꞌab tibaj yaab.

33Bix el lkꞌe Jesús tuya yaab cyiꞌj xjal otk jaw chmet, bix ocx tkꞌoꞌn Jesús ke twiꞌ tkꞌab cyuj tẍquin yaab. Bix oc ttzubanxin tiꞌ tkꞌabxin, bix oc tmocoꞌnxin twiꞌ taakꞌ yaab.

34Njawtzen tcyeꞌyen Jesús twitz cyaꞌj, bix e jaw jawsanxin, bixse e xiꞌ tkbaꞌnxin tej xjal yaab:

—Jkomtzen tiiba―tz̈i Jesús.

35Texse naj tjket tẍquin yaab, bix ncyajtl taakꞌ baꞌn. N-akꞌtltzen yaab yolel.

36Bix e xiꞌ tkbaꞌn Jesús cye xjal tuꞌn miꞌn txiꞌ cykbaꞌn ti otk baj te Jesús tuya yaab. Pero amale otket txiꞌ tkbaꞌn Jesús cye xjal tuꞌn miꞌn txiꞌ cykbaꞌn, ilx tiꞌj e cub ten ke xjal kbalte.

37Otkxse chi jaw kleeꞌ xjal, bix e xiꞌ cyyolen:

—¡Cykilxse baꞌn tbint tuꞌn Jesús! Hasta kej xjal min tziyꞌx tuj cywiꞌ bix xsun kej me, baꞌn tbint cyyolen tuꞌn―tz̈i ke xjal.