ROMANOS 7 - Mam of Todos Santos -- Guatemala Unicode

Jun xnakꞌtzbil tiꞌj mejoblenel

1Key hermano, ejeeꞌy jun wik xjal n-el cyniꞌya tiꞌj ti tten ley te twitz txꞌotxꞌ. Juꞌ tzunj cytzkiꞌna oj tcyim jun xjal, min cawetl ley tibajxin. Oꞌcx tiꞌj iꞌtz koꞌ ncawentzen ley kibaj.

2Cxeꞌl nkꞌoꞌna jun tumel cyey ti tten oj ttzakpet jun xjal tiꞌ ley tuꞌn cyamecy. Tzin tkbaꞌn ley il tiꞌj ctemel xuuj tuya tchmil. Jaj iꞌtzxxin, attzen xuuj tjakꞌ jley tzin tkbaꞌn tuꞌn tten majebil tuya tchmil. Pero oj tcyim tchmil xuuj, tzakpiꞌntltzen taꞌ xuuj tuj ley.

3Katzen ma maje xuuj tuya juntl xinak iꞌtzx tchmil, tzin tkbaꞌntzen paꞌl najleꞌntzen xuuj. Pero katzen otk cyim tchmil xuuj, tzakpiꞌntzen taꞌ xuuj tuj jley tzin tkbaꞌn il tiꞌj ctemel tuya tchmil. Katzen taj xuuj maje tuya juntl xinak, yaaꞌntzen paꞌl najleꞌnxuj.

4Key hermano, tisenxsen ntzakpet xuuj tiꞌ ley te najleꞌn tuꞌn jun cyamecy, tuꞌntzen tmaje tuya juntl xinak, juꞌxsen ke. O ko tzakpet tuj tkꞌab ley jax tuꞌn jun cyamecy, jaj tcyamecy Cristo, tuꞌntzen at kmojbabl kiib tuya Cristo, jaj xjal e jatz itzꞌj juntl maj tuj cyamecy. At kmojbabl kiib tuya Cristo tuꞌntzen kajben te Dios tuꞌnj baꞌn nbint kuꞌn.

5Nejl tej lepchx koꞌ tiꞌ ootxa knaabl, e bint-x kuꞌn nuk jaj kajbil yaaꞌn baꞌn. E kajbe tuꞌn tbint kuꞌn j-e tkba ley tuꞌn miꞌn bint kuꞌn. Bix tuꞌnj e xiꞌ lpe koꞌ cyiꞌj kajbil yaaꞌn baꞌn, ajben koꞌ te taawj kꞌilx cye xjal tuj cyamecy.

6Pero jaꞌlewe tzakpiꞌn koꞌ tjakꞌ tcawbil ley. Min ko tentl tjakꞌ tawbil ley, tisenxsen jun xjal oj tcyim min tentl tjakꞌ ley. Ya nko niman Dios yaaꞌn tuꞌnj chkꞌoꞌn koꞌ tuꞌn ley, sino cuma kaj tuꞌn kajben texin tuya cykil kcꞌuꞌj.

Kꞌiꞌn ootxa knaabl aj il kuꞌn

7Katzen tuꞌn ley at kil, jeyꞌ, ¿kaꞌpatzen ley? Min. Te ley min tzꞌoc tlojoꞌnte ejooꞌ tiꞌ il. Ulte ley nuk te kbalte at kil. Tisen tzunj, nejl oc nkꞌaꞌbena tikꞌch cye wuyena, pero min el nniꞌya tiꞌj ka yaaꞌn baꞌn jlu. Pero tej toc nbiꞌna tley Dios ka yaaꞌn baꞌn toc nkꞌaꞌbena tikꞌch cye xjal at, eltzen nniꞌya tiꞌj kaꞌtzen e bint wuꞌna.

8Tej tkbante ley tuꞌn miꞌn tzꞌoc nkꞌaꞌbena tikꞌch at, pero jnnaabla aj il tcyꞌi tzꞌoc tbiꞌn jlu. Oꞌcx oc tkꞌaꞌben tikꞌch at. Nukettzen mintiiꞌ ley, mintzele e cnet jwila.

9Nejl tej mitknaꞌx toc nbiꞌna ti toc tuꞌn ley, eꞌlexse tuj nwitza baꞌn kena. Pero tej tul ley jyol wila, e chicꞌajaxse iꞌtz taꞌ wila, bix el nniꞌya tiꞌj yaaꞌn baꞌn kena. Cyimnen kena.

10Jley e tkba ko camal kchunkꞌlal te junx maj ka ma kniman. Pero min e nnimiya, bix nuk e xiꞌ tiiꞌn kena tjakꞌ tcawbil cyamecy.

11Tuj nwitza ul ley te onl te weya tuꞌn ncamana nchunkꞌlala te junx maj, pero yaaꞌn juꞌwa. Ajben nuk tuꞌn tyeecꞌante aj il kena, bix at tuꞌn ncyima tuꞌn wila.

12Juꞌ tzunj, key hermano, amale tzint tyeecꞌan tley Dios aj il koꞌ, qꞌueleltzen kniyꞌ tiꞌj yaaꞌn ley kaꞌ. Jaca juun ley sakxsen bix jiquenxsen bix baꞌnxsen.

13Kape cykbaꞌy yaaꞌn baꞌn ley, cuma tuꞌn ley oc koꞌ tjakꞌ tcawbil cyamecy. Pero yaaꞌn tuꞌn te ley. Tuꞌn ilte ocx koꞌ tjakꞌ tcawbil cyamecy. Tuꞌnj ootxa knaabl min e xiꞌ kniman jley baꞌnxix, bix juꞌ tzunj ocx koꞌ tjakꞌ tcawbil cyamecy. Jatzen tajbel leyj nuk tuꞌn tchicꞌajax kaꞌxsen knaabl ootxa.

14N-el kniyꞌ tiꞌj baꞌn ley, cuma jley jax tnaabl Dios. Pero yal ke, at knaabl aj il tjakꞌ tcawbil il.

15Chicꞌaj tjakꞌ tcawbil il taꞌ ootxa knaabl, cuma jbaꞌn kaj tuꞌn tbint kuꞌn min nbint kuꞌn, sino jaj kcyꞌi tuꞌn tbint, nbint kuꞌn.

16Katzen tzin kkbaꞌn yaaꞌn baꞌn jnbint kuꞌn, nyeecꞌatzen jlu baꞌn te ley tuj kwitz, cuma jax juꞌx ley tzin tkbaꞌn jnbint kuꞌn yaaꞌn baꞌn.

17Katzen nbint kuꞌn jkcyꞌi, tzin tyeecꞌatzen yaaꞌn ejooꞌ nko binchante sino knaabl aj il nbinchante.

18N-el kniyꞌ tiꞌj te junxse maj kaꞌ ootxa knaabl aj il, cuma amale kajat tuꞌn tbint baꞌn kuꞌn, pero min tcuyan knaabl aj il tuꞌn tbint.

19Kaj tuꞌn tbint baꞌn kuꞌn, pero min nbint. Pero jkaꞌ kcyꞌi tuꞌn tbint, nbint kuꞌn.

20Pero ka nbint jkcyꞌi, n-eltzen kniyꞌ tiꞌj yaaꞌn ejooꞌ nko binchante il, sino jaj knaabl aj il.

21Juꞌ tten kchunkꞌlal. Kaj tuꞌn tbint baꞌn kuꞌn, pero jaj knaabl aj il nmyonte.

22Tuj kanem n-oc takꞌ tley Dios ke,

23pero at juntl knaabl nakꞌanan te myolte ti taj kanem, jaj knaabl aj il, bix tzyuꞌn koꞌ tuꞌn.

24¡Lastim koꞌ! ¿Al ccoꞌplte ke tjakꞌ tcawbil jknaabl kaꞌ nxiꞌ tiiꞌn ejooꞌ tuj cyamecy?

25¡Cxeꞌl kkꞌoꞌn chjonte te Dios ma ko coꞌpj tuꞌnxin tuꞌn Kaaw Jesucristo!

Juꞌtzen ma tzꞌel kniyꞌ tiꞌj tuj kanem kaj tuꞌn kniman ley te Dios, pero taj knaabl aj il tuꞌnx kxiꞌ lpe tiꞌ il.