SANTIAGO 4 - Mam of Todos Santos -- Guatemala Unicode

Yaaꞌn baꞌn tuꞌn kxiꞌ lpe tiꞌj tikꞌch at twitz txꞌotxꞌ

1¿Tikentzen n-el cyiiqꞌuen cyiiba bix nchi kꞌojla? At kꞌoj cyxola tuꞌn tlaj cyexa cyajbila. Jtaj cynaabla aj il nkꞌojl tiꞌj cynaabla ma tzaj tkꞌoꞌn Dios.

2N-oc cykꞌaꞌbena tikꞌch cye cyuyey, pero min ncnet cyuꞌna. Ncub cybyoꞌna xjal, bix nuk nchi jyona cyexa cyajbila, pero min ncnet cyuꞌna. Nchiꞌlec cycꞌuꞌja cyiꞌ juntl, bix at nim kꞌoj cyxola. N-oc cyipena tiꞌj tuꞌn tcnet cyuꞌnxa, pero min txiꞌ cykanena te Dios. Juꞌ tzunj, mintiiꞌ ma kꞌoj cyey tuꞌn.

3Oj nchi naꞌna Dios, min txiꞌ cykanena texin ti tten tuꞌn cyajbena texin. Nuk nchi kꞌumena texin ti cyaja. Juꞌ tzunj, mintiiꞌ ma kꞌoj cyey.

4Oj cyaja nuk cyexa cyajbila bix yaaꞌnj te Dios, juꞌ key tisen jun xuuj at tchmil pero nxiꞌ ttziyan juntl xinak. ¿Mimpa tzꞌel cyniꞌya tiꞌj ka ma pon cycꞌuꞌja nuk tiꞌj tikꞌch at twitz txꞌotxꞌ, nchi kꞌojl tzuna tiꞌ Dios? Juꞌ tzunj, alcyej xjal taj tuꞌn t-xiꞌ lpe tiꞌj tikꞌch at twitz txꞌotxꞌ, n-oc tkꞌon tiib te aj kꞌoj tiꞌ Dios.

5¿Ti toc cyuꞌna? ¿Nukpa tajx nbyan tuj tyol Dios nim taj Dios tuꞌn kten nuk te texin? Min. E bint koꞌ tuꞌnxin te texin.

6Bix at mas tipemal Dios twitzj tipemal knaabl aj il, bix taj Dios ko tzaj tonen. Juꞌ tzunj, tzin tkbaꞌn tyol Dios cyjulu: “At tkꞌoj Dios cyiꞌj ke xjal nuk nbaj cyniman cyiib, pero kej xjal n-oc cykꞌon cyiib te chꞌin, tzin tkꞌoꞌn Dios t-xtalbil cye,” tz̈i tyol Dios.

7Juꞌ tzunj, miꞌn chi nimana tajbil taaw il, sino cykꞌonx cyiiba tjakꞌ tcawbil Dios. Ka ma chi weꞌxixa twitz taaw il, qꞌueleltzen lkꞌe cyiꞌja.

8Ka ma chi tzaj lkꞌey tiꞌ Dios, jax ctzaal lkꞌe cyuyey. Key ma chi binchan il, miꞌn tzꞌajbentl cykꞌaba tuꞌn tbint mas kaꞌ tuꞌn. Bix key at caꞌba twiꞌ cyanem, miꞌn cheꞌx lpey tiꞌj tikꞌch at twitz txꞌotxꞌ. Cytxjoma cyanema.

9Tuꞌn t-xiꞌ cyyeecꞌana ka ma cyaj cykꞌoꞌna kaꞌ, chi bisena bix chi okꞌa. Tzꞌocxit cytzebla te cyookꞌbila bix cytzalajebla te bisbajil.

10Ka ma tzꞌoc cykꞌon cyiiba te chꞌin twitz Dios, ctzaaltzen tkꞌoꞌnxin cyey tuꞌn cyoca te nim.

Yaaꞌn baꞌn tuꞌn kyole kaꞌ tiꞌ juntl ocslal

11Key ocslal, miꞌn chi yolena kaꞌ tiꞌ juntl ocslal cyxola. Ka ma chi yolena kaꞌ tiꞌj juntl ocslal, nchi kꞌojl tzuna tiꞌj jtzin tkbaꞌn ley, bix juꞌ tzunj tzin cykbaꞌna at mas cynaabla twitz ley. Ka ma chi iꞌya tibaj ley juꞌwa, yaaꞌntzen eteꞌy tjakꞌ tley Dios, sino ma chi oca kꞌolte ley tisen Dios.

12Pero junx Kꞌolte ley at, bix jaxin kbalte ka baꞌn bix ka kaꞌ ma bint tuꞌn jun xjal. Yaaꞌn ejeeꞌy chi kbalte alcye kej xjal chi cletel bix alcye kej xjal chi xeꞌl tuj kꞌakꞌ, sino jaxin.

Miꞌn ko bisen tiꞌj ti pjel nchiꞌj

13Jaꞌlewe at jun tumel cxeꞌl nkbaꞌna cyej xjal cyxola min nchi ximan tiꞌ Dios. Tzin cykbaꞌn cyjulu: “Jaꞌlewe bix ka nchiꞌj ko xeꞌl tuj jun tnom. Ko temel jun jnabkꞌi tuꞌn kqꞌueyen bix tuꞌn kcaman nim pwak,” tz̈ike.

14Pero mintiiꞌ tumel cyuyey ti pjel tuj cychunkꞌlala nchiꞌj. Jkchunkꞌlal tisen chꞌin muj tuj nuk jun rato n-el naj.

15Mas baꞌn tuꞌn cykbantiya cyjulu: “Ka ma tzaj tkꞌoꞌntl Dios kchunkꞌlal, ckbinchaꞌtzen jlu bix ka jaj lu,” tz̈i cybela.

16Pero jaꞌlewe, min txiꞌ cykbaꞌna juꞌwa, sino ncub cynicꞌuꞌna cychunkꞌlala bix min txiꞌ cyxiꞌmana tiꞌj ka ma tzaj tkꞌoꞌn Dios cykꞌija. Pero yaaꞌn baꞌn njaw cyniman cyiiba.

17Juꞌ tzunj, n-el cyniꞌya tiꞌj alcyej baꞌn tuꞌn tbint cyuꞌna, bix ka min ma bint cyuꞌna, attzen cyila tiꞌj.