2 JUAN 1 - Mam of Todos Santos -- Guatemala Unicode

Jun kꞌolbebl tuꞌn apóstol Juan

1Inayena, jun nejenel cyxol ocslal, nxiꞌ ntzꞌiꞌbena te cyey ocslal. Ejeeꞌy tisen jun jawnex xuuj ma scyꞌet tuꞌn jun cawel te t-xuꞌl. N-oc cyakꞌa weya tuya cykil wanema, bix yaaꞌn nuk oꞌcx weya, pero n-oc cyakꞌa cye cykilca xjal ma chi ocslan tiꞌ yol jaxxix.

2N-oc cyakꞌa weya cuma junx taꞌ knaabl tuꞌnj tocx yol jaxxix tuj kanem. Bix ctemel yol jaxxix tuj kanem te junx maj.

3Tzajxit xtalbil cyibaja tuꞌn Kman Dios tuyax Kaaw Jesucristo, Tcwal Kman Dios. Bix tzajxit kꞌaꞌben cycꞌuꞌj cyiꞌja, bix tuꞌn cytena tuj ttz̈yal cyuꞌn. Cbinel jlu ka ma tzꞌoc cybiꞌna yol jaxxix bix ka ma tzꞌoc cyakꞌ cyuyey cyey.

At nim tzpetsal cyxol kej xnakꞌtzal

4Nim in tzalaja tej t-xiꞌ nbiꞌna nchi oc lpey tiꞌj yol jaxxix, tisen e tzaj tkbaꞌn Kman Dios ke.

5Key ocslal, jaꞌlewe cxeꞌl ncubsaꞌna nwitza cyey tuꞌn toc cyakꞌ cyuyey cyey. Jnxiꞌ nkanena cyey yaaꞌn jun acꞌaj tley Dios. Jatxe tuj tneel o tajbe Dios tuꞌn toc cyakꞌ cyuyey cyey.

6Bix tuꞌn toc cyakꞌ cyuyey cyey, il tiꞌj cbinel cyuꞌna cykilcaj ma tkba Dios tuꞌn tbint cyuꞌna. Juntl maj cxeꞌl nkbaꞌna cyey, jatxe tuj tneel o tkba Dios tuꞌn toc cyakꞌ cyuyey cyey.

7At nim xnakꞌtzal ẍtakꞌ nchi bet twitz txꞌotxꞌ. Tzin cykbaꞌn ka nuk ten jyol oc Jscyꞌoꞌn tuꞌn Dios te jun xjal Jesús tbi. Pero jun xjal nyolen juꞌwa, nuk jun xnakꞌtzal ẍtakꞌ bix jun aj kꞌoj tiꞌ Dios.

8O ko akꞌanana tuꞌn cyiikꞌena t-xtalbil Dios. Cycꞌojlanx cyiiba tuꞌn miꞌn tzꞌel cyxooꞌna ja xtalbil lu.

9Alcyej xjal ncyaj tcyeꞌyen t-xnakꞌtzbil Cristo, sino n-oc lpe tiꞌ juntl xnakꞌtzbil, min-altzen Dios tuya. Pero alcyej xjal ncyaj ten tujx xnakꞌtzbil tiꞌj Cristo, attzen Kman Dios tuya bix Tcwalxin.

10Ka at jun xnakꞌtzal ẍtakꞌ taj tzꞌocx tuj cyjay tuꞌn tyolen cyuyey tiꞌj jun xnakꞌtzbil yaaꞌn junx taꞌ tuya yol jaxxix tiꞌ Cristo, miꞌn txiꞌ cykꞌoꞌna amleꞌn tuꞌn tocx. Miꞌn txiꞌ cykanena t-xtalbil Dios tibaj,

11cuma alcyej xjal nxiꞌ tkanen t-xtalbil Dios tibaj, tzin tyeecꞌan n-el jtbinchben baꞌn tuj twitz.

Mancꞌbil yol

12At nimtl waja txiꞌ nkbaꞌna cyey. Pero mas waja tuꞌn t-xiꞌ nkbaꞌna cyey oj toc ncyeꞌyena cywitza twitzj tuꞌn tcub ntzꞌiꞌbena mas twitz ja uꞌj lu. Waja chin pona cyuyey, tuꞌntzen ktzalaj nim.

13Kej ocslal tzalu nxiꞌ cykꞌoꞌn jun cykꞌolbebl cyey.