1 PEDRO 2 - Mam of Todos Santos -- Guatemala Unicode

1Cuma ma chi oca te ttanem Dios, juꞌ tzunj, key ocslal, cykꞌoꞌncj cykilca yaaꞌn baꞌn. Miꞌn cub cyyajlaꞌna ke xjal, bix miꞌn chi oca te xmeletzꞌ. Miꞌn chiꞌl cycꞌuꞌja tiꞌ cyuyena, bix miꞌn chi cub tena iken yol kaꞌ tiꞌ cyuyey.

2Tisen jun ẍlak ntzeyꞌ tcꞌuꞌj tiꞌ cychꞌuꞌ, jax juꞌx cyey, ntzeyꞌxit cycꞌuꞌja tiꞌj tyol Dios sakxix yaaꞌn tzꞌil, tuꞌntzen cytz̈ꞌiy tuꞌn tuj cyocslabla.

3Ma cyiikꞌa t-xtalbil Dios jun maj. Chi oca tisen jun tal neeꞌ ma txiꞌ jun maj tchꞌuꞌ, bix tajx mastl.

4Tisen najben jun xak te tkꞌukꞌlel jun jaaꞌ, jax juꞌx te Kaaw. Jaxin tkꞌukꞌlel kchunkꞌlal, tisen jun xak iꞌtz. Juꞌ tzunj, chi lkꞌetza tuyaxin. El cyiiqꞌuen xjal jaxin, pero te Dios, ma jaw tscyꞌoꞌn jaxin, bix nimxsen cꞌajbelaxin.

5Tisen oj njaw cybinchaꞌn xjal lookꞌ tibaj tkꞌukꞌlel jaaꞌ tuꞌn tbint jun jaaꞌ, jax juꞌx cyey, cymojbanx cyiiba tuya Kaaw tuꞌn cyoca tisen jun tja Dios jaaꞌ najla Dios. Bix tisenj tej t-xiꞌ cykꞌoꞌn pala oybil te Dios, juꞌx cyey, chi ajbena te Dios. Oj nchi ajbena te Dios juꞌwa, jax jun oybilkey te Dios, bix tiikꞌel Dios cyoybila, cuma at cymojbabl cyiiba tuya Jesucristo.

6Ktzkiꞌn jlu, cuma tzin tkbaꞌn tyol Dios cyjulu: “Jeyꞌ, cwel nkꞌoꞌna jun jawnex xak te cytanem nxjala, jun tkꞌukꞌlel jaaꞌ scyꞌoꞌn wuꞌna, bix kej xjal n-oc ke cycꞌuꞌj tiꞌj ja xak lu, yaaꞌn nuk cyajx cꞌoquel ke cycꞌuꞌj tiꞌj,” tz̈i tyol Dios.

7Juꞌ tzunj, cyey ma chi ocslana, jawnexsen ja xak lu tuj cywitza. Pero te cyej xjal min ma chi ocslan, tzin tkbaꞌn tyol Dios cyjulu: “Jxak el cyiiqꞌuen kej binchal jaaꞌ, ma tzꞌoc te tkꞌukꞌlel jaaꞌ, bix jawnex,” tz̈i tyol Dios.

8Jax tzin tkbaꞌn: “Tuj cywitz xjal, tiꞌj Clol cye cxeꞌl nkꞌoꞌna, tisen jun xak tcub tuj cybe nchi jaw pitcꞌaj tiꞌj, bix tisen jun tzlom nchi jaw jilpaj xjal twitz,” tz̈i tyol Dios. Nchi jaw tzꞌak tiꞌj cuma cycyꞌi tuꞌn toc cybiꞌn. Juꞌ tzunj, il tiꞌj nchi jaw tzꞌak.

Ejeeꞌ kej xjal scyꞌoꞌn tuꞌn Dios

9Perotzen cyey, t-xjal Dioskey. Scyꞌoꞌnkey tuꞌn Dios tuꞌn cyajbena te kbalte tyolxin cyxol xjal bix tuꞌn cyajbena tuj taakꞌen jrey tibaj cykilca. Ttanem Dios sakxixkey, bix taj Dios tuꞌn cytena nuk te texin. Ma ttxoc Dios ejeeꞌy tuꞌn cyetza tuj klolj bix tuꞌn cytena tuj spiꞌyen, tuꞌntzen t-xiꞌ cykbaꞌna jawnex colbil cye xjal o bint tuꞌn Dios.

10Nejl, yaaꞌn ttanem Dioskey. Pero jaꞌlewe, ma chi oca te ttanem Dios. Nejl, min e cyiikꞌa tlastim Dios. Pero jaꞌlewe, ma cyiikꞌa.

Il tiꞌj cbinel tajbil Dios kuꞌn

11Key ocslal n-oc cyakꞌa weya, tisen jun wikxitl xjalkey cyxol xjal te twitz txꞌotxꞌ. Nuk jun rato eteꞌy tzalu. Juꞌ tzunj, cxeꞌl ncubsaꞌna nwitza cyey tuꞌn miꞌn txiꞌ cynimana tajbil cynaabla aj il, cuma nkꞌojl cynaabla aj il tiꞌ cyanema.

12Cxeꞌl cyiiꞌna cychunkꞌlala tuj tumel cywitz xjal yaaꞌn ocslal, tuꞌntzen toc cycyeꞌyen cybinchbena baꞌn. Amale nchi yolet kaꞌ cyiꞌja jaꞌlewe, pero laꞌ alcye jun kꞌij cjawel cynimsaꞌn tbi Dios, cuma tuꞌnj n-oc cycyeꞌyen jbaꞌn nbint cyuꞌna, chi ocslaltzen tiꞌ Dios.

13Il tiꞌj cxeꞌl cynimana cykilca cawel tcub cyxol xjal, cuma juꞌ taj Kaaw. Cynimanx jnintzaj cawel,

14bix jax cynimanx ke gobernador, cuma smaꞌnke tuꞌn cawel tuꞌn cykꞌonte cycastiwa kej xjal binchal kaꞌ, bix tuꞌn cyyolen baꞌn cyiꞌj xjal binchal baꞌn.

15Taj Dios tuꞌn cybinchantiya baꞌn tuꞌn tmaket cytzi kej xjal cycyꞌi jaxxix yol cuma mintiiꞌ cynaabl tiꞌj.

16Ma ttzakpi Dios ejeeꞌy, pero yaaꞌn tuꞌn cyxiꞌ lpey tiꞌj tikꞌch cyaja, sino tuꞌn tbint tajbil Dios cyuꞌna.

17Juꞌ tzunj, cykꞌonx nimbil te cykilca. Cꞌoqꞌuelxix cyakꞌ ocslal cyey. Cybiꞌy Dios. Bix cynimanxa kej cawel.

18Yaltzen key xjal nchi akꞌanana tjakꞌ tcawbil cypatróna, tuꞌn toc cybiꞌna cyyol, yaaꞌn nuk oꞌcx tuꞌn t-xiꞌ cynimana ke patrón baꞌn cynaabl, pero jax juꞌx tuꞌn t-xiꞌ cynimana ke patrón cyiw.

19Amale cyiwet tcawbil cypatróna cyibaja, pero cynimanxa jaxin tuya cypasensyey, tuꞌn cynimana Dios, cuma baꞌn jlu tuj twitz Dios.

20Ka ma chi binchana jun kaꞌ tiꞌ cypatróna, bix ma tzꞌoc cypjuꞌn ejeeꞌy tuꞌn tlaj cyila, ¿ti cꞌajbela ka ma tziyꞌx cycastiwiya cyuꞌna tuya cypasensyey? Pero ka ma chi binchana nuk baꞌn, pero n-ocx tpjuꞌn cypatróna ejeeꞌy, bix ka ma tziyꞌx ja qꞌuixcꞌaj lu cyuꞌna tuya cypasensyey, baꞌntzen nchi eꞌley tuj twitz Dios.

21At-xit cypasensyey, cuma ma chi txqueta tuꞌn Dios tuꞌn cyxiꞌ lpey tiꞌj yecꞌbil e cyaj tkꞌoꞌn Cristo. Iyꞌx qꞌuixcꞌaj tuꞌn Cristo, bix tuꞌnj qꞌuixcꞌaj iyꞌx tuꞌnxin, ma tzꞌel baꞌn te cyey.

22Mintiiꞌ il e tbinchaxin, bix min e ẍtakꞌenxin.

23Tej toc cyxmucchaꞌn xjal jaxin, mintiiꞌ akꞌxin. Tej tiyꞌx qꞌuixcꞌaj tuꞌnxin cyuꞌn xjal, min e xiꞌ tkanenxin te Dios tuꞌn tcub cycastiwa. Nuk oꞌcx e xiꞌ tkꞌon tiibxin tuj tkꞌab Dios, jxin binchal cykilca jiquenxix.

24Jaxxin e xiꞌ ikente kil tej tjaw kꞌoꞌn t-xumlalxin twitz cruz, tuꞌntzen tel ttzakpiꞌnxin ejooꞌ tiꞌj knaabl aj il, tuꞌn kbinchante baꞌn. Tuꞌnj tcyimlenxin ma ko cleta.

25Nejl, otk chi el tzpeta tisen ke carnel. Pero jaꞌlewe, ma chi ul meltzꞌaja tuya Cristo, ja cylel cyey bix cꞌojlal cyanema.