LOS HECHOS 22 - Mam of Todos Santos -- Guatemala Unicode

1Bix e xiꞌ tkbaꞌn Pablo:

—Key te ntanem, bix key cawel, cykꞌontz chꞌin cycꞌuꞌja tiꞌ nyola te coꞌpbil weya, nuksamkey―tz̈i Pablo.

2Tejtzen toc cybiꞌn xjal tej tyolen Pablo tujx cyyol, tuj yol hebreo, bix e weꞌke xjal mas, bix oc cykꞌoꞌn xjal cycꞌuꞌj tiꞌj. Bix akꞌx Pablo yolel:

3—Aj judío kenwe. Jatzen in itzꞌja tuj tnom te Tarso, parte te Cilicia. Pero tejtzen cwalx kena, bix ajtz bint koꞌya tzalu Jerusalén. Jatztzen ma chin tz̈ꞌiya wewe. Jatztzen in ocxawe tuj scwela. Ja weya xnakꞌtzal we jGamaliel, jxin cyiwxsen e tema tuj tley Moisés, octzen cycyeꞌyen ke kxeꞌchel ootxa. Bix axsenwe ncꞌuꞌj tiꞌj, bix tuyaxsen cykil wanem waj oc ncyeꞌyen tley Dios tisenxj tzin cyseꞌn cyey.

4Bix yal weya tuj nwitz, kej xjal lepchec tiꞌj t-xnakꞌatz Jesús nchi oc kꞌojl tiꞌ Dios. Juꞌ tzunj nim in oc kꞌojl weya cyiꞌ ocslal lepchec tiꞌ tbe Jesús, tejxe cybyet wuꞌna. Xinakle ke ocslal, xuujleke, bix e xiꞌ wiiꞌnkeya tuj tzeeꞌ te pres.

5Bix baꞌn toc te tstiwa tiꞌj jaj xin tneel pala bix nintzaj consejo tuj nin tja Dios. Ejeeꞌ tzunxin e kꞌonte jun uꞌj weya te wajwalela cywitz cawel te judío tuj tnom te Damasco, tuꞌn t-xiꞌ njyoꞌn ke ocslal. Juꞌtzen in xaꞌ weya te jyol cye ocslal, tuꞌn cytzaj wiiꞌna tzalu Jerusalén, tuꞌn cycub tuj castiwa.

Nkꞌumen Pablo ti tten tocslan(Hch. 9:1-19; 26:12-18)

6In ten weya tuj be te Damasco, bix ya chꞌitk npona. Pero tetzen chil kꞌij ttzaj txakpaj jun tij tken luz wibaj tuj cyaꞌj.

7Tzinxsen tij ntꞌilpaj bix tij cyiwxsen, biꞌx in cub tzꞌak tuꞌn. Pero bix in biꞌya jun yol e tzaj kbante weya: “¡Saulo, Saulo! ¿Tuꞌn tikentzen nim qꞌuixcꞌaj ntzaj tkꞌoꞌna weya?” tz̈itzen juꞌwa.

8Bix aj ntzakꞌbeꞌna: “Taat, ¿altzen cyey?” ntz̈i tzuna. Bix ajtz ttzakꞌbeꞌn weya: “Inayen wej Jesús te Nazaret. Inayenxj nchin baj tzyuꞌna,” tz̈itzen weya.

9Kej xjal weya wuya e cyil jtken luz, biꞌxsen e jaw seyꞌpajke, pero min el cyniyꞌ tiꞌj ti jilel e tzaj tkbaꞌn yol we.

10Bix aj nkanen tej yol: “Taat, ¿titzen jilel tey taj bint wuꞌna?” ntz̈i tzuna. Bix ajtz tkbaꞌnxin weya: “Weꞌwey. Kꞌinx jtbey Damasco. Ojtzen tpona, laꞌ altzen ctzaal kbante tey ti cbinel tuꞌna,” tz̈itzen weya.

11Bix in jaw weꞌya, pero min akꞌ nwitz tuꞌn tken jluz. Juꞌ tzunj in xaꞌ cyiiꞌna wuyena nkꞌaba tejxe kpona Damasco.

12Tejtzen kpona Damasco, attzen junxin xjal Ananías tbi. Ebil xsunxin tiꞌ tley Moisés. Cykil xsun kej xjal judío najl tuj Damasco baꞌnxsen cyyol tiꞌjxin.

13Bix e tzaj xin Ananías wiꞌja. Tejtzen tulxin wiꞌja, bix e tzaj tkbaꞌnxin weya: “Hermano Saulo, e tcyeꞌyena juntl maj,” tz̈i tzunxin. Tujx naj tjaw ncyeꞌyena, bix oc ncyeꞌyenxin.

14Bix e tzaj tkbaꞌnxin weya: “Jxin Dios e cynaꞌ ke kxeꞌchel ootxa ma scyꞌonte tey tuꞌn tel tniꞌya tiꞌj alcyej taj Dios. Cꞌoquel tcyeꞌyena tcwalxin, jxin mintiiꞌ til tuya tnaabl. Ctiikꞌa tzuna tyolxin.

15Ma tscyꞌo Dios jay, cuma tajxin tzꞌoca te t-xelxin cyxol xjal te kbal tej cykil cꞌoquel tcyeꞌyena bix cꞌoquel tbiꞌna texin.

16Yal jaꞌlewe, intiiꞌtl tuꞌn tcub tyoꞌn tey mas. ¡Weꞌwa! ¡Koꞌ! Matzen bautizarja wuꞌna. Tuꞌn toc ke tcꞌuꞌja tiꞌ Jesús. Bix tuꞌn tel ttxjoꞌnxin tila,” tz̈itzen Ananías weya.

17Bix in cuyaya, bix in ajtz meltzꞌaj tzalu Jerusalén, bix in ocx tuj tja Dios te naꞌl Dios, bix e cub kleeꞌ tuj nwitz.

18Tej tcub kleeꞌ tuj nwitz, oc ncyeꞌyen Jesús, bix e tzaj tkbaꞌnxin we: “Nix tuꞌna. Ctex naj tuj Jerusalén, cuma mlay cycuya xjal kej yol o wakꞌ tey,” tz̈i Jesús we.

19Bix aj ntzakꞌbeꞌna: “Taat, ka yaaꞌn chin oquel cybiꞌnwe bix cybiwe nyol, cuma cytzkiꞌntl ti tten n-oc ncloꞌn Dios, bix cuma weya nchixa tuj jaca camon jaaꞌ te jyolcye ocslal te pjuleccye, bix kꞌolecxcye tuj tzeeꞌ. Oꞌcx cyilj tiꞌj n-oc cybiꞌn jay.

20Cyeꞌyentz, taat, tej nbyet Esteban tuya xak, jaantzen ken weya cyeyꞌlxte tikꞌch e baj cyiꞌ ocslal, bix nchin cꞌojlan tzuna cyxbalen jxin xool xak,” ntz̈i tzuna.

21Pero bix ajtz ttzakꞌbeꞌn Jesús: “Min. Mlay tzꞌoc cybiꞌn jay. Pero at-x juntl taakꞌena wuꞌn. Cutxa. Ma txiꞌ nchkꞌoꞌna nakch cyuyaj xjal yaaꞌn judío,” tz̈i Jesús we—juꞌtzen tten tyolen Pablo cye xjal judío.

Tej tpon kꞌiꞌn Pablo tuj tkꞌab cycawel soldado

22Maatzꞌe jaꞌlewe oc cybiꞌn judío ja Pablo. Min-al e kꞌajt, pero tej cybinte tbyaꞌn tuꞌn Pablo kej xjal yaaꞌn judío, bix akꞌ ke xjal cyakwusal juntl maj, bix e jaw s̈iꞌnke:

—Mlay kpa jun kaꞌ xjal. Mintiiꞌ tuꞌn tten twitz txꞌotxꞌ. ¡E tcyim! Yaaꞌn baꞌn tuꞌn titzꞌj―tz̈i ke xjal cyjaw s̈iꞌn.

23Bix akꞌxke s̈-il, bix el cyrotan xjal cyiꞌj, bix e jaw cytz̈iten kuk, cuma tzinxsen nchiꞌl cycꞌuꞌj xjal.

24Tejtzen toc tcyeꞌyen juꞌwa, bix e tkba jxin cycawel soldado tuꞌn tocx Pablo tunwen tuj cyja soldado. Bix e xiꞌ tkbaꞌn najxin cye tsoldadoxin:

—Cykꞌoꞌnxsen tzꞌuꞌn tiꞌj ojxe ttzaj tkbaꞌn ke tuꞌn tiken nim cykanbil xjal tiꞌj―tz̈i cawel cye soldado.

25Entonces bix akꞌ ke soldado te ẍpolcꞌa tkenxin tkꞌabxin tuꞌn ttzyet tpjujxin. Pero bix aj tkbaꞌn Pablo te junxin chꞌin cawel tcub nka:

—Judío kenwe. Pero jax aj Roma kenwe. Juꞌ tzunj mintiiꞌ baꞌn toc cypjuꞌn cyey inayena, cuma mix nchixa cyiiꞌna twitz jun cawel tuꞌn t-xiꞌ tcyeꞌyen wil tuj tumel―tz̈itzen Pablo te capitán cye soldado.

26Tejtzen tbinte capitán juꞌwa, bix e xiꞌxin twitz nin cawel cye soldado te kbalte, bix e xiꞌ tkbaꞌnxin:

—Nuksama, taat, cyeꞌyentz, jxjal lu jun xjal romano―tz̈i chꞌin cawel te nin cawel.

27Entonces bix e xiꞌ lkꞌe comandante taꞌ Pablo, bix e xiꞌ tkanenxin:

—Kbantz we, ¿jaxpa ka aj Roma?―tz̈i tzunxin t-xiꞌ tkanenxin.

Bix aj ttzakꞌbeꞌn Pablo:

—Juꞌ tewa, taat, te Roma kenwe―tz̈i Pablo.

28Bix e xiꞌ tkbaꞌn comandante:

—Juꞌx weya aj Roma kena, pero nimxsen pwak ajben we tuꞌn cycnet wuꞌj tuꞌn woc te aj Roma―tz̈i tzunxin te Pablo.

Bix aj ttzakꞌbeꞌn Pablo:

—Baꞌnte, pero weya aj Roma kenwe, cuma juꞌ witzꞌjlen―tz̈i Pablo.

29Tejtzen toc tbiꞌnxin ke tyol Pablo, bix el cytzakpiꞌn kej xin soldado binne cyten te pjulec te Pablo. Bix e jaw luꞌlen tuj tchuꞌlxin, cuma aj Roma Pablo. Jaxin toclel cꞌojlante Pablo tjakꞌ tcawbilxin, pero otk cub tẍpoꞌnxin Pablo tuya cadena.

Tej cytxquet kej nejenel cye judío tuꞌn cawel cye soldado tuꞌn toc Pablo tuj xkel

30Pero jxin comandante e tajbexin txiꞌ tjyoꞌnxin tuꞌn tiken nchi kanena judío tiꞌ Pablo. Entonces tetzen juntl kꞌij bix e xiꞌ tsmaꞌnxin tuꞌn cyel kꞌit jcadena ẍipbelte Pablo, bix tuꞌntzen cyoc chmet ke nintzaj pala cye judío cyuya ke consejo te stis. Tejtzen toc cychmoon cyiibxin, bix e xiꞌ tiiꞌn comandante ja Pablo tuj sesión, bixsen e cub waꞌbet-xin cyxolxin.