SAN MARCOS 10 - Mam of Todos Santos -- Guatemala Unicode

Tzin tkꞌoꞌn Jesús xnakꞌtzbil tuꞌn miꞌn tcub tpaꞌn tiib xinak tiꞌ t-xuꞌl(Mt. 19:1-12; Lc. 16:18)

1Bix etz Jesús tuj tnom te Capernaum, bix e xiꞌxin tbeyel ttxꞌotxꞌ Judea, ttxlaj Capernaum te iyꞌna, bix iyꞌxxin tuj nimaꞌ te Jordán, jlajxe Judea. Bix e jaw chmet xjal tiꞌ Jesús juntl maj, bix akꞌ Jesús xnakꞌtzal cye xjal tisex nbaj texin cyxol xjal.

2Bix e pon cabxin xjal nimal tuj cyley, ejeeꞌj xin fariseo, bix e xiꞌ cykanenxin te Jesús ka baꞌn tel tpaꞌn tiib xinak tiꞌ t-xuꞌl. Nuktzen ti cyajaxin tuꞌn tcub tzꞌak Jesús.

3Bix aj ttzakꞌbeꞌn Jesús:

—¿Titzen e cyaj tkbaꞌn Moisés cyey?―tz̈i Jesús.

4Bix aj cytzakꞌbeꞌnxin:

—E tcuya te Moisés tuꞌn tel tpaꞌn tiib xinak tiꞌ t-xuꞌl. Tuꞌntzen cycub pax, nuktzen jun uꞌj txiꞌ tkꞌoꞌn xinak te xuuj tzin tkbaꞌn otk chi cub pax―tz̈ikexin te Jesús.

5Bixse aj ttzakꞌbeꞌn Jesús:

—Juꞌtzen tcyajlen tkbaꞌn Moisés, pero tuꞌnj cyyuwinela.

6Pero tuj tneel yaaꞌn juꞌ tewa. E cyaj ttzꞌiꞌben Moisés: “E cub tbinchaꞌnte Dios xinak tuya xuuj.

7Juꞌ tzunj cyjela tkꞌoꞌn xinak tman bix ttxu tuꞌn toc maje tuya xuuj.

8Cycaꞌbeltzen chi elel tisen junx xjal bix ma tuꞌn cycub ten mojl junx,” tz̈i Moisés tcyajlen ttzꞌiꞌben. Juꞌ tzunj yaaꞌn caꞌba cybet, sino tisen jun xjal mixbe tuꞌn tel pax.

9Juꞌ tzunj tcyajlen tkꞌoꞌn Dios te junx, yaaꞌn tuꞌn tcub tpaꞌn jun xjal―tz̈i Jesús cye fariseo.

10Bix jaantzen ke t-xnakꞌatzxin oc ebinte tyol Jesús cye fariseo. Eteꞌ xsunxin tuj jjaaꞌ jaaꞌ eteꞌxin, bix e xiꞌ cykanen t-xnakꞌatzxin ti tten tyol Jesús cye fariseo.

11Bix e xiꞌ tkbaꞌn Jesús:

—Alj ma tzꞌel tpaꞌn tiib tiꞌ t-xuꞌl, bix ma maje tuya juntl xuuj, ma tzꞌoc tbinche pajlel tiꞌ tneel t-xuꞌl bix twitz Dios.

12Bix jax juꞌx te xuuj, ka ma cyaj tkꞌoꞌn tchmil, bix ma maje tuya juntl xinak, ma tzꞌoc tbinchen pajlel tiꞌ tneel tchmil bix twitz Dios―tz̈i Jesús cye t-xnakꞌatz.

Tej tcub tcyꞌiwlaꞌn Jesús ke neeꞌ(Mt. 19:13-15; Lc. 18:15-17)

13Bix e xiꞌ cyiiꞌn xjal cab neeꞌ tuꞌn toc tmocoꞌn Jesús ejeeꞌ, tuꞌn cyoc te wunak. Pero bix akꞌ ke t-xnakꞌatz Jesús te cawlec cyej xjal kꞌilcye neeꞌ tuꞌn miꞌn cheꞌx lkꞌe neeꞌ tiꞌ Jesús.

14Toctzen tcyeꞌyen Jesús, bix e tzaj tkꞌojxin cyiꞌ t-xnakꞌatzxin, bix e xiꞌ tkbaꞌnxin cyjulu:

—Cytzakpiꞌnctz kej neeꞌwa tuꞌn cytzaj wiꞌj. Miꞌn cysey tisenj tzin cyseꞌna, cuma nuktzen ejeeꞌ cyej xjal tisen kej neeꞌwa baꞌn cyten tjakꞌ tcawbil Dios, cuma tzin cybiꞌn bix min baj cycꞌuꞌj.

15Cxeꞌlxixse nkbaꞌn cyey, alj min ma tzꞌoc tbiꞌn tcawbil Dios tisen jun neeꞌ, mlay tzꞌoc tuya Dios―tz̈i Jesús.

16Bix e jaw tchleꞌn Jesús ke neeꞌ, bix e cub tkꞌoꞌnxin tkꞌabxin cyibaj neeꞌ te cyꞌiwlablcye.

Tej tyole junkꞌa cwal kꞌina tuya Jesús(Mt. 19:16-30; Lc. 18:18-30)

17Tuꞌntzen ttzyet tbe Jesús jaaꞌ xaꞌninaxin, bix e pon ajkel junxin xjal, bix e cub majexin twitz Jesús, bix e xiꞌ tkanenxin:

—Jeyꞌ, baꞌn Xnakꞌtzal, ¿ti cwel nbinchaꞌn tuꞌn ncaman tiꞌ nchunkꞌlal te junx maj tuya Dios?―tz̈i tzunxin te Jesús.

18Bix aj ttzakꞌbeꞌn Jesús:

—¿Tikentzen n-oca tkbaꞌna baꞌn weya? Cꞌoquelxix tcꞌuꞌja tiꞌ tyola, cuma min-alte jun xjal baꞌn. Nuk jacꞌa te Dios baꞌn.

19Yal tzunj tkanbila, ttzkiꞌntl tzuna jlaaj cawbil e cyaj tkꞌoꞌn Dios. Miꞌn byona, miꞌn tzꞌikena xuuj, miꞌn tzꞌalkꞌana, miꞌn ẍtakꞌena tiꞌ juntl xjal, miꞌn cub tyajlaꞌna xjal, ebimcꞌa tmana bix ttxuy, bix xsunj cabtla. Katzen ma cybiy ja lu, bix ka min xcub tzꞌaka twitz, ccamal tzuna tiꞌ tchunkꞌlala te junx maj tuya Dios―tz̈i Jesús texin.

20Bix e xiꞌ tkbaꞌn jxin xjal te Jesús:

—Xnakꞌtzal, cykil te ja luwe o bint weya wuꞌn jatxe tuj ncwalela―tz̈i tzunxin.

21Bix aj ttzakꞌbeꞌn Jesús tuya tcꞌuꞌj:

—At-x juntl minaꞌx tbint tuꞌna. Qꞌueyex tikꞌch tey, bix kꞌonxse twiꞌ cye mebe. Juꞌtzen cnetela tkꞌinemala tuj cyaꞌj. Ojtzen tbint tuꞌna, lpetztzen wiꞌj―tz̈i Jesús.

22Bix e jaw baj tcꞌuꞌj jxin xjal tej toc tbiꞌnxin, bix e jaw bisenxin, cuma kꞌina xsunxin. Bix elxin tiꞌ Jesús.

23Bix aj tcyeꞌyen Jesús ke t-xnakꞌatz ttxlaj, bix aj tkbaꞌnxin:

—Penaxse tuꞌn toc cykꞌon cyiib jxjal kꞌina tjakꞌ tcawbil Dios―tz̈i Jesús cye t-xnakꞌatz.

24Biꞌx e naj cynaabl ke t-xnakꞌatz Jesús cyuꞌn tyolxin, cuma eꞌla tuj cywitzxin ka ejeeꞌ kꞌina mas wunak twitz Dios. Bix e xiꞌ tkbaꞌn Jesús cyexin:

—Key cwal, aljxe xjal tiꞌj, cyiwxsen tuꞌn toc cykꞌon cyiib tjakꞌ tcawbil Dios. Tisen kej xjal kꞌinan.

25Mlay tzꞌocx naj jun kꞌinan tuj tcawbil Dios twitz junjil tz̈ej tuꞌn texjil tuj tẍyoꞌp jun bak―tz̈i Jesús.

26Toctzen cybiꞌn t-xnakꞌatz Jesús, masx e jaw kleeꞌkexin, bix akꞌkexin yolel cyxolelexxin:

—Katzen juꞌ ttena, ¿altzen jun baꞌn tcoꞌpan tiib tuꞌn miꞌn cyaj tiꞌjxe tcawbil Dios?―tz̈i tzunkexin.

27Toctzen tcyeꞌyen Jesús ejeeꞌxin, bix e xiꞌ ttzakꞌbeꞌn Jesús:

—Cye xjal, mlayx bint cyocxcye tuj tcawbil Dios. Pero te Dios, cykilca baꞌn tbint tuꞌnxin―tz̈i Jesús.

28Bix akꞌ Pedro, t-xnakꞌatz Jesús, kbalxte texin:

—Keya, o cyaj kcyeꞌyena tikꞌch jilel keya tuꞌn koc lpeya tiꞌja―tz̈i Pedro te Jesús.

29Bix aj ttzakꞌbeꞌn Jesús:

—Tzinen cxeꞌl nkbaꞌn cyey, aljxe xjal nuk wuꞌn bix ma tiꞌ nyol te coꞌpbil ma cyaj tcyeꞌyen tja, bix ke titzꞌen, ke ttzicy, bix ke tman, ke tcwal, bixsen ttxꞌotxꞌ,

30mas cꞌoquel kꞌoꞌn te tuꞌn Dios twitzx ja txꞌotxꞌa. Ctiikꞌeltzen mas nim cꞌojlablte. Bix ctiikꞌeltzen nim titzꞌen, bix ttzicy, bix tman, bix ttxꞌotxꞌ, bix ma tja. Pero al tzunj ma tzꞌoc lpe wiꞌj, jax qꞌuiyal aꞌ chꞌin tcꞌuꞌj. Pero amale cyiwet chꞌin twitz ja txꞌotxꞌa, ojtzen tul acꞌaj twitz txꞌotxꞌ, ctiikꞌeltzen tchunkꞌlal te junx maj.

31Bix nimxse xjal nintzaj jaꞌlewe, ejeeꞌ tzunj mintiiꞌ chi oquela tuj juntl twitz txꞌotxꞌ. Bix nimxse xjal yaaꞌn nintzaj jaꞌlewe, ejeeꞌ tzunj chi oquel te nintzaj tuj juntl twitz txꞌotxꞌ tuꞌn Dios―tz̈i Jesús cye t-xnakꞌatz.

Tej tyole Jesús juntl maj ka tuꞌn tcyim(Mt. 20:17-19; Lc. 18:31-34)

32Bix e tzyet jcybexin tzyuꞌn tuꞌn cyponxin tuj tnom te Jerusalén, nejltzen Jesús cywitz t-xnakꞌatz. Yaltzen ke t-xnakꞌatzxin, otkxse chi jaw kleeꞌxin, cuma juꞌ e xiꞌ tiin tiib Jesús Jerusalén jaaꞌ taꞌ nim xjal nkꞌojlec tiꞌjxin.

Bix at juntl wik xjal lepch cyiꞌjxin. Otkxse cub ttz̈i cyiꞌ xjal, cuma cytzkiꞌntl xjal nimxse xjal nkꞌojlec tiꞌ Jesús tuj tnom te Jerusalén.

Bix ex ttxcoꞌn Jesús kej t-xnakꞌatz juntl maj cyjunalxin. Bixse akꞌxin kbalte ti jilel tbajlel tiꞌjxin.

33Bix e xiꞌ tkbaꞌnxin:

—Cyena. Lutzen koꞌ xiꞌnin tuj Jerusalén, jaaꞌj chin xeꞌla kꞌoꞌn tuj cykꞌab ke nintzaj tawil naꞌl Dios bix ke txꞌolbal ley. Ejeeꞌ tzunxin chi kbalte tuꞌn nbyet bix chin xeꞌl cykꞌoꞌnxin tuj cykꞌab nmak xjal te Roma.

34Ejeeꞌtzen xinj chi oquel xmucchante weya, inayena, jxjal Smaꞌn tuꞌn Dios tuꞌn ntena cyuya xjal. Pjel cytzuuben xjal inayena, chin oquel cypjuꞌna xjal, bix chin cwel cybyoꞌna xjal. Pero tetzen toxen kꞌij oj njatz itzꞌja juntl maj―tz̈i Jesús cye t-xnakꞌatz.

Jun cykanbil Santiago bix Juan(Mt. 20:20-28)

35Ja tzunj xin Santiago tuya Juan, t-xnakꞌatz Jesús, ke tcwal jxin Zebedeo, bix e xiꞌ lkꞌekexin tiꞌ Jesús, bix e xiꞌ cykbaꞌnxin cyjulu:

—Xnakꞌtzal, kaja bint jun xtalbil tuꞌna kiꞌja, jaj cxeꞌl kkanena tey―tz̈i tzunkexin.

36Bix aj tkanen Jesús:

—¿Titzen jilel cyaja tzꞌoc nbinche cyiꞌja?―tz̈i Jesús.

37Bix e xiꞌ cykbaꞌnxin cyjulu:

—Oj toc tey te cawel, ctkꞌaꞌy jun nin kaakꞌena ttxlajquey te cawel tuyey, jun keya tuj tmankꞌaba, bix juntl keya tuj tneẍa―tz̈i tzunkexin te Jesús.

38Bix aj ttzakꞌbeꞌn Jesús:

—Min tzꞌel cyniꞌya tiꞌj ti jilel ntzaj cykanena we. ¿Jacꞌapatzen tziyꞌx cyey cyuꞌn oj tiyꞌ aꞌ cycꞌuꞌja tisej weya? Il tiꞌj chin byetela. Jeyꞌ, ¿mama cub cybisen cyey tuꞌn cycyima wuya?―tz̈i Jesús cye Juan bix Santiago.

39Bix aj cytzakꞌbeꞌnxin:

—Cbinelke kuꞌn―tz̈i tzunkexin.

Bix e xiꞌ tkbaꞌn Jesús:

—Min cytzkiꞌna, pero jax cyuꞌna qꞌuiyal aꞌ cycꞌuꞌja bix chi byetela.

40Yaltzen cykanbila weya, yaaꞌn inayenwe chin kbalte al ccawel wuya oj woc te cawel. Jatzen cxeꞌla kꞌoꞌnte akꞌuntl cyej xjal o tscyꞌo Dios―tz̈i Jesús.

41Toctzen cybiꞌn jlajajtlxin t-xnakꞌatz Jesús tyol Santiago tuya Juan, bix oc chiꞌl chꞌinkexin.

42Toctzen tcyeꞌyen Jesús tikꞌch nbajcye t-xnakꞌatz, bix e tzaj ttxcoꞌnxin cykilcakexin, bix e xiꞌ tkbaꞌn Jesús cyexin:

—Cytzkiꞌntl tzuna cyxol kej xjal te Roma nchi cawen cyibaja at cawel nchi cawen tuꞌn t-xiꞌ cyyeecꞌan nim cyajwalel cye xjal. Bix cyiw nchi oc cyiꞌ xjal.

43-44Perotzen cyey cyxol, yaaꞌntzen juꞌ ctemela tewa. Tecꞌaxtl ctemelate, cxeꞌl cycyeꞌyena ke xjal nejl twitzj tuꞌn cycawena cyibaj xjal. Al tzunj ma bint tuꞌn juꞌwa, ejeeꞌ tzunj chi oquel te nintzaj cyxola.

45Mitetpe ja tej xjal Smaꞌn tuꞌn Dios o tzul te cycꞌojlaꞌbetz xjal, sino ja texin o tzul te ajbel cye xjal, tuyaxetzen cxeꞌl tkꞌoꞌnxin tchunkꞌlalxin te twiꞌ colbil nim xjal tuj tkꞌab il―tz̈i Jesús cye t-xnakꞌatz.

Jaj jun mos̈ Bartimeo tbi ul tnaabl twitz tuꞌn Jesús(Mt. 20:29-34; Lc. 18:35-43)

46Tbajtzen tkbaꞌn Jesús ke tyol, bix e tzyet tbexin cyuya t-xnakꞌatzxin juntl maj. Cwa cyponxin tuj tnom te Jericó. Te xsunxin ttxaꞌn tnom, bix oc lpe nim xjal tiꞌjxin. Cwa tpon canaxin tiꞌj junxin mos̈ kꞌuklcꞌa tuj be, kanl tcotz cye xjal. Bartimeo tbi jxin mos̈, tcwal junxin xjal Timoteo tbi.

47Tej tzunj tbinte mos̈ jxin xjal tzajnin taꞌxin ja Jesús aj Nazaret, bix akꞌxin s̈-il:

—¡Jesús, jay Tcwal David, kꞌantz tcꞌuꞌja wiꞌj!―tz̈i mos̈.

48Nimtl xjal oc ilente mos̈ tuꞌn miꞌn tzꞌel twiꞌ. Pero mas el ts̈iꞌnxin twiꞌxin, bix e xiꞌ tkbaꞌnxin juntl maj:

—¡Tcwal David, kꞌantz tcꞌuꞌja wiꞌja!―tz̈i tzunxin.

49Bix e cub weꞌ Jesús, bix e xiꞌ tkbaꞌnxin cye xjal:

—Cytxcontz jmos̈a―tz̈i Jesús.

Bix e tzaj cytxcoꞌn xjal jaxin:

—¡Nimx tcꞌuꞌja! ¡Weꞌwey! Luy ntxquet tuꞌn Jesús―tz̈i ke xjal.

50Tbintetzen mos̈, bix ex t-xooꞌnxin ttxowꞌxin toc, bix e jaw tꞌicypajxin, bix e xiꞌ lkꞌexin tiꞌ Jesús.

51Bix e xiꞌ tkanen Jesús te mos̈:

—¿Ti jilel taja tzꞌoc nbinche tiꞌja?―tz̈i Jesús.

Bix aj ttzakꞌbeꞌn mos̈ te Jesús:

—Xnakꞌtzal, waj chin cyeꞌyen juntl maj―tz̈i tzunxin te Jesús.

52Bix e xiꞌ tkbaꞌn Jesús texin:

—Baꞌn taja. Tuꞌn cykil tcꞌuꞌja ma tzula tnaabla―tz̈i Jesús.

Tujx naj tul tnaabl tbakꞌ twitzxin, bix akꞌ xeꞌl lpexin tiꞌ Jesús tuj be.