APOCALIPSIS 1 - Mam of Todos Santos -- Guatemala Unicode

Jun tumel e tzaj tyeecꞌan Cristo te apóstol Juan

1Jntzꞌiꞌben tuj ja uꞌj lu, jatzen tumelj e xiꞌ tkꞌoꞌn Dios te Jesucristo tiꞌj ti pjel laꞌ alcye jun kꞌij, tuꞌntzen t-xiꞌ tyeecꞌanxin cye t-akꞌanalxin twitz txꞌotxꞌ. Bix e tzaj tsmaꞌn Jesucristo jun tsanjelxin tuj cyaꞌj tuꞌn ttzaj tyeecꞌan ja tumel lu weya, inayena, t-akꞌanalxin Juan.

2Bix ma cub ntzꞌiꞌbena cykilca ma wila twitz ja t-xak uꞌj lu. Ntzkiꞌna jaxxix jtyol Dios lu, cuma e tzaj tkꞌumen Jesucristo weya.

3At t-xtalbil Dios cyibaj kej xjal njaw cys̈iꞌn ja tyol Dios lu tiꞌj ti pjel, bix at t-xtalbil Dios cyibaj kej xjal nchi bin oj ns̈-ij bix jax nxiꞌ cyniman jntzꞌiꞌben, cuma tzajne ttzaj lkꞌe jkꞌij tuꞌn tjapan baj cykilcaj tyol Dios.

Jun kꞌolbebl cye wuuk cloj ocslal at tuj tnom te departamento te Asia

4Inayena, Juan, nxiꞌ ntzꞌiꞌbena j-uꞌj lu te cyey ocslal eteꞌy tuj wuuk tnom te departamento te Asia. Tzajxit t-xtalbil Dios cyibaja, bix chi tenxita tuj ttz̈yal tuꞌnxin. Jaxin at nejl bix at jaꞌlewe bix tzul. Bix chi tenxita tuj ttz̈yal kꞌoꞌn cyuꞌn wuuk espíritu cycub twitz tkꞌukbil Dios jaaꞌ ncawena,

5bix kꞌoꞌn tuꞌn Jesucristo, tej xjal baꞌn n-oc ke kcꞌuꞌj tiꞌj tyolxin, bix jaxin tneel xjal o jatz itzꞌj tuj cyamecy te junx maj, bix cawel tibaj cykilca rey twitz txꞌotxꞌ.

Cjawel knimsaꞌn Jesucristo, cuma n-oc kakꞌ texin, bix ma ko tzakpet tuꞌnxin tuj kil tuꞌnj ttz̈qꞌuelxin el tz̈itj tej tcyimxin,

6bix ma takꞌxin ke tuꞌn kcawen tuyaxin bix tuꞌn kajben te Dios, Tmanxin. Tuꞌnxit tnimset-xin bix tuꞌn tcawenxin tibaj cykilca te junx maj. Juꞌxit ttena.

7Jeyꞌ, tzulxin tuj muj. Cykilca xjal twitz txꞌotxꞌ cꞌoquel cycyeꞌyen jaxin, cyuyax kej xjal e cub byonte texin. Bix cykilca xjal twitz txꞌotxꞌ chi ookꞌel oj tul meltzꞌajxin. Juꞌxit ttena.

8Tzin tkbaꞌn Kaaw Kman Dios cyjulu: “Inayena tneel bix mancꞌbil. Inayena at nejl bix at jaꞌlewe bix chin temelxwe te junx maj. At cykilca wipemala,” tz̈i Kman Dios.

E cub tyeecꞌan Cristo tiib twitz Juan tisen tuj jun witziyꞌ

9Yal weya, inayena Juan, jun ocslal kena tisen ejeeꞌy, bix ma tziyꞌx nimcꞌa qꞌuixcꞌaj wuꞌna tisex cyey. Junx ko cawel cyuyey tuj tcawbil Dios, bix junx niyꞌx kuꞌn tuꞌn tipemal Jesucristo.

In tena pres tuj jun chꞌin txꞌotxꞌ tmij mar. Patmos tbi txꞌotxꞌ. In ocxa pres tuꞌn tlaj e xiꞌ nkꞌumena tyol Dios bix jti e baj tiꞌj Jesús.

10At jun domingo e tzaj tkꞌoꞌn Dios tipemal weya tuꞌn toc ncyeꞌyena jyaaꞌn chicꞌaj cywitz xjal. E nbiꞌya tkꞌajkꞌajel tyol jun xjal wiꞌjxiya. E kꞌajt-xsen cyiw. Tisen xux twiꞌ.

11Bix e tzaj tkbaꞌn weya:

—Inayena tneel bix mancꞌbil. Tzꞌiꞌbecꞌax tuj uꞌj jcꞌoquel tcyeꞌyena, bix smanxa j-uꞌj lu cye ocslal eteꞌ tuj wuuk tnom te departamento te Asia: Efeso, Esmirna, Pérgamo, Tiatira, Sardis, Filadelfia, bix Laodicea―tz̈i Jesús.

12Bix aj ncyeꞌyena alj nyolen wuyena. Bix e wila wuuk cantil te oro.

13Cyxoltzen wuuk cantil, e wila jun xinak, jaj Smaꞌn tuꞌn Dios tuꞌn tten cyuya xjal. Toc t-xbalenxin jawnex cupeninx maa t-xeeꞌ tkenxin, bix toc jun ẍipbelte te oro ttziiꞌ t-xuucꞌxin.

14Jtwiꞌxin bix ttzmal twiꞌxin sakxsen tisen sak lant bix tisen skbaken. Bix ke tbakꞌ twitzxin nchi koptzꞌaj tisen tken kꞌakꞌ.

15Nkoptzꞌaj tkenxin tisen xcbil bronce oj n-ocx tuj kꞌakꞌ. Bix tkꞌajkꞌajel twiꞌxin tisen jun nimaꞌ oj n-etz wajtzꞌaj twitz xak.

16Bix tcub wuuk cheꞌw tuj tmankꞌabxin, bix tetz jun machet caꞌba ttziiꞌ binne tten tuj ttzixin. Bix tcyeꞌnc twitzxin tisen tken kꞌij oj nkoptzꞌaj cyiw te chil kꞌij.

17Tej t-xiꞌ ncyeꞌyena jaxin, in cub tzꞌaka t-xeeꞌ tkenxin tisencꞌa cyimne in oca. Bix e cub tkꞌoꞌnxin tmankꞌabxin wibaja, bix e tzaj tkbaꞌnxin weya:

—Miꞌn tzaj ntz̈iya tiꞌja, cuma inayena jxjal tneel bix jxjal mancꞌbil.

18Iꞌtz kena te junx maj. In cyima, pero o chin jatz itzꞌja te junx maj. Bix inayena nchin cawena tibaj cyamecy bix tibaj cynajbil cyimne.

19Juꞌ tzunj, tzꞌiꞌbencꞌa jma tila, j-at jaꞌlewe, bix jpjel mas yaj.

20Yaltzen cyiꞌj wuuk cheꞌw xiꞌ tcyeꞌyena tuj nmankꞌaba bix kej wuuk cantil te oro, cxeꞌl nkbaꞌna tey ti japenina. Kej wuuk cheꞌw, jatzen japenina kej wuuk tneel xjal cyxol ocslal eteꞌ tuj wuuk tnom. Bix kej wuuk cantil, jatzen japenina kej ocslal eteꞌ tuj wuuk tnom―tz̈i Jesús weya.