ROMANOS 11 - Mam of Todos Santos -- Guatemala Unicode

Alcye kej chi cletel cyxol aj Israel

1Amale elet cyxooꞌn ke t-xjal Dios j-e tkba Dios, ¿pero opa tzꞌel t-xooꞌn Dios ejeeꞌ? Min. Inayena jun tumel min o tzꞌel t-xooꞌnxin cykilca, cuma jun aj Israel ken weya, pero min o tzꞌel t-xooꞌnxin inayena. T-xeꞌchel Abraham kena, bix te Benjamín kena.

2Kej xjal o chi oc te t-xjal Dios, ejeeꞌj ya ttzkiꞌntlxin jatxe tuj tneel at tuꞌn cyoc te t-xjalxin, min o tzꞌel t-xooꞌnxin. Tuj cykil tyem at juun xjal e xiꞌ lpeke tiꞌ Dios. ¿Mimpa cytzkiꞌna ti toc tuj tyol Dios tiꞌ Elías tej toc tkanbilxin twitz Dios cyiꞌ aj Israel?

3E xiꞌ tkbaꞌn Elías te Kaaw cyjulu: “Taat, o cub cybyoꞌn aj Israel cykilca ke tyolela. O cub cyxiten ke altar jaaꞌ e naꞌna koꞌya tbiy. Bix yal jaꞌlewe nuk inayena o chin cyaj itzꞌj cyuꞌn, bix nchi jyon wiꞌja tuꞌn ncuba,” tz̈i Elías.

4¿Pero ti e tzaj tkbaꞌn Kaaw texin? E tzaj tkbaꞌn cyjulu: “Yaaꞌn tjunala o cyaja, cuma at wuuk miltl xinak nchi naꞌn nbiꞌya, bix min o cub cychꞌecy twitzj sant Baal tbi te cynaabl Dios,” tz̈i Kaaw te Elías.

5Bix jax juꞌx jaꞌlewe. At juun xjal cyxol aj Israel jaꞌlewe o chi oc te t-xjal Dios. Bix o chi oc te t-xjalxin nuk tuꞌnj o tzaj tkꞌoꞌnxin t-xtalbilxin cye.

6Cuma t-xjal Dios koꞌ tuꞌnj t-xtalbil Dios, mlaytzen txiꞌ kkbaꞌn t-xjal Dios koꞌ tuꞌnj baꞌn o bint kuꞌn. Ka tuꞌnj baꞌn o bint kuꞌn, yaaꞌntltzen tuꞌnj t-xtalbil Dios.

7Juꞌ tzunj, ¿ti qꞌuelela kniyꞌ tiꞌj? Qꞌuelel kniyꞌ tiꞌj kej aj Israel n-oc cyipen tuꞌn cyoc jiquen twitz Dios, pero min o chi caman tuꞌn cyoc jiquen twitzxin. Pero kej cyxol aj Israel o tzꞌoc ke cycꞌuꞌj tiꞌ Dios, te cye o kꞌoj tuꞌn cyoc jiquen twitzxin. Yaltzen niyꞌtlkej, cycyꞌi e xiꞌ cyniman Dios,

8tisen tzin tkbaꞌn tuj tyol Dios: “E cyaj tkꞌoꞌn Dios ejeeꞌ tuꞌn cyten tuya jun cyanem cyimne, bix tuya jun cynaabl mintiiꞌ n-ocx tuj, tisencꞌa min tzꞌex tuj cywiꞌ. Juꞌ cyten nejl, bix juꞌx cyten jaꞌlewe,” tz̈i tyol Dios.

9Ejeeꞌ tzunja tisenj e tkba David. Tz̈i David cyiꞌj aj Israel cyjulu: “Jcykꞌinemal cꞌoquel te tzyul cye nuk tuꞌn t-xiꞌ tiiꞌn ejeeꞌ tuj il. Jatzen cycastiwaj.

10Chi cyjel tuj klolj tuꞌn miꞌn tzꞌel cyniyꞌ tiꞌj. Bix cyil cbinelxsen tisen jun cyiketz mlay chi jaw tjakꞌ,” tz̈i David tuj tyol Dios.

Jun colbil cye xjal yaaꞌn judío

11N-eltzen kniyꞌ tiꞌj o tzꞌel cyxooꞌn aj Israel ja Cristo. Pero cxeꞌl nkanena cyey, ¿qꞌuelelpa cyxooꞌn mas yaj? Min, yaaꞌn te junx maj o tzꞌel cyxooꞌn. Pero tej tel cyxooꞌn ja Cristo nejl, ja tzunja cyil otzen tzꞌajben tuꞌn cyclet kej xjal yaaꞌn Israel. Bix ja lu cꞌajbel cye aj Israel, cuma oj cylonte tkꞌaꞌ Dios te cyekej yaaꞌn Israel tuꞌn cyclet, cꞌoqueltzen lochꞌ cycꞌuꞌj tiꞌj tuꞌntzen ejeeꞌn tuꞌn cyclet.

12Cuma o tzꞌajben te cyej xjal yaaꞌn judío tuꞌn tkꞌoj xtalbil cye tuꞌnj tel-len cyxooꞌn aj Israel ja Cristo, bix cuma o tzꞌajben te cyej xjal yaaꞌn judío tuꞌn cyiikꞌente jun baꞌn tuꞌnj tel-len cyiiqꞌuen aj judío jxtalbil e takꞌ Dios, ¿yaaꞌmpatzele jax nimxsen mastl xtalbil ccyiikꞌel kej yaaꞌn judío oj tul jkꞌij tuꞌn cyocslan kej xjal judío tiꞌ Cristo?

13Key xjal yaaꞌn judío, il tiꞌj qꞌuelel cyniꞌya tiꞌj tuꞌnj oj cyocslan ntanema tiꞌ Cristo, cꞌajbeltzen waakꞌena tuj nwitza. Amale smaꞌnt kena tuꞌn Cristo tuꞌn nkꞌumena tpocbalxin te cyej xjal yaaꞌn judío,

14waja tuꞌn tajben waakꞌena cye ntanema. Waja tuꞌn toc cycyeꞌyen kej xjal judío jxtalbil e kꞌoj cye tuj tneel pero tuꞌn tel-len cyiiqꞌuen, o kꞌoj te cyej yaaꞌn judío, tuꞌntzen tel cycꞌuꞌj tiꞌj ja xtalbil lu te cyex, tuꞌntzen cyclet.

15Bix ka ma chi clet ke ntanema, ¿cꞌajbelpa loj lu te cyej xjal yaaꞌn judío? Oc. Cuma o tzꞌajben te cyej yaaꞌn judío tuꞌn cyoc tuj ttz̈yal tuya Dios tiꞌj tel-len cyiiqꞌuen ke judío tiꞌ Cristo, juꞌ tzunj mas cꞌajbel te cyej yaaꞌn judío ka ma chi ocslan kej judío tiꞌ Cristo, cuma chi jawetz itzꞌj tuj cyamecy.

16Kej xjal judío t-xjal Dioske tuj tneel. ¿Bix juꞌxpele chi pomela baja? Cxeꞌl nkbaꞌna cyey jun tumel. Ka at jun cluj ttxꞌotxꞌel pan, bixsen qꞌuelel piẍet jun tkiyꞌ te niyꞌbebl, ka baꞌn jqꞌuelel piẍet, qꞌueleltzen kniyꞌ tiꞌj baꞌn entera pan, cuma junx ttxꞌotxꞌel. Jax juꞌx jun tzeeꞌ. Ka baꞌn tloqꞌuel, jax baꞌn ke tkꞌab, cuma jax tzeeꞌ.

17Jaꞌlewe, nim judío yaaꞌn t-xjal Dios. Ejeeꞌtzen tisen cab tkꞌab jun wik tzeeꞌ olivo tbi min e cyakꞌ cywitz. Juꞌtzen eꞌla txꞌometke tiꞌ tzeeꞌ. Ejeeꞌtltzen cyey ocslal yaaꞌn judío tisen tkꞌab juntl wik tzeeꞌ o chi oc wiꞌt tiꞌ tken olivo. Ya junx elninakey cyuya t-xjal Dios, bix o kꞌoj cyey jax xtalbil, tisex kej tkꞌab o chi oc wiꞌt junx ncyiikꞌen cyipemal tuꞌn junx cyloqꞌuel.

18Pero amale ot chi oca t-xjal Dios, miꞌn cub cybisena ejeeꞌy mas baꞌn cywitz judío. Ka cyaja ncub cybisena mas baꞌnkey, qꞌuelel cyniꞌya tiꞌj nuk tkꞌabkey, bix yaaꞌn tkꞌab ntz̈ꞌis̈ente tlocꞌ, sino ja tlocꞌ ntz̈ꞌis̈ente ke tkꞌab.

19Kape at juun cyey cxeꞌl cykbaꞌna cyjulu: “Ejooꞌya xjal yaaꞌn judío mas nintzaj cywitzj judío, cuma kej judío o chi el txꞌomet tuꞌn koctlke te cyxel,” tz̈ikey.

20Jax cyuꞌna el txꞌomet ke judío, pero nuk tuꞌn min oc ke cycꞌuꞌj tiꞌ Cristo. Bix ke cyey o chi oca te tajlal nuk tuꞌnj cyocslabla tiꞌ Cristo. Juꞌ tzunj miꞌn cub cybisena mas nintzajkey, sino cꞌoquel cycꞌuꞌja tiꞌj ti e baj cye judío.

21Cuma el ttxꞌoman Dios kej mero t-xjal tej min e cybi tyolxin, juꞌ tzunj cyey, qꞌuelel ttxꞌomanxin ejeeꞌy ka min ma cybiy tyolxin.

22Juꞌ tzunj, il tiꞌj qꞌuelel cyniꞌya tiꞌj tzin tkꞌoꞌn Dios xtalbil, pero jax juꞌx tzin tkꞌoꞌn Dios castiwa. E takꞌxin castiwa cyej judío e cub tzꞌak tuj il, pero te cyey e takꞌxin t-xtalbilxin cyey. Bix tkꞌaꞌxxin t-xtalbilxin cyey ka min ma cyaj cycyeꞌyena cyocslabla tiꞌ Cristo. Pero ka ma cyaj cyxooꞌna cyocslabla tiꞌ Cristo, Diostzen qꞌuelel txꞌomente cyey, tisen tej tel ttxꞌomentexin ke judío.

23Yaltzen ke judío, ka ma tzul tuj cycꞌuꞌj bix ka ma tzꞌoc ke cycꞌuꞌj tiꞌ Cristo, chi oqueltzen te t-xjal Dios juntl maj, tisentzen o tzꞌel txꞌomet tkꞌab tzeeꞌ bix cꞌoquel juntl maj, cuma baꞌn tbint jlu tuꞌn Dios.

24Tej cyoca t-xjal Dios, ejeeꞌ tzuna tisentzen oj toc wiꞌt juntl wik ttzeꞌyel loꞌpj tiꞌ tken olivo, cyiw tuꞌn tbint. Cuma baꞌn tuꞌn tbint tuꞌn Dios juꞌwa, yaaꞌntzen nim t-xiꞌlen tuꞌn tbint tuꞌnxin tuꞌn cyoc judío te t-xjalxin juntl maj, cuma ejeeꞌ tisen mero tken olivo tuj tneel, yaaꞌn tisen juntl wik tzeeꞌ tisen ejeeꞌy.

Kej xjal aj Israel chi oquel te t-xjal Dios juntl maj

25Key hermano, cxeꞌl nkbaꞌna jun tumel cyey min el cyniꞌya tiꞌj nejl. Pero jaꞌlewe waja tuꞌn tel cyniꞌya tiꞌj, tuꞌntzen miꞌn cub cybisena mas jawnexkey cywitz aj Israel. Kej aj Israel chi oquel te t-xjal Dios juntl maj laꞌ alcye jun kꞌij. Qꞌuelel cyxooꞌn ti taj Dios hasta ojxe cykilcaj xjal yaaꞌn aj Israel at tuꞌn cyoc te t-xjal Dios otk chi oc.

26Ojtzen tpon tumel alcyej kꞌij, cykilcatzen aj Israel chi cletel. Ntzaj tkbaꞌn tyol Dios cyjulu: “Jclol cye xjal tzul tzalu te tnom te Dios, Sión tbi, bix qꞌuelel tiiꞌn cyil ke tiyꞌjil Jacob,” tz̈i tyol Dios.

27Bix jax juꞌx tzin tkbaꞌn Dios tuj tyol cyjulu: “At jun ntrata cyuya aj Israel tuꞌn cyoc te ntanema, bix oj tel wiiꞌna cyil, otktzen nnimana ntrata cyuya,” tz̈i Dios.

28Kej judío o tzꞌel cyxooꞌn tpocbal Clol cye, bix juꞌ tzunj aj kꞌojke tiꞌ Dios tuj twitz Dios. Tuꞌnj tel-len cyxooꞌn tyol Dios, o kꞌoj te cyey yaaꞌn judío tuꞌn cyoca te t-xjal Dios. Pero tuj tneel e tsicyꞌ Dios kej judío tuꞌn cyoc te t-xjal. E cyaj tkꞌoꞌnxin tyolxin cyuya ke cyxeꞌchel tuꞌn cyoc cyiyꞌjil te t-xjal Dios. Juꞌ tzunj chi oqueltzen te t-xjalxin n-oc cyakꞌ texin.

29E cyaj tkꞌoꞌnxin tyolxin at tuꞌn tkꞌontexin t-xtalbilxin cye, bix at tuꞌn cyoc te t-xjalxin, bix ktzkiꞌn cjapanelxin tiꞌ tyolxin.

30Pjel cyiꞌj judío tisenj e baj cyiꞌja ejeeꞌy yaaꞌn judío. Nejl min e cynimana Dios. Pero tej tel cyxooꞌn kej judío t-xtalbil Dios, bixsen oc toyenxin te cyey, bix e cyiikꞌa.

31Jax juꞌx min cynima kej judío Dios jaꞌlewe, pero tzul lastim cye tuꞌn Dios, tisenxj ul lastim cyey tuꞌnxin.

32O tyeecꞌa Dios cykilca xjal, judíole, yaaꞌnle judío, o tzꞌel cyxooꞌn tyolxin, tuꞌntzen toc toyenxin najsbil cyil te cykilca, cuma cykilca at cyil.

33Tuꞌn tzunj tbajlen tnincꞌuꞌn Dios, ¡jawnexsen te junx maj jtilbil Dios o txiꞌ tyeecꞌan! ¡Nimxsen tumel at tuyaxin! Min cnet tuꞌn tel kniyꞌ tiꞌj cykilcaj o baj tnincꞌuꞌnxin tuꞌn tbint, bix mi nuket jun xjal at tumel tuya tiꞌj ti tten tuꞌn nbint tuꞌnxin.

34Ja lu tisen tzin tkbaꞌn tyol Dios. Tz̈i cyjulu: “¿Atpa jun xjal n-el tniyꞌ tiꞌj tnaabl Dios? Min-al. ¿Atpa jun xjal baꞌn tuꞌn t-xiꞌ tkꞌumen te Dios alcyej baꞌn tuꞌn tbint? Min-al.

35¿Atpa jun xjal cꞌasbenel Dios twitz? Min-al,” tz̈i tyol Dios.

36Ja te Dios binchalte cykilca at. Jaxin ncawen tibaj cykilca nbaj, bix cykilca at te tajbel texin. ¡Jawxittzen nimset tbixin te junx maj! Juꞌxit tzuna.