SAN MARCOS 4 - Mam of Todos Santos -- Guatemala Unicode

Jun techel tiꞌj jun awal(Mt. 13:1-23; Lc. 8:4-15)

1Te juntl maj, bix akꞌ Jesús xnakꞌtzal xjal ttziiꞌ tnijabel aꞌ juntl maj. Tjawxse chmet xjal, bix e cuꞌx Jesús tuj jun choc tibaj aꞌ, bix e cub kexin tuj choc, nchi cyaj bajtltzen xjal ttziiꞌ aꞌ.

2Entonces bixse akꞌ Jesús xnakꞌtzal xjal, tuya jun tumel tiꞌ awal. Tujtzen t-xnakꞌatz Jesús e xaꞌ tkbaꞌn cyjulu:

3—Cyabintz ja lu: At junxin awal ex te awal triwa.

4Takꞌ tzunxin awal, at cab iyaj e cub tz̈itj tuj be. Bix e pontl ke chꞌit njaw cywaaꞌntljil.

5Cabtl twitz iyaj e cyaj tzꞌak twitz pcꞌat txꞌotxꞌ. Bix e jatz pokꞌch te iyaj, cuma yaaꞌn nim t-xeeꞌ txꞌotxꞌ.

6Tuꞌntzen tcykal kꞌij, bix oc wochꞌpaj, tejxe ttzkij, cuma yaaꞌn nim tlocꞌ otk txiꞌ tuj txꞌotxꞌ.

7At cabtl twitz iyaj e cyaj tzꞌak tuj tikꞌch chꞌiꞌxel. Pero nuk e jaw ẍqꞌuililin tjakꞌ chꞌiꞌx, tejxe tetz cyim. Mintiiꞌ twitz e takꞌ.

8Pero at cabtl twitz iyaj e cyaj tzꞌak tuj tbanel txꞌotxꞌ, bix e jaw tz̈ꞌiy, bix e takꞌ nim twitz. At juun tken e takꞌ winaklajaj twitz. At cabtl e takꞌ oxcꞌal twitz. Bix at cabtl tken e takꞌ jun mutxꞌ tuya winkꞌan twitz, bix ma syent―tz̈i Jesús cye xjal.

9Bix e xiꞌ tkbaꞌn Jesús:

—Cyjkom cyẍquina. Katzen cyaja tzꞌel cyniꞌya tiꞌj yol lu, cyxiꞌmaxsen tiꞌj―tz̈i Jesús.

10Tcyajtzen Jesús tjunal cyuya t-xnakꞌatz bix cabtl xjal, bix e xiꞌ cykanen te Jesús ti elpenina jyol otk tkba Jesús.

11Bix aj ttzakꞌbeꞌn Jesús:

—Mintiiꞌ tumel cyuya xjal ti tten tjawlel ttz̈ꞌis̈en Dios tcawbil. Yaltzen cyey, ejeeꞌy nxnakꞌatz, matzen txiꞌ tkꞌoꞌn Dios cyey tuꞌn tel cyniꞌya tiꞌj ti tten bix ti ctemela tcawbil Dios twitz txꞌotxꞌ. Yaltzen cyej xjal min tzꞌoc cybiꞌn nyol, nchi oc nxnakꞌtzaꞌnwe, pero yaaꞌnxix tuj jiquen yol.

12Nchin xnakꞌtzantzenwe juꞌwa tuꞌntzen tchicꞌajax ti elpenina jtyol kiyꞌjil Isaías tej t-xiꞌ tkbaꞌnxin cyjulu: “Cuma amale n-oquet cycyeꞌyen, pero minteyꞌ n-akꞌ cywitz tiꞌj. Bix seya n-oc cybiꞌn, pero minteyꞌ n-el cyniyꞌ tiꞌj. Nuket el cyniyꞌ tiꞌj, otle chi meltzꞌaj tuya Dios bix otle najset cyil,” tz̈i Isaías.

13Yajtzen cykanbila tiꞌj weya nyol, ¡jayaxittzen min tzꞌel cyniꞌya tiꞌj! Kane min tzꞌel cyniꞌya tiꞌj ja lu, jeyꞌ, ¿tine cyseꞌy tuꞌn tel cyniꞌya tiꞌj cabtl cyiw tpocbal tzul?

14Konkbaꞌxne cyey ti elpenina jyola. Jxjal awal jatzen xjalj nkban tyol Dios.

15Ja tzunj iyaj cwel tzꞌak tuj be, ja tzunja tisej nbajte tyol Dios tuj cyanem jun wik xjalja. Ejeeꞌtzen xjalja n-oc e binte tyol Dios, bix n-el tiiꞌntl naj biman tuj cycꞌuꞌj.

16Ja tzun kej awal cjawel itzꞌj tuj pcꞌat txꞌotxꞌ, jatzen juntl wik xjalja. Ejeeꞌtzen xjalja n-oc e binte tyol Dios, bix n-oc juch cycꞌuꞌj tiꞌj.

17Pero yaaꞌn cyiw cycꞌuꞌj, tisen yaaꞌn nim tlocꞌ iyaj tuj txꞌotxꞌ. Juꞌ tzunj min cypa. Ka ti ilel ma tzaj cyiꞌj tuꞌn tyol Dios, ya mintltzen tzꞌoc juch tyol Dios tiꞌ cyanem xjal.

18Ja tzunj txꞌotxꞌ nim chꞌiꞌx twitz, jatzen juntl wik xjalja. N-oc e binte tyol Dios,

19pero nuk juꞌ naj cycꞌuꞌj tiꞌj ti jilel at twitz txꞌotxꞌ. Ja tzunj nuk juꞌ toc cyanem tiꞌj ti qꞌuelexa cykꞌij, kꞌakꞌ cycꞌuꞌj tiꞌ kꞌinemal, bix n-oc takꞌ twitz txꞌotxꞌ cye, ejeeꞌ tzunja kꞌeꞌlecx tibaj tyol Diosa. Ya mintzenteyꞌ n-oc juchtl cycꞌuꞌj xjal tiꞌ tyol Dios.

20Ja tzunj iyaj e cub tzꞌak tuj tbanel txꞌotxꞌ, ja tzunja tisen kej xjal n-oc cybiꞌn tyol Dios, tzin cyiikꞌ tyolxin, biꞌx n-oc ten tiꞌ cyanem. Ejeeꞌtzen xjalja tisenj awal tzin tkꞌoꞌn nim twitz, tisenj tspigayil triwa attzen tkꞌoꞌn winaklajaj twitz, at te oxcꞌal twitz, bix at te syent twitz―tz̈i Jesús cye t-xnakꞌatz.

Mintiiꞌ jun tuj ewjel mint jaw chicꞌajax(Lc. 8:16-18)

21Bix akꞌ Jesús xnakꞌtzal xjal tuj ewjel yol juntl maj:

—¿Jacꞌapatzen tzaj tiiꞌn jun xjal jun cantil tuꞌn tocx ewet tjakꞌ jun alma bix ma tjakꞌ wetbil? ¡Min! Sino cꞌoquex kꞌit ja cantila tunwen tuꞌn tcub ten txakel tujxix chicꞌaj. Oj mintknaꞌx tocx cantil tunwen, min chicꞌaj tikꞌch jilel tuj klolj. Pero ya oj tocpan cantil, cykilcaj min chicꞌajax tuj klolj, ya chicꞌajtltzen tuj tken cantil.

22Jaxse juꞌx weya. Jatzen cantilj weya jaxxix yol kꞌiꞌn wuꞌna. Ja nyola jaxxix yaaꞌn tuꞌn tcub ewet cyuꞌna, sino tuꞌn tkꞌumj.

23Al at tẍquin tiꞌ twiꞌ, cybimcꞌatzen―tz̈i Jesús.

24Bix e xiꞌ tkbaꞌn Jesús juntl yol cye t-xnakꞌatz bix cye cabtl xjal:

—Cykꞌoꞌnc cycꞌuꞌja tiꞌj cꞌoquel cybiꞌna, cuma laꞌ jniyꞌ chꞌin cyanema tiꞌ tyol Dios, ka nim, jax tzul tkꞌoꞌn Dios nim tkenal tyol cyuyey. Ka yaaꞌn nim cycꞌuꞌja tiꞌ tyol Dios, jax yaaꞌn nim tkenal tyolxin ctzaal cyuyey.

25Bix xsunkej n-ocxix cycꞌuꞌj tiꞌ tyol Dios, tzul tkꞌoꞌn Dios mas ttxolen tyol cyuya. Pero tzunkej min kꞌakꞌxix cycꞌuꞌj tiꞌ tyol Dios, hasta qꞌuelel baj tuj cycꞌuꞌj alcyej chꞌin otk bint cyuꞌn―tz̈i Jesús.

Jun techel tuꞌn ttz̈ꞌiy iyaj

26Bix e xiꞌ tkbaꞌn Jesús juntl wik yol cye xjal:

—Jte Dios tcawbil juꞌcꞌa tisen iyaj,

27tisen oj ncuꞌx awet twitz iyaj tuj txꞌotxꞌ tuꞌn jun xjal. Tiẍtetltzen te xjal baj te tiiꞌj, kale nwutan bix kale iꞌtz, pero te iyaj, ntz̈ꞌiyte tjunal tuꞌnx tipemal. Ntz̈ꞌiyte te kꞌijl bix te koniyan. Mintiiꞌ te xjal tumel tuya ti tten ntz̈ꞌiy awal.

28Nejl njatz itzꞌj tuj txꞌotxꞌ, bix njaw tz̈ꞌiy tken, bix mancꞌbiltzen n-akꞌ twitz.

29Yal ojtzen ntzkij, bixsen ntzyet tchmoj, cuma otk pon tumel tuꞌn tjtxꞌet. Tisex ttenj iyaj njaw tz̈ꞌiy tjunalx, ojxe tzin tkꞌoꞌn twitz, juꞌxse ttenj tcawbil Dios njaw tz̈ꞌiy tjunalx―tz̈i Jesús.

Jun techel tiꞌj iyaj te mostaza(Mt. 13:31-32; Lc. 13:18-19)

30Bix at juntl tyol Jesús:

—¿Titzen tten oj tel niyꞌ tiꞌj ti tten tcawbil Dios, bix ti tten oj ttz̈ꞌiy?

31Juꞌcꞌa tisen twitz jun wik itzaaj mostaza. Ja tzunj twitz mostaza jatzen jun iyaj mas xmutzꞌ twitz cykilca twitz tiyꞌjil itzaaj ncuꞌx cyawaꞌn xjal.

32Pero junxse maj ncuꞌx awet, njaw tz̈ꞌiy ojxe niyꞌ tibaj t-xaak. Maꞌ nimxse, bix at maj nchi ocx najan chꞌit tjakꞌ tlequemal―tz̈i Jesús te techlal ka nejl nuk cab xjal toclel tjakꞌ tcawbil Dios, yal mas yaj, mas nim xjal cꞌoquel.

Tej tkbante Jesús alcye cyajbelel ke techel(Mt. 13:34-35)

33Juꞌtzen tten t-xnakꞌtzan Jesús tuya tyol yaaꞌn tzinenxix, laꞌ jniyꞌ chꞌinxja yol el cyniyꞌ xjal tiꞌj.

34Min e t-xnakꞌtzaxin ke xjal tujxix tzinen, sino tuj ewjel chꞌin tyolxin. Pero yaltzen cye t-xnakꞌatzxin, e xiꞌtzen tkbaꞌnxin tej ya cyjunaltlxin ti tten juun yol min otk tzꞌel cyniyꞌ tiꞌj.

Tej tweꞌ cykꞌiꞌk tuꞌn Jesús(Mt. 8:23-27; Lc. 8:22-25)

35Tejtzen takꞌ cwel klolj texj kꞌij, bix e xiꞌ tkbaꞌn Jesús cye t-xnakꞌatz:

—Ko iyꞌx juntl jlajxe tnijabel aꞌ―tz̈i Jesús.

36Bix e cyaj cycyeꞌyenxin xjal ttziiꞌ aꞌ, bix iyꞌxkexin tuj choc jaaꞌ tcuꞌxa Jesús. Bix oc lpe juntl wik xjal cyiꞌjxin tuj juntl wik choc.

37Pero lwewa e cub pokꞌch naj jun jbal bix cykꞌiꞌk cyibajxin. Nimxse oc punntzꞌaj aꞌ tuꞌn cykꞌiꞌk tiꞌ choc. Bix ocx noj aꞌ tuj choc, tejxe takꞌ xeꞌl tjakꞌ aꞌ.

38Pero yaltzen te Jesús, otk tzul twatlxin nka ttziiꞌ tẍyoꞌp choc. Bix ocx cycꞌasen t-xnakꞌatzxin jaxin. Tz̈i tzunkexin cyjulu:

—¡Taat! ¿minmatiiꞌ toclena kiꞌj oj kxiꞌ baj tjakꞌ aꞌ?―tz̈ikexin te Jesús.

39Bix e jaw weꞌ Jesús, bix e xiꞌ tkbaꞌnxin te cykꞌiꞌk bix te tnijabel aꞌ:

—¡Cꞌol! ¡Weꞌ!―tz̈i Jesús.

Nweꞌtlte cykꞌiꞌk. Tzinexse e cyjaꞌ.

40Tejtzen tweꞌ cykꞌiꞌk, bix e xiꞌ tkbaꞌn Jesús cye t-xnakꞌatz:

—¿Tikentzen cutzen ttz̈i cyiꞌja? ¿Minaꞌxpatzen toc ke cycꞌuꞌja ka baꞌn cycleta tuꞌn Dios?―tz̈i Jesús cyexin.

41Pero otkxsen cub kojl ttz̈i cyiꞌjxin, bix akꞌkexin kanlecte tiyꞌ cyeylexxin:

—¿Altzen loj junxin xjal lu? Maj ma tbi aꞌ bix cykꞌiꞌk tyolxin―tz̈i ke t-xnakꞌatz Jesús.