LOS HECHOS 5 - Mam of Todos Santos -- Guatemala Unicode

Ananías tuya Safira

1Pero attzen junxin xjal min e cub tpaꞌnxin tikꞌch texin tuya cykil tcꞌuꞌjxin. Ananías tbixin, bixsen t-xuꞌlxin Safira tbixuj. Bixsen e xiꞌ cyqꞌueyenxin jun cytxꞌotxꞌxin cycaꞌbelxin.

2Bixsen e cub cyniqꞌuenxin tuya t-xuꞌlxin tuꞌn tcyaj cyiiꞌnxin jun tkiyꞌ tiꞌj twiꞌ cytxꞌotxꞌxin, bixsen e cub cyuꞌnxin tuꞌn t-xiꞌ cykbaꞌnxin cye t-xel Jesús ka cykil twiꞌ txꞌotxꞌ toclel cykꞌoꞌnxin cyexin. Entonces bixsen e xiꞌ Ananías kꞌolte tej jun tkiyꞌ twiꞌ txꞌotxꞌ, bix e xiꞌ tkꞌoꞌnxin cye t-xel Jesús.

3Pero bix e xiꞌ tkbaꞌn Pedro te Ananías:

—¿Tuꞌn tikentzen ncwaꞌ tcꞌuꞌn tey juntl tkiyꞌ twiꞌ jtxꞌotxꞌa te tey? Jma tzaj tkꞌoꞌna keya nuk tisencꞌa cykil twiꞌ txꞌotxꞌ ma tzaj tkꞌoꞌna keya. Yaltzen tey matzen ẍtakꞌena twitz Espíritu Santo. ¿Tuꞌn tiken ma tzꞌoca tbiꞌna ti jilel ma tzꞌoc tkꞌoꞌn taaw il Satanás tey?

4Mintiiꞌxix te il tiꞌj tuꞌn t-xiꞌ tqꞌueyena ttxꞌotxꞌa. Bix ka taja t-xiꞌ tqꞌueyena, ja tey taaw. Te tey, bixet t-xiꞌ tcꞌuꞌna cykil twiꞌ ttxꞌotxꞌa, cuma tey. ¿Pero tuꞌn tikentzen xcwaꞌ tbisena tiꞌj tuꞌn tcub tyajlaꞌna ejooꞌya cyjulu? Pero jaxxix min ma ẍtakꞌen tey twitz xjal, sino twitz Dios―tz̈i Pedro te Ananías.

5Tejtzen toc tbiꞌn Ananías kej yol juꞌwa, bix e cub tzꞌakxin cyimnetlxin twitz txꞌotxꞌ. Cykilxsen xjal oc ebinte ti otk baj te Ananías, bixsen oc ttz̈i cyiꞌ xjal.

6Yajcꞌatltzen bix ul cabkꞌa xjal tuya jun sábana, bix iyꞌx cymaksiꞌnkꞌa t-xumlal cyimne tuya, bix iyꞌ cyiiꞌnkꞌa te mukbil.

7Otktzen bint oxe hora tej tocpan jxuj Safira, t-xuꞌl jxin cyimne. Mintiiꞌ tumel tuyaxuj ti otk baj.

8Bix e xiꞌ tkanen Pedro texuj:

—Kbantz we, jpwak ma tzaj cykꞌoꞌna keya, ¿cykilpa twiꞌ jtxꞌotxꞌ ja lu?―tz̈i Pedro.

—Jaxte cykilte twiꞌ txꞌotxꞌ―tz̈i Safira.

9Entonces bix e xiꞌ tkbaꞌn Pedro:

—¿Titzen tten ma chi ẍtakꞌena twitz Dios? Yaltzen jaꞌlewe, ebin xsunj alj tzul beta. Lu tzajne tzaj nkayena ejeeꞌj kꞌa xjal ẍi cuꞌx mkunte tchmila. Bix juꞌx tey, ejeexkꞌa chi xeꞌl kꞌinte tey tuj mukbil―tz̈i Pedro texuj.

10Tzinxix nxiꞌ baj tkbante Pedro juꞌwa, tzin ncub tzꞌak Safira t-xeeꞌ tken Pedro cyimnentlxuj. Tejtzen cyocpan jkꞌa xjal, cyimnenxuj toc cycyeꞌyenkꞌa. Jax bix etz cyiiꞌnkꞌa jaxuj te mukbil, bix e cuꞌxxuj ttxlaj tchmilxuj.

11Cykil xsunj xjal te tja Dios, bix cykilkej ebin tej juꞌwa bix xsun kej oc cyeyente tcyamecy Ananías bixsen t-xuꞌlxin Safira tuꞌn cyẍtakꞌbil, nimxsen ttz̈i e cub cyiꞌj xjal.

Nimxsen techel bix tbanel e bintl cyuꞌn t-xel Jesús

12Nimxsen techlal bixsen kꞌanj ke xjal e bint cyuꞌn t-xel Jesús cyxol xjal. Bixsen ke cye ocslal jaca kꞌij nchi chmet tuj nintzaj tja Dios, twitz tpeꞌn tunwen Salomón tbi.

13Yal tzun kej xjal yaaꞌn ocslal, tej tcyim Ananías tuya Safira cywitz t-xel Jesús, bix e tzaj ttz̈i cyiꞌ xjal kej xin t-xel Jesús, pero nim oc cybiꞌn xjal ejeeꞌxin. Pero chebe akꞌke xjal ebil cyyolxin, bix oc ke xjal ocslal.

14Pero mixsen jtoo juꞌwa. Nimxsen xjal akꞌ ebilec tyol Jesús, xuujle, xinakle.

15Tuꞌntzen nim techlal e bint cyuꞌn t-xel Jesús, nimxsen tpocbal el, hasta etz cyiiꞌn xjal ke cyyaab tuj be twitz wetbil, twitz pop, tuꞌntzen oj tiyꞌ bet Pedro tuj be, amatzen nuk t-xlequemal Pedro tziyꞌ cyibaj yaab, tuꞌn tul cynaabl.

16Jax juꞌx cyuj nim tnom ttxlaj Jerusalén, nimxsen xjal ul Jerusalén, kꞌiꞌntzen ke yaab cyuꞌn, bix xsun kej otk tzꞌoc biman cyiꞌj. Cykilxsenke ul cynaabl.

Tej cyjaw tzyet Pedro tuya Juan

17Pero tejtzen toc cycyeꞌyen nimxsen xjal lepchec cyiꞌ t-xel Jesús, bixsen oc chiꞌl jxin tneel cawel cyibaj pala tuj nintzaj tja Dios, bix xsun kej xin at tuyaxin, bix kej xin saduceo.

18Tuꞌntzen tchiꞌlel cycꞌuꞌjxin bix ex cysmaꞌnxin tuꞌn cytzyet ke t-xel Jesús, bix ocxkexin tuj tzeeꞌ cywitz xjal.

19Pero tejtzen tcub klolj, bix e pon jun tsanjel Dios e tzaj tuj cyaꞌj, bix el tjkoꞌnxin tlemel tzeeꞌ, bix etzkexin, bixsen e xiꞌ tkbaꞌn tsanjel Dios cye t-xel Jesús:

20—Cyix cyxiꞌy. Cyocxsen tuj nintzaj tja Dios, bix miꞌn baj cycꞌuꞌja tuꞌn cykꞌumenxsen ti ttenj acꞌaj chunkꞌlal tuya Dios, bix ti elpenina―tz̈i tsanjel Dios.

21Tejtzen toc cybiꞌn t-xel Jesús, tetzen klaxcꞌa, bix ocxkexin tuj nintzaj tja Dios, bix akꞌkexin xnakꞌtzalec cye xjal.

Joocꞌtzen nbaj, tchmonte tneel pala tiib cyuya nintzaj consejo te niꞌcꞌul cyley tuj cyreligión judío tujx jjaaꞌ jaaꞌ n-oca cychmon cyiibxin. Bixsen e tzaj cytxcoꞌnxin kej xin nintzaj tij cyxol xjal judío. Tejtzen tbaj cychmon cyiibxin, bix e xiꞌ ikꞌbajkexin tuj tzeeꞌ tuꞌn cypon jxin t-xel Jesús cywitzxin.

22Entonces bixsen e xiꞌ ke cypolicía nintzaj xjal te kꞌil cyexin, pero tej cypon policía, min-altlkexin tuj tzeeꞌ. Bixsen ajtzkexin te kbalte cyuya pala cyuya consejo.

23Bix e xiꞌ cykbaꞌnxin cye cawel:

—Kej tlemel tzeeꞌ jaaꞌ eteꞌcxa kej pres jpuꞌnte, bix ke cꞌojlal nchi cꞌojlan cyexin peꞌn. Pero tejtzen tocx kjkoꞌna tzeeꞌ, min-altl tocx tunwen―tz̈itzen ke policía cye cawel.

24Tejtzen toc tbiꞌn jxin cawel cyibaj cꞌojlal tja Dios bixsen tneel pala, e jaw kleeꞌkexin, bix akꞌkexin kanlte te cyeeylexxin ti otk baj, bix ti tten oj tel tpocbal.

25Pero lwewa ul naj jun xjal bix ocx kbet cyexin:

—¡Cycyeꞌyentz! Kej xjal ocx cykꞌoꞌna tuj tzeeꞌ, lu ke nchi xnakꞌtzan jaꞌlecuwe tuj nintzaj tja Dios―tz̈i tzunj xjal cye ke cawel.

26Toctzen cybiꞌn xin jcawel cyibaj cꞌojlal tja Dios juꞌwa, ja tzunj xin cawel cyuya cabtl cꞌojlal bix e xiꞌkexin jaaꞌ eteꞌ t-xel Jesús, tuꞌntzen cytzaj kꞌiꞌnxin cywitz nintzaj cawel. Pero min ocxix tenke cꞌojlal yajlalte cyexin, cuma cytz̈i xjal cyiꞌ cꞌojlal.

27Tejtzen cyul kꞌiꞌnxin, bix e cub wabatkexin cywitz consejo. Bixsen e xiꞌ tkanen tneel pala cyexin:

28—Cyiw o txiꞌ kkbaꞌna cyey tuꞌn miꞌn chi yolena tiꞌ Jesús. ¿Pero titzen ma cybinchey? ¡Jun wikxitl ma cybinchey! Ma tzꞌex baj ttz̈itpuj tyol Jesús cyuꞌna tuj cykil Jerusalén. Yaaꞌntzen oꞌcx ma tzꞌoca cyuꞌna, sino cyaj tzuna tzꞌoc cykꞌoꞌna te kiketzen cyimlen jxjal Jesús―tz̈itzen tneel pala cye t-xel Jesús.

29Pero bix aj ttzakꞌbeꞌn Pedro tuyaj cabtlxin t-xel Jesús:

—Mayꞌte, taat, ma bint ke kuꞌn ti jilel o cykbay keya. Pero keya te ke, ja tej tyol Dios mas il tiꞌj twitz cyyol xjal.

30Ja Dios, jaj xin Cydios kej xin ootxa kxeꞌchel, jatzen xinj e jatz itzꞌjsante Jesús tuj tcyamecy. Pero ejeeꞌtzen cyey xjal, ejeeꞌtzen cyey e binchante tuꞌn tcubxin, bix e cubxxin cyuꞌna twitz cruz tisen jun nuk yalx xjal byol.

31Pero tej xin Jesús oc cycyeꞌyena tisen jun byol, jatzente xjalj o jax tiiꞌn Dios tuj cyaꞌj. O cub kexin tuj tmankꞌab Dios, bix o tzꞌoc nim tajwalelxin tuꞌn Dios. O tzꞌocxin te mas nintzaj cawel cye xjal, bix coꞌpl xjal, tuꞌntzen baꞌn cycoꞌpj xjal te Israel tuj cyil. Bix ka ma chi etza tuj cyila, chi coꞌpjel cyey tuj cyila.

32Keya jaxxix ke kyol, bix baꞌn tuꞌn Espíritu Santo kyola, cuma laꞌ alj ma tzꞌoc ebinte tyol Dios, ntzaj tkꞌoꞌnte Dios Espíritu Santo te cycotz―tz̈itzen ke t-xel Jesús cye cawel.

33Tejtzen toc cybiꞌn ke cawel tuj consejo kej yola, bix e tzaj kꞌojlkexin nim. Tuꞌntzen tchiꞌlel cycꞌuꞌjxin cyajxin e cub cybyoꞌnxin ke t-xel Jesús.

34Pero cyxoltzen nintzaj consejo at jun tij xjal tej cloj fariseo, kej xin nimal tuj tley Moisés. Jxin xjal Gamaliel tbixin. Gamaliel txꞌolbal leyxin, bix ebiꞌn xsunxin cyuꞌn xjal. Ja tzunj xin Gamaliel bix e jaw weꞌxin cyxol ke tuyaxin, bix e xiꞌ tkanenxin tuꞌn tyolenxin. Bix e xiꞌ tkbaꞌnxin tuꞌn cyetz kꞌiꞌn t-xel Jesús jun tkiyꞌ tuꞌntzen miꞌn tzꞌoc cybiꞌnxin tiꞌ tyol Gamaliel.

35Entonces bixsen e xiꞌ tkbaꞌn Gamaliel cyej cabtlxin tuyaxin:

—Key te ntanem Israel, cxeꞌlxix cycyeꞌyena ti chi temeley cyuyaj xjal lu.

36Tzulcꞌaxna tuj cycꞌuꞌja ma bint cab tyem jxin Teudas ocxin te nintzaj xjal, bix oc meltzꞌajxin kꞌojlel tiꞌ gobierno tuya cyaja syent xjal. Pero cwax tbyet Teudas. Yal tzun kej oc lpe tiꞌj, bix el tz̈itjke, bix e baj twiꞌ.

37Juꞌx e baj tuyaj xin Judas tuj Galilea. Te tzun kej kꞌij tej njaw tumel tajlal xjal tuꞌn gobierno, bixsen oc kꞌojlkexin tiꞌ gobierno cyuya ke tuyaxin. Pero cwax tcubxin bix cykilca kej xjal oc lpe tiꞌjxin el tz̈itj.

38Chꞌinnchꞌetzen juꞌx pjel te ja lu. Juꞌ tzunj cxeꞌl nkbaꞌn cyey tuꞌn miꞌn chi cub cybyoꞌna, cuma ka yaaꞌn te Dios cyaakꞌen, ka nuk cyex, cykil pjel twiꞌ, tisen e baj cyej xjal ma txiꞌ nkbaꞌn cyey.

39Pero ka jax te Dios cyaakꞌen ncub bint, mlayx bint cyuꞌna tuꞌn tcub cybajsaꞌna. Cykꞌoꞌncxix cycꞌuꞌja tiꞌj miꞌn tzꞌoc cykꞌon cyiiba te kꞌojlel tiꞌ Dios―tz̈itzen Gamaliel cye ke nintzaj consejo te stis.

40Cykil xsunkexin oc ebin tej tyol Gamaliel. Entonces bixsen e tzaj cytxcoꞌnxin ke t-xel Jesús juntl maj, bixsen el kꞌiꞌnke cyiꞌjxin, bixsen e xiꞌ nim tzꞌuꞌn cyiꞌjxin. Bix juntl maj e xiꞌ kbet cyexin tuꞌn miꞌn chi yolenxin mas tiꞌj Jesús. Yajcꞌatltzen bix ex tzakpetkexin.

41Entonces bix etz ke t-xel Jesús cywitz nintzaj consejo te stis cyxol xjal judío. Axsen ttz̈yal cuma otk tcuya Dios tuꞌn tiyꞌx cawbil cyuꞌnxin nuk tiꞌjcꞌa Jesús. Baꞌnxsen eꞌla tuj cywitzxin.

42Bix min oc cybiꞌnxin cyyol cawel, sino jaca kꞌij iyꞌkexin ttziiꞌ cyja xjal, bixsen tuj nin tja Dios e kbankexin tiꞌj ti tten Jesús, jxin Scyꞌoꞌn tuꞌn Dios.