1 CORINTIOS 10 - Mam of Todos Santos -- Guatemala Unicode

Jun naabl tuꞌn miꞌn chi cub maje ke ocslal cywitz ke dios cyimne

1Key hermano, cycyeꞌyenc kej ootxa xjal wiyꞌjila te Israel el xeꞌtke tuꞌn Dios tuꞌn cyil. Ejeeꞌtzen xjalja e ten tjakꞌ t-xtalbil Dios. Dios e cub kꞌonte jun muj cyibajxin te cꞌojlal cyexin bix te kꞌilx cyexin tuj cybexin. Bix Dios e cub paꞌnte tej Cyak Mar tuꞌntzen cyiyꞌx kej xjal te Israel jlajxe.

2Bix oc cykꞌon cyiibxin tuꞌn cyxiꞌ lpexin tiꞌ Moisés, jxin otk takꞌ Dios te nenel.

3Bix Dios e tzaj kꞌonte cywaxin etz tz̈itj twitz cyaꞌj, bix cykilcakexin e xiꞌ waaꞌnte.

4Bix Dios e tzaj kꞌonte cycꞌaꞌxin etz itzꞌj tiꞌ jun xak, bix cykilcakexin e xiꞌ wecꞌante. Cxeꞌl nkꞌumena cyey tej xak etz aꞌ tuj, jatzen jun techel te te Cristo, cuma e ten tipemalxin cyuya xjal.

5Pero amale nimet e ten ke aj Israel tjakꞌ t-xtalbil Dios, pero chꞌixcꞌa yaaꞌn cykil xjal min el baꞌn twitz Dios, bix juꞌ tzunj min e ponkexin tuj txꞌotxꞌ otk tkba Dios, sino e cyimkexin tuj tzkij txꞌotxꞌ.

6Juꞌ tzunj, key hermano, nim cykꞌoꞌnc cycꞌuꞌja tiꞌj e baj nejl. Nim kaꞌ e cyajbe ke ootxa xjal wiyꞌjila, bix e xiꞌ tzpetkexin tuꞌn. Juꞌ tzunj cycꞌojlam cyiiba tuꞌn miꞌn chi eꞌla juꞌxa

7Miꞌn chi oc majey twitz sant, tisen e baj cye ke ootxa xjal wiyꞌjila. Tz̈i tyol Dios cyjulu: “Tneel e cub keke twitz cysant tisen wacẍ bix akꞌke waaꞌl bix wcꞌal, bix lwewa e jaw weꞌke bixel twitz cysant tisen wacẍ,” tz̈i tyol Dios.

8Bix miꞌn chi achena tuya pajbaj. Cꞌulel tuj cycꞌuꞌja ke ootxa xjal te Israel wiyꞌjila oc ipanke cyiꞌ kej xuuj te Moab tuj pajlel, bix juꞌ tzunj e tzaj tkꞌoj Dios bix e cyim winak ox mil aj Israel te junx kꞌij.

9Miꞌn tzꞌoc cycyakwusaꞌna Dios tuya nim cyila. Juꞌ e bint cyuꞌnj ootxa aj Israel, ¿bix ti e baj cye? Tuꞌn nimxsen nchi yaan, e tzaj tkꞌoj Dios cyiꞌj, bix oc tsmaꞌn Dios lbaj te txꞌaꞌleccye, bix nimxse xjal e cyim.

10Bix miꞌn nuk chi txololona tiꞌ Dios. Juꞌ e baj cye wiyꞌjila, bix e cyimke tuꞌn Dios tuꞌn t-ángel.

11Cykilj castiwa lu e baj cyiꞌj wiyꞌjila, amale nimet t-xtalbil Dios at cyibajxin. O cyaj tzꞌiꞌbet tuj tyol Dios te yecꞌbil te ke jaꞌlewe tuj mancꞌbil tyem, tuꞌntzen toc kcwent tiꞌj tuꞌntzen miꞌn ko tzpet.

12Juꞌ tzunj, alj cyey tuj cywitza mlay chi cub tzꞌaka tuj il, ¡kꞌoꞌnc cycꞌuꞌja tiꞌj!

13Nuk chꞌinnchꞌe oj cycub tzꞌaka tuꞌn niyꞌbebl cyiꞌja. Pero kej niyꞌbebl niyꞌ cyxola, cyxol cykilca ocslal niꞌya, yaaꞌn nuk cyxol ejeeꞌy ocslal tuj Corinto. Pero oj toc niyꞌbebl tiꞌ jun xjal, jatzen xjalja baꞌn tuꞌn toc ke tcꞌuꞌj tiꞌ Dios te onlte tuꞌn tweꞌ twitz niyꞌbebl. N-el tniyꞌ Dios tiꞌj, bix mlay takꞌ Dios tuꞌn toc niyꞌbebl tiꞌ jun xjal ka mlay tziyꞌx tuꞌn xjal oj toc niyꞌbebl tiꞌj. Oj toc niyꞌbebl tiꞌ jun xjal, Dios cꞌonlte, tuꞌntzen miꞌn cub tzꞌak tuj il.

14Entonces, key hermano, e xiꞌke wiyꞌjila tuj castiwa tuꞌn oc majeke cywitz sant. Juꞌ tzunj cyxomela sant.

15Ejeeꞌy xjal n-el cyey cyniyꞌ tiꞌj. Juꞌ tzunj cxeꞌl nkꞌumena jun tumel cyey. Cybisenx tiꞌj ka tumel nyola bix ka min.

16Oj t-xiꞌ kcꞌaꞌn santa cena te nabbil tetzlen ttz̈qꞌuel Cristo tuj t-xumlal, nko yeecꞌantzen at kmojbabl kiib tuyaxin. Juꞌx oj t-xiꞌ kwaaꞌn juun piẍ pan te nabbilte tcyimlen Cristo, nko yeecꞌantzen junx elnina koꞌ tiꞌ t-xumlalxin.

17Juꞌcꞌa japenina koꞌ tisenj pan te santa cena chꞌimacꞌa n-eꞌla. Amale nbaj piẍet pero junx pan, jax juꞌx ke. Amale nimet kbaj ocslal, pero junx elnina koꞌ. Jpan nbaj piẍet pero junx, jatzen jun techel junx elnina koꞌ tiꞌ Cristo.

18Junxitl techel cxeꞌl nkꞌumena cyey. Cyxol aj Israel nejl e cub cypaten ke pala alimaj te Dios twiꞌ altar, bix e xiꞌ cychyoꞌntlxin cychuꞌl alimaj. Tej t-xiꞌ cychyoꞌnxin juꞌwa, e xiꞌ cyyeecꞌanxin at cymojbabl cyiibxin tuya Dios.

19¿Titzen nxaꞌ nkbaꞌna jlu juꞌwa? Min tzin nkbaꞌna tecꞌaxit jchiꞌpj nxiꞌ oyet cye sant twitzj chiꞌpj min txiꞌ oyet, bix min tzin nkbaꞌna ejeeꞌt sant at cyipemal. Jnxiꞌ nkbaꞌna ja te il tiꞌj jaj jaaꞌ nxaꞌ kkꞌoꞌn kanem.

20Jnxiꞌ nkbaꞌna kej xjal yaaꞌn ocslal oj nxiꞌ cyoyen jun cyoybil te jun sant, yaaꞌn te Dios nxaꞌ cyoyen, sino cye biman nxaꞌ cyoyen. Juꞌ tzunj cykꞌoꞌnc cycꞌuꞌja tiꞌj tuꞌn miꞌn txiꞌ cychyoꞌna chiꞌpj oꞌyen cye sant, cuma ncyꞌiya tuꞌn cymojban cyiiba cyuya biman.

21Mlay tuꞌn tbaj cysmoꞌna cꞌaal cyanema tiꞌ Dios bix cꞌaal cyanema cyiꞌ biman, pero juꞌ tzin cyseꞌna ka nchi nimana santa cena bix ncheꞌxtla te nimal cywitz sant.

22Oj tcub kpaꞌn kanem tiꞌ Dios, tzultzen tkꞌoj Dios kiꞌj, bix mlay weꞌ tkꞌoj Dios kuꞌn, cuma at mas tipemalxin twitz ke kipemal. N-oc juch tcꞌuꞌj Dios kiꞌj, bix tajxin nuk tiꞌjxin cꞌoquela juch ke kcꞌuꞌj.

Cykil baꞌn tuꞌn tbint kuꞌn pero yaaꞌn cykilca najben

23Jax cyuꞌna cykil baꞌn tuꞌn tbint tuꞌn jun ocslal, pero nxiꞌ nkbaꞌna cyey yaaꞌn cykilca najben. Jacꞌa bint te alcye kaj, pero yaaꞌn cykilca jacꞌa tzꞌajben tuꞌn ktz̈ꞌiy tuj tyol Dios,

24bix yaaꞌn entera baꞌn te yecꞌbil te juntl. Cyxiꞌmex alcye jun baꞌn te juntl ocslal. Yaaꞌn nuk chi ximela tiꞌj alcye cyaja.

25Pero oj cypona te lokꞌol chiꞌpj tuj qꞌueybil chiꞌpj, mintiiꞌ il tiꞌj tuꞌn tbaj cykanena alcye chiꞌpj otk txꞌaj oybaj twitz sant. Ka mintiiꞌ tumel cyuyey ka oꞌyen chiꞌpj cye sant bix ka min, mintiiꞌ tuꞌn tbaj cycꞌuꞌja tiꞌj,

26cuma cykilca wikan chiꞌpj o tzaj tkꞌoꞌn Dios ke. Tz̈i tyol Dios cyjulu: “Entera twitz txꞌotxꞌ tuyax cykilca at twitz txꞌotxꞌ ntzaj tkꞌoꞌn Dios,” tz̈i tyol Dios.

27Katzen ma ttxoc jun xjal yaaꞌn ocslal ejeeꞌy te waaꞌl tuya, ka cyaja cheꞌxa, baꞌn tuꞌn cyxiꞌy, bix baꞌn tuꞌn t-xiꞌ cychyoꞌna laꞌ alcye chiꞌpj ctzaal kꞌoꞌn cyey. Miꞌn chi oca te kanlte ka otk txꞌaj oyet chiꞌpj twitz sant bix ka min.

28Pero ka ma tkꞌumen jun xjal te cyey, “Oꞌyen tej chiꞌpj lu cye sant,” ka tz̈i juꞌwa, miꞌn txiꞌ cychyoꞌna jchiꞌpj, tuꞌn miꞌn cybinchay jun il tuj twitzj xin nkꞌumente.

29Pero n-el kniyꞌ tiꞌj nuk te te texin il tuj twitzxin, yaaꞌn te cyey.

Pero cxeꞌl cykbaꞌna yaaꞌn tumel tuꞌn miꞌn txiꞌ cychyoꞌna chiꞌpj nuk tuꞌn tyol juntl,

30bix yaaꞌn tumel oj toc ten juntl xjal yolel cyiꞌja oj t-xiꞌ cytz̈iybeꞌna alcye ntzaj tkꞌoꞌn Dios cyey bix nxiꞌ cykꞌoꞌna chjonte te Dios tiꞌj.

31Jax cyuꞌna cykilca chiꞌpj baꞌn tuꞌn t-xiꞌ kchyoꞌn. Pero cxeꞌl nkbaꞌna cyey, amale baꞌnt tuꞌn t-xiꞌ kchyoꞌn cykilca, bix tuꞌn t-xiꞌ kcꞌaꞌn cykilca, bix tuꞌn t-xiꞌ kbinchaꞌn cykilca, mas il tiꞌj tuꞌn kajben te Dios twitzj tuꞌn tbint cykilca kuꞌn.

32Juꞌ tzunj miꞌn cub kyeecꞌan jun kbinchbil tuꞌn tcub tzꞌak juntl tuj il kuꞌn, mi nuk jun judío bix mi nuk jun yaaꞌn judío bix mi nuk jun ocslal.

33Juꞌ nbint wuꞌna. Tiꞌj cykilca nbint wuꞌna, nchin jyona tuꞌntzen wajbena te cykilca xjal. Mintiiꞌ nbint wuꞌna nuk jaj baꞌn te weya, sino jaj baꞌn te cykilca, tuꞌntzen cyclet.