APOCALIPSIS 9 - Mam of Todos Santos -- Guatemala Unicode

1Tejtzen toc t-xuxen jweꞌyan ángel, e wila jun ma tij cheꞌw otk tzaj tzꞌak tuj cyaꞌj bix e cuꞌx twitz txꞌotxꞌ. Bix e xiꞌ kꞌoꞌn tal jaaꞌ te tuꞌn tjket ttzi jul jaaꞌlen ponina baj t-xeeꞌ.

2Tej tjket ttzi jul jmintiiꞌ tumel t-xeeꞌ tuꞌn, e jatz sib tuj jul, tisen oj njatz sib tuj jun ma tij jorno. Bix oc klolj twitz kꞌij tuyax twitz cyaꞌj tuꞌnj sib e jatz tuj jul.

3Tujtzen sib etz nimjil cuchiꞌ. E xiꞌkejil twitz txꞌotxꞌ. E xiꞌ kꞌoꞌn cyejil cyoclenjil tuꞌn cytxꞌaꞌnjil, tisen ke jil siꞌcy at twitz txꞌotxꞌ.

4E xiꞌ kbet cyejil tuꞌn miꞌn tzꞌoc cytxꞌaꞌnjil tz̈ꞌim bix chaꞌx cꞌul bix tzeeꞌ at twitz txꞌotxꞌ. Nuk oꞌcx tuꞌn toc cytxꞌaꞌnjil cyiꞌ kej xjal mintiiꞌ techel Dios toc tibaj cywitz.

5Min e xiꞌ kꞌoꞌn cyejil tuꞌn cybyon xjal. Nuk oꞌcx tuꞌn toc qꞌuixcꞌaj cyiꞌ xjal tuj jweꞌ xjaw cyuꞌnjil. Bix jqꞌuixcꞌaj iyꞌx cyuꞌn xjal tisenj is̈jnin niyꞌx tuꞌn jun xjal oj n-oc ttxꞌaꞌn jun siꞌcy tiꞌj.

6Tuj ja tyem lu, cxeꞌl cycubsaꞌn xjal cywitz tuꞌn cycyim, pero mlay chi cyim. Tuya cykil cycꞌuꞌj chi oquel cyipen tuꞌn cycyim, pero mlayx chi cyim.

7Cycyeꞌnc cuchiꞌ tisenj ke tz̈ej binne cyten tuꞌn cyxiꞌ tuj kꞌoj. Bix tjax tuj cywiꞌjil tisencꞌa corona te oro. Bix cywitzjil tisen cywitz xinak.

8Jatzen ttzmal cywiꞌjil tisen ttzmal cywiꞌ xuuj, bix twitz cyejil tisen twitz cye león.

9Bix toc cyxbalenjil ttziiꞌ cyxuucꞌjil tisencꞌa ttxꞌotxꞌel xcbil. At cyxiicyꞌjil, bix tzinxsen rinininjil cyxiicyꞌjil tisen nchi rininin nimxsen carwaj noꞌn cyuꞌn tz̈ej nchi ajkelen tuj kꞌoj.

10At cyjeeꞌjil tisen cyjeeꞌ siꞌcy, tuꞌntzen toc cytxꞌaꞌnjil cyiꞌj xjal. At tipemal cyjeeꞌjil tuꞌn cyqꞌuixbisanjil cyiꞌ xjal tuj jweꞌ xjaw.

11At jun cycaweljil tuꞌn tcawen, jatzenj ángel ncawen tibaj jul mintiiꞌ tumel t-xeeꞌ. Tuj yol hebreo, Abadón tbi cawel, bix tuj yol griego, Apolyón tbi.

12Jtneel qꞌuixbisabl ma tziyꞌ. Pero at-x caꞌbatl qꞌuixbisabl chi ul tibajxe jlu.

13Tejtzen toc t-xuxen twukakan ángel, e xiꞌ nbiꞌna jun yol etz kꞌajtl cyxol kej cyaja cache eteꞌcꞌa twiꞌ altar te oro tcub twitz Dios.

14E xiꞌ tkbaꞌn te twukakan ángel kꞌiꞌn xux tuꞌn:

—Tzakpimela kej cyaja biman ẍpoꞌnke ttziiꞌ jnintzaj nimaꞌ Eufrates tbi―tz̈i.

15Bix el tzakpet kej cyaja biman, tuꞌntzen tcub cybyoꞌn toxen tkiyꞌ xjal, cuma nuk binne cyten tuꞌn cycyim toxen tkiyꞌ xjal cyuꞌn tej tpon j-hora bix jkꞌij bix jxjaw bix jjnabkꞌi.

16E xiꞌ cyiiꞌn nimxsen soldado tjax cyibaj tz̈ej. Jatzen cyajlal xinj soldado caꞌba syent millón. E nbiꞌya cyajlal.

17Tej ttzaj tyeecꞌan Dios weya ke tz̈ej cyuyax soldado tjax cyibaj, e wila cyjulu: Tilbil xcbil ttziiꞌ cyxuucꞌ soldado cyak tisen kꞌakꞌ bix chaꞌx bix kꞌent. Cywiꞌ tz̈ej tisen cywiꞌ león, bix tuj cytzi etz kꞌakꞌ tuyax sib tuyax azufre.

18Bix tuꞌnj kꞌakꞌ bix sib tuyax azufre etz tuj cytzijil, e baj cyim toxen tkiyꞌ xjal.

19At cyipemal tz̈ej tuj cytzijil tuꞌn cybyonjil xjal, pero jax juꞌx at cyipemal tuj cyjeeꞌjil. Cyjeeꞌjil tisen ke lbaj, bix at cywiꞌjil tiꞌj cyjeeꞌjil. Bix cyuꞌn tzunj luwe nchi qꞌuixbisanjil xjal.

20Pero amale e cyimet nim xjal, pero ke niyꞌtl xjal min e cub byetke cyuꞌn kej qꞌuixbisabl lu, min e cyaj cykꞌoꞌn tuꞌn mintl chi naꞌn cywitz biman. Cuc e naꞌn ke Dios cywitz biman bix ke sant te ttxꞌotxꞌel oro bix plata bix bronce bix xak bix tzeeꞌ, kej mlay chi cyeꞌyen bix mlay chi bin bix mlay chi bet.

21Bix min e cyaj cykꞌoꞌn tuꞌn mintet e byontl ke xjal bix tuꞌn cyxiꞌ lpe cyiꞌ chmambaj bix tuꞌn cyyas̈en bix tuꞌn cyalkꞌan.